SHURAI 12
12
Ramai nou Abram ye Kulouyu
1Chuo Ramai nou Abram hisü paoe, “Nevei füdei, ne kikhamai alia ne puo ki thaokhaia Enou ne hi ngaopei laiyu füdei hisü hotawo. 2Enou neye tyahrü aduli soupeilai alia Enou neye ha peilai alia ne zhih sü soudu-sousho peia neye panou maikhemai vei shiha nasü soulai.
3“Neye shiha peiyu maisü Enou ha peilai.
Ana neye chaa peiyu maiye sü Enou chaa peilai.
Alia ne vanou tyahrü hrülaiye Enou shiha peilai.”#12.3 Alia ne vanou...peilai; moa Enou neye shiha peiyu büa tyahrü hrülai nou puletao-a shiha peio tea ahinou kholai.
4Ramai nou paopeiyu thaifüa Abram nou tapare, ae Lot-a puhye koa tae. Puhnou Haran hinou tapayu phaki Abram hai po rainaingou pare. 5Abram nou puh chapfü Sarai ae puh thaihou nahpoutu Lot, alia puhvei kini teitei ae Haran hinou ngaolouyu qila mai hrülai sa-a Kanaan füdei hi hore donou tapare.
Puletao nou Kanaan hi velouyu phaki, 6Abram nou Shekem nuh hi sheeyu Moreh hi buyu phüsüübe tachoe. Süteile kisü Kanaan mainou dei sünahi hrüa bue. 7Süthaisü Mapao nou Abram hi ve zhungaoa puh hi paoe, “Dei haina hai Enou nevei tyaonah maitao hi peilai.” Südonou puhye ve ngaopeiyu Maopao ye thore rathobuh ali puhnou soushu loue. 8Süthaisü puhnou Bethel teinghi palo deichi lova tapaloua teinghi loulo Bethel, teinghi palo Ai sühaiko hinou sahpao haoloua bure, alia sühinou puhnou rathobuh ali soushuloua Mapao ye thoe. 9Süthaisü Abram nou tapu poa Negeb hilosha taho tare.
Abram nou Ejipt hi Talouyu
10Ana Kanaan teidei hisü tokaayu ve daore. Südonou Abram nou phajü touli hrüre donou Ejipt teidei hisü kouh tare, daiolouzü sühi hai tokaayu nahai shishore. 11Puhnou Ejipt hi talou laiyu phaki puh chapfü Sarai hisü paoe, “Ne hai hüvei shoyu naotumai alie. 12Ejipt hi mainou neye ngaolouzü, hainapai hai puh chapfüe tea choloua Eye southa shulai alia neye southa laimoe. 13Südonou ne hai atupai baie tea paolo, sütou louzü ne vanou ahrirai khailoulai ae Eye sheshetou peishulai.” 14Abram nou Ejipt hi talou khaie, Ejipt hi buyu mainou puh chapfü Saraiye hüvei shoa zhingao loure. 15Pharaoh veo vei peikhomai kamai-a nou puhye ngaoloua Pharaoh hisü tave puhye paoshore alia naotupai ye sü Pharaoh ki hi save khailoure. 16Naotupai vanou Pharaoh veo nou Abram ye sü veishoa sheshe peie, alia zhaotu, chode, rheisüh, racho ae qila naotu poutu mai taoli peie.
17Ana Pharaoh nou Abram chapfü Saraiye salouyu vanou Mapao nou Pharaoh hi ae puh kikhamai hi ngaopi shoyu sounou seive thoupeie. 18Südonou Pharaoh nou Abram ye kuloua paoe, “Nenou ahi souyu haisü daige? Naotupai haina hai ne chapfüe touyu daisounou ne ahi rai-a paopei moe? 19Puh hai netupai baie tea daisounou paopeia Eye panou achapfü soure donou polouro? Ne chapfü sü haihi buna! Saloua buh hai hinou tawo.” 20Pharaoh veo nou puhvei maitao hisü panou tawo tea kharochi peia puhye panou puh chapfü ae puhvei kini teitei noupu koa tare.
Tällä hetkellä valittuna:
SHURAI 12: POUMBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.