Luk 21
21
Rɛjɛ ɔwanɛ ekud
(Mk 12:41-44)
1Jisɔs ɔrɔ ɔfɛ bani mbɛ bafɔnɔ bagbuga barɔbɔ rɛjɛ rɛbɛ na nkpukpu bagbuga na ɛtɔ-Ɛbrɔkpabi. 2Ɔfɛ mɨnɛ ɔram ɔwanɛ-ekud, ŋɔ ɔrɔbɔ bagbuga bafa. 3Jisɔs ya, “Nkanɛ nu kpikpɛ, ɔram ɔwanɛ-ekud ŋɔ ɔjɛ oci oni naŋɔnɛ. 4Bani mbɛ fɛb bajɛ egbigbɨra na mbu bafɔnɔ; nsu ɔwanɛ ŋɔ na bɔram bɔmɔ ɔjɛ fɛb mbu ɔfɔnɔ na rokpin rɔmɔ.”
Jisɔs ɔtanɛ ɔbaŋa rekubɛ ɛtɔ-Ɛbrɔkpabi
(Mt 24:1,2; Mk 13:1,2)
5Banyɛgɛ Jisɔs bajuju bara bakaŋɛ boyi ɛtɔ-Ɛbrɔkpabi, kɛmanci bari ji na brika rata, na rajɛ ndɛ bajɛ Ɛbrɔkpabi. Nsu Jisɔs ya, 6“Minfɛ rata ndɛ-ɛ? Kegbu kekowu nci rɛta dinɛ nfa rɛbɔ resuŋɛ birebirɛ ɔcɛmɛ; rɛta nandinɛ rɛkɔtɔ na rɔcɛ.”
7Basɨna mɔ, “Ɔkpɛbɛ, baga kegbu nci birɛ mbi bɛkɔjagi? Mɨnɛ bagagba bokotumɛ eriŋ ya birɛ mbi bɛkɔjagi?”
8Ɔkanɛ bɛ ya: “Babɛrɛ nu bɔkpaju bonua bakagbɔgɛ nu. Ndi ecii kubawu na rirɨna rimia, ya ami Krais, mɨnɛ, kegbu kekunɛ. Kanyɛgɛ bɛ nu. 9Ara minfugɛ bani bajuŋɛ raku mɨnɛ bajuŋɛ na bacɛmɛ, kafɔnɔ nu bofu. Birɛ mbi kubɛbɛrɔsɔ bɛjaga, nsu nkpakurɛ kɛtɨbi kegbu kekigikunɛ.”
10Oruŋɛ rɔsɔ na kɔtanɛ kɔmɔ: “Irɛ irɛnɛ kuiju reku na bacɛmɛ, mɨnɛ bani mbɛ bara irɨma ntunɛ ɔkɨm ŋɔnɛ kubaju na bani mbɛ bara irɨma ntunɛ ɔkɨm ojuju. 11Rɔcɛ kurɔŋarɛnɛ, ŋbɔ, bokukubi ifiɛ kuiju bani na kwa eciecii, mɨnɛ birɛ bofu na ɔkɨmkɨm eriŋ kuɛkɔgɛ na kaju-rɔja.
12“Nsu nabɔ birɛ mbi fɛb bɛjaga, kubabɨma nu bajɛ nu rasinkanɛ. Kubasɛ nu ibɔ bajɛ bayɛrɛ ratiba na basam-rɔrɛ bafina nu na ɛtɔ-nkpɔkɔbi. Mɨnɛ bakɔbɛ nu babarɛ na rɔsɔ bakɨm na bani retu. Birɛ mbi fɛb kubɛjaga bɛjɛ nu ndi minyɛgɛ mi. 13Nfa ekotumɛ kegbu kenua kɔkanɛ bani brika ramu. 14Kajuŋanɛ nu bɔkpaju mimbaŋa mbu minkɔtanɛ kɔsɔri. 15Ndi kunjɛ nu ramu na nkatid kɔgbɨri mbu minkɔtanɛ, bani ɛban banua bayɛŋɛ kɔkpɛnɛ mbu minkɔtanɛ mɨnɛ bayɛŋɛ kɔkanɛ ya minkitanɛ kpikpɛ. 16Tum britɛ banua kubakwɛ nu, bama banua mbɛ barumanɛ na mbɛ babanɛ, bani kɛtɨbi na bacɛmɛ, mɨnɛ kubaŋua nu bajuju. 17Oni naŋɔnɛ kuotumɛ na ɛban na anu ndi minyɛgɛ mi. 18Nsu roria tumdunɛ na ratu ranua rɔyɨma. 19Bara nu tɨmisi, mɨnɛ kuminyaŋɛ bɔkpaju bonua.
Jisɔs ɔkanɛ kɛmanci bakokubɛ Jɛrusalɛm
(Mt 24:15-21; Mk 13:14-19)
20“Ara minfɛ bata-iku mbɛ bani ɛban banua bafɛrɛ Jɛrusalɛm, kumingbɨra ya bakowu kokubɛ du. 21Yɔgɛ bani mbɛ bara na Judia babira barua na ikuku irɛnɛ, yɔgɛ mbɛ bara na Jɛrusalɛm bajaga, mɨnɛ mbɛ bara na rofia bakanɔ Jɛrusalɛm. 22Nfa na kegbu nci Ɛbrɔkpabi ekosinkanɛ bani Jɛrusalɛm. Rasinkanɛ ndɛ kurajaga kɔkɔgɛ mbu bakanɛ-rotuma Ɛbrɔkpabi barɛ. 23Rayi kandɛ kura tumɛ kekukubi rayi na babanɛ bosukpa na mbɛ bajɛŋɛ bɔ raba! Ɔkɨmkɨm rasinkanɛ kurawu na rɔrɛ ndu, mɨnɛ rasinkanɛ Ɛbrɔkpabi kurakɨmanɛ bani mbɛ. 24Kubaŋua bajuju na bakaŋkaŋ, mɨnɛ bajuju kubabɛ baruŋɛ na irɛ ijuju aya mankpɔkɔbi. Bani Jɛntail kubakubɛ Jɛrusalɛm mɨnɛ kubatumɛ kafa ta kegbu kɛbɛ kɛyɛ.
Rewu ndi Wɔ Oni
(Mt 24:29-31; Mk 13:24-27)
25“Boriŋ kubotumɛ na royi, kɔfɛ na borunku. Na rokuku, irɛ kuitumɛ na ifiri, bofu kubosi bani aya ija irɛnɛ ikɔnyɨŋanɛ mɨnɛ bagbɨra mbu bakosi. 26Bani kubacɛrɛ na bofu aya bafumanɛ mbu bokowu na rokuku, fɛŋɛ nsɨm ŋɔ ɔra na kaju-rɔja kuɔnyɨŋanɛ.#21:26 Birɛ mbi bɛra na kaju-rɔja bɛra royi, kɔfɛ, borunku na bejuju. 27Na kegbu bakɔfɛ Wɔ Oni oŋuɛ na kaju-rɔja na nsɨm mɨnɛ na ɔkɨmkɨm boyi. 28Ara birɛ mbi bɛbɨnɛ kɔjagi, bara nu mɨnɛ birɛ nu ratu ranua, ndi rɛnyaŋɛ renua rɛra kpirekpirɛ.”
Rɛkpɛbɛ rɛtɨna fig
(Mt 24:32-35; Mk 13:28-31)
29Jisɔs otuba rɛkana ndi ɔjɛ bɛ: “Rɔ rɛtɨna keti fig na ratɨna beti ndɛka fɛb. 30Ara afɛ bacɛ riwa ribɨnɛ kɔjagi, kuagbɨra ya kefi ikari kekunɛ. 31Kɛmacinɛ, ara afɛ birɛ mbi bɛjaga, kuagbɨra ya Rɔrɛ-rɛkɨm Ɛbrɔkpabi rɔra kpirekpirɛ.
32“Nkanɛ nu kpikpɛ, birɛ mbi fɛb kubɛjaga nabɔ bani mbɛ bara babin kunku baba fɛb. 33Kaju na rɔcɛ kukacia, nsu ramu ramia raciŋɛ.
34Nsu jɨba nu bɔkpaju bonua, mɨnɛ babɛrɛ nu rokpin ronua. Kadi nu mɨnɛ miŋɔ minciacia. Kakubɛ nu kegbu kenua minfɔnɔ ratanɛ na botima mimbaŋa rokpin ronua. Ara minsi kanya reyi kandi kurɛbɛ nu gbɨna. 35Aya bikɔn, reyi kandi reŋuɛ ɛyɛ oni naŋɔnɛ kwanancɛnɛ na rokuku. 36Babɛrɛ nu sɛnsɛn kegbu mɨnɛ rɔbɔ nu njɔm ya minfɔnɔ mintigiri koci birɛ mbi fɛb mbi bɛkɔjagi, mɨnɛ minyɛ mimbara na rɔsɔ Wɔ Oni.”
37Reyi nandinɛ Jisɔs ɔkpɛbɛ na ɛtɔ-Ɛbrɔkpabi, mɨnɛ korirɛ nankunɛ oruŋɛ na rokuku olif ɔkasu kaka ta reyi rɛcɛ, 38isobisobi bani bakowu kofugɛ mɔ na ɛtɔ-Ɛbrɔkpabi.
اکنون انتخاب شده:
Luk 21: Olulumo-Ikom
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2022 Luke Initiative for Scripture Translation
