Kusintii Andunya 6
6
Daa laalɔi amanɛ ŋa
1Si waati iyi amanɛ ŋa à sinti ku kpɔ si ilɛ nɔ à bí ama inaabo ŋa, 2ŋɔi inɛi Ilaaɔ̃ ŋau #6:2 inɛi Ilaaɔ̃ ŋau Inɛ ŋa a kù mà sãa sãa inɛ ŋa iyi à waa fãa si afeu ihɛ̃. Inɛ gɔ ŋa à ni dimii Sɛti ŋai à so abo si dimii Kaɛ̃ɛ, inɛ gɔ ŋa mɔ à ni amaleka ŋai à kpaasi ara nŋa bɛi amanɛ ŋa à naa à so abo si inɔi amanɛ ŋa. à yɛ iyi ama inaaboi inɛi andunya ŋau à sĩa nɔ à cica ŋa à ce abo. 3Ŋɔi Aɔ̃ Lafɛ̃ɛ í ni, hundem kaa maa wa si amanɛ do ajɔ fei domi amanɛ ilu arai nɔ kukpɔi adɔ̃ɛ kaa re adɔ̃ cifa (120). 4Waati bɛɛbɛ mɔkɔ ngbɛ ŋai à wa si andunya hee do waati iyi inɛi Ilaaɔ̃ ŋa do ama inaaboi inɛi andunya ŋa à tɔtɔɔ à bíò ama nŋa ŋa. Mɔkɔ ngbɛ nŋu ŋau bɛ aŋai à nya iri wo tako.
5Aɔ̃ Lafɛ̃ɛ í yɛ inɔ kukãi amanɛ ŋa í la í caa si ilɛ, lasabui idɔ nŋa ajɔ fei si laalɔ nŋu akãi í ya wa. 6Nɔ inɔɛ í na í fɔ do ankãanyi do iyi nŋu í ceò amanɛ ŋa si ilɛ, í roo jiida jiida si idɔɛ. 7Nɔ í ni, an kpa irii mii iyi ǹ taka fei si andunyau ihɛ̃i. Hai amanɛ do mɛɛmu ŋa do iŋa hai nɛ nto ŋa hee do yɛi ŋa fei an kpa ŋai domi inɔm í ya maa fɔi do iyi ǹ takaò mii ŋau bɛ fei. 8Amma Aɔ̃ Lafɛ̃ɛ í cea Nowee didɔ̃.
Nowee
9Faajii nyaanzei Nowee wee. Nowee amanɛ dee deei, wa jirima Ilaaɔ̃ si inɔi inɛi waatiɛ ŋa. Ilaaɔ̃i wa too. 10Nɔ í bí ama inɛmɔkɔ mɛɛta, Sɛmu do Kamu do Zafɛti. 11Ilaaɔ̃ í yɛ iyi andunyau í bɛjɛ, nɔ inɔ kukã wa kɔ̃ɔsii. 12Ŋɔi Ilaaɔ̃ í cɔ inɛi andunya ŋa í yɔɔ iyi laalɔ nŋau í la í caa, domi daai inɛ fei í bɛjɛ si andunya.
13Nɔ Ilaaɔ̃ í sɔ̃ Nowee í ni, ǹ dasi idɔ n kpa mii ilu hunde fei si andunya, domi aŋai à jɔ̀ inɔ kukã í la si andunya. An kpa iri nŋai si ilɛu fei. 14Awɔ Nowee, ce akɔi inyi do jĩi ndii gofɛɛ. Nɔ i jɔ̀ ku nɛ ilaawa ŋa nɔ i dasi kɔntaa si inɔɛ do anyiɛ fei. 15Yaase bɛi aa coo wee. Kusɔi akɔi inyiu ku to agbãawɔ cĩɔ mɛɛta, nɔ kucĩɛ mɔ ku to agbãawɔ ciitaa, nɔ kugbokaɛ mɔ ku to agbãawɔ kuntaa. 16Nɔ i jɔ̀ ku jɛ kukpɛkɛ mɛɛta. Nɔ i kɔ́ɔ. Hai tengi bii ì kɔ́ɔu bɛi aa nya fɛrɛnti do ikpa ilɛ wa iyi kugbokaɛ á to agbãawɔ akã. Fɛrɛnti iyi aa nyau á kaako akɔu feii. Si anyiɛ nɔ i nya andɛɛ si cingaaɛ i daa si gambo. 17Bɛi ǹ sɔ̃ɛu bɛ fei, ce bɛɛbɛ domi an jɔ̀ inyi ku kɔ̃ si andunya fei nɔ inyiu ku jɛ mii ilu hunde baa yooma fei. Mii iyi í wa ilɛ fei á kui. 18Amma awɔi an ba akabuu ku dĩ. Lɔ akɔi inyiu awɔ do amaɛ ŋa do aboɛ do aboi amaɛ ŋa ajɔ. 19Mii iyi wa mi fei, dasi ŋa minji minji si akɔi inyiu akɔ do abo, ku ba a ba faaba do awɔ takaɛ fei ajɔ. 20Yɛi dimi ikã ikã fei, do mɛɛmu dimi ikã ikã fei, do iŋa hai nɛ nto dimi ikã ikã fei, minji minjii aa naa a lɔ bi tɛɛ akɔ do abo ku ba a maà ku. 21Nɔ ijɛ dimi iyi à ya jɛ ikã ikã fei i tɔtɔɔɛ bɛ ku ba ku na ku jɛ ijɛɛ do ti mɛɛmu ŋau. 22Ŋɔi Nowee í ce mii ŋa iyi Ilaaɔ̃ í sɔ̃ɔu fei dee dee.
Tällä hetkellä valittuna:
Kusintii Andunya 6: MKL
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
2021, SIM International et UEEB