Genesis 8
8
Is Ked-engked te Zalem
1Wazà melipati te Megbevayà si Noe wey is duma zin he menge langgam he zutun te seled te arka. Umbe impepengeramag din kayi te kelibutan ne midnaneynaney mebmevavew is wahig. 2Mid-engked haazà is kedtudà te wahig he ebpuun te utew mezalem he zaǥat ne mid-engked daan is kegkevusbus te utew zekelà he wahig he ziyà ebpuun te hewhewanan, ne midtikdew haazà is utew mereǥes he uzan. 3Ne zutun mid-iseg is kebmevavew te wahig taman te neuma is 150 he andew puun te kedlapey. 4Ne hein ike-17 he andew te ikepitu he vulan, diyà mekesavuk is arka te Buntud he Ararat. 5Mid-iseg mebmevavew is wahig taman te ike-10 he vulan. Ne zutun te egkehuna he andew te ikesepulù he vulan, egkeehè en is menge puntur te menge vuntud.
6Kedlavey te 40 he andew, mibpuwasan ni Noe is sulawà duen te arka 7ne zuen uwak he impelayang din. Ne haazà is uwak wazà medlikù su midtulung dà medlayanglayang taman te wazè pa memezahi is tanà. 8Ne impelayang en daan ni Noe is limuken su ed-ahaan din ke wazè en wahig diyà te tanà, 9piru wazà naahà duen te limuken he egkeletunan din su kemulu pa is wahig nekeeneb te tivuuk he kelibutan. Umbe midlikù haazà is limuken diyà te ki Noe ziyà te arka. Ne impelatun ni Noe haazà is limuken diyà te velad din. 10Ne midtaǥad pa si Noe te pitu he andew ne impelayang din en maan haazà is limuken he ebpuun te arka. 11Ne hein mahapun en dutun, midlikù haazà is limuken he ebangà te mehilew he zahun te kayu he ulibu. Ne netuenan dutun ni Noe he midtighak en is wahig. 12Ne midtaǥad pa maan si Noe te pitu pa he andew zutun, ne impelayang din en maan haazà is limuken, piru wazè en medlikù diyà te kandin.
13Ne 601 en is penuiǥen ni Noe. Ne zutun te egkehuna he andew te nehuna he vulan, wazè en wahig diyà te tanà. Ne in-awà dutun ni Noe is atep duen te arka ne neehè din he nemezahan en iyan is tanà. 14Hein iyan en ike-27 he andew zutun te ikezuwa he vulan, nemezahan en is tivuuk he kelibutan.
15Ne zutun migkaǥi is Megbevayà diyà te ki Noe, ke sikandin te, 16“Liǥawang kew en keniyan te arka. Dumaha nu is esawa nu, is menge anak nu, wey is menge ambey nu. 17Ipeliǥawang nu zaan haazà is langun he menge linimbag he menge langgam wey menge keranapranap, su wey mengevuwad sikandan wey zan meeneb is tivuuk he kelibutan.” 18Ne zutun migawas si Noe duma is menge anak din, wey esawa zin, wey menge ambey zin. 19Ne migawas daan dutun is kada paris te langun he menge kelasi te egeǥehinawa sumalà is kelasi zan: menge langgam, menge keranapranap, wey menge tagbis.
20Ne mibaal si Noe te pemuhatà para te Nengazen. Ne migkuwa zin dutun te menge langgam is lumpiyu ragkes daan is kada kelasi te menge lumpiyu he tagbis, ne midtutung din heini zutun te pemuhatà he iyan pemuhat para te Nengazen. 21Ne nahazek te Nengazen is kehemut te evel zutun, ne ke sikandin diyà te ǥehinawa zin te, “Kenè ku en maan edezeetan is menusiyà, minsan netuenan ku en he mekesesalà sikandan puun pa te ked-enaka kandan. Kenè ku en maan ed-umanan edlimasa iring te mibeelan ku. 22Taman en te kenè pa egkehanew is kelibutan, kenà egkehimu he edhelinen ku is menge timpu, kekenà, ibpaaǥi ku zed is timpu te kebpemula wey tiraǥun, is timpu te meǥenew wey meinit, is timpu te ǥulavung wey tipenguzan, is maandew wey mezukilem.”
اکنون انتخاب شده:
Genesis 8: mbbOT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2013, Wycliffe Bible Translators, Inc. All rights reserved.