Hch 9
9
Saulote yiꞌriũꞌmueka Jesúre
(Hch 22.6-16; 26.12-18)
1Saulo Jesúre yiꞌyurãte jããrika riꞌkawaꞌri baꞌiaja nareka kijairoyika ruᵽu. Suᵽa imarĩ, “Baꞌiaja nare yibaaerã”, ãrĩwaꞌri kurarãka ĩᵽamaki imatiyaiki ᵽõꞌirã keꞌrika. 2“Ĩꞌĩ Saulo, yiᵽũataiki Jesúre ãꞌmitiriᵽẽairãte kiñiꞌarũ”, ãrĩwaꞌri ᵽaᵽera kioꞌookaroꞌsi kijẽñeka, Damascorã judíorãkare rẽrĩriwiꞌia imaruᵽutarimajare beaokaroꞌsi.
—Ika mijãꞌmeikaᵽi nare ñiatõᵽorãka uᵽakaja ĩmirĩja, rõmijãteoka ñiꞌatirã Jerusalénrã nare yeꞌeraꞌarãñu,== Saulote kire ãrĩka.
3Suᵽa imarĩ maꞌaᵽi aꞌririjari Damasco wejearã keyaerã baaekarõꞌõjite, ikuᵽarõꞌõᵽiji maboꞌikakuriᵽi yaaboaika kire jããtaꞌaeka. 4Toᵽi mae marãkãꞌã baaberiwaꞌri sarãja Saulote ñaꞌrĩka. Torãjite mae, ikuᵽaka kire sãrĩka:
—Saulo, Saulo, ¿dako baaerã baꞌiaja yire mibaariwãꞌimañu?== kire sãrĩka.
5Sãꞌmitiritirã,
—¿Maki mime jeꞌe Ñiᵽamaki?== kẽrĩka.
—Baꞌiaja mibaawãꞌimarĩrijayuka Jesús ñime,== kire kẽrĩka.
6Iꞌsuᵽaka kire ãrĩtirã,
—Mae miꞌmirĩkatirã, Damascorã meꞌᵽe. Torã meyarãka ᵽoto, “Ikuᵽaka mibaabe”, ĩꞌrĩkate mire ãrĩrãñu,== Saulote kẽrĩka.
7Sauloka aꞌrikarã, sajaikakite ãꞌmitirikoꞌomakaja kire niatõᵽoberika. Ᵽuᵽataekarã imarĩ torã najiyirĩkataeka suᵽabaatirã jaiberijĩkaoka najarika. 8Sabeꞌerõꞌõ miꞌmirĩkatirã yoibaotaerã kibaakoᵽeka. Torãjĩrã mae õibeyua kiñakoa jarika simamaka Damascorã kijeyomarãre kire tĩtiwaꞌrika. 9Torã kire neꞌeeyaeka beꞌerõꞌõ maekarakarĩmi yoibeyuka, baꞌabekaja, suᵽabaatirã dakooka ukurimarĩaja Saulote imaeka.
10Iꞌsia wejearã Jesúre yiꞌyuka, ĩꞌrĩka Ananías wãmeikite imaeka. Makãrãrũñuroka uᵽakaᵽi kire ᵽemakotowiritirã,
—¿Yaje mime Ananías?== Jesúre kire ãrĩka.
—Ãꞌã Ñiᵽamaki, õꞌõrã ñime,== kire kẽrĩka.
11—Ãꞌã, mae Wãjimaꞌa wãmeirõꞌõᵽi meꞌᵽe. Iꞌsimaꞌaᵽi aꞌririjari Judas wiꞌiarã meyarãñu. Torã eyatirã, “¿Yaje õꞌõrã Saulo, Tarsowejeakakire ime?”, kire meᵽe. Mia, iꞌsuᵽaka merĩrãñu yire jẽñebaraka imaki kimamaka. 12-13Makãrãrũñuroka uᵽakaᵽi ikuᵽaka simakoꞌo: Ĩꞌrĩka ᵽoꞌimaji, Ananías wãmeikire kire yibeakoꞌo. Suᵽa imarĩ kiᵽõꞌirã kãkaeyatirã kiᵽitaka Saulo ᵽemarã kijaꞌaᵽearãka ᵽoto, ate yoiki kijarirãñu,== Ananíare kẽrĩka ᵽoto ikuᵽaka Ananíare yiꞌrika:
—Jerusalénrã mire yiꞌyurãre baꞌiaja kibaarijayuakaka jiamarĩa kimajaroka ñaꞌmitiyu. 14Suᵽabaatirã kurarãka ĩᵽarimarãre kire jãꞌmeᵽũatamaka, õꞌõrã Saulore etaeka. Mire ãꞌmitiriᵽẽairã yija imamaka, wẽkomaka yijare baaokaroꞌsi Jerusalénrã yijare eꞌewaꞌririmaji kime,== Ananíare kire ãrĩka.
15Toᵽiji ikuᵽaka Jesúre kire bojaeka:
—Mire ñañu uᵽakaja kiᵽõꞌirã meꞌᵽe. Yimajaroka ᵽoꞌimajare wãrõrimaji kimaerã kire yiwãꞌmaeka. Judíotatarã, judíotatamarĩrã, suᵽabaatirã niᵽarimarãteoka sawãrõrimaji kimarãñu. 16Saᵽi ĩꞌrãkurimarĩa baꞌiaja kijũarãka Saulore ñorĩrũjerãñu,== Jesúre ãrĩka Ananíare.
17Torãjĩrã ᵽuri Saulo ᵽõꞌirã Ananíare aꞌrika mae. Kimaeka wiꞌirã eyatirã kiᵽitaka Saulo ᵽemarã Ananíare jaꞌaᵽeaeka. Suᵽabaatirã ikuᵽaka Ananíare kire ãrĩka:
—Yijeyomaki miaꞌmitiᵽe. Maĩᵽamaki Jesús, miꞌtarijaraᵽaka ᵽoto mire ᵽemakotowiraᵽakiji, yire ᵽũatakoꞌoka miñakoa jiirũ ãrĩwaꞌri. Suᵽabaatirãoka Esᵽíritu Santore mire ñaꞌrĩjãirũ ãrĩwaꞌri ᵽariji yire kiᵽũatayu,== kire kẽrĩka.
18Torõꞌõjiteje, waꞌitĩti uᵽaka ĩoika Saulo ñakoaᵽi ñaꞌrĩka. Torãjĩrã ᵽuri jia kiñakoa jarika ate. Iꞌsuᵽaka kire kibaamaka, kimiꞌmirĩkaeka ᵽoto Ananíare kire ruᵽukoꞌa jũjeka. 19Iꞌsuᵽaka kijarika beꞌerõꞌõ baꞌatirã okajãjia kijarika. Iꞌsuᵽaka jaritirã ñoaᵽañaka Jesúre yiꞌyurãka Damascorã kimaeka.
Damasco wejeakarãre Jesúrika bojariroka Saulote bojaũꞌmueka
20Torãjĩrã mae judíorãkare rẽrĩriwiꞌiarã kãkatirã, Jesúrika bojariroka wãrõbaraka, “Tuᵽarã Maki kime Jesús”, Saulote nare ãrĩka. 21Iꞌsuᵽaka kibaamaka, koᵽakaja ᵽoꞌimajare ᵽuᵽataeka.
—Mia, ĩꞌĩji kime Jesúre yiꞌyurãte baꞌiaja baarimaji Jerusalénrã. Õꞌõrã kime Jesúre yiꞌyurãte ñiꞌatirã, kurarãka ĩᵽamarã ᵽõꞌirã nare eꞌewaꞌyaokaroꞌsi,== ᵽoꞌimajare ãrĩka.
22Iꞌsuᵽaka naᵽuᵽajoakoꞌomakaja Tuᵽarãte kire jeyobaamaka, jiibaji Jesúrika bojariroka kibojamirĩrĩkawaꞌrika. “Rita sime, Jãꞌmerũkika Tuᵽarãte wãꞌmaekaki kime Jesús”, nare kẽrĩroyika. Jia sakibojamaka, Damascokarã judíorãka ĩᵽarimarã marãkãꞌã kire nokatẽrĩwãrũberika.
Judíotatarãte kire jããrika riꞌkamaka Saulote ruꞌrika majaroka
23Damascorã ñoatakaja sawãrõbaraka Saulote imamaka, “Kire majããerã”, judíorãka Jesúre yiꞌribeyurãte ãrĩᵽuᵽajoaeka. 24Suᵽa imarĩ ñami, ĩmioka kire naᵽãñaroyika wejeaᵽi ᵽoriwaꞌrirũkirõꞌõ koᵽerekarã kire jããokaroꞌsi. Iꞌsuᵽaka nabaakoꞌomakaja Saulote sõrĩka. 25Kiõrĩka simamaka kibojaeka yiꞌyurãte kire jeyobaaeka, kiruꞌyaokaroꞌsi. Torãjĩrã mae, ñami wejea nataꞌtekarõꞌõᵽi imatirã ᵽiꞌi uᵽaka ĩoikarã kire jããtirã aᵽeᵽẽꞌrõtorã kire naruetaeka kiruꞌyaokaroꞌsi.
Jerusalénrã Saulote imaeka mae
26Toᵽi, ruꞌriwaꞌritirã Jerusalénrã keyaeka mae. Torã Jesúre yiꞌyurãka jeyoaririka kiyaᵽakoᵽeka. Iꞌsuᵽaka kiyaᵽakoꞌomakaja, “Jesúre yiꞌribeyuka kime Saulo ᵽuri”, ãrĩwaꞌri kire nakĩkika. 27Imakoꞌomakaja, Bernabé, Saulore jeyobaaekaki. “Miꞌtabe, aᵽóstolrãkaka majairã”, kire kẽrĩka. Sauloka naᵽõꞌirã eyatirã ikuᵽaka Bernabére nare ãrĩka:
—Saulo kime ĩꞌĩ, maꞌaᵽi keꞌririjayukãꞌã maĩᵽamaki Jesúre kire ᵽemakotowirika. Suᵽabaatirã kika kijaika. Iꞌsuᵽaka Jesúre kire baaeka beꞌerõꞌõ Damascorã dako werikimarĩaja ᵽoꞌimajare Jesúrika bojariroka wãrõraᵽaki kime,== Bernabére nare ãrĩka.
28Iꞌsuᵽaka nare kẽᵽakãꞌã, “Maka imarũkika Saulote ime mae”, kireka narĩka. Iꞌsuᵽaka naᵽakãꞌã, Jerusalénrã naka kimaeka. Naka imarijari dako werikimarĩaja tokarãre Jesúrika kibojaeka. 29Judíotatarã imakoꞌomakaja griego oka jairãka jaibaraka Saulore imaeka. Tuᵽarã majaroᵽũñu ãñua nare bojabaraka, “Sãñu uᵽakaja Jãꞌmerũkika Tuᵽarãre wãꞌmaekaki kime Jesús”, nare kẽrĩka. Iꞌsuᵽaka kẽᵽakãꞌã ãꞌmitiriwaꞌri kire jããrika nariꞌkaeka. 30Sãꞌmitiriwaꞌri, Cesarearã kijeyomarãre kire eꞌewaꞌrika. Torã eyatirã Tarsowejearã kire naᵽeꞌawaꞌrirũjeka.
31Iꞌsia ᵽoto ᵽuri Judea, Samaria, suᵽabaatirã Galilea kaꞌiarãoka baꞌiaja Jesúre yiꞌyurãte jũaberika. Suᵽa simamaka Esᵽíritu Santore nare jeyobaamaka jĩjimakaᵽi Jesúre jiibaji yiꞌyurã nimamirĩrĩkawaꞌrika. Suᵽa imarĩ rĩkimabaji Jesúre yiꞌyurãte imarijarika. Suᵽabaatirãoka ritaja jiyiᵽuᵽaka Maĩᵽamakire õᵽaraka nimarijarika.
Bitamajite Ᵽedrote jieka
32Suᵽa imarĩ Jesúre yiꞌyurãte ĩꞌrãweje jariwaꞌririmarĩaja Ᵽedrote ĩataᵽaroyika. Iꞌsuᵽaka imawaꞌri Lida wãmeirõꞌõrã naᵽõꞌirã turirĩ keyaeka. 33Torã eyatirã Eneas wãmeikite kĩaeka. Bitamaji imarĩ, maekarakaotẽñarirakakuri wejejẽꞌrãka keyawaꞌrika kikãrĩrũkirõꞌõrãja ᵽeyubaraka. 34Torãjĩrã mae, ikuᵽaka Ᵽedrote kire ãrĩka:
—Eneas, miaꞌmitiᵽe, Jesucristore mire jieyu mae. Suᵽa imarĩ mimiꞌmirĩkabe. Suᵽabaatirã mikãrĩrũkia mibuᵽebe,== kire kẽrĩka.
Iꞌsuᵽaka kire kẽrĩkarõꞌõjiteje, bitamaji imakoᵽekakite miꞌmirĩkaeka. 35Rĩkimarãja Lidakarã suᵽabaatirã Sarónkaꞌiakarãoka ĩaekarã suᵽa kibaaeka. Suᵽa imarĩ nimauᵽatiji Jesúre yiꞌyurã oyiaja najarika.
Reyaekakote Ᵽedrote tããeka
36Ĩꞌrãko Joᵽe wãmeirõꞌõkako Tabitá wãmeikote imaeka, Jesúre yiꞌyuko. Griego okaᵽi ᵽuri Dorcas wãmeiko koimaeka. Jiiko ᵽoꞌirõmo imarĩ wayuoka baairãte jia kojeyobaaroyika. 37Imakoꞌomakaja, ikuᵽarõꞌõᵽiji wãmarĩa jariwaꞌri koreyaeka mae. Koreyamaka ĩatirã reyairãre nabaaika uᵽakaja koᵽoꞌia najũjeka korĩrã. Suᵽabaatirã ĩmiᵽẽꞌrõtorã imaeka kurarakarã koroꞌsiji kore nataeka. 38Iꞌsuᵽaka kore baatirã, “Lidarã Ᵽedrote ime”, ᵽoꞌimajare ãñua Joᵽekarã Jesúre yiꞌyurãte ãꞌmitirika. Sãꞌmitiritirã ĩꞌᵽarãte naᵽũataeka Ᵽedrote akarĩ, koyikurirãja kimaeka simamaka. Kiᵽõꞌirã eyatirã ikuᵽaka kire narĩka:
—Dajoa wãrũaja yijaka.==
39Suᵽa naᵽakãꞌã Ᵽedrore naka aꞌrika Joᵽe wãmeika wejearã. Torã eyatirã Dorcas majaka nataekarõꞌõrã kire neꞌewaꞌrika. Suᵽa imarĩ koᵽõꞌirã rĩkimarãja natĩmiarãre reyataᵽaekarãre oᵽaraka imamaka kĩaeka. Keyamaka kiᵽõꞌirã narẽrĩka kika jaiokaroꞌsi.
—Dorcate reyaerã baaraᵽaka ruᵽu rĩkimakaja saya yijare koᵽuꞌaĩjiraᵽe,== ãᵽaraka Ᵽedrote sanabeaeka.
40Iꞌsuᵽaka kire naᵽakãꞌã,
—Mija ᵽoriwaꞌᵽe ruᵽu,== nare kẽrĩka.
Naᵽoriwaꞌrika beꞌerõꞌõ, ñukuruᵽatirã Tuᵽarãka kijaika. Kika jaiweatirã, reyaekakote jorowaꞌri ĩatirã,
—Tabitá mimiꞌmibe,== kore kẽrĩka.
Iꞌsuᵽaka kẽrĩka ᵽotojo koñakoa wiritaeka. Suᵽa imarĩ Ᵽedrote ĩatirã komiꞌmiruᵽaeka. 41Toᵽi mae, koᵽitakaᵽi ñiꞌatirã Ᵽedrote kore miꞌmataeka. Suᵽabaatirã, “Mija ᵽoᵽe ruᵽu”, kẽrĩkarãte kiakaeka.
—Koᵽakaja õñia kojayu. Ate kore mija ĩaraᵽe mae,== Jesúre yiꞌyurã natĩmiarã reyataᵽaekarã, suᵽabaatirã aᵽerã najeyomarãreoka kẽrĩka.
42Ika majaroka ãꞌmitiriᵽatatirã Joᵽekarã rĩkimarãja Jesúre yiꞌrikarã. 43Sabeꞌerõꞌõ torã ñoaka Ᵽedrote imaeka, waꞌiroꞌsi ajea baꞌiraberimaji Simón ᵽõꞌirã.
Tällä hetkellä valittuna:
Hch 9: TNC
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2019, Wycliffe Bible Translators, Inc. All rights reserved.
