Hch 6
6
Ĩꞌᵽotẽñarirakamarã nare jeyobaarimajare neꞌeka
1Torãjĩrã iꞌsijẽꞌrãreka rĩkimabaji Jesúre yiꞌyurãre imarijarika. Suᵽa imarĩ, griego oka jairã ikuᵽaka ãrĩkarã hebreo oka jairãre:
—Ĩꞌrãrĩmi uᵽakaja baꞌarika ᵽibariᵽotojo, jia ĩꞌrãtiji samija ĩjibeyu. Natĩmiarãte reyataᵽaekarã hebreo oka jairã rõmijãre takaja rĩkimabaji mija ĩjirijayu,== narĩka griego jairã.
2Iꞌsuᵽaka najaimaka, Jesúre yiꞌyurãre nakaeka aᵽóstolrãka. Suᵽabaatirã ikuᵽaka nare narĩka:
—Baꞌarika ᵽibarika ᵽemawaꞌribaji imatiyaika sime yija wãrõrijayua yijaroꞌsi ᵽuri. Baꞌarika takaja yija ᵽuᵽajoajĩkareka yija ima jaꞌatarimaja yija imajĩñu. 3Iꞌsuᵽaka simamaka yija jeyomarã, mijakarã ĩꞌᵽotẽñarirakamarãre mija wãꞌmabe jia ᵽuᵽakirãre, jiyiᵽuᵽaka ᵽoꞌimajare õñurãre, Esᵽíritu Santore jia yiꞌyurãre, “Baꞌarika ᵽibarimaja mija imabe”, nare yija ãñaokaroꞌsi. 4Yija ᵽuri, Tuᵽarãre takaja jairimaja, suᵽabaatirã kirika bojariroka wãrõrimaja imarã,== aᵽóstolrãkare nare ãrĩka.
5Iꞌsuᵽaka naᵽakãꞌã, “Rita sime”, ãñurã oyiaja nimaeka Jesúre yiꞌyurã. Suᵽa imarĩ Esteban, jia Tuᵽarãre yiꞌyuka imarĩ, Esᵽíritu Santore kire jeyobaamaka, kiyaᵽaika uᵽakaja baarijayuka kimamaka, baꞌarika ᵽibarimajiroꞌsi kire neꞌeka. Suᵽabaatirã neꞌeka Feliᵽere, Ᵽrócorore, Nicanore, Timónre, Ᵽármenare, suᵽabaatirã Antioquíakaki Nicoláre. (Nicolás ᵽuri, judíotatamarĩka kimakoꞌomakaja, beꞌrõbaji judíorãka uᵽaka kijarika, nuᵽakaja Tuᵽarãre yiꞌyuka.) 6Suᵽabaatirã aᵽóstolrãka ᵽõꞌirã nare neꞌewaꞌrika. “Ĩꞌrã nime baꞌarika ᵽibarimaja yija wãꞌmakoꞌorã”, nare narĩka. Suᵽabaatirã aᵽóstolrãka naᵽitaka naruᵽukoꞌa ᵽemarã jaꞌaᵽeatirã, “Miyaᵽaika uᵽakaja nabaaokaroꞌsi nare mijeyobaabe”, ãrĩka Tuᵽarãre najẽñeka.
7Saᵽi ãrĩwaꞌri Jesúrika bojariroka yiꞌyurãte bojaeka ãꞌmitiritirã rĩkimabaji sayiꞌyurãte Jerusalénrã ᵽuburijarika. Suᵽabaatirã kurarãkaoka rĩkimarãja kimajaroka ãꞌmitiriᵽẽaekarã.
Estebanre nañiꞌaeka
8Tuᵽarãre kire jeyobaamaka, jimarĩ maikoribeyua ᵽoꞌimajare ĩaeka wãjitãji Estebanre baabeaeka. 9Kimaekarõꞌõrã neyaeka judíorãka rẽrĩriwiꞌiaᵽi iꞌtaekarã ikuᵽaka kibaarika yaᵽaberiwaꞌri. “Ᵽoyarãre aꞌritaᵽaekawiꞌi”,#6.9 Sinagoga de Esclavos Libertados. ãrĩrika uᵽaka wãmeirõꞌõ simaeka. Cirenekarã, Alejandríakarã, Ciliciakarã, suᵽabaatirã Asiakaꞌiakarãᵽitiyika nimaeka torã rẽrĩkarã. Ĩꞌrã Estebanka okabojikarã. 10Iꞌsuᵽaka kire nabaakoꞌomakaja jia Estebanre nare yiꞌriwãrũka, Esᵽíritu Santore kire jeyobaamaka. Suᵽa imarĩ marãkãꞌã baatirã kire nokatẽrĩwãrũberika. 11Kire okatẽrĩwãrũberiwaꞌri, aᵽerãte niñerũ nawaᵽaĩjika, Estebanre nabojajããokaroꞌsi. Seꞌekarã, “Tuᵽarãte, suᵽabaatirã Moisés imaroyikakiteoka Estebanre jaiyuyeraᵽaka ãꞌmitiraᵽarã yija ime”, ãrĩwaꞌri aᵽerãre naᵽakibojaeka. 12Naᵽakika ãꞌmitiritirã, jimarĩ wejeakarã, suᵽabaatirã ᵽakiarimarã, Moisére jãꞌmeka wãrõrimajaoka kire boebariwaꞌri Estebanre ñiꞌatirã judíorãka ĩᵽarimarã ᵽõꞌirã kire neꞌewaꞌrika. 13Ĩᵽarimarã ᵽõꞌirã kire neꞌeeyaeka ᵽoto majaroka ᵽakirimajare nakaeka. Niñerũ nawaᵽaĩjimaka ikuᵽaka nabojaᵽakika:
—Ĩꞌrãkurimarĩa Tuᵽarãte jiyiᵽuᵽaka õrĩriwiꞌia suᵽabaatirã Moiséte jãꞌmekaoka kijaiyuyemaka yija ãꞌmitiyu. 14Suᵽabaatirã, “Jesús Nazaretkaki Tuᵽarãte jiyiᵽuᵽaka õrĩriwiꞌia kuyeᵽaterãki, suᵽabaatirã Moisés imaekakite jãꞌmeroyika saᵽi ᵽuᵽaika maima kioꞌarãñu”, iꞌsuᵽaka Estebanre ãᵽakãꞌã yija ãꞌmitiraᵽe,== ãrĩwaꞌri nabojaᵽakika.
15Suᵽa imarĩ torã imaekarãte kire yoirĩkaeka. Iꞌsuᵽaka kire nabaamaka ángel ᵽema uᵽaka yaꞌtarika kiᵽema jarika.
Tällä hetkellä valittuna:
Hch 6: TNC
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2019, Wycliffe Bible Translators, Inc. All rights reserved.
