SHURAI 19
19
Sodom Mainou Mah Souyu
1Rakivamai hainou Sodom hi koukhedao nou ve-e, ana sükisü Lot hai Sodom vei robomü hinou chobua nou bue. Lot nou puhaiye ngaolouyu phaki lashu loua puhaiye tako daoe alia puh pah pfüa deiphi nakouloue, 2alia puhnou paoe, “Apaopuwo, Enou nehai hi khowe, zhuvea-a nou ne kilai aki hi zhoukhei ve phi dzükhü loua chao baio, alia dosho shona kushuzhi loua ne hainou tare veidu nasü tabaio.”
Ana puhai nou “Moe, ahaio zhoukhei kijüdu hinou chaoa bailai,” tea paore.
3Ana Lot nou puhaiye kutai louyu vanou, puhai-a puhye koa puh ki hi vere. Lot nou puhaiye khei thoumoyu raokhao khaoloua tovai soupeie alia puhai nou touloure.
4Ana puhai züta moa bukinou Sodom nuhdu hi mai taidu hrülai nou tave ki sü sühao loure. 5Puletao nou Lotye laloua paoe, “Zhoukhei ne ki hi houyu mai daiki bue? Vakou sapa peio, Etao-a puhai zhu shiloulai.”
6Lot nou kipa paloua puh thailo kikhusü khure, 7alia puletao hisü paoe, “Athaihou jürai maitaore, Enou neletao hi khowe, haibüyu zhai ashi soupeiso. 8Zhukhaio, mai linoua sabu-sazü khaimoyu anah naotumai ahai bue, Enou puhaiye sü neletao hi sapa peilai alia puhai hisü neletao nou sounü souwo, ana aki hi ve houyu mai ahaiye halia soupeiso, daiolouzü puhai sü akikha khevai talou bure.”
9Ana puletao nou Lot hisü paoe, “Etao ludu vaipeio, ne shetoumai ali soua hainou ve Etaoye paodou laiwu? Ne raoso, molouzü honahai jünou neye shipua soupeilai.” Süthaisü puletao nou Lotye khaolaiwua kikhu dakholai tea takoure. 10Ana shemai ahai sünou bah thaipa Lotye kikha daothou loua kikhu sü khuwure. 11Alia puhai nou kikhu hi buyu mai taidu hrülai nghithou soucha khaire, sübüa puletaoye sü panou kikhu phouha-a baire.
Lot nou Sodom Thaowua Tayu
12Süthaisü mai honahai nou Lot hisü paoe, “Nuhdu haina hi nevei kityarai mai aliro buhae? Bulouzü nuhdu haihi nou sa-a tapalo. 13Daiolouzü nuhdu haina souhare donou Mapao nou ahaiye haihi seivewe. Mapao nghoujü nou nuhdu haina nou mah souyu hai chosha louhore.”
14Südonou Lot nou tapaloua puh nah naotupai ahaiye nyalaiyu nahai hisü “Nuhdu haihi nou tapalo, daiolouzü Mapao nou nuhdu haina hai souha laire” tea paopeie. Ana puhai nou süsü pahnü souwe tea cholou baire.
15Shona teithe rarapa khaie, rakivamai hainou Lotye “Tharao” tea paoe. “Tashulo, ne chapfü, ae ne nahpai haiye sa-a tapalo, molouzü nuhdu haina souhayu hinou neletao-a koa souhashulai.” 16Ana puhsü tapanü more. Sükuyuma Mapao nou puhye zhuvea loure, südonou mai honahai nou puhye ae puh chapfü alia puhnah naotupai ahaiye sü baokhao süthailoua nuhdu hinou vakou sapa khaipeie. 17Puletaoye vakou sapakhai peiyu thai maili nanou paoe, “Neletao hriloure donou tutalo, thailo reive zhuso, moa deikho tarali hia chaoso, deichi hi tupalo, molouzü neletao-a mei nou deitha shulai.”
18Ana Lot nou puhai hisü paoe, “Apaopuwo, Etao ye panou sükua souso. 19Nehai nou Eye khuleshi peia ahrirai khailu peie, ana doushoyu deichi hi Ewo tupa louhoe, sühi hotelou mojünou mei nou Eye taongi loua bailai. 20Zhukhaio, hohi tuve lousüyu nuh taitou ali bue, Eye panou hohi tukouloua baio. Süku louzü ahrirai khailu lousüe.”
21Puhnou chila peie, “Süsüa Enou aetou peilai, nenou pao-a buyu nuh sünasü souha laimoe. 22Thashoa tutakhaio, daiolouzü nenou nuh sünahi vete loumo koute, Enou halia soushi laimoe.”
Südonou nuh sünasü Lot nou taiyu tea kuyu vanou Zoar (taiyu) tea saloue.
Sodom ae Gomorrah Souhayu
23Lot nou Zoar nuh hi vete louyu phaki teinghi pare. 24Süthaisü Mapao nou raki vanou Sodom ae Gomorrah nuhdu ahai hisü meichuh ae mei seikou thoure, 25sükua puhnou nuhdu sühai, deikho teitei, mai hrülai alia deiphi hinou paopayu na veishi souha khai toure. 26Alia Lot chapfü hai puhnou thailo reida khaive zhuyu vanou taike ali vita-a baire.
27Abraham nou thainesho shona puhnou Mapao nghoujü nou lahyu buh hisü tahoe. 28Puhnou Sodom ae Gomorrah alia deikho teitei hi zhukouyu phaki meikhao hai mei alao deiyu büa meikhao payu zhingaoe. 29Ana Ramai nou deikho hi buyu nuhdu ahaiye souhayu kisü Puhnou Abraham ye lichopeie, alia Lotye panou hriloure donou tupaloue.
Moab mai alia Ammon mai Hrüpayu Ko
30Lot nou Zoar nuh hi hrüa buyu ngaopiyu donou, puh nah naotupai ahai koa deichi hi tapaloua lya qulu ali hinou hrüe. 31Atsüpai nou anapai hisü paoe, “Ahai puo hai tsüloure, alia deiphao haihi maili noua ahaiye napeire mai ngaolou hore. 32Khe, ahai puoye zhaoh nou souzhi loua puhye koa sazüloua nahmai ngaolou laishe.” 33Puhai nou sükua süzhou khei puhai puoye zhaoh panou keloua zhire, alia atsüpai nou talou puoye koa züloure. Kabüyu phaki puhnou talou züloue alia kushu tare touyu puo nou halia sümoe.
34Thainesho shosü atsüpai nou anapai hisü paoe, “Zhukhaio, dokhei Enou apuoye koa züre, zhoukhei-a puhye zhaoh panou keloua zhi laikhe, alia ahai puo hinou nahmai ngaoloure donou ne-a talou puhye koa zükhaio.” 35Sübüa puhai nou süzhou khei-a puhai puoye panou zhaoh keloua zhire alia anapai nou talou puoye koa züloure, alia anapai nanou kabüyu teile hinou talou züloue alia kushu tare touyu hai puo nou halia sümoe. 36Sükua puo hinou Lot nahpai ahaisü nahmai hrüloue. 37Atsüpai nou nahpoutu ali naloue, alia puh zhih hai Moab tea sapeie. Puh hai chukoute Moab mai vei puopaoe. 38Anapai nou nahpoutu ali naloue, alia puh zhih sü Benammi tea saloue. Puh hai Ammon mai vei puopaoe.
Tällä hetkellä valittuna:
SHURAI 19: POUMBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.