SHURAI 33
33
Jakob nou Esau ye Ve Daoyu
1Jakob nou puh pa pfüa lapa zhukhaie Esau sü puhmai kaihdai tao sa-a takouyu zhingaore. Südonou puhnou puhnah maitaoye sü Leah, Rachel ae qilapai ahai hi zhipeire. 2Puhnou qilapai ahai ae puhai nahmaitaoye sü poa palo khailoue. Süthaina hisü Leah ae puhnah maitao alia Rachel ae Josef ye süthailo akhai hi khailoure. 3Puhnou puletao jünou raia tapoa puh jürai nghiki takou loumo koute deiphi peipfüa nakouloua avu anai khurüe.
4Ana Esau nou takou puhye te hinou kholoua münou teire, alia puhai maihai kheinou krare. 5Esau nou naotu maitao ae nahmaitao zhingao loukhaie puhnou noue, “Neye koa salaiyu mai haitao hai thaoe?”
Jakob nou paoe, “Ramai nou leshi shoa ne kilai Eye peikhai touyu nahmaitaoe.” 6Süthaisü qilapai ahai ae puhai nahmaitao takouloua peipfü nakou khurüe. 7Sübüa Leah ae puhnah maitao alia kou akhai hisü Josef ae Rachel nou takou peipfü nakou loua khurüwe.
8Esau nou paoe, “Me taoli raia Eye takou daoyu taosü daisou mai khaie?”
Jakob nou chila peie, “Ajürai nou Eye leshi zhuvea peire donou souwe.”
9Ana Esau nou paoe, “Athaihouna, avei-a alao bue, lah nevei taosü poa ne hi khailoua baio.”
10Jakob nou paoe, “Moe, nenou Eye zhuvea leshiwe toulouzü Enou peiyu natao popeio. Cheche vuzünou ne zhuh ngaolouyu hai Ramai zhuh ngaolouyu khihaore, nenou Eye haizhou koute zhuvea leshi peie. 11Enou neye donou poveyu sapeina haitao hai popeio, daiolouzü Ramai nou Eye leshi shopeia kini alao peie.” Jakob nou paokhai khaiyu vanou Esau nou ae tea peikhai touyu natao sü poloure.
12Süthaisü Esau nou paoe, “Etao veidu tashu laikhe. Enou nejü raia tapeilai.”
13Jakob nou puh hi chila peie, “Ajüraina, nenou süwe süolouzü nahmai hai khouko hae, ae kikhaorütao donou E tsüchomo louhoe. Haitao hai teithe likhia tha-a hutapei louzü teitei nou thaikhai bailai. 14Ne ajü raia tabaio, E-a thalou süsa tha-a kikhaorütao ae nahmaitao sa-a nenou buyu Edom hisü veloumo koute talai.”
15Esau nou paoe, “Sütoulouzü avei mai taoli ne hi khaipei laiho?”
Ana Jakob nou chila peie, “Sükumoa veie, ajürai nou Eye zhuvea leshi peina likhei jüpa baie.”
16Südonou Esau nou süzhou teithe nou Seir tea kuyu Edom hi khaitare. 17Ana Jakob nou Sukkoth hi talou sühinou ki soupaloua puhvei kikhaorütao panou bailoue. Südonou buh sünasü Sukkoth tea zhih saloue.
18Puhnou Paddan-aram hinou tapoa Kanaan maivei teidei Shekem nuhdu hi kaozhou ashi daomoa veteloue alia nuhdu sünaphi dou ali hinou sahpao haoloua bure. 19Puhnou dou sünasü Shekem puo Hamor tyaonah mai hinou sha kaihli peia hüloue. 20Puhnou buh sühinou sheelabuh ali soupaloue, ae sünasü El-Elohe Israel (Israel maivei Ramai) tea kuloue.
Tällä hetkellä valittuna:
SHURAI 33: POUMBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.