Matius 28
28
Kinovijaan di Yisus Kavagu
(Mar. 16:1-8; Luk. 24:1-12; Yaya 20:1-10)
1Om katalibpo dii diri Tadau Koingkajadan, om i minanavauno dii di susuvab di Tadau Minggu, iri tadau koiso saralom sominggu, om ongoino dii i Moria, i tulun mantad si Bandar Madala, om i Moria vokon do mongontong di lobong.
2Nga tigogi do ginumunggun i tana do opuod marong do kivaro moloikat do Tuhan minindaau mantad suruga minongoi pongoluvid diri vatu nisompon di lobong, om ogom nogi dii siri timpak di vatu. 3Om isido nopo di kaantangai diolo nga irad do tungkilap om okonko aalang-alang kinopurako di sabungjo. 4Nga songkopor-kopor nopo dii iri minangajaga siri do nokorosi marong om naadan dii irad do napatai.
5Om pitangarno dii i moloikat diri tongotongondu do, “Ada kou rumosi do oilaankuno do mogium kou bo dino di Yisus daa iri pinasalib. 6Nga auno sino Isido siti, novijauno kavagu do irad diri nokomoiJo mantad. Ongoi koupo siti, om antangai ilo pinoilian Disido. 7Om ogoogoo mujuno mampanau, om abaran mujuno iri tongotulunJo do, ‘Novijauno i Yisus mantad pialatan di tulun napatai, om mogulu Isido mantad dikovu mongoi soi Vonuvo Golilia, om sirino kaantangan muju Disido,’ kanto diolo do oinomod iti komoionku dikovu,” kadi moloikat.
8Om piogono dii iolo mogidu mantad siri lobong do rumosii aandaiani marong iolo, om panangkusno#28:8 panangkus: pogundak dii iolo do mongoi mangaabar di tongotulun di Yisus. 9Nga tigogi dii do nosomungan di Yisus iolo, om kaDisido, “Potingkurono? Aandai-andai kovi?” ka. Om ongoino dii poibisaraan iolo di takodJo om singkotud do sumamba Disido. 10Nga kadi Yisus, “Ada kovi bo rumosi. Ongoio mujuno abarai i kosuladanKu do, ‘Ongoi kouno silo Golilia om koontong kou di Tuhan silo,’ kanto nono diolo,” kadi Yisus.
Sinuapan do Tongoimam i Tongosoujor
11Ontok do manau-panau i tongotongondu om rikotno iri piipiro soujor do iolopo nga muli siri bandar do mongoi mangaabar di tongokotua do imam diri naantangan diolo siri lobong. 12Om untunno dii i tongokotua do imam om i moloingon do Joudi om poiupakatno dii iolo do onuan do siin oguu i tongosoujor do isuap diolo. 13Om upakato nogi dii diolo i tongosoujor do kadiolo, “Patangaron muju nopo nga, ‘Inongoi takauo kosodop di tongotulunJo iri kojuvan di Yisus ontok di nokopingoodop ikoi,’ kanto nono do tulun. 14Om ausoi kosusaan muju dino do insan korongoupo i Gobonor diti, nga ikoi kondiri tumango mitangar disido,” kadiolo. 15Om onuono dii di soujor i siin om ombo nopo iri nituduk diolo irino vinaja di soujor, om sampaino dii do maino do popiinsusujon di tulun Joudi i tinangaran diri.
Minonuu i Yisus Mangaabar diri Abar do Aandai
(Mar. 16:14-18; Luk. 24:36-49; Yaya 20:19-23; Susuuon 1:6-8)
16Korongou ikoi nopo dii i tongotulun di Yisus do novijau Isido, om pampanauno dii ikoi, iri opulupo om iso tulun, do mongoi soi Vonuvo Golilia, om ongoino dii ikoi siri kulud#28:16 kulud: kotud pantok i nituduk di Yisus laid. 17Nga kaantangai nopo dii dagai i Yisus om singkotudno dii ikoi do sinumamba Disido. Nga kivaro nogi piipiro dagai do opiduvopo i ginavo do aparsaya. 18Nga insomokno dii i Yisus dagai, om pitangar do ka, “Suruga om vonuvo nga nipokuasano Dogo. 19Sabap diri do pampanau kouno do tumikid do tulun, om tudukan mujuno iolo do sumiliu do tulunKu, om botisan#28:19 botisan: boptoisan nogi iolo do i ngaran diAmo,#28:19 diAmo: diApa om i ngaranKu i TanakJo, om i ngaran di Tatod Tolidang do roiton.#Antangai Susuuon 8:16; 19:5; Ruum 6:3; 1 Korintus 1:13; 10:2; Golotia 3:27. 20Om tudukan mujuno maja kasangkat diri nisuuKu dikovu, om ondomo mujuno do soumur maja-vaja Okui dikovu gosob do koovion diti vonuvo,” kadii di Yisus.
انتخاب شده:
Matius 28: LabukPKV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1995, Wycliffe Bible Translators, Inc. All rights reserved.
