METIU 6
6
Ammem Aincko Ibinam Poyir
1“Ansulangka noluk Ru:ncpvncmc kumnamcm tani:kvdvngc ka:ycpc cmna kumma:pcka; kapila:nc odomvlo noluk taycng amongkc Ba:bukolok amancm pa:ma:yc.
2“Cdcmpidag nolu cdclo ammem atvko cmpc biycnc, noluk kcra:lo oko dumdumcmsin mango:yoka, agom lc:sila lunckvdv:dc kumko okumno odokkc nogorlok lambc lambclo, tani:kvdvngc bulum luyitycpc cmna kumgo:dag. Aropakpc, ngo nolum lubidung, bulu buluk amancm pa:toibong. 3Cmpige:la nolu cdvlo cmpc binamcm bidonc, noluk lagbvg alagdc okkom idu:nc noluk lakkek alagdcm kinmoyok, 4Odomvlo noluk cpv:pc binamdc kinmango:pc binampc iyc; odokkc noluk Abudc sc:kobv kinmango:pc ka:dagnc amancm biycpc.
Kumnam Agom Poyirnam
(Lu:k 11.2-4)
5“Odokkc cdvlo nolu kumdonc, nolu agom lc:sila lunckvdv:dcmpc iyorungka; kapila:nc bulu kumko okum okumno odokkc nogorlok lambckvdv:dok r:uyi ru:yilo dagsa:la kumnamcm kumnv:dag, bulum tani:kvdv:dc ka:ycpc cmna. Aropakpc, ngo nolum ludung, buluk amancm bulu pa:toibong. 6Cmpige:la cdvlo nolu kumdonc, noluk soyarlo:pc gva:lang odokkc yabgom mokapsulang odokkc noluk Abudcm kumnang sc:kobv kinmango:pc du:dagnc; odokkc noluk Abubv kinmango:pc ka:ncdc nolum amancm biycpc.
7“Odokkc kumdom Angu tani:kvdv:dcmpc bojcrungko atvma:nc agom lugodcm lukumsuyoka; kapila:nc buluk bojcru:pc agom gompir pirnamdokki tadycpc cmna bulu mc:dag. 8Bulukkcmpc iyoka, kapila:nc noluk Abudc noluk koma:dapc okkom nolu madagnc kindag. 9Cdcmpidag scmpc kumtoka:
Ngoluk taycng amo:tok du:nc Abba,
Nokkc amincm kumnampc ika:langka.
10Nok migom dotcngc pvngangka:langka,
tani:mo:pvso:sin taycngamo:tok ikampc nok mc:namdcmpc ingapka:langka.
11Silo ngolum lo:dcm donamdcm bi:ka;
12Odokkc ngoluk narnam mc:yinsuteika,
Ngolusin ngoluk narnckvdv:dcm kapc mc:yinamsutonc;
13Odokkc ngolum ka:bomc:bokolo:p gvboyoka,
cmpige:la ngolum aima:nc yalodokkcm moya:langka.
14“Kapila:nc nolu tani:kvdv:dcm buluk imursiyarcm mcyinsumvlo, noluk taycng amo:tok Abubv:sin nolum mc:yinsuyc; 15Cmpige:la nolu tani:kvdv:dok buluk imursiyarcm mc:yinsuma:mvlo, noluk Abubv:sin noluk imursiyarcm mc:yinsuma:yc.
Menna Doma:pc Du:nam Poyir
16“Odokkc cdvlo nolu menna doma:pc du:donc, nappangcm napvnarc:ma:pc kangkosuyoka, agom lc:sula lunckvdv:dcmpc, kapila:nc bulu dumsi migmom ka:nyi:modag buluk menna du:namdcm tani:kvdv:dc ka:begycpc cmna. Aropakpc, ngo nolum lubidung, buluk amancm bulu pa:toibong. 17Cmpige:la nolu cdvlo menna doma:pc du:donc, tukkudo tulangcm yonsulang odokkc nappangcm mopu:sulang, 18nok menna doma:pc du:namdcm tani:kvdv:dc ka:begmaycpc ckvdaggom nok Abubv ka:begycpc sc:ko kinmango:pc ka:la du:nc; odokkc nok Abubv sc:kobv kinmango:pc ka:dagnc nom amancm biycpc.
Taycng Among Mitcmircm
(Lu:k 12.33-34)
19“Mo:pvso avkc lcgangc murkongcm lcngkumsuyoka, okolo tapumclang argomc dopakdagnc odokkc dopsongkvdv:dc:sin gvala dopso:dagnc, 20Cmpige:la nok lcga:pc taycng amo:to murkongcm mckumtoka, okolo tapum manggom argomc domang odokkc okolo dopsongc gva:mang odokkc dopso:mang. 21Kapila:nc okoloi nok murkongcm mckumsuycnc, oddoi nok asindc:sin du:yc.
Amvrdok Sakiyc
(Lu:k 11.34-36)
22“Amigdci amvrdok sakiyc. Cdcmpidag nok amigdc aimvlo, nok amvr appv:dc pvangc dorrubyc, 23nok amikdc aiyo:la du:ma:mvlo, nok amvr appv:dc kcmmo-jv:jv:yc. Cdcmpc odo nok saki:dc kcmomvlo, cddvko kcmmo-jv:jv:ycsong!
Ru:ncpvncbv:lang Kanamsv:nam
(Lu:k 16.13; 12.22-31)
24“Sc:kosin ru:tum anyilok agom tadla agercm gerbila:mang; bv akoncm tayumyc odokkc akondcm aipc mc:yc, cdcmanggom akondc aipakpc mc:yc odokkc akondcm aima:pc mc:la mcpakyc. Nolu Ru:ncpvncmc odokkc murkong uidok agercm lckko:pc gerra:mang.
25“Cdcmpidag ngo nolum lubidung, noluk turra du:nam lcgangc mc:dvryoka, nolu okkom dodonc cdcmanggom okkom tv:ycnc, cdcmpcmanggom noluk amvr lcgangc, okkom gcycn cmna. Turra du:namdc donamdcmyam bottaya:ma:lang, odokkc amvrdc gasor-galugcmyam bottaya:ma:lang? 26Do:mvrtok dcnggo:nc pcttangkvdv:dcm kangkvtoka: bulu pidmang cdcmanggom gadmang cdcmanggom kumsu:lo:sin jongkumsumang, odokkc ckvdaggom noluk taycngamo:tok Abubv bulum domodag. Nolu bulumyam arc kaya:ma:lang? 27Odokkc nolukkolok sc:ko mc:dvrra avkc turnamcm lagdukopci turyarmola:dang? 28Odokkc nolu kapila galuk-gasor lcgangc mc:dvrdang? Arvgolok elug appunkvdv:dcm kangkvtoka, kapc bulu punsa:dagnc; bulu cdclosin atv agercm germang onnomsin momang; 29Ckvdaggom ngo nolum lubidung, Solomonkc amin gvdo appv:do:sinci odokbuluk apunkoncmpcsin moru:lvgmangai 30Ckvdaggom Ru:ncpvncbv arvgolok ncsinkvdv:dcm cdcmpc galuk-gasorcm molvgdagmvlo, okodc silo turra dung cmpige:la yamporom mcramnok vmvlo cra:lvgdonc, Bv nolum bojcru:yangko attarcm moru:lvgma:yclang, c:i adji:ko mc:jvgnc tani:kvdvnga? 31Cdcmpiga:lok mc:dvr mc:so:yoka, scmpc lula, ‘Ngolu okkom doyya:ncm?’ ’ Cdcmanggom ngolu okkom tv:ya:ncm?’ cdcmanggom ‘Ngolu okkom gcycbomya:ncm?’ 32Kapila:nc Angu tani:kvdv:dc cdc appv:dcm madag; odokkc noluk taycng amongkc Abubv kindag nolum cdc appv:dcmci madag cmna. 33Cmpige:la maa:danna Bvk migom dokodcm mapo:lang odokkc Bvk dormo agomdcm odokkc cdc appv:dcm nolum biycpc.
34“Cdcmpidag yamporomkc lcgangc mc:dvryoka, kapila:nc yampodc avkcpc yampo mc:suycpc. Longcdok mc:dvrdcm longcdokkcpc pv:motoka.
Tällä hetkellä valittuna:
METIU 6: MISIBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
