Matius 25
25
Poiradan di Opulu Raraa
1Om kadii di Yisus kavagu, “Potingkuro batoi i Kinoringan monguasa di tongotulunJo ontok do korikatanKu kavagu? Buli poiradanKu diri opulu raraa minongovit do lampu do sumamung di kumawin. 2Nga saralom do opulu raraa diri, limo raraa i opintar, om limo raraa i obudu. 3-4Do iri nopo limo raraa opintar pinosodia laid i miniak si butul vokon om i lampu. Nga iri nopo limo raraa obudu auso miniak vokon nosodia, tinggalpo i poinsuvang maantad diri lampu nokuutanjo. 5Nga sabap do alaid rumikot i kumawin, iolo pun siodop dii marong do mongindad, om odopno dii kasangkat iolo.
6Nga tanga sodopno dii om kivaro nogi dii mongoloou do ka, ‘Labus koupo. Alono ilo kumawin, somungo mujupo isido,’ ka.
7Om tungagno dii iolo sompori-ori mangatag di lampu doisido. 8Nga kadi limo raraa iri obudu, ‘Owo! Iibai ikoipo daa dino miniak muju do sipipisokno iti dagai lampu,’ kadiolo.
9Nga kadi limo raraa i opintar, ‘Owo! Aui dii kapamaagi ikoi dikovu do bagaljano iti. Gaam do mongoi koupo dikovu momoli silo kadai,’ ka.
10Om ongoino dii iolo siri kadai momoli. Nga ontok diolo momoli korikot i kumawin, om labusno dii i limo raraa opintar do sumamung om maja diri kumawin mongoi masu siri pikowinan, om kunsiaino dii iri pintu.
11Om rikotno dii i limo raraa mantad kadai do mokiukab daa do pintu do, ‘Uu tuan, ukabai ikoipo do pintu,’ kadiolo.
12Nga jawapno dii i kumawin do ka, ‘Patangaronku marong dikovu iti do au okui kotutun dikovu,’ kadii.
13Sabap diri do antatangai mujuno, do au oilaan muju maso diri nong sombo do tadau ko jaam korikatanKu kavagu,” kadi Yisus.
Poiradan di Tolu Turipon
(Luk. 19:11-28)
14Om kadi Yisus kavagu, “KorikatanKu nopo nga inong di tuan do minampanau mongoi siri vonuvo sondiang, om di aupo nakapanau isido pinloovojopo dii iri tongoturiponjo do tikidan manaak do siin onuon do puku do padagang ontok do kolivang isido. 15Iri nopo koiso turipon noonuan do siin limo noribu pirok, iri nopo koduvo turipon noonuan do siin duvo noribu pirok, om irino kotolu turipon noonuan do siin oribu pirok maja diri osonggupan diolo kondiri, om pampanau nogi dii i tuan diolo. 16Om timpuunno dii padagang i tulun noonuan do pirok limo noribu, om nakaanu isido do untung limo noribu pirok. 17Iri tulun noonuan duvo noribu pirok nogi nga padagang om nakaanu isido do untung duvo noribu pirok. 18Nga iri nopo dii turipon di noonuan do oribu pirok diri, nga okon nogi ko padagang nga pongugar nogi dii do tana om lobongono dii polosok iri siin di tuanjo.
19Nga laid mantad diri om rikotno dii i tuan diolo do mongijap nong songkuro nadadapat diolo mantad diri siin salaid diri. 20Om rikotno dii i koiso turipon do paatod diri siin opulu noribu pirok mivaja diri untung nadadapatjo, om kadisido, ‘Tuan! Limoi noribu nipokuutnu dogo. Antangaipo nga nakaanu oku vagu do limo noribu pirok untung,’ ka.
21‘Oo, aandai marong!’ kadi tuanjo. ‘Ikano turiponku di aandai om rumalan di nisuuku. Aandai iti karajanu, do insan okuyakpo nga rumalankoi padagang. Nong irad dino pokuutonku nogi dino ika do siin oguu mantad diti. Na! Asuno om koompitkoi diti kasananganku,’ ka.
22Om rikotno iri koduvo turipon, om kadisido, ‘Tuan! Duvoi noribu nipokuutnu dogo. Antangaipo nga nakaanu oku kavagu do duvo noribu pirok untung,’ ka.
23‘Oo, aandai marong!’ kadi tuanjo, ‘Ika nogi nga turiponku do taandai om rumalan di isuuku. Aandai iti karajanu, do insan okuyakpo nga rumalankoi do padagang. Nong irad dino pokuutonku nogi dino ika do siin oguu mantad diti. Na! Asuno om koompitkoi diti kasananganku,’ ka.
24-25Om rikot nogi dii i turipon kotolu om pitangar do, ‘Tuan, atii iti piroknu. Onuono, do oilaanku ika do orongitko, do mogiumko do kountungan i okonko tumosnu kondiri, om onuonnu iri okonko dika, jadi rumosi oku dika. Sabap diri do lobongoku dii mongolosok iti piroknu saralom tana. Jadi maino pogulionku kavagu iti siinnu do oribu,’ ka.
26Nga kadii di tuan, ‘Ikano turiponku do araat om amalas! Oilaannu laid do mogium oku diri kountungan i okonko tumosku kondiri om onuonku iri okonko dogo. 27Nga nong irad dino, aandai nogi kama do pinobiingnu iri pirokku, om kaanu okui daa do bunga sombia do korikot oku,’ kadi tuan.
28Om pitangarno dii i tuan diri turipon vokon do, ‘Ongoio muju ilo pirok soribu silo disido, om pataakonno di turiponku diri kivaro pirok diri opulu noribu. 29Sabap iri nopo tulun di kivaro nunu nopo nga onuan kavagu do oguu. Nga iri nopo tulun di auso, nga insan kivaropo okuyak si disido nga solodon kasangkat. 30Nga ausoi bala kogunaanku turipon diti. Pataamo mujuno siri labus i otuvong marong, i pantok do songiadan om sangarit-ngarit i nipon diolo do oolian kasansara,’ kadii di tuan,” kadi Yisus.
Manalasai i Tuhan Kasangkat di Tongobansa
31Om kadi Yisus kavagu, “Iokuno i Sinumiliu do Tulun, om ontok do rumikot Oku saralom do vinaangKu, om kasangkat di tongomoloikat nga kavaja Dogo, om mogom Oku dino siri toogomonKu do Iokuno Raja do monguasa. 32Om untunon nogi dino kasangkat i tongobansa siri gotuvangKu om sompinionKu nogi dino iolo irad diri momimiara di kambing do monompini di kambing biri-biri poinggavul di kambing vokon. 33Iri nopo irad di kambing biri-biri om sompinionKu siri ponong vananKu, om iri nopo irad di kambing vokon om sompinionKu siri ponong gibangKu.
34Om mitangar Oku nogi dino diolo ponong vananKu do, ‘Ongoi kouno dikovu siti, i nabarakatan diAmoKu,#25:34 diAmo: diApa onuanKu ikovu do iso pantok siri kopomorintaan diri nisodia dikovu mantadpo di kinovorunan diti vonuvo. 35Do vitilon Oku nga paakanon Okui dikovu; om tuuvan Oku nga poiupon Okui dikovu; om insan au kotutun kou Dogo nga osuau kou popoindakod Dogo; 36om auso pakaianKu nga onuan Okui dikovu pakaian; om kitoruol Oku nga kakapon#25:36 kakapon: ligaton Okui dikovu; om poinjiil Oku nga piantangan Okui dikovu,’ kangKu nono.
37Nga jawap kadi tulun di abanar si ponong vananKu, ‘Tuhan, sombiaKo naantanganja do vinitilon ko tinuuvan om pinaakan om pinoiupja? 38Om sombiaKo naantanganja do au otutunan om pinoindakodja Ika, ko sombia auso pakaianNu om inonuanja Ika do pakaian? 39Om sombia do kinumakap#25:39 kinumakap: mongoligat ikoi Dika do kitoruol om mongontong ikoi Dika do poinjiil?’ ka.
40Om popoilo Oku nogi dino do, ‘PatangaronKu marong dikovu iti, do isai-isai nopo sulodKu diri auso ngaran-ngaran do tinulung muju, nga irad nogi do Ioku iri tinulung muju,’ kangKu nono diolo.
41Om mitangar Okuno di tulun ponong gibangKu do, ‘Pogidu kouno do nosumpaanKu ikovu, om tunu kouno dikovu silo pinuang do tapui do au moilo pisokon, iri nisodia laaid do ijonon di kotua do rogon om i tongosusuuonjo, 42do vitilon Oku nga au Oku paakanon dikovu; om tuuvan Oku nga au Oku poiupon dikovu; 43om ontok di au kotutun kou Dogo nga au Oku poindokodon dikovu; om ontok di auso pakaianKu nga au Oku onuan dikovu do pakaian, om ontok di kitoruol Oku nga au Oku kakapon dikovu om poinjiil Oku nga au Okui piantangan dikovu,’ kangKu nono.
44Nga jumawap nogi iolo, do kadiolo, ‘Tuhan, sombia naantanganja Ika do vinitilon ko tinuuvan, ko au notutunanja Ika, ko auso pakaian, ko kitoruol, ko poinjiil do au notulungja Ika?’ kano.
45Om popoilo Oku nogi dino diolo do, ‘PatangaronKu marong dikovu iti, do isai-isai nopo iri auso ngaran-ngaran diri au tinulung muju nga irad nogi do Ioku au tinulung muju,’ kangKu nono diolo.
46Om iolo nopo diti nga ukuman siri kasansaraan diri auso koovion. Nga tulun nopo diri abanar om poosuon siri kovijaan diri auso koovion,” kadii di Yisus.
انتخاب شده:
Matius 25: LabukPKV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1995, Wycliffe Bible Translators, Inc. All rights reserved.
