यहून्ना 21
21
तिबिरियुस नद्दी का धुरा चेलाहोन पर प्रगट होनो
1या बातहोन का बाद यीशु ने अपना आप खे तिबिरियुस झील का किनारा सेवक होन पर प्रगट कर्ये अरु या रीति से प्रगट कर्यो. 2शमौन पतरस अरु थोमा जो दिदिमुस बोलस हइ, अरु गलील का काना नगर का नतनएल अरु जब्दी को बेटो, अरु ओका सेवक होन मे से दो अरु जन जमा था. 3शमौन पतरस ने उनसे बोल्यो, “मी मछ्छी पकडन जास हइ.” उनने ओकासे बोल्यो, “हम भी तरा साथ चलस हइ.”
येका लिए वे नीकलीखे डोंगा पर चड्या, पर उ रात कुछ नी पकड्यो. 4फजर होते ही यीशु किनार पर खडो हुयो. फिर भी सेवक होन ने नी पहचान्यो कि यो यीशु हइ. 5तब यीशु ने उनसे बोल्यो, “हे बच्चाहोन, तुम्हारा पास कुछ खान खे हइ?” उनने जवाब दियो, “नी.” 6ओने उनसे बोल्यो, “डोंगा की दाहिनी तरफ जाल डाल, ते पाये.” तब उनने जाल डाली,
अरु अब मच्छीहोन का कारण जाल खीच नी सक्या.
7येका लिए वा सेवक ने जोका से यीशु प्रेम रकतो थो पतरस से बोल्यो, “यो तो प्रभु हइ” शमौन पतरस ने यो सुनीखे कि प्रभु हइ, कमर मे कपडा खे कसी लियो, क्युकी उ बिना कपडा को थो, अरु झील मे कूद पड्यो. 8पर अरु सेवक होन डोंगा पर मच्छीहोन से भरी हुइ जाल खीचते हुयो आयो का क्युकी वे किनार से जमीन जादा दूर नी कि कोय दो सौ हात पर थो. 9जब किनारा पर जमीन पर उतर्या, ते उनने कोयला की आग का अरु ओका पर मच्छी रखी हुइ, अरु रोटी देखी. 10यीशु ने उनसे बोल्यो, “जो मच्छीहोन तुम ने अभी पकडी हइ, उनमे से कुछ ला.”
11शमौन पतरस ने डोंगा पर चडीखे एक सौ त्रिरेपन बडी मच्छीहोन से भर्यो हुयो जाल किनारा अरु जमीन पर खीच्यो, अरु इत्ती मच्छीहोन होना पर भी जाल नी फट्यो. 12यीशु ने उनसे बोल्यो, “आ खानो या.” अरु सेवक होन मे से कोय खे हिम्मत नी हुयो, कि ओकासे पूछे, “तू कोन हइ?” क्युकी वे जानता था कि यो प्रभु हइ. 13यीशु आयो, अरु रोटी लीखे उनने दी अरु ओसो मे मच्छी भी.
14या तीसरी बार हइ, कि यीशु ने मऱ्या हुया मे से जिन्दो उठना का बाद सेवक होन खे दर्शन दियो.
यीशु की पतरस से बातचीत
15खानो खाना का बाद यीशु ने शमौन पतरस से बोल्यो,
“हे शमौन, यहून्ना को बेटा, खे तू इनसे बडीखे मरासे प्रेम रखस हइ?” ओने ओकासे बोल्यो, “हव प्रभु. तू तो जानस हइ, कि मी तरा से प्रिती रखुस हइ.”
ओने ओकासे बोल्यो, “मरा मेडाहोन खे चरा.” 16ओने फिर दूसरी बार ओकासे बोल्यो, “हे शमौन यहून्ना को बेटा खे तू मरासे प्रेम रखस हइ?” ओने उनसे बोल्यो, “हव, प्रभु तू जानस हइ, कि मी तरा से प्रिती रखुस हइ.” ओने ओकासे बोल्यो, “मरा मेडाहोन की रखवाली कर.” 17ओने तीसरी बार ओकासे बोल्यो, “हे शमौन, यहून्ना को बेटा खे तू मरासे प्रिती रखस हइ?” पतरस उदास हुयो,
कि ओने ओखे तीसरी बार असो बोल्यो, “तू मरासे प्रेम रखस हइ?” अरु ओकासे बोल्यो, “हे प्रभु तू तो सब कुछ जानस हइ तू यो जानस हइ कि मी तरा से प्रिती रखुस हइ”
यीशु ने ओकासे बोल्यो, “मरा मेडाहोन खे चरा. 18मी तरा से सच्ची-सच्ची बोलुस हइ, जब तू जवान थो, ते अपनी कमर बाधीखे झा चाहतो थो, व्हा फिरतो थो. पर जब तू बूढ्ढो हुये ते अपना हात लम्बा कर्येका अरु दूसरो तरी कमर बाधीखे झा तू नी चाह्ये व्हा तोखे ली जाये.” 19ओने या बातहोन से दर्शायो कि पतरस कसो मरना से परमेश्वर की महिमा कर्ये. अरु यो बोलीखे ओकासे बोल्यो, “मरा पीछे अय जा.”
यीशु अरु ओको प्रिय सेवक
20पतरस ने फिरीखे उ सेवक खे पीछे आते देख्यो, जोका से यीशु प्रेम रखेतो थो, अरु जो ने खाना का टेम ओकी छाती का तरफ झुकीखे पूछ्यो “हे प्रभु, तरो पकडनआलो कोन हइ?” 21ओखे देखीखे पतरस ने यीशु से बोल्यो, “हे प्रभु, येको का हाल हुये?”
22यीशु ने ओकासे बोल्यो, “अगर मी चाहु कि उ मरा आना तक ठैर्यो र्हिये ते तोखे? तू मरा पीछे अय जा.”
23येका लिए भैइहोन मे या बात फैली गइ, कि उ चेलो नी मर्ये. ते भी यीशु ने ओकासे यो नी बोल्यो, कि यो नी मर्येका पर यो कि “अगर मी चाहु कि यो मरा आना तक ठैर्यो र्हिये ते तोखे येका से का?”
24यो उ चेलो हइ, जो या बातहोन की गवइ देस हइ अरु जो ने या बातहोन खे लिख्यो हइ अरु हम जानस हइ, कि ओकी गवइ सच्ची ची हइ.
परिनाम
25अरु भी भोत सा काम हइ, जो यीशु ने कर्या. अगर वे एक-एक करीखे लिख्या जास, ते मी समझयुस हइ, कि किताबहोन जो लिखी जास वे जगत मे भी नी समाती.
انتخاب شده:
यहून्ना 21: NTGnn24
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Gowlan Language ©The Word for the World International and Gawlan Translation Samiti, Telkhar, Maharashtra, India, 2024.
