San Mateo 14

Betgake' Juanna', beena' bchoa beṉ' nisa'

(Mr. 6:14-29; Lc. 9:7-9)

1Na' do kana', Heródeza', beena' chṉabia' gana' mbani Galileana', benile' ka nak daa chon Jesúza'. 2Na' golle' beṉ'ka' chon xshine'na':

―Beenan' dii Juanna', beena' bchoa beṉ' nisa'. Ba bibane' ladj beṉ' wetka', daan chak chone' yeḻ' wakka'.

3Ḻa' kana' ni mban dii Juanna', Heródeza' bseḻee beṉ' bex̱'gake'ne' na' wloogake'ne' lillyana' ni c̱he Herodíaza' xool beṉ' bisheena', beena' le Felipe. 4Ḻa' dii Juanna' golle' Heródeza':

―Bi nakan wen nkoo xool beṉ' bishoona'.

5Na' daa golle'ne' ka' goklall' Heródeza' wite'ne', per bi biyaxjile' daa bllebe' beṉ'ka' chajḻe' daa nak Juanna' to beṉ' chyix̱jee daa che' Chioza'ne'. 6Per ka wya'i Heródeza' yiz, bi' nool wew' c̱he Herodíaza' byaab' lao beṉ'ka' lle' lṉina'. Na' daa ḻe biyoolallii Heródeza' ka byaab' 7ax̱t bzoe' Chioza' de tasc̱hiw bc̱hebe' wi'eb' bittezə dii iṉabib' ḻe'. 8Na' kon ka bzajnii xṉa'baab' bem', na' che'b' Heródeza':

―Yic̱hj Juanna', beena' chchoa beṉ' nisa', cheenid' goṉo'n nad' to lo plat llilj.

9Na' gokyeshii Heródeza', per daa ba bc̱heble' lao yog' beṉ'ka' goxe' lṉina' wi'eb' kon daa iṉabib' ḻe', benshaze' byen we'gake'b' daa wṉabb'. 10Na' bseḻee beṉ' jac̱hoggake' yic̱hj Juanna' ḻoo lillyana'. 11Na' blliagake'n to lo plat llilj na' be'gake'n bi' nool wewaa na' be'baan xṉa'baa.

12Na'ch beṉ'ka' wdalen Juanna' txen wyajgake' jaxi'gake' kwerp c̱he'na' na' bkwash'gake'n. Na' wdena' jellgake' Jesúza' ka gok.

Jesúza' bwawe' gayaa mil beṉ'

(Mr. 6:30-44; Lc. 9:10-17; Jn. 6:1-14)

13Na' ka wṉezi Jesúza' daa gok c̱he Juanna', bizee gana' zoe' na' biyo'e to ḻoo barkw ziyaje' gana' kono beṉ' lle'. Na' ka wṉezi beṉ'ka' lle' yellka' llia gaozə cho'a nisdo'na' galan zej Jesúza', na'ch wloogake' nez janogake'ne'. 14Na' ka bichej Jesúza' ḻoo barkwa', ble'ile' beṉ' zan inlleb ba lle' na', na' biyeshile' ḻegake' na' biyone' beṉ'ka' bi shao'. 15Na' ka ba wlle', na'ch beṉ'ka' nak Jesúza' txen jabig'gake' kwite'na', che'gake'ne':

―Ba wlle' ṉaa, na' gani lle'cho kono zoa wit' dii gaocho. Goll beṉ'ki yiyajgake' yellka' llia gaozə kwenc̱he lljx̱i'gake' dii gaogake'.

16Na' che' Jesúza' ḻegake':

―Bi chonan byen yiyajgake'. Len', ḻi we' dii gaogake'.

17Na' che'gake'ne':

―Gay'chga yetxtil na' zi c̱hopchga beḻ noa'nto' ni.

18Na' che' Jesúza' ḻegake':

―Ḻi goṉshkin ni.

19Na'ch golle' beṉ'ka' kwe'gake' lo yixa'. Na' bex̱ee yetxtilka' gay' na' beḻka' c̱hop na' bḻis lawe'na' yabana' na' bi'e Chioza' yeḻ' chox̱ken. Na'ch bxoxje' yetxtilka' na' bi'en beṉ'ka' nakgake'ne' txen kwenc̱he be'gake' c̱he c̱he beṉ'ka'. 20Na' wdao yog'ḻoḻ beṉ'ka' ax̱t ka beljgakile'. Na' ka bidaogake', na'ch bitopgake' diika' bgaaṉ, na' biyakan shlliṉ xet'. 21Na' beṉ' byoka' wdao gokgake' ka do gayaa mil, na' bi blabgake' noolka' na' bi'do'ka' wdao.

Jesúza' wzee lo nisdo'na'

(Mr. 6:45-52; Jn. 6:16-21)

22Ka wde dga bigoo Jesúza' beṉ'ka' nakgake'ne' txen to ḻoo barkw kwenc̱he yiḻag'gake' shḻaa nisdo'na' to ḻezgake', na' ḻe' bigaaṉe' kwenc̱he bisee beṉ'ka' bdop bllag. 23Na' wde bisee beṉ'ka', na'ch wyepe' to lo yaa kwenc̱he jeḻwille' Chioza' toze'. Na' ni zetie' lo yaana' ka goḻ. 24Na' barkwa' gana' ziyoo beṉ'ka' nakgake'ne' txen ba zejan gchoḻ nisdo'na'. Chakan to ki to ka'lə daa chas chat' nisa', na' be'na' bi cho'en latj yiyajan shḻicha. 25Na' zbaḻz biyetj Jesúza' lo yaana' na' bizee tlo nisdo'na' zeje' gana' zejləgake'. 26Na' ka ble'i beṉ'ka' non Jesúza' txen zeje' tlo nisa', ḻe bllebgake' na' ax̱t besyaagake', nagake':

―¡Ba za' to yel bx̱en!

27Na' lii wṉete Jesúza' ḻegake', chi'e:

―Bi illeble. Nad'kzan'.

28Na'ch wṉe Pédrona' chi'e:

―X̱an', shi lin', ben ka gak saa lo nisi kwenc̱he yid' kwito'na'.

29Na' che' Jesúza'ne':

―Dashka'.

Na'ch bchej Pédrona' ḻoo barkwa' na' wzoloe' chzee tlo nisa' nan shaje' kwit Jesúza'. 30Per ka gokbe'ile' zechga be'na', na' bllebe' na' lii wzolote chbi'e yel, na'ch besyee chi'e:

―¡X̱an', bisla nad'!

31Na' lii biyox̱'te Jesúza' neena', chi'ene':

―¿Berac̱he gokc̱hopzilo'? ¿Bic̱he bi nx̱enilalloo nad' kwasḻoḻ?

32Na' kon ka biyoogake' ḻoo barkwa' na' bgan be'na'. 33Na' beṉ'ka' bgaaṉ ḻoo barkwa', be'la'ogake' Jesúza' na' gollgake':

―Dii ḻi, lin' Xiiṉ Chioza'.

Jesúza' biyone' beṉ'ka' bi shao' gana' mbani Genesareta'

(Mr. 6:53-56)

34Na' ka bḻag'gake' shḻaa nisdo'na' na' bllingake' gana' mbani Genesareta'. 35Na' beṉ' Genesaretka' biyombia'gake' Jesúza' na'ch bzengakile' beṉ' yellka' lle' gao nan ba bllin Jesúza'. Na' jwa'gake' yog' beṉ'ka' bi shao' lawe'na', 36na' got'yogakile'ne' wi'e latj ḻa'c̱h' gox̱' beṉ' we'ka' xe'na', na' yog' beṉ'ka' bex̱'gake'n biyakgakile'.

اکنون انتخاب شده:

San Mateo 14: zad

های‌لایت

به اشتراک گذاشتن

کپی