Ripimae Agaa 17
17
Gote-me Abram Kagaa Bi Kasa.
1Abram-na mali 99 patinaloa, Adaa Aa nipu piri ipua lalo: Ni Gote purina-re yapulu oroyalo nina rolo-para pirape. Goa pua epeanu pape. 2Nina rogae agaa nerapu ora palua, goa pua nena onaa maadayalua.
3Go rabu Abram nipu suna adaneawa kubuniasa, go rabu Gote-me nipu-para lalo: 4Go rogatepa agaana papeare go lapatoda nere ruru adapuna aara pirali. 5Nere abiare Abram pida wala nateme, nena biri abiare Abraham teme, akoloya nere abia onaa adapuna aara maapiralua. 6Ne madare ini adapu etalia. Goa pua ruru adapu pitimi pare medalomare aa mudu pitimi. 7Go rogatepa agaare oroyalo salia. Goa pua ne sana rikirana page, gome madu saliade nogo nakinuna rikirana page, nimina Gote pitua. 8Go Kenan onaana su ne abia go kimisu ipua epaa ayere, neme nepara nena orope madusalide nogo naki walo diayawa, niri nimina Gote pitua.
Yogane Rugulapena Rogae Aaga.
9Goa pua Gote-me Abraham-para lalo: Nere neme goapa toadare waru ratape nepara nena ruru orope epaliminu page, neme go rogatepa agaa waru pagoa ratalepape. 10Nerapu agaa gupa rogato. Nena ruru orope epaliminu page, Nimi goa pipape. Aa naki rayona yogane puduri rugutapape. 11Ora rayona yogane puduri rugutapape. Go robore sana roga i-agaana robo. 12Naki rayore yapi 8 popenaloare, yogane puduri rugulatepape, orope maralalimide rayona page komea goa pipape. Pa ruru para kaboria epe onaana sinuna page kogono aanuna sinu page. 13Nena adare-para madininu page kaboria epenuna page go rayona yogane puduri ora rugulatepape. Go robomere nina, nimi rapu rogae agaare (pa sama lama palia). 14Yogane na ruguteade aanakinuri nina ruruda diaga ratu rubape, gore nina rogae agaa ruguta.
15Gote-me Abram para wala lalo: Nena ore Saraina, bi rado ma-ato, abiare nipuna biri Sarah lape. 16Nipu neme maepealua, goa pua nena naki mada madialia. Nipu neme maepealua pulu nipu mada ruru adapu epalimi. Aa mudunu page nipu mada opalimi.
17Go rabu Abram-me kubuniawa, Gote adaa bi kasa, nipume giri-loa kone gupa isa. Gorupa mali 100 pope yomagae-na naki madiata pae? Sarah page mali 90 yadega naki mada madialia pae? 18Gore Abram-me Gote para lalo: Nena lae-are Ismael mada na palipae?
19Go rabu Gote-me lalo: E, yapare, nena ore Sarah-me nena naki mada madialia, goa paliaga, nipuna biri Aisak lape. Nina rogae agare nipurapu palua, go rogalipade aagare orope maralaliade ruru rapu page pa sama lama palia. 20Nena si Ismail-para page, nena laedea pagawade. Nipu page neme epea palua. Nipu nogo-naki page adapu katoa, neme ne madare ruru adapu page maralaina toa. Nimu aamudu 12 page piralimi, goa pua neme nipuna rururi puri waru pabenatoa. 21Go yapare nina rogae aagare Aisak rapu rogalua, mo mali medana Saraha-me madialiade naki rapu. 22Gote-me Abraham rapu aaga lo kirituare nipu pisa.
23Ora go yapinare Abraham-me nipuna si Ismael para, nipuna adarupara madini naki rayo para moneme kaboria epe-naki rayo page nipuna adarepara asimi aanaki rayona yogaene puduri rugulaisa. Gote-me lakisade rupa. 24Abraham nipuri mali 99 patina loa, yogane pudu rugusa raburi, 25si Ismael-re mali 13 patina loa. 26Abraham para si Ismael lapore meda rabu go yapina yogane pudu rugusipi. 27Go raburi Abraham-na su-ada para asimi aa naki rayopara pa su medapara kaboria ipisa aa nakinuna page rayo nipu rapu yogane rugusimi.
اکنون انتخاب شده:
Ripimae Agaa 17: kew
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2004, Wycliffe Bible Translators, Inc. All rights reserved.