Luk 16
16
Rɛkana ori ŋɔ ɔcɛŋɛ ikari ifa
(Mt 11:12-13; 5:31-32; Mk 10:11-12)
1Jisɔs ɔkanɛ banyɛgɛ mɔ rɛkana ndi, “Ɛfɔnɔ ɔkɔ ogbuga ŋɔnɛ ŋɔ ɔfɔnɔ ori ŋɔ ɔbabɛrɛ birɛ bɛmɔ. Bakanɛ ɔkɔ-ogbuga kaŋɔ ya ori ɔmɔ ɔrakaka okubɛ bagbuga bamɔ na ɛyɔ nji ɛbɔ ekibara. 2Ɔkɔ-ogbuga ŋɔ ojia mɔ ɔsɨna ya, ‘Mbun mbu nfugɛ mbaŋa wu? Tubɛrɛ manrɛ manyɛ oyiyi ndi abosi rɛsɛ na ami.’
3“Ori ŋɔ ɔsɨnanɛ ya, ‘Kunku nkosi nyan? Mintɛ rɛsɛ omia ɔkɔsɛ mi na rɛsɛ. Nkifɔnɔ nsɨm rɛsɛ ndi retigiritigiri, mɨnɛ gbobi bosiŋɛ mi kɔrɛ rɛrɛ. 4Ngbɨri mbu nkosi na esikafa nfɔnɔ bani ɛkɨmaŋba mbɛ bakɔtam mi na bɔtɔ bɔbɛ ara okurɛ ɔsɛ mi na rɛsɛ.’
5Mɨnɛ ojia bani mbɛ badi mintɛ rɛsɛ ɔmɔ itɨma ŋɔnɛ na ŋɔnɛ. Ɔsɨna ɔbɛrɔsɔ, ‘Mantɨma manyɛ manra bu? 6Oni kaŋɔ ɔfɛlɛ mɔ ramu ya, ‘Ndiŋɛ mɔ iram nsaŋ mantana olif itan. Mɨnɛ ori kaŋɔ ɔkanɛ mɔ ya, ‘Kamantɨma manyɛ, nsu tumetumɛ fɔdkanɛ rɛ iram ifa irɨma jubi wadwad.’ 7Mɨnɛ ɔsɨna ɔnyakanɛ ya, ‘Mantɨma mintɛ-rɛsɛ omia manra bu na ibɔ iyɛ?’ Odi-mantɨma ɔkanɛ mɔ ya, ‘Ndiŋɛ mɔ igɔd ibam wid ifa irɨma iram jubi.’ Ori kaŋɔ ɔkanɛ mɔ mɨnɛ ya, ‘Kamantɨma manyɛ, fɔdkanɛ rɛ ibam igɔd ifa.
8Ndi mintɛ-rɛsɛ ɔfɛ mbu kekukubi ori ɔmɔ owusi, ɔka mɔ na kegbɨra gba nci ɔfɔnɔ; ndi ɛra kpikpɛ ya bani rokuku ndu bagbɨri kɛmanci basiŋɛ na birɛ rokuku ndu baci bani mbɛ bara na rɛjaɛ. 9Nfa na mbu nduga mɔ mingbɨra, ‘Si nu rɛrɔgɔ na birɛ mbi minfɔnɔ na rokuku, na esikafa minfɔnɔ bacɛmɛ. Nabɔ esikafa ara minkikɔyɛ kosi gba na mbu minfɔnɔ, bani kubatama nu bayɔgɛ na kwa minkotumɛ najunaju.’
10Oni naŋɔnɛ ŋɔ ɔbɔ okijɨba birɛ bekikɨri na brika ɛyɔ, ɔyɛŋɛ kɔjɨbi brika birɛ bɛrɛnɛ. Nsu ara akiyɛ ajɛnɛ rejubi na birɛ bekikɨri na ɛjagi ya ayɛŋɛ kɔjɛnɛ rejubi na brika birɛ bɛrɛnɛ. 11Ara minkijɨba birɛ rokuku na brika ɛyɔ, ekosi nyan na bajɛ nu brika birɛ? 12Mɨnɛ ara minkijɨba birɛ bani bajuju na brika ɛyɔ, yɛnɛ mɔ ɔkɔjɛ wu mbu bɔra bɔyɛ?
13“Ori ɔra ŋɔ okotugi bani bafa kegbucinɛ; ndi kuɔbana ŋɔnɛ ɔfɔnɔ rɔraganɛ na ŋɔka. Kuɔjɛ ŋɔnɛ rejubi, ŋɔka ɔbɛ kpaab. Ayɛŋɛ kotugi Ɛbrɔkpabi mɨnɛ atuga ogbuga.”
Jisɔs ɔtanɛ na Bafarisi
(Mt 11:12-13; 5:31-32; Mk 10:11-12)
14Bafarisi mbɛ bafɔnɔ rɔraganɛ ogbuga, bafugɛ fɛb mbu Jisɔs ɔtanɛ, basɔŋɔ mɔ. 15Nsu Jisɔs ɔkanɛ bɛ ya, “Anu minra kɛlɨŋa bani mbɛ minkɔgɛ bani bajuju ya minra brika bani, nsu Ɛbrɔkpabi ɛgbɨri botima bonua. Birɛ mbi bani babɛŋɛ ya bɛra juju birɛ, na jɛnɛ Ɛbrɔkpabi bɛra birɛ ɛyɛŋɛyɛŋɛ.
16“Ibina Mosis na manrɛ bakanɛ-rotuma Ɛbrɔkpabi ibabɛrɛ bani ta kegbu Jɔn oru-raku; Bɨnɛ kafa bara bakanɛ bani brika ramu babaŋa rɔrɛ-rɛkɨm Ɛbrɔkpabi, mɨnɛ oni naŋɔnɛ ojuŋɛnɛ kɔnɔ. 17Nsu ɛra ŋɔrɔŋɔrɔ ya kaju na rɔcɛ rɔyɨma, na kɔkanɛ ya kekpena Ibina Ɛbrɔkpabi tumcinɛ kɛyɨma.
18“Orumanɛ naŋɔnɛ ŋɔ okpu ɔwa ɔmɔ na ɛtɔ-rɛba mɨnɛ ɔkasa ɔwanɛ ojuju ɔtɔ Ibina boruba; Mɨnɛ orumanɛ ŋɔ ɔsa ɔwanɛ ŋɔ ɔjaga rɛba, ɔtɔ Ibina boruba.
Ɔkɔ-ogbuga na Lasɔrɔs
19Rɛyi dinɛ, Jisɔs ɔkanɛ banyɛgɛ mɔ ya, “Ɛfɔnɔ ɔkɔ-ogbuga ŋɔnɛ ŋɔ oyuɛnɛ oyiyi mɨnɛ odiŋɛ brika bedidi reyi nandinɛ aya kɛtɔmɔ. 20Nsu ɔram ŋɔnɛ ŋɔ oyinɛ ya Lasɔrɔs, ɔra bɔrɔgibɔrɔgi na ɛkpaju. Bani basɔgɛ mɔ baŋuɛ bayɔgɛ na okegere ɔrɛnɛ ŋɔ ekuma nji baciŋɛ banɔ na keyuga ɔkɔ-ogbuga ŋɔ. 21Nansɛrɛ ŋɔ Lasɔrɔs ɔyɔm kanya kafa, ofumanɛ kodi bedidi mbi bɛra bɛgbara na rɔcɛ mbi ɔkɔ-ogbuga ɔra odiŋɛ. Bɔgba boŋuɛ bɔlɨbɛ mɔ bɔrɔgi kafa.
22Rɛyi dinɛ ɔram ŋɔ ɔba. Mɨnɛ banyiɛ-rotuma Ɛbrɔkpabi basɔgɛ mɔ baruŋɛ ɔkatumɛ na rokpinkpa Abraham na rɔrɛ Ɛbrɔkpabi. Ɔkɔ-ogbuga ŋɔ mɨnɛ ɔba, bafiɛ. 23Mɨnɛ koku kɔmɔ koruŋɛ na kwa ɔkɨmkɨm rasinkanɛ ndɛ najunaju. Ɔrɔ birebirɛ ɔfɛ Abraham kɛgbanta ɛyɔ na rɔrɛ Ɛbrɔkpabi. Ɔfɛ mɨnɛ Lasɔrɔs na rokpinkpa Abraham. 24Ɔkɔ-ogbuga otibɛ remu ɔjɛ Abraham ya, ‘Mintɛ Abraham, fɔnɔ erun na ami, tigɛ Lasɔrɔs ɔrɛbɛ retu bininɔ na mani oŋunɛ mi kemi, ka nra na ɔkɨmkɨm rasinkanɛ na roku ndu.’
25Nsu Abraham ɔkanɛ mɔ ya, ‘Wɔ omia, jinɛnɛ ya kegbu rokpin rɔyɛ na rokuku afɔnɔ brika birɛ, Lasɔrɔs okifɔnɔ tumgba. Nsu kunku ɔranka na kɔrɔmetima mɨnɛ awu ara na ɔkɨmkɨm rasinkanɛ. 26Mɨnɛ kokwɛ kafa, ɔkɨmkɨm kɛdɛmɛ keyibanɛ yu. Oni irɨma iyua ɔyɛŋɛ kɔŋagi owu kandu mɨnɛ oni mbari onua ɔyɛŋɛ kɔŋagi owu irɨma iyua.’
27Nsu ɔkɔ-ogbuga ɔkpɔlɛ Abraham ya, ‘Mintɛ Abraham, bɔtutu tigɛ Lasɔrɔs orua na ɛtɔ mintɛ omia. 28Ndi nfɔnɔ bama barumanɛ batan, mɨnɛ nduga mɔ ɔkajam bɛ ratu bafɔdkanɛ ramaɛ rabɛ, esikafa bakawu mɨnɛ na kwa ɔkɨmkɨm rasinkanɛ ncɛ.’
29Nsu Abraham ya, bafɔn ‘Mosis na bakanɛ-rotuma Ɛbrɔkpabi kotunɛ bɛ. Bayɛŋɛyɛŋɛ koji mbu barɛ.’
30Ɔkɔ-ogbuga ɔfɛlɛ mɔ ramu ya, ‘Kanyanɛ, mintɛ Abraham! Nsu ara batigɛ oni ɛyɛ ɛbɛ ŋɔ osi na rɔrɛ babureburɛ, kubafugɛ mɔ, mɨnɛ kubafɔdkanɛ rokpin banyɛgɛ Ɛbrɔkpabi?
31Nsu Abraham ɔkanɛ ya, ‘Ara bakifugɛ Mosis na Banyiɛ-rotuma Ɛbrɔkpabi, tum ara oni ofiɛ na rɔbɔ oruŋɛ bafugɛ mɔ.”
اکنون انتخاب شده:
Luk 16: Olulumo-Ikom
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2022 Luke Initiative for Scripture Translation
