SHURAI 25
25
Abraham vei Tyaonah Kukhe Maitao
1Abraham nou maipfü kukheli, Ketura teanou kuyu paiye sü napuloue. 2Ketura nou Abraham hisü Zimran, Jokshan, Medan, Midian, Ishbak ae Shuah napeie. 3Jokshan sü Sheba ae Dedan puoe. Dedan nahpoutu taosü Asshurim, Letushim alia Leummim. 4Midian nahpoutu maitao hai Ephah, Epher, Hanok, Abida ae Eldaah. Haitao hrülaisü Ketura nahmaie.
5Abraham nou puhvei kini abu teitei hai Isaak hi peikhaire. 6Ana puh chapfü kukhe nou napeiyu nahpoutu maitao hisü puhnou sapeina peie, alia puhnou hria bukinou puletaoye sü Isaak hinou dou-a teinghi palo seitare.
Abraham Thaiyu alia Puhye poa Vuhyu
7-8Abraham nou chükhaokhao-a puhnou po 175 payu hinou deiphao tachotare. 9Puh nahpoutu Isaak ae Ishmael nou puhye sü Mamre teinghi palo buyu Hitmai Zohar nahpoutu Ephron vei dou, Makpelah chuh qulu nahi daovuh peie. 10Dou sünasü Abraham nou Hitmai hinou hüloue. Abraham ae Sarah puchamai ahai nou sühi vuhpeie. 11Abraham nou thaitayu thai, Ramai nou puh nahpoutu Isaakye shiha peie. Alia Isaak nou Beer-la-hai-roi hi ho hrütare.
Ishmael vei Tyaonah Maitao
12Haitao hai Ejipt pfüpai, Sarah qila Hagar nou napeiyu Abraham nahpoutu Ishmael vei nahpoutu maitaoe. 13Tsükhana zhih sü Nebaioth toue. Süthaisü Kedar, Adbeel, Mibsam, 14Mishma, Dumeh, Massa, 15Hadad, Tema, Jetur, Naphish ae Kedemah. 16Puletao sü tyahrü kiahai vei puopaoh maitaoe, alia puletao vei nuh ae puletao nou ve buyu fühao alili hai puletao zhih hinou sapei khaitoua bue. 17Ishmael nou po 137 hrüloua thaitare, alia puhye sü kikhamai nou vuhyu khüh hinou poa vuhpeie. 18Ishmael tyaonah taonou Ejipt teinghi palo Assiria hi talouyu ludu hi buyu Havilah ae Shur kohinou hrüe. Sükua puletao nou Abraham tyaonah kukhe maitao nou buyu buh hinou tyakua hrüe.
Esau ae Jakob ye Nalouyu
19Abraham nahpoutu Isaak vei ko sü haibüe. 20Isaak nou Rebekaye nalouyu phaki puh hai po raidai pare. Rebeka hai Mesopotamia hi Aramea mai Bethuel nah naotupaie alia Laban tupaie. 21Puh chapfü Rebeka hai nahah pfüli souyu thaifüa Isaak nou puhye donou Mapao hi veachi paopeie, alia Mapao nou puhvei akho sü noupeia Rebeka sü nahmai hrüloue. 22Nahtou ahai sü puh pouhi bua bukinou alinou aliye khaovare, südonou puhnou “Haibü louzü E daisou nou hriwe?” tea paore. Süthaisü puhnou Mapao hi noure. 23Alia Mapao nou honapai hisü paoe,
“Tyahrü ahai ne pou hinou bue,
ae nenou nalaiyu sühai sü chavei laimoe,
mai linou kukhe alina jünou khoulai,
jürai nanou thaihou navei kuvah soulai.”
24Nayu teile kouyu phaki, puhnou nahbei naloue. 25Nah narai nasü hora-a ae pfüphao maipfüa naloue, südonou puh zhih sü Esau tea sapeie. 26Süthaisü puh thaihou nasü Esau phi keitsü poa nakouloue. Südonou puh zhih sü Jakob tea saloue. Puhaiye nalouyu kisü Isaak hai po rairou pare.
Esau nou Puhvei Tsüzha Zhotou Louyu
27Nahtou hainou dupaloure, alia Esau sü sou husüshoe ae rekou nou sühao tayu jüpae, ana Jakob louzü kaona-a kikha nou buyu mailie. 28Isaak nou Esau ye khue daiolouzü Esau nou sou southaloua pove puhye peiyu donou, ana Rebeka nou Jakob ye leshie. 29Teitheli Jakob nou vudzü hea buyu phaki, Esau sü dou hinou pouzü shoa ki hi khaive-e. 30Esau nou Jakob hi paoe, “Eye nevei khaovudzü horayu nasü peio, daiolouzü E pouzüre.” (Südonou puhye sü Edom tea kuwe). 31Jakob nou paoe, “Nevei tsüzha nasü Eye zhopei raiwo.” 32Esau nou paoe, “Esü thaiyu laire, avei tsüzha nasü E poa daisoulai?” 33Jakob nou paoe, “Ahi raia choupeio.” Puhnou choupeia puhvei tsüzha nasü Jakob hi zhopeiwure. 34Süthaisü Jakob nou Esau ye raokhao ae khaovudzü peie, puhnou touloua kushu tare. Sükua Esau nou puhvei tsüzha nasü zhotou loure.
Tällä hetkellä valittuna:
SHURAI 25: POUMBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.