Matthew 7

Jojin di ada pipl dem

(Luke 6.37, 38, 41, 42)

1“Unu no fi joj, fi dehn no joj unu! 2Bikaaz di siem wie unu joj, unu gwain get joj. Ahn di siem amount unu kritisaiz dah di siem amount unu gwain get kritisaiz. 3Wai unu si di mata weh iina unu breda ai, bot unu no si di lag weh deh iina fi unu uon ai? 4Or, how unu gwain seh tu unu breda, ‘Mek Ah tek di straa outa yo ai,’ wen unu gat wan big piis a wuud iina fi unu uon ai? 5Unu dah som riil hipokrit! Fos unu fi tek di big piis a wuud outa unu uon ai; den unu gwain si beta fi tek di straa outa unu breda ai.

6“Uno no fi tek somting weh huoly, ahn chruo'ih fronta di wail daag dem; niida fi chruo unu prity porl biidz fronta di hag dem, bikaaz aal di hag dehn gwain du dah waak aal uova dem, ahn di daag dem gwain ton roun ahn bait unu.

Fi get God blesin kiip deh prie ahn no stap!

(Luke 11.9-13)

7“Kiip deh aks, ahn unu gwain get; kiip deh luk, ahn unu gwain fain; kiip deh nak pan di duo, ahn di duo wi uopm fi unu. 8Bikaaz evrybady weh aks, gwain get; dem weh luk, gwain fain weh dehn deh luk fah; ahn dem weh nak pan di duo, ih gwain uopm fi dem. 9Pierans, wish wan a unu wi gi ihn son wan rak, wen ihn aks fi wan bred? 10Or gwain gi'im wan sniek, wen ihn aks fi wan fish? 11No kya how yo bad, yo nuo seh yo wi gi gud tingz tu yo pikniny dem. So, ho moch muo unu Faada iina hevn gwain gi gud tingz tu dem weh aks im!

12“Aal taim unu fi du fi ada pipl jos wat yo wuda waahn dehn du fi yo, bikaaz dis dah weh di Laa ahn di uol taim prafit dem wende tel yu fi du.

Di wie fi get hevn dah laik deh paas chruu wan naro giet

(Luke 13.24)

13“Gwaan iin chruu di naro giet. Bikaaz di ada giet waid ahn di ruod big nof fi ker yo tu distrokshan, ahn plenty pipl deh go iin chruu'ih. 14Bot di giet smaal ahn di ruod naro weh ker yo tu laif, ahn dah jos wan likl bit a pipl fain ih!

Wat di rilijos liida dem tiich dah laik fruut trii, som gud, som bad

(Luke 6.43, 44)

15“Luk out fi di faals prafit dem weh kom tu yo deh luk gud dres op, bot iina dehn haat dehn jos laik wan kraas wulf. 16Jos bai weh dehn du, yo gwain nuo dem. Nonbady no pik aaf griep ahn fig aafa maka trii, no chruut? 17Dah di siem wie, aal di gud trii dem bier gud fruut, bot wan trii weh no gud bier suoso bad fruut. 18Wan gud trii kyaahn bier bad fruut, ahn wan trii weh no gud kyaahn bier gud fruut. 19Aal di trii dem weh no bier gud fruut gwain get chap dong ahn chruo iina di faiya. 20So wen yo si dehn fruut, yo wi nuo dehn dah weh kain a trii.

Mii no nuo yuu ataal!

(Luke 13.25-27)

21“Dah no evrybady weh kiip deh kaal mi, ‘Laad, Laad’ gwain get iina di Kingdom a Hevn, ongl di wan weh kiip deh du wat mi Faada iina hevn waahn ihn fi du. 22Plenty pipl gwain tel mi pahn Dat Die, ‘Laad, Laad, wii neva priich God mesij iina yo niem? Ahn iina yo niem wii neva tek out bad spirit? Ahn iina yo niem wii neva du plenty mirakl tu?’ 23Den Ah gwain tel dem klier ahn striet, ‘Ah neva nuo unu ataal! Golang faar fahn upaa Ah deh, bad pipl!’

Di parabl bout di waiz man ahn di fuul

(Luke 6.47-49)

24“So, enybady weh hier weh Ah tiich im, ahn den ihn obie, dah jos laik wan smaat man weh bil ihn hous pahn di rak. 25Wen di rien kom, di plies get flod, ahn di briiz staat bluo haad ahn staat biit'op gens daty hous, bot ih no drap dong, bikaaz di foundieshan wehn bil pan di rak.

26“Bot enybady weh hier weh Ah deh seh ahn no pie mi non main, dah jos laik wan fuul-fuul man weh bil ihn hous pahn di san. 27Di rien kom, di plies get flod, ahn di briiz staat bluo ahn staat wap'op gens daty hous, ahn ih faal dong ahn mash'op iina piisiz!”

Jesus atarity

28Wen Jesus don seh aala demya tingz, di paila pipl wehn uova sopraiz bout di wie ihn tiich, 29bikaaz ihn neva deh taak laik dehn tiicha a di Laa dem. Insida dat, Jesus wende tiich dem laik him dah wehn sombady weh gat plenty atarity.

Tällä hetkellä valittuna:

Matthew 7: NTIC

Korostus

Jaa

Kopioi