Mataio 5
5
1Ege E darasmerare abele le lakub, epe E ogi abele paser ge, ege emerilu, epe abara kaimeg giz tabakeuare abim;
2Ege E uiabi detager a ereuerem uiabim, kega,
3Uerkab uader le gebegeb nerkep; abelelam uiaba uteb kotor baselaia.
4Uerkab uader le okasosok; abelelam nagri uiaba okadraseked.
5Uerkab uader le mapodan tonar; abelelam uiaba nagri gobar atagor abele ged.
6Uerkab uader le uererege a niap ge abele barkak tonarlam; abelelam uiaba gem osmeda.
7Uerkab uader le nagri nasenas; abelelam E uiabi ko nasenas.
8Uerkab uader le og kak nerkep; abelelam uiaba abi erdali abele Ade.
9Uerkab uader le demeger abele mapodanuem; abelelam nei atkeroa Ade ra uerem giz.
10Uerkab uader le dedkoli abele barkak tonarlam; abelelam uiaba nagri kotor baselaia.
11Uerkab uaba ese uiaba adud mer uabim, a uabi dedkoeda a bes mer uabim, a gaire adud uridili uabim karielam.
12Uaba sererege a bapereker; abelelam uaba nagri au bodomalam kotor baselaiaim; abelelam uiaba ikerare mokakalam gaire perofeta giz kekiam uabim.
13Ege uaba gesep ra sol; ese sol nole kurabkurab a nade lu uaba kurabem? nolea nerute lu ko abkoreb ikerare no bataueret adem a le esapili.
14Uaba gesep datki. Umer kak ispili abele uteb tumge paser ge.
15Uiaba nole disirik abele lamepa, a iketilu muige abele kumete; epe iketilu abele lamepa ra uteb, iaueakai datki nagri le uridili abele meta ge.
16Uaba datki mokakalam le la opem, iaueakai uiaba erdali uaba debe tonar, uiaba naospered uaba Aba emeri kotor ge.
17Uaba nole dikiaporare kaka tabakeamud ko detui abele gelar, gako abele gaire perofeta giz ra mer; kaka nole tabakeamud ko detui, epe bakedida.
18Abelelam a ageakar kaka uabi detagered, Eseamulu abele kotor ge gako abele gesep ge, epe nole aseamur kak abele iota, gako kebi uar mog abele gelar giz, a mena bakedida gaire lu uridili.
19Dasmerare, ese le detui abele kebi gelar, a ereuerem le mokakalam, E nei eteker kebi kale abele kotor baselaia; epe ese le ikeli pako ereuerem abele, E nei eteker au kale abele kotor baselaia.
20Abelelam kaka uabi detagered, Ese nole aule uaba barkak tonar tumem abele gaire aotale giz gako Faresaio giz, umer kak uaba barot abele kotor baselaia ge.
21Ua aserare gaire aule giz uiaba mer, Ma nole le ipit eumida; ese le ipit eumida nerute le, E bodomalam abele meratager.
22Epe kakanale uabi detagered, Ese le tababu ueku abara boai, E nagri bodomalam abele meratager; ese le abi detager abara boai, Raka, E nagri bodomalam abele meratager; ege ese nerute le abi detager nerute le, Paim le ae, E nagri bodomalam abele ur Genaim.
23Ese ma abi ikuar mara zeku lu abele bao ge, epe ma ko dikiapore mara boai nagri nerute lu mari ueku,
24Ma dikaereti mara zeku lu abele uteb abele bao opem, epe ma bakeam; kekiam abi itikubi mara boai, a ko takomed a ikuar mara zeku lu.
25Ma dudum abi itikubi abele le ezoli abara gaire lu mari dog, peirdi uaba okakis abele gab ge; iaueakai nole mari emarid abele meratager abele le ezoli abara lu, a ko mari emarid abele meratager tarima le, E tarima le mari emarid abele memeg le, a memeg le mari emarid abele audubare meta.
26Ageakar kaka mari detager, Ma umer kak ko esomed, pe bakedida abara mani.
27Ua aserare aule giz ra mer, Ma nole kogem;
28Epe kakanale uabi detagered, Ese le dasmer abele kosker E abi lag, E emetu kogem abim abara nerkep.
29Ese mara tuter pone mari nadkoli ma dekeamur a adem; abelelam debele nerute mog mara gem abi, a adud batauered mara gem kemerkemer Genaim.
30Ese mara tuter tag mari nadkoli, ma isimi adem, abelelam debele nerute mog mara gem abi, a adud batauered mara gem kemerkemer Genaim.
31Uiaba mer kega, Ese le imud abara kosker, debele ko ikuar abim abele dituaki jauali;
32Epe kakanale uabi detagered, Ese le imud abara kosker, epe nole ko kak, E abi namarik kogem; ese le ispilu abele amu kosker E dali kogem.
33Ua aserare aule giz uiaba nerute mer, Ma nole bes iskosi, epe ma abi ikuar abele Opole lu ma emetu iskosi;
34Epe kakanale, kaka uabi detagerare, Nole iskosi kak; nole iskosi abele kotor ge, abelelam Ade ra bao ge;
35Gako abele gesep ge, abelelam abele uteb ekueilu abara teter; gako Ierusalema, abelelam au Opole ra uteb.
36Ma nole iskosi mara kerem ge, abelelam ma umer kak dipegili netat mara mus ko kakekake a golegole.
37Epe uaba mer mokakalam, Uao, uao; Nole, nole; abelelam abele mer aule gaire mer, abara giz adudelam.
38Ua aserare uiaba mer, Bodomalam abele pone, nerute pone, a bodomalam abele tereg nurute tereg;
39Epe kakanale uabi detagerare, Uaba nole imara abele adud; ese nerute le mara tuter peik bage erese, ma ko batauerik nerute.
40Ese le lagelage mari ikerare abele meratagerem, E ais mara gem uali, ma ikuar mara au gem uali.
41Ese le mari bamesili abi kemem bakeamulu abele netat mail, ma ko bakeamulu abim neis mail.
42Ma abi ikuar abele le mari damosare, ma nole adem dimu abele le lagelage damosare mani marielam.
43Ua aserare uiaba kega, Ma abi nasenase abele le emerilu maike, a deralu abele le mari ueku;
44Epe kaka uabi daratagerare, Uaba abi nasenase uiaba le giz uabi ueku, uaba debe mer ikuar uader le uabi adud mer egali, uaba abi nasenase uader le uabi deralu, uaba abi esorerapare uader le uabi bes mer gako uabi dedkoli;
45Iaueakai uaba Baba emerilu abele kotor ge abara uerem giz uabim; E abi emarid abara lem uiabim uader le adud tonar, a uader le debe tonar, E abi emarida irmir ko abi uader le barkak tonar, gako uader le adud tonar.
46Abelelam ese uaba abi nasenase uader le uabi nasenase, nalu uaba bodomalam nagri? nako telona giz nole ikerare mokakalam abele tonar?
47Ese uaba tepteb nasenase uaba boai, nalu lu aule uaba ikerare? nako telona giz nole ikerare mokakalam?
48Dasmerare, abkoreb uaba debe tonar kemerkemer, mokakalam uaba Baba emerilu kotor ge, E debele kemerkemer.
اکنون انتخاب شده:
Mataio 5: ulk1902
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Published by the British and Foreign Bible Society in 1902.
