MAFIYU 7

Faa‐vɛɛ ʋai è wɔɔ nu va ga laa woo

1Ziizɛ ɣɛni tea, “A mɛ lɛ faa vɛɛ nu va ga laa woo, kɛɛ ʋaa ma faa mɛ lɛ yɛ wo ma. 2Ƃɔvɛlaale woi nɔ wa nu na faa ɣaa leve la tɔ nɔ ɣa Gala ka wa dɛi ɣaa leve la. Nii nɛpɛgi yà po kɔ̃ɔ nu ma tɔ nɔ ɣa a wo kɔ̃ɔ yìɛ. 3Zɛƃɛi yá kɛ yìɛ wɛlɛ kava wolo va è wɔi ɣaazu, tɔwɔ ɛ̀ lɛ gulu likpii ɣaa ɣaa é yà ƃɔɔ è ɣaazuvɛ? 4Yà zoo ɣɛ le è ɣɛ è wɔi ma, ‘Ƃe ba gè kavai wulo è ɣaazuve,’ gulu likpii wɔ ge yà ɣagi è ɣaazu? 5Yài ŋɛ ni è ga daa‐nɛɛ‐wũ‐ba nu, guli likpii wulo dɛ è ɣaazuvɛ ɣaʋu pa. Na ɣa ɣɛɛ na yà sa maa ƃɛɛ kãlai ga è kavai wulo è wɔi ɣaazu. 6Ŋɛnii maa ziɣiai, a mɛ lɛ teve gilewua wɔ. A mɛ lɛ wɔnɔ wa lɔnɔ‐ba ŋɛniitiɛ wu bũiga laa wu, te mɛ lɛ va kizisu ga wɔwɔ tɔ lite tɔ laa lɛ wo wu.

A ná maa ʋeli, wo ná maa vele ɣaa ziɛ, wo kpogi luƃo

7“A ná maa ʋeli. Wa na ɣɛɛ na, wa ná maa zɔlɔ wo. A ná maa velei ɣaa ziɛ. Wa na ɣɛɛ na, wa ná vɛtɛ. A kpogi luƃo. Wa na ɣɛɛ na, dáa ɣa lao wo luo. 8Ƃɔvɛlaale nui nɛpɛ yá ná maa ʋeli towaa ná maa zɔlɔ wo, nui yá ná maa vele ɣaa ziɛ é ná vɛtɛ, nui wɔnɔ yá kpogi luƃo dáa lao túo. 9Ƃɛ ɣa é wo zaama, ani dúi ɣa feli na kpoolo‐ʋɔɔ ma manui kwɔti ʋe zéea? 10?Ɔɔ ani yá feli na feza ma é kaali leve pɔ́? 11?Wai mugi wo ga tuƃo‐vele‐yowũ vea, ani wa kwɛ̃ɛ na ga velei wa ŋɛni vagɔ ʋee la wo leaitiɛ ya ga faa‐nɛɛ, wo ɣeeai nii mugi é gee‐zuvɛ towa ɛ́ lɛ ŋɛni vagɔ ʋeea niitiɛ ya ta feli ma ɔ́ leve wa dɛi ƃalaa va? 12Na ma velei nɛpɛ wo wõini nu ƃuse luo la ga wiɛ, a luo ŋɛ na ga tiɛ. Na ɣa é ga Gala na tɔgi ƃɔga Gala daa woo‐wo beaitiɛ ta wɔlɔi zu ʋai te zo‐suvɛ too la.

Kpaki zeɣe laa ƃoolagɛi

13“Kpaki zeɣei daa ƃoolagɛi, a leve ga nà laa vele. Ƃɔvɛlaale kpaki zeɣei nii yá pele wulo ga nu ga sú ƃɔnɔ wo mayeɣei laavɛ ƃakpavɛ. Nu levesu lɛ wɔnɔ ƃaani ga ná vele. Taitiɛ wɔgi te levesu ga ná vele te lamagɛ. 14Kɛ̀ kpaki zeɣei nii yá pele wulo ga nu ga é zɛʋu maa zɔlɔ wo, dáavɛ ƃoolagɛ ná ziɛ wosu ƃai. Tɔwɔ nu gile‐gile nɔ ɣa é pelei nii vɛtɛsu.

Gului ƃɔga mavai

15“A ƃɔɔ maazu vɛtɛ ga zɛɛ ʋaa Ɣala daa woo‐wo beaitiɛ, niitiɛ ta va wo wɔ baala kɔlɔ zu tɔwɔ te wuu zu vele ga koei nii pulu ƃakpai ma. 16Wa te wɛ̃ɛ ga te ɣaa vai.? Nu ɣa ŋasa vaa wulo ŋai gulu ɣa ɔ́ nɔ ɣɛ ga nu gɔɔva wulo ŋai tife ɣa? 17Na ma gului nɛpɛgi sa‐su wuai towaa vaa ga gulu vaa vagɔ. Kɛ̀ gulu yowũ ɣa vaa nɔ ga gulu vaa yowũ. 18Gului sa‐su wuai ɛ́ lɛ zooga ɔ́ vaa ga gulu vaa yowũ, ɔ́ nɔ ɣɛ ga gulu yowũ vaa ga gulu vaa vagɔ. 19Gului nɛpɛ ɛ́ lɛ vaa ga gulu vaa vago, ta teve te pili ŋabu ɣa. 20Nii mavele ma wa zɛɛ ʋaa Ɣala daa woo‐wo beaitiɛ wɛ̃ɛ ga te ɣaa vaitiɛ.”

Gɛ̀ lɛ wɔlɔ‐wɔlɔ wo wɛ̃ni

21Ziizɛ ɣɛni tea, “Nuitiɛ te ɣɛɛzu ma, ‘Màliɣii, màliɣii,’ te pɛ ge lei ta lɛ Gala ta masadai zu, kɛni nɔ nui nii é kèea yii‐mai ɣɛɛzu, na ɣa ga kèeai nii é gee‐zuvɛ. 22Folo ta ɣa vaazu ziitizu nu lamaa yíɛ ɣɛ mà, ‘Gé maliɣii, gé maliɣii, kɛbɛ gé Gala daa woo woni yà laa‐zeigi zu, gé gɔʋɛ yowũ ƃɛ numaa wulu yà laa‐zeigi zu, gé tii maa‐wɔlɔ‐wɔlɔ tamaa ɣɛ yà laa‐zeigi zu.’ 23Nà wɔ gà sa gà ɣɛ te ma, ‘Gɛ̀ lɛ wɔlɔ‐wɔlɔ wo wɛ̃ni. A ziɣi kòba, wai ŋɛ ni wo ga faa yowũ‐ɣɛɛ vea.’

Pɛlɛ‐lo bea felegɔitiɛ

24“Na ma nui nɛpɛ yá gòi niitiɛ mɛni yíɛ te ɣɛ, manui maʋaa ɣa wulo ga kele‐ɣele nui é ná pɛlɛi loni fasa ma. 25Tinei puuni ziɛ‐ʋegi va ta fãgai te pɛlɛi na ʋala‐fala. Kɛ̀ ɛ́ lɛ woloni, ƃɔvɛlaale tɔɔ vilegɛi ɣɛ fasa ma. 26Nui nɛpɛ yá gòi niitiɛ mɛni wɔnɔ tɔwɔ ɛ́ lɛ kɛɛni ɔ́ te ɣɛ, manui maʋaa ɣa wulo ga titi nui nii é ná pɛlɛi loni yãaze su. 27Tinei puuni ziɛ‐ʋegi va ta fãgai te pɛlɛi na ʋala‐fala é wolo. Ná goloi wala zu wɔɔlɔi ɣɛ ma.”

Ziizɛ na gaa‐ƃai

28Tei Ziizɛ woloni ga fai niitiɛ wo, kpɔgi ɣɛɛni pɔ̃ɔ ga ná kala‐bogi, 29ƃɔvɛlaale é te ɣala boni nɔ è ɣɛ nui maɣaa‐ƃai zéea. Ɛ́ lɛ ŋɛni kɛɛni ga ta ɣala‐mɔitiɛ ta dɛi ɣavele.

Tällä hetkellä valittuna:

MAFIYU 7: DN1971

Korostus

Jaa

Kopioi