San Mateo 12

Jxkaase entewa skuutxhtxi çxuktedeçxa ũ'ni

(Mr 2.23-28; Lk 6.1-5)

1Txãa ensu' Jesusa' skuutxh ehsuk skhẽuuç yu' sapatu jxkaase ente. Aça' txãa yakh u'jusawe'sxa' wẽeçxa skuutxhtxi çxuktedeçxa ũ'tx. 2Txã'wẽ yũute', fxariseowe'sx uyçxa' na'wẽtx we'we Jesusa's:

—¿Uyu'gá' idx yakh u'jusawe'sxa' na'wẽ yuuçta' mjĩi enmée jxkaase entewa? jĩte', 3Jesusa' na'wẽk pta'sx:

—I'kwe'sxa' ¿iilẽeymeewá'kwe? Teeçx ente' Davxida' txãa yakh u'jusawe'sx yakh wẽeçxa' na'wẽk yũu: 4Dxuus yatte u'kaçxa', kxtee pantxi ũ'k txãatxi' kim yuhwa ũ'wa'j ji'phmeeta' naasáa sacerdote yuuçxáatx ũ'wa'jsa yu'. 5I'kwe'sxa' Moises leytewa ¿iilẽeymeewá'kwe? Kxte pta'sxçxa', dxuus yatte sacerdotewe'sxa' jxkaase'çmeeta' makwe jxkaase entewa jĩ'k. Txã'wẽ jxkaase ente jxkaasemeete', pkalna ¿sũju'çmeekwe'? 6I'kwe'sxa' mjiyuwe: Ayte' dxuus yatte jxthaakwe jxtuhthesa ũsa'. 7I'kwe'sxa' jiyu'çmeewá'kwe Dxus librute na'jĩ'k: Vxitetx peeygãaniçxá'sthu adxa' jxthãasu', tajkx ikhçxa altalte kabni's peejxmeeth jĩ'k. Txã'jĩni's jiyuwaça', kwe'sxtxi' ũusaçxana açewe'wemeene'kwe, txã'wẽçxáa yũunisa' pkalme' naa pa'ga. 8Txãa pa'gatey sapatu jxkaase entewa Dxus Nçxi'k Nasa Yuusáa jxkaahwa'j ji'pha' jĩk.

Teeçx piçthẽ'j txajx kuse udxnisa

(Mr 3.1-6; Lk 6.6-11)

9Jesusa' txajũ u'jçxa', judiuwe'sx pkhaakheni yattek u'ka. 10Kxteea' teeçx piçthẽ'j teeçx kuse udxnisa kẽese'jya' ãjasameek u'p yu'. Aça' Jesusa's ewmée vxit wẽeçxa na'wẽtx pẽjx:

—Jxkaase entewa nuykatxhite ¿ewmanx? jĩte', 11Jesusa' na'wẽk pas:

—I'kwe'sx teeçx piisxáa ji'phte' txãa piisxá' jxkaase ente ewmeekhẽ khẽete', ¿u'jçxa kutxi'jmeema'kwe jxkaase entewa? 12Nasa' piisxaate jxthaakwe pa'gasa', aça' wejx txã'wẽ ew yũuwa'ja' makwe jxkaase entewa. 13Txã'wẽ pasçxa txãa piçthẽ'ja's na'wẽk we'we:

—Kuse's mku'le'j jĩte', txã'wẽy yuuk, naapkaçxha' txajx kuse' ewuuk ka'tuwe'sx na'wẽy. 14Aça' fxariseowe'sxa' kasehçxa Jesusa's ikhya' puutx we'wetx.

Jesus ma'wẽsatewa nyafxiitey pta'sxni

15Txã'wẽ yũuçte Jesus jiyuçxa', txajũ kasehna u'kh, aça' nasa wala u'jtx txãa yakh. Jesusa' ãça'sa ma'wẽsatxwa jxukak nuykatxhi, 16nawa kim yuhtxwa pta'sxkaahme' nuykatxhisa kimtewa. 17Dxus yuwe pta'sxsa Isaias we'weni kxtey yuukahnçxáak txã'wẽ neewe'we. Isaiasa' na'jĩk:

18Adxna selpiwa'jsa naa piçthẽ'ja'sthu txhitxh.

Txãasa peeygãhna weçxana ũsthu,

Sa' adx Espiritu's ũsu'nja,

Aça' adx ew yũuwa'ja's pta'sxina maa nasatxwa jxuka.

19Txã' puiiwameena, sa' ãate susnawa fxi'zemeena.

Txãa pa'ga txajx we'weni' kĩh yuhwa pthũusemeena klxiikhunsu.

20Makwe pxthaa ãhmeekwesatewa txã' ahçemeena,

Sa' çxhãçxha fxi'zewa'ja's ji'phmeeyã'thewa, txã' ivxiitumeena,

Naa kiwete zhiçxkwe txajx jxkaahwa'j en ãhpkaçx.

21Aça' nasa' ma'wẽsawa jxuka txã'sçxáana ũythasutxna jĩ'k.

Dxus Espiritu's açewe'weni

(Mr 3.19-30; Lk 11.14-23; 12.10)

22Txajũ' Jesus tasxte jxũna pa'jtx uyya' ãjasamée we'weya'wa ãjasamée eçx iiyamunisa's. Aça' Jesusa' nuykatxhite', txãa piçthẽ'ja' uyya' ãjak, sa' we'weya'wa ãjak. 23Txã'wẽ yũute', nasa jxukaysa ũukh yajkxna na'wẽtx kuh jwed we'we':

—Naa piçthẽ'ja' Davxid Nçxi'k íina jĩ'tx. 24Txã'jĩni's fxariseowe'sx wẽse'jçxa', na'jĩtx:

—Naa piçthẽ'ja' eçxtxi nasaa ũusuh kutxi'ji'k nawa eçxthẽ'j pu'çxteçxáak txã'wẽ ãja' jĩ'tx.

25Txã'wẽ yajkxna ũste Jesus jiyuçxa', na'wẽk we'we:

—Maa kiwetewa gobierno' peekx nasatxíiçxáa ahçeçxa puiiçxa', çxhãçxhameena. Txã'wẽy çxhab ma'k yuu meeçxa' teeçx yattewe'sx ma'tx yuu nawa puutx yahçena puiiçxa', puutx pçuutxna. 26Txã'wẽy eçxthẽ'jwa txajx jxkaahnisa eçx yakhíiçxáa puiiçxa', çxhãçxhamée puutx pçuutxna. 27I'kwe'sx adxna we'weçxa', eçxthẽ'j pu'çxteçxáak eçxtxi kutxi'ji' jĩna i'kwe we'we'. Aça' txã'wẽ dxihte', txã'wẽ i'kwe'sx yakh u'jusawe'sxwa eçxtxi kutxi'jya' ãja'tx jĩ'i'kwe aça' txã'wẽ ãjawa'ja's ¿kimki'k ũs? Txã'wẽ i'kwe'sx yakh fxi'zesaíiwa ãate kaajiyu'ju'tx i'kwe'sx jxpubani's. 28Adxa' eçxtxi kutxi'ji'th Dxus Espiritu pu'çxte'. Nawa i'kwe'sxtxi Dxusçxaçxáa jxkaahwa'j en ãhne' txãa pa'ga ne'tka txã'wẽ yũ'.

29Maawa piçthẽ'j çxhãçxhasa iiyamuni's kusa'jya' u'jçxa', txãa piçthẽ'j çxhãçxhasa khuẽ'yna tudmeeçxa yu', kusa'jya' ãjameena. Txã's khuẽ'yna tudçxa yuuçxáa kusa'jya' ãjana.

30Adx ju'gu yuusame' açesaçxa txã'wẽ yuutxna. Sa' adxa's pu'çxsame', yupsaaçxa txã'wẽ yuutxna. 31Na'jĩ'th na', nasa kĩhwa ewmée yũuni kĩhwa Dxusna ewmée nuywe'wetewa txãatxi' jxuka ya'peltunaĩna. Nawa Dxus Espiritu's açewe'wete', bagaçxte yuhwa peltunãywa'jmée yuuna. 32Sa' maawa Dxus Nçxi'k Nasa Yuusa's ewmée nuywe'wesa's peltunãywa'j yuuna. Nawa Dxus Espiritu's ewmée nuywe'wesa yuuçxáana peltunãywa'jmée yuuna naa kiwete cielutewa.

Ma'wẽ fxi'zeni'swa uyçxak ya'jiyu'

(Lk 6.43-45)

33Fxtũu tasx ewsa' ewku yũnu'. Nawa fxtũu tasx ewmeesa' ewmeek yũnu'. Fxtũu tasx ma'wẽsatewa yũnte yuuçxáak ya'jiyu'. 34Ewmeesa luuçx i'kwe'sxa' ¿ma'wẽ ew we'weya' ãjaki'kwe, ũuste yuu ewmeesa ji'phçxa'? Txãa pa'gatey ũuste yaakxni'sku ya'we'we'. 35Nasa ewsa' ewsaçxá'sku we'we', txajx ũuste' ewsaçxá's ji'phna naa pa'ga. Naapkaçxha' nasa ewmeesa' ewmeesaçxá'sku we'we', txajx ũuste' ewmeesaçxá's ji'phna naa pa'ga. 36Adxa' na'jĩ'th na': Dxus kastigãywa'j ente' jxuka pta'sxi ji'phutxna kĩhwa jxuka ewmée we'weni's. 37Idx ma'wẽ we'weni'swa jxuka paapẽyni yuuna, txajũ yuuwema'g yuu meeçxa' yuuwemeema'g yuu nawa ya'jiyuna.

Nasa ewmeesa' cieluju kĩhçxáawa kaavxya'ja'khaahni

(Mr 8.12; Lk 11.29-32)

38Txajũ' fxariseowe'sx vxite' ley kaapiya'jsawe'sx Jesusa's na'jĩnatx pẽjx:

—Txã'wẽ kim yuhwa ãjanimeesa's kwe'sxtxi mkaavxya'ja' jĩte', 39Jesus pasçxa':

—Nasa ewmeesa ĩsxiisawe'sxa' kim yuhwa ãjanimeesa'stxi kaavxya'ja'khaja'. Nawa txã'wẽ yũumée Dxus yuwe pta'sxsa Jonas fxi'zeniçxáana ya'pta'sxina. 40Jonaswa ma'wẽga wedx tutxhte tekh en tekh kus u'pu', txã'wẽy Dxus Nçxi'k Nasa Yuusaawa tekh en tekh kus kiwe dxiiga ũsuna. 41Dxus kastigãywa'j en ãhte', Niniwe çxhabtewe'sxa' naa ensuwe'sxtxi' ewmeete nvxiitutxna, txãa pa'gatey Jonas Dxus yuwe's pta'sxiçpkaçxha', Niniwetewe'sxa' pkaltxi nvxihtçxa wa'lmée Dxus tasxte utxaatx. Aça' ayte' Jonas na'wẽsaçxáamée jxthaakwesa ũsa', nawa txãa yu'sa' wa'lu'tx. 42Txã'wẽy Dxus kastigãywa'j en ãhte', jxu'j kiwete jxkaahsa u'ya' naa ensuwe'sxtxi' ewmeete nvxiituna, txãa pa'gatey txã'wẽ jxu'j kiwejuwa txãa u'ya' yuwe'k Salomon pta'sxniçxá'swa wa'lmée wẽse'jya'. Aça' ayte' Salomonte jxthaakwesa ũsa', nawa txãa yu'sa' wa'lu'tx.

Eçxa' nasa ũuste ki' sxawedni

(Lk 11.24-26)

43Eçxa' nasa ũusuh kasehçxa kiwe uhdxsu pekũhna u'juçxawa u'pwa'j uymeeçxa': 44Sxawedu'nja kasehth txãa yatnay sũju'k. Txajũ' sxawedna pa'jçxa', txãa piçthẽ'ja's uyuuna yata's ma'wẽ ew pheu'jçxa padçxa txaahni ũs yuukx txã'wẽ. 45Txajũ' u'jçxa vxite siete eçx txãate jxthaakwe ewmeesatx jxũna pa'jçxa txãa piçthẽ'j ũuste jxuka khẽjetxna, aça' txãa piçthẽ'ja' iiméh jxthaakwe ewmeesa yuuna. Txã'wẽ yuuwa'j en pa'jana naa nasa ewmeesatxi' jĩk.

Jesus njĩ'j vxite' txajx nyakhwe'sx

(Mr 3.31-35; Lk 8.19-21)

46Jesus txã'wẽ nasatx we'wena ũsiyna, njĩ'j vxite' nyakhwe'sx txãa yakh we'weya' pa'jçxa ekate ũsu'tx. 47Aça' kxte ũssa teeçxsa' Jesusa's pta'sxku:

—Iidx mama iidx nyakhwe'sx idx yakh puutx we'weya' pa'jçxa ay ekate ũsta' jĩte', 48Jesusa' na'wẽk we'we pta'sxsa's:

—Adx mama adx nyakhwe'sxa' kimtewa jiimeewá'kwe jĩçxa', 49txãa yakh u'jusawe'sxtxi kuseju vxijxaçxa:

—Naawe'sxçxáa adx mama, adx nyakhwe'sxta'. 50Txãa pa'gatey maawa adx Tata cielute ũsa' txajx jxthãasni's kxtey yuusaaçxáa txã'wẽ adx nyakh, adx npe'sx, adx mama na'wẽsata' jĩk.

Tällä hetkellä valittuna:

San Mateo 12: pbbNNT

Korostus

Jaa

Kopioi