Matayo 6
6
Mojɔ moBodongo
1Toma nganjamani bo otakɔni bilomu binu bibodongo a boso bobato bo banɛe no. Okakɔni boa, otasɔni nongo ndese ai Sangwa’nu yona odi a Diko.
2Oko boa, wɛ okakɔ monganji ai bato batongo, pɛ bohueja mo-ndule a boso bowɛ. Bato babokosea bakɔkɔ boa a sinagoge, na a licilinga, bo bato babakumejae. Mbi natɔndɔkɔ no na soti mɛnɛ bo bato bamina ba’si ndese yena ebwani na bu. 3Wɛ ko, okakɔ monganji, t’okine oko bo ebɔ ewɛ ebali ejebe mojɔ mokɔkɔ ebɔ ewɛ ebami. 4Kɔ bato monganji oko a libombi; na Sangwao yona onɛkɛ a libombi âda na likabo ai wɛ.
Bokoja a mojɔ moBo’nga
5Oka’ngani Njambe, t’odaeni oko na ekɔmɛli ebakosei. Ibo bapalaka bo bangɔe a sinagoge, na bo bamae a licilinga a mojɔ mobo’nga, bo bato babanɛe. 6Wɛ ko, oka’nga Njambe, kwea a tei endako ewɛ, dipa modipe mowɛ, na inga Njambe a libombi. Sangwao yona onekɛ a libombi âda na likabo ai wɛ. 7Yana angaka no, t’odaeni oko na bikenge binɛnɛ bingasangasa o akɔkɔ bapakano. Mojɔ bo, ibo badingaka bo Njambe adi bobahokea a mojɔ mobikenge bibu binɛnɛ. 8T’odaeni oko na ekɔmɛli ebu, mojɔ bo Sangwa’nu ajebaka taka enu oko omongakinini. 9Obwanini bonga Njambe na ekɔmɛli ye;
Sangwa’su yona odi a Diko;
Yɛ kombe ewɛ esumame;
10Yɛ Bokumu bowɛ bodoe;
Yɛ bolulea bowɛ bokɔɔme ya nase o akɔɔmɔkɔ bo a Diko.
11Bopa so busa bu milɛmbɛ mia mibwani.
12Boyɛ so nongo jisu ai wɛ o ayɛkɛ so baya badi na nongo ai so.
13Bambeja so a njea ebomeka.
Heleja so ko a bobe
Bokumu bodi ai wɛ, na ndangasa, na ekumu, oko na bosusu. Amen.
14Ino okayɛni bato jibe jibu, Sangwa’nu adi boyɛ no pongono. 15Ino ko omiti yɛni bato jibe jibu, Sangwa’nu atayɛ no jibe jinu.
16Yana adi na bikia, t’odaeni oko na wa a miso manu o ekɔmɛli ebakosei. Ibo bakinaka maso mabu mabehe, a boneja bato bo bakiaka dia. Mbi natɔndɔkɔ no soti bo ndese ebato bamina ebwani. 17Wɛ ko okakia, baka swe jiwɛ, na sosa boso bowɛ, bo bato batajeba nongo bo okiaka; 18aneja oko Sangwao yona odi a libombi, na Sangwao yona onɛkɛ a libombi âda na likabo ai wɛ.
Likonja liNase na Bokumu boDiko
19T’ohɛjeni oko leka loyumu lonɛnɛ a mojɔ monu bɛnɛ ya nase, mojɔ bo lobebaka ya na sɛ na bikpa, na babi babukaka ndako a bo’ba. 20Kinani leka lonu loyumu lohɛe oko oho Diko; lotabeha nongo na sɛ oho, na babi batalusa nongo a boba. 21Mojɔ bo, esika edi leka lowɛ loyumu, molema mowɛ mosambi oko ena.
22Diso didi paka emokuku. Isa diso diwɛ didi dipele, mokuku mowɛ mosusu modi a bohu. 23Diso diwɛ ko dikabeha, mokuku mowɛ mosusu modi oko a modidi. Oko boa, isa bohu bua bodi a tei ewɛ bodi oko modidi, modi modidi tuu.
24Moto t’ajebake bokɔmɛ baswa babae. Isa adi bolona okina, na âpala yona otongo; isa adi bocingama na okina, na âsɛtoja yona otongo. Otahɔnɔkɔni bokɔmɛ Njambe na makonja pongono.
25A mojɔ momina, mbi nabalaka na nu bo otakakwanani nongo a mojɔ momohelo monu, a mojɔ moboyaka na bomwaka na elwaeli enu. Na mohelo na mia, edi boso nde, te mohelo? Na mokuku na bisenja, edi boso nde, te nɔokuku? 26Anjani mbulu badiko; te banake gbie, te bajuake, te baboleake leka a ndako, Sangwa’nu ko yona odi oho Diko ababɔ kɔkɔ. Na no na mbulu, banɔi na bobuno nda, te no? 27Okina onu adi bakaeja masu mande mweka na mokakwano? Oko adi bokakwana a mojɔ mobisenja cina eye? 28Anjani bohohu bomanga maesika; te makɔke elomu; te mayoake bisenja. 29Mbi ko natɔndɔ kɔ no bo elwaeli eSɔlɔ mɔ a ekumu ende esusu, eibwana na elwaeli edikina danga diesika. 30Leka loesika lua lodi busa bu lodi botumbama puma; na isa Njambe alwajaka leka lomina, esingaiti no! Ino bato baejimeli ekɛkɛ! 31Yɛni boda na mokakwano; yɛni bobala bo, Êyaka so nde? Êrawaka so nde? 32Bapakano badukaka oko leka lomina, Sangwa’nu ko yona odi oho Diko ajebaka bo obwanini bosɔ leka lu losusu. 33Ino, peta dukani Bokumu boNjambe na bodongo bonde, nongo osɛni leka lu losusu pongono. 34Oko boa, t’okakwaneni oko a mojɔ mopuma. Kinani puma etombe muna mopuma. Monɔngɔ mobusa bu mobwani na busa bu.
Tällä hetkellä valittuna:
Matayo 6: NTNG61
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Alliance Biblique de la R. D. Congo
