Luka 11

İsa düan muskıno

1İsay cayê de düay kerdenê. Düayê xo kı qedenay, telebanê xo ra jüyê İsay rê vat: “Wayir, Yahyay senên kı düay muskıti bi telebanê xo, tı ki bımuskını ma.”

2İsay inan rê nia vat: “Sıma key kı düan kenê, nia vacerê:

‘Ya Piyê mao kı asmên de,

Namê to bımbarek bo.

Hukumdariya to bêro.

3Her roc rısqê ma bıdı.

4Gunanê ma ef bıkı,

Çıkı ma ki iyê kı ma rê gunan kenê,

İnan ef kenım.

Meverdı ma ray ra vecim.’ ”

5Bado inan rê nia vat: “Vacım kı sıma peşew şi kê jü havalê xo, iy rê nia vat, ‘Haval, hirê tenan nanan dên bıdı mın. 6Jü havalê mın ray ra ama, kê ma de thaba çino, biyari vırniya iy.’ 7Havalê sıma zerrê kêyi ra nêvano, ‘Mın ret bıverdı! Kêber kilito. Domanê mın lê mın de cılı derê. Ez nıka nêşkinan ravezeri thaba to deri.’ 8Sıma rê nay vaceri: Mêrık havalina xo ra kı mevezo ra, nan medero, feqet sıma kı pêser pêser wast, a sırı urceno ra, çiyo kı sıma rê lazımo iy dano sıma.

9“Ezi ki sıma rê nay vanan: Sıma bıwazerê, Heq dano sıma. Bıfeteliyê, vênenê. Kêber bıcınerê, sıma rê beno ya. 10Kamo kı bıwazero gêno. Kamo kı bıfeteliyo vêneno. Kamo kı kêber bıcıno, cı rê kêber beno ya.

11“Wertê sıma ra, kamci pi, lacê xo kı cı ra nan bıwazo, kemerı dano cı? Yan masi kı bıwazo, mar dano cı? 12Ya ki hak bıwazo, thırbestıkı dano cı? 13Ekı sıma bı zerria xoa xırabın'a bilı zanê xelatanê rından bıderê domananê xo, Piyê sımao kı asmên de, kam kı cı ra Rowo Bımbareki bıwazero, O senên daa zêdı iy nêdano cı?”

Qeweta İsay Heqi rawa

14Wertê jü mêrıki de, cın esti bi, ay ra nêşkiyenê qeşi kero. İsay key kı cın wertê mêrıki ra vet, zianê mêrıki bi ya u iy qeşi kerd. Sılxetiya kı na diye, sas bi mand. 15Tayênan vat: “Seytano#11:15 Luka ita de Seytani rê “Balzevul” vano. Yahudiyan no namı nay jü put ra kı pê cı kayê xo bıkerê. kı serdarê roanê xırabınano, İsa bı qeweta iy'a, mıleti ra cınan veceno.” 16Tay binan ki wastenê İsay imtan bıkerê. Ay ra İsay ra wasti kı asmên ra jü alametı bımuskıno. 17Feqet İsay çiyo kı inan aqlê xo ra vêrnenê ra zana. Nia vat: “Kamci welat kı mabênê xo de parçı biyo, o welat rıjino. Kamci kê kı mabênê xo de parçı biyo, o kê vıla beno. 18Ekı Seytan wertê xo de parçı biyo, senên şikino hukumdariya xo rê dewam bıkero? Sıma vanê ‘İsa bı qeweta Seytani'a cınan veceno.’ 19Ez kı bı qeweta Seytani'a cınan vecenan, mordemê sıma bı qeweta kami'a vecenê? Hesabê ni qesanê sıma, mordemê sıma bıxo sıma ra pers kenê. 20Ez cınan bı qeweta Heqi'a vecenan. No ki muskıno kı Hukumdariya Heqi resta sıma.

21“Ekı jüyo de qewetın bı çhek'a kê xo qori kero, çiyê iy rê qe thaba nêbeno. 22Feqet key kı mêrıko de iy ra daa qewetın şi ni mêrıki ser, bı iy'a şikiya, a waxt çhekê u zırxê kı pê cı guvano, inan gêno beno, çiyê mêrıki keno vıla.

23“Kamo kı hetê mı ra niyo, verba mıno; kamo kı mı de arê nêdano, o keno vıla.

24“Cıno kı wertê mordemi ra vecino, yaban yaji de bı reti'a fetelino. Ekı nêdi, vano, ‘Kêyo kı ez cı ra veciyan, peyser sêri kê xo.’ 25Key kı peyser êno, sêr keno kı kê geji kerdê, dê arê. 26Nay dıma sono, xo ra xırabın bı hawt cınan'a pia peyser êno. Ni pêro kunê wertê i mordemi, uca de manê. Ay ra halê ni mêrıki halê xoyê verêni ra beno xırabın.”

27Key kı İsay ni qeşi kerdi, wertê sılxetiye ra jü cinıkı iy rê nia vat: “Ğeji bê a cinıka kı tı arday na dina; ğeji bê ay kı sıtê xo do to!”

28İsay ki vat: “Ay ra zêdı iyê kı qesa Heqi eşinê pê, say kenê, ğeji bê inan!”

Mılet wazeno kı alametan bıvênero

29Key kı sılxetiye biyenê gırs, İsay inan rê nia vat: “Neslo nıkayın neslo de xırabıno. Mı ra alametan pinê, feqet alameta Pêxember Yunusi#11:29 Pêxember Yunus: Yunus zerrê jü masi de hirê roci mandi bi; bado ki Heqi o rusnay bi Ninova, mıletê ucay pêro tobı kerdi bi. Mesih İsa ki merdena xo ra hirê roci tepia amayena xo, bı na mesela'wa qeşi keno. ra zobina alametı nêvênenê. 30Yunus senên kı saba mıletê Ninova alametı bi, Lacê Mordemi ki saba ni nesli alametı beno. 31Roca Hesabi de, Hukumdara Veroci bı ni nesli'a pia urcena ra, inan makum kena. Na hukumdarı tê peyniya dina ra amay bi kı gos bıdero hekmetanê Qıral Sılemani. Nıka nıta de, jüyo kı Qıral Sılemani ra daa berco, o esto. 32Roca Hesabi de, mıletê Ninova bı ni nesli'a pia urceno ra, ni nesli makum keno. Çıkı mıletê Ninovay qesanê Yunusi kı eşiya pê, tobı kerd. Nıka nıta de, jüyo kı Yunusi ra daa berco, o esto.”

Roştia cani

33İsay vat: “Kes çıla nêvesneno, nêkeno cayê dıjdi, yan ki nêkeno bınê qabı. Çıla finê cı, dardı kenê kı kamo kı kuno kê, roşti bıvênero. 34Çım roştia cania. Ekı çımê to vêneno, canê to pêro bı roşti'a beno pırr; ekı çımê to nêvêneno, canê to wertê tari de mano. 35A waxt rınd hadarê xo bêrê, roştia kı zerrê sıma dera, mebêro tari. 36Ekı canê sıma pêro wertê roşti dero, qe cayê xo tari niyo, senên kı çıla roşti dana, sıma zê a waxti her waxt wertê roşti de benê.”

Wey halê sıma rê Ferisi

37İsay kı qeşikerdena xo qedenê, jü Ferisi saba werdi İsa dawetê kê xo kerd. İsa şi xonça ser, nist ro. 38İsa hona kı nênisti bi ro xonça ser, destê xo gorê adetê inan nêşüti bi. Ferisi kı na diye sas bi.

39İsay Ferisi rê nia vat: “Dest şütena sıma manda nay: sıma dormê tasıkı ya ki dormê fincanı şünê, feqet zerrê sıma çım-vêsaninı bı xırabi'a pırro. 40Sımayê bêaqıli, Heqi senên kı teberê kesi vırasto, zerrê iy ki nêvırasto? 41Nıka çıkê sıma kı esto, bıderê feqiran, a waxt her cayê sıma beno pak.

42“Wey halê sıma rê Ferisiyênê! Saba Heqi her çiyê xo ra desini ra jüy#11:42 Desini ra jü: Yahudiyan çiyo kı kuno dest, i çiyan ra desın de jü saba Heqi danê Mabeda xo. danê, sıma saba punı bı vasanê binan ki desini ra jüy danê. Feqet heqa mordeman nêdanê ya ki Heqi ra hezkerdenı niyanê xo viri. Sıftı ninan bıkerê bado desini ra jüy danê. 43Wey halê sıma rê Ferisiyênê! Sıma çıqa qayılê xavran de en cayanê vırniye de ronistenı rê. Ekı meydan de kamo kı bêro sêro, sıma bı hurmet'a sılam kero, no çıqa sono xosê sıma. 44Wey halê sıma rê! Sıma mezelê kı hurindia xo beli niyê, mandê inan! Mılet kı inan sero ravêro, nêzano kı i mezelê.”

45İlimdaranê itıqati ra jüyê İsay rê vat: “Malım, to kı ni qesan vanay, ma rê ki heqeret kenay.”

46İsay vat: “Wey halê sıma rê ki ilimdarê itıqati! Sıma baranê gıranan barê mıleti kenê. Feqet sıma bıxo saba ni baran bêçıka xo bilı nêlewnenê. 47Wey halê sıma rê, çıkı sıma mezelanê pêxemberan vırazenê, feqet ni pêxemberi hetê pi u khalıkanê sıma ra amay bi kistenı. 48Sıma bı nia kerden'a hem owo kı pi u khalıkanê sıma kerdo, iy rê sayidinı kenê, hemı ki nay qebul kenê! Çıkı pi u khalıkanê sıma pêxemberi kistê, sıma ki ni pêxemberan rê mezelan vırazenê. 49Ay ra Heqi bı hekmet'a nia vato, ‘Ez inan rê pêxemberan u xeberdaran rusnenan. İ ninan ra tay pêxemberan u xeberdaran kisenê, tayênan rê ki zulım kenê.’ 50-51No nesıl gonia Habili#11:50-51 Habil lacê Ademi. Habil Heqi ver de mordemo rast bi. Herdê dina ser de, mordemo kı en sıftı amay bi kistenı, o bi. ra hata gonia Zekeriyay hesab dano. Zekeriya ki cao kı qurbani amenê vesnayenı mabênê ucay bı mabênê Mabedı de amay bi kistenı. Pêxemberê kı dina esta çina amê kistenı, hesabê gonia inan pêronan ni nesli ra pers bena. Heya, sıma rê vanan, ninan pêronan ra ni nesli mesul gênê pê. 52Wey halê sıma rê ilimdarê itıqati! Kilito kı kêberê irfani keno ya, sıma o gırot berd. Nı sıma bıxo ni kêberi ra kutê zerrı, nı ki sıma verda jüyo kı wazeno ni kêberi ra cı kuyo zerrı.”

53İsa kı uca ra şi, Ferisi u ilimdarê itıqati bı qesan'a amay iy ser. İsay ra heqa xeylê çi de persi pers kerdi. 54İnan wastenê kı iy fek ra qesanê çewtan bıeşiyê pê kı iy nêheq kerê.

اکنون انتخاب شده:

Luka 11: kiu

های‌لایت

به اشتراک گذاشتن

کپی