MAAK 14
14
Jesu Ithenii Emanjong
(Met 26.1-5; Luk 22.1-2; Jhn 11.45-53)
1Manlaennii vokhehkho chor ynvaemah kuurvachu hung-vivachii inii ninii avaehrae aanchung jaethiim aere thiimthang aeng Jesu chu ynsaangkhe ynruwhjaeh ing suwrnungka thehchehva kenchiiva ichii khaena emanseer; 2akhaechuve mee vakhae kaarna isii ikha asuwhniimah ing kuurva inii sungna suwrmah manuw enchii.
Jesu Bethani nache Richiithou Aataehpeeh
(Met 26.6-13; Jhn 12.1-8)
3 #
Luk 7.37,38 Bethani na ynchor ing ina Simon eenna Jesu ing amaarpha nache rupanuw yngkheh ing amen iruwpak ynthiingjaeh richiithou abuwr yngkheh vechika, ama ing richiithou buwrchu imongka Jesu rusaena achirpa. 4Amana ong ae kaarna mee areh aenche embarung isii ing enriir, “Ynchii khaena ikaniimahna richiithou amamaangva?” 5Dinari chathumna ynjuwr naka sara ae ningna ympivachiichu ta aeka enuw ing rupanuwchu enriirsah.
6Changvakonchu Jesu ing ariir, “Tusatah rasiing, ynchii khaena rupanuw havi nemanjaava? Ama ing kataklina nong isapak yntupeehpa. 7Sara ae chuve apha om bakhaena nenuwthoh onghak nachuw, amanche nenuw ing engkhaena tuning nen-chii isa nongchu nentuchehsa; changvakonchu kive nenuwthoh apha vakhaena onghakmah manuw. 8Ama ing achehsah nongchu atupa; ki kathikmah rirae ama ing maensa ing richiithou eetaehpa. 9Neningna atatak ing kariirnah, laaruw paam aangkhengna isa chong aantong raenche rupanuw havi inge yntupeeh nong ikho ama yndennii khaena yntong vaata.”
10Amana suum ariinii kaarna ynvae Judas Iskariot ing Jesu irensahnii khaena aanchung jaethiim ae ningting vaksa. 11Enuw ing ama achongchu ensiitahna enrotha iroh ing seer ipeeh ynrusae vokhehkho ama ing Jesu chu irensahnii apha icha amanjongpa.
Akuurchiimnii Manlaennii Imaar
(Met 26.17-30; Luk 22.7-23; Jhn 13.21-30)
12Chor ynvaemah tar isahnii ahaar-pa iniine jao theh ae naka maarva enchii inii ahenpharae sebok aeng Jesu ningna ensii, “Nang ing manlaennii yndennii khaena imaarniichu hesinungka unakhe ihesir naadikva?”
13Jesu ing sebok ynniimeh jeba-thenka ariir, “Khuwruung nase vakruw, amana chiibeer areen mee yngkheh ing eentuwhfhuw vaata; ama aanuwchu jiiruw, 14amanche ama ing aruwhniitah een aafhuw ningnache riirruw, ‘Oja ing ariirnah, ki ing kasebok ae thoh manlaennii yndennii khaena imaarniichu una-khenva achiinah taruw?’ 15Amana chungtanii ka iruung yngkhehna ama ing manriipka thoraang atuvasah imansiivaata.”
16Sebok aenche khuwruung ting-che vak aeka Jesu ing eningna ariir vakhaechu engaantuwh fhuwpa; amana enuw ing manlaennii yndennii khaena imaarniichu thoraang entupa.
17Khuri ijungvithoh ynruw ing Jesu ing suum ariinii ae thoh vaksae. 18Enuw ing emaar raenche Jesu ing ariir, “Ki ing neningna atatak ing kariirnah, kithoh kensahhak nengkaar tanii mee yngkheh ing ki irensavaata.”
19Enuw embarungriir ija ing yngkheh yngkheh ing kipingmo ta aeka ensiipa.
20Jesu ing eningna ariir, “Isahnii yngkhehna kithoh tar kensahhak suum ariinii nengkaar tanii mee yngkhehva. 21Akhaechuve Mee Sapa khaena ynziihka omchu suwhna, changvakonchu Mee Sapa rensavachii mee khaena chembe aajaehmeh ijaaniiva. Ama meechu jungommah nave akhaena sakseh vachiiva.”
Aafhuw Ningsiih Thaemin
(Met 26.20-30; Luk 22.14-20; 1 Kor 11.23-25)
22Enuw ing emaar raenche Jesu ing tarchu verika, bor apithoh abakhiipa, amana eningna jepika ariir, “Saruw; havi ki kashava.”
23Vokheh Jesu ing vomrip chiichu verika bor apeeh aanuwnache, eningna pika engkheng inche enginpa. 24Changlae Jesu ing eningna ariir, “Havi mee vakhae khaena ynta kasii chongngiir chuva, 25Ki ing neningna atatak ing kariirnah, Thangnang iruwngpaamna ki ing itharpeh inva kachii iniichu aphamah raentaangche ki vomrip chii athar vokheh inmahning.”
26Aanuwnache enuw ing la tuaeka Oleep Bung ting sisae.
Jesu Pitar ing Rumahvachii Maen ing Ajeer
(Met 26.31-35; Luk 22.31-34; Jhn 13.36-38)
27Jesu ing eningna ariir, “Nenuw vakhae ing ki ibathen vanenta, havi ynziih vasahva; ki ing jao aacheerchu manvar vakata, amana ajao aenche taenchir vaatae. 28#Met 28.16Changvakonchu ki ing athar vokheh hangring ningka nemaana Galili ting hesi vakata.
29Pitar ing Jesu ningna ariir, “Enuw vakhae ing ibathen khang ae nakho ki chuve utaraenkho bathenmah ningchii.” 30Jesu ing Pitar ningna ariir, “Ki ing naningna atatak ing kariirnah, atanii jaenrap aarkhuung ing vanii akhuwngmah rirae nang ing vathumchak irumahtanii.” 31Chang-vakonchu Pitar ing athar vokheh ariir, “Ki nangthoh ithiihak vakhang nakho irumah suptu tumah ningchii.” Pitar ing ariir vaangche enuw vakhae ingkho changche enchii.
Jesu ing Getsamani na Athamsah
(Met 26.36-46; Luk 22.39-46)
32Enuw ing Getsamani ichii min tingche vaksae, amana Jesu ing asebok ae ningna ariir, “Ki ing kathamsahrae nenuw havane heongruw.” 33Amana Jesu ing Pitar, Jems vokhehkho Johon ruwka amanche inempak ija ing rungneh ynthehsa. 34Amana Jesu ing eningna ariir, “Kalaetha i ithii ynthongvaang inempak jaana, havane ongnuwna hahjaehruw.”
35Amana Jesu ing maesokting topoh vasika ruwruwna akheerkhuwh mansinka athamsah, havi irupeeh taniive kaningtanii apha i imanlaen-peehsar achii. 36Amana Jesu ing ariir, “Aba, Apa, naningna chembe aangkhenglaang aruchirsa. Kaning-tanii havana ijachaam kam i iripeehsar; changvakonchu ki ing kamanden ynsuwhmahsana, nang ing namandenchu ynsuwhrasiing.”
37Jesu ing ahuunglae enuw ing ijaar aechu amupa, amana Jesu ing Pitar ningna ariir, “Simon, nang ijaar vachii? nang apha yngkheh pangkho nahahcheh mahva? 38Nenuw batheem tingche nenbukniimah ing hahjaehruw vokhehkho thamruw, laetha ingve amandennah changvakonchu hakchaang ingve suurna.”
39Athar vokheh Jesu ing vakka achingnii thohkhe aanghakjaeh ing athamsah. 40Amana athar vokheh Jesu ing ahunganrirae enuw ing ihejaar aechu amu, akhaechuve enuw emik inempak ikhuw; amanche enuw ing Jesu ningna ynsaangkhe basangva kenchiiva ichii manghuw mahsae.
41Jesu ing avomanthumnii ahunganrirae eningna ariir, “Nenuw jaarchuwka ija nenbasum jaehva? Aphachu ahenphapa! Mee Sapa i isii icher kikting ynrensahpa. 42Hang-suwruw, inuw sitaruw; enruw, ki ynrensah mee thohche ynneeng samuw.”
Jesu Ensuwr
(Met 26.47-56; Luk 22.47-53; Jhn 18.3-12)
43Jesu ing achong raenche sebok suum ariinii kaartanii Judas Iskariot ing aanchung jaethiim ae, thiimthang ae vokhehkho upa ae thoh ynruw ing, chemthar vokhehkho rumor thoh ynruw ing mee inempak vathengsae. 44Amana Jesu arensah Judas ing eningna buwtinnii yngkheh apeeh ae, “Ki ing aabeeng katum ama mee chuva; amachu suwrnuwna ruwruw.”
45Amana Jesu kuurting ama ing ithupak ing vakka ariir, “Aafhuw!” taka aabeeng atum. 46Chukhaenache enuw ing Jesu chu suwr aeka emphuwppa. 47Changvakonchu engkuurna ong mee yngkheh ing chem isuwka Aanchung Jaethiim meenae yngkhehchu aana asaehjohpa. 48Amana Jesu ing eningna ariir, “Lamruw isuwr vaangkhe chemthar re rumor chisuwka nenuw ing kichu isuwr ivatheng vachuw? 49#Luk 19.47; 21.37Anasiir rumniieenna kamanchuw raenchuw nenuwkho ongchuw changvakonchu nenuw ing isuwrmahchuw. Havi ynthiing thiiziihchu ahungchumnii khaenava.”
50Enuw vakhae ing Jesu chu bathen aeka taenchirsae.
51Iler yngkheh ing peenpang singka Jesu aanuw ahenjii; enuw ing amachu suwrkenta enchii, 52Changvakonchu ama ing peenchu bathenka asae ing taensa.
Aanchungpuh maana Jesu Vajeer Entu
(Met 26.57-68; Luk 22.54-55,63-71; Jhn 18.13-14,19-24)
53Jesu chu Aanchung Jaethiim ongniiting enruwpa; amana aanchung jaethiim ae, upa ae, vokhehkho thiimthang ae engkheng yngkongsae. 54Amana Pitar ing Aanchung Jaethiim vajeernii een sukmae ipha ing Jesu aanuw yndahhak ing ajenjii; amanche aarung mee ae thoh ama ing mi uka ong. 55Aanchung jaethiim aere upa ae engkheng ing Jesu ithehnii khaena ataklina ichummah saarkhii enjong changvakonchu tuwhmahsae. 56Akhaechuve mee aanem ing Jesu taklina ichamah saarkhii empeeh, changvakonchu saarkhii empeehchu yngkheh pangkho yntinting yntincheh mahsa.
57Amana mee areh aeng hangiir aeka Jesu taklina ichummah saarkhii havi enghenpeeh, 58#Jhn 2.19“Mee ing aseem rumniieen havi mamaang ningka, inii nithum sungna mee ing aseemmah yngkheh ki ing seemva kata,” achiichu kenuw ing kensii. 59Changche ichii ing riirkhang ae nakho ensaarkhii chaapchu suptin yntincheh mahsa.
60Amana Aanchung Jaethiim ing hangiirka Jesu chu asii, “Nang nabasangfhuw omahva? Mee aenge nataklina imanraar aeka saarkhii empeeh icha ynchiiva?”
61Changvakonchu Jesu ing ahuw turudeh ing ongka basang mahsa. Amana athar vokheh Aanchung Jaethiim inche Jesu ningna asiireeh, nang bor apha Khrista chuvachii? 62Amana Jesu ing basangka ariir, “Ki amachuping; nenuw ing Mee Sapa inche Aapirseh ruwreng tachangna ong vokhehkho thangbaen tanii ruwrduhna ijuwng muvanenta.”
63Amana Aanchung Jaethiim ing apeen isiihka ariir, “Havi chungna inuw ing saarkhii ynchii jongvaan chiiva? 64Jesu inge ithipak ing ichong nenuw ingkho nensiipa. Nenuw ing ynchii nemandennah?” Amana enuw vakhae ing Jesu chu itheh aru miraar empeehpa. 65Amana mee topoh aeng Jesu taklina bachir aeka vokhehkho amae mangkhum aeka engabeeng amanche achuw ing eebeengva riirla ta aeka ichong embasen.
Pitar ing Jesu Arumah
(Met 26.69-75; Luk 22.56-62; Jhn 18.15-18,25-27)
66Amana Pitar ing vajeernii een sukmaena aonglae Aanchung Jaethiim meenae rupanuw yngkheh ihuung; 67amana Pitar ing mi auchu amutah nache rupanuw inche enka ariir, “Nangkho Nazaret Jesu thoh ynruwhakchuw.”
68Changvakonchu Pitar ing rumah-ka ariir, “Nang ing ynchii nariirva ki manghuwkho manghuwmah ing vokhehkho manghuw chehmah ing.” Amana Pitar ing taangting jungsuwhsa. Changlaenche aarkhuung inche khuwngsa.
69Amana meenae rupanuw ing amachu muka aruvaena ingiir ae ning-na hava mee i enuw engkaar taniiva taka ariir. 70Changvakonchu ama ing athar vokheh rumahsa. Amana apha topoh aanuwna akuurna ingiir aeng Pitar ningna enriir, “Nang i amarem vachii, akhaechuve natak i Galili tanii vachii.”
71Changvakonchu Pitar ing ataksah siraap ympika vokhehkho chongreep itu basenka ariir, nenuw ing nenriir mee havi khaene ki ynchiikho manghuwmah ing.
72Aphanache aarkhuung ing avoma-niinii khuwngsa. Amana aarkhuung ing avomaniinii akhuwngmah rirae nang ing ki vathummeh irumahtanii taka Jesu ing aningna ariirchu ynsiisaka abarungriir nungaemahpak ing chapsa.
Tällä hetkellä valittuna:
MAAK 14: MOYO
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
