Naiˍ htangˍ 3
3
Laˍ hkuiˍ siˉ jiˉ mangˉ na taeng pyo biˍ jiˍ
1Htiˍ nuing hingˉ ngang beu Peˍtruˆ nae Yoˉhanˍ yaˉ yetˍ miˍ hkiˍ sumˍ sumˍ naˍ riˍ ang buinˉ paˉ naeˉ nyamˍ veu ang buinˉ paˉ kyaˉ cawngˉ ang huiˍ veu lae jiˉ. 2Keutˆ yaˍ lui beu nae laˍ hkuiˍ baˍ maenˍ nae uiˉ changˉ htiˍ hu mangˉ na ang buinˉ paˉ kyaˉ cawngˉ ang huiˍ veu awngˉ lae naeˉ changˉ uiˉ kawngˉ paˉ yaˍ biˍ jiˍ. Cu nuing yang na changˉ uiˉ ham yao cawngˉ ang huiˍ hkaoˍ veu Ang hu buiˍ nae maengˉ jiˉ langˉ kaw htang veu piˉ ca jiˉ. 3Peˍtruˆ nae Yoˉhanˍ yaˉ yetˍ cawngˉ ang huiˍ veu awngˉ lae naeˉ na yang myangˉ yao yaˉ yetˍ na hpuˉ paˉ yaˍ jiˍ. 4Haeˉ mae beu, Peˍtruˆ nae Yoˉhanˍ yaˉ yetˍ yang na hu yao, Gaˉ yetˍ na hu lao nae Peˍtruˆ ha biˍ jiˍ. 5Changˉ hiˉ mangˉ muiˉ yaˉ yetˍ kawngˉ htiˍ ceuˍ ceuˍ ang ya yaˇ nae kuitˆ yao yaˉ yetˍ na hu yao ca jiˉ. 6Peˍtruˆ ciˍ jiˍ yang, Ga beu hpuˉ suiˉ htiˍ ceuˍ piˍ laˍ seuˍ baˍ ca. Hta yao muiˉ, ga beu ca naeˉ ningˉ nang na piˍ laˍ vaˍ. Naˍzaˍraet changˉ Yeˍsuˆ Hkritˆ beu ang maengˉ hkaoˉ veu hta laˉ yao kaˉ ba yawˍ aengˉ baoˇ nae ha biˍ jiˍ. 7Changˉ mangˉ beu laˍ maˍ laˍ puˍ kaˍ seu Peˍtruˆ chu yao chuingˉ hta beu, tiˍ chitˍ nae laˍ hkuiˍ hkiˉ teut nae hpaˍ vaˍ yangˍ muiˉ kaˍ ca laˉ jiˉ. 8Yang peuk hta laˉ naeˉ cung laˉ yao yawˍ laengˉ jiˉ. Yawng kawngˉ htuˍ yaˍ laˉ mae ang buinˉ paˉ kyaˉ cawngˉ ang huiˍ veu awngˉ lae yao, peuk nga aengˉ yao Hpaˍcaoˍ na chiˍ mawng jiˉ. 9Haeˉ mae kaˉ ba yawˍ yao Hpaˍcaoˍ na chiˍ mawng naeˉ na changˉ hkaˉ hko laˉ hko uiˉ ya myangˉ yao, 10changˉ niˉ maˇ ang buinˉ paˉ kyaˉ cawngˉ ang huiˍ veu Ang hu buiˍ nae maengˉ jiˉ langˉ kaw htang veu paˉ saˉ yaˍ naeˍ mangˉ yaˇ nae yawng hu bae jiˉ. Yang beu hpeuˍ laˉ jiˉ kanˉ hingˉ na yawng kuitˆ manˍ hko laeˍ jiˍ.
Sawˉlaˆmunˍ beu cawngˉ#3:11 Yeˍruˆsaˍlaemˍ vengˍ veu ca naeˉ ang buinˉ paˉ kyaˉ cawngˉ ang huiˍ ang hkumˍ veu Peˍtruˆ ang buinˉ tangˍ maˍ jiˍ
11Changˉ hiˉ maˇ, Peˍtruˆ nae Yoˉhanˍ yaˉ yetˍ na chu kap yao ca beu, changˉ ang byaˍ uiˍ manˍ hko yao, Sawˉlaˆmunˍ beu cawngˉ ang hkumˍ nae haoˉ naeˉ hiˉ keung veu, huinˍ yao laˉ jiˉ. 12Peˍtruˆ hingˉ na myangˉ yao, changˉ ang byaˍ uiˍ na yang ha biˍ jiˍ yang, Iˉsaˍreˍlaˆ changˉ yawng veuˉ, ba ceuˉ ha yao ningˉ awˍ lawng na nawng manˍ yao ca ngaeˇ. Changˉ ningˉ mangˉ kaˉ ba yawˍ hkiˍ jiˍ ningˉ ngaˍ gaˉ yetˍ beu laˍ htiˍ tanˉ hkoˉ nae cheˉ naeˉ kam naeˉ hingˉ hkaoˉ veu ha taw biˍ jiˍ uiˉ baˍ aˍ. Ba ceuˉ ha yao gaˉ yetˍ na hu chawk chawk langˍ ngaeˇ. 13Aˍbraˍhamˍ, Iˉcak, Yaˍkok yawng beu Hpaˍcaoˍ gu ang hpiˍ puˉ uiˉ beu Hpaˍcaoˍ nawˍ yang beu yaˍ cenˍ Yeˍsuˆ mangˉ na laˍ htiˍ tanˉ hkoˉ piˉ taw laˉ byaˇ. Ang suingˉ hiˉ mangˉ na nawng ngaˍ ang suingˉ Piˉlatˆ laˍ puˍ hkaoˍ veu ap yao ang suingˉ hiˉ maˇ poiˉ awkˍ laeˍ naeˍ nae kuitˆ yao muiˉ nawng ngaˍ Piˉlatˆ mae kaˍ huˍ veu yang na paek taw saˍ byaˇ. 14Nawng ngaˍ Ang seungˍ sangˉ ang sui pawng Ang suingˉ mangˉ na hpaw saˍ yao, changˉ na saeˍ hu mangˉ na poiˉ lao nae paˉ jiˉ. 15A sak teˍ yaˍ naeˍ uiˉ saˍ laiˍ Ang suingˉ mangˉ na nawng ngaˍ saeˍ byaˇ. Hta yao muiˉ, Hpaˍcaoˍ nawˍ yang na siˉ yao piˉ teˍ laˍ laeˍ byaˇ nae gu aˍ sak seˍ hkamˉ naeˉ uiˉ changˉ yaˇ. 16Nawng ya bae ya myangˉ jiˉ laˍ hkuiˍ baˍ maenˍ nae uiˉ changˉ ningˉ mangˉ kaˍ ca laˉ laeˍ jiˍ ningˉ ngaˍ, Yeˍsuˆ beu ang maengˉ na yumˉ naeˉ saˉ naeˉ pa yaˇ. Ang maengˉ hingˉ ngaˍ yang na kaˍ piˉ ca laˉ laeˍ jiˍ. Yumˉ naeˉ saˉ naeˉ hingˉ ngaˍ Yeˍsuˆ paˉ nae ya yao, yumˉ naeˉ saˉ naeˉ hingˉ ngaˍ nawng mae nuing suiˍ tawngˍ naˍ veu changˉ ningˉ mangˉ na maenˍ nae ca buiˍ duingˉ buiˍ laˉ laeˍ biˍ byaˇ. 17Yaˍ changˍ mawngˉ namˉ yawng veuˉ, nawng beu ang suingˉ baˍ bae nae yao ha jiˉ laˉ mae, nawng muiˉ baˍ bae nae yao ningˉ mae ha naeˉ na ga ang bae yaˇ. 18Hpaˍcaoˍ nawˍ yang beu Hkritˆ ya tuk ya hpan naeˉ nae yang beu pa rawˉ hpaet uiˉ na cuˉ yao kaˉ huˍ veu nae ciˍ jiˍ lawˉ yang hingˉ lawˉ vaˍ puing byaˇ. 19Haeˉ mae yao, Hpaˍcaoˍ nawng beu naˍ hokˍ hingˍ na poiˉ lawtˍ laˍ taw naeˉ uiˉ saˍ laiˍ, naˍ hokˍ na kuitˆ puiˉ laeˍ yao nuing ba penˉ laeˍ bao. 20Ningˉ mae ha baoˉ vaˍ, Ang suingˉ Hpaˍcaoˍ kawngˉ lui jiˉ mawnˍ pyawˉ naeˉ uiˉ ang nyamˍ hkeu lui yao, nawng saˍ laiˍ cheˉ yuˉ yao chiˉ jiˉ Yeˍsuˆ nae maengˉ jiˉ Hkrit htiˍ hu mangˉ na yang sa luiˍ laˍ naeˍ yaˇ. 21Hpaˍcaoˍ nawˍ tawngˍ hpanˍ ngang beu nae yang beu ang seungˍ ang sangˉ pa rawˉ hpaet uiˉ na cuˉ yao ciˍ saˍ jiˍ lawˉ, ang ceuˉ hkaˉ hko laˉ hko na ang suiˍ taengˍ taw laeˍ beu hkeu Yeˍsuˆ buingˍ htaˍ htaˍ veu ya ca naeˉ. 22Moˉseˍ ciˍ jiˍ hingˉ ngaˍ, Nawng beu Ang suingˉ Hpaˍcaoˍ nawˍ nawng beu ang ceuˉ ang cat hkaoˉ veu ga na meunˉ lang nae uiˉ pa rawˉ hpaet htiˍ hu nawng saˍ laiˍ piˉ taw laˉ naeˉ. Yang nawng na hkaˉ hkai laˍ naeˍ uiˉ ciˍ tangˍ na nawng ya naˉ yuˉ naeˉ yaˇ. 23Pa rawˉ hpaet hiˉ mangˉ beu tangˍ na baˍ naˍ yuˉ nae uiˉ changˉ nawˍ changˉ ceuˉ uiˉ hkaoˉ veu sit pyo naeˉ na ya hkamˉ buˉ naeˉ nae ha saˍ jiˍ. 24Saˍmoeˍlaˆ nae hingˉ nawngˍ veu taw laˉ jiˉ uiˉ pa rawˉ hpaet uiˉ muiˉ htiˍ coe peunˉ yao htiˍ coe muiˉ ningˉ awˍ lawng na maˍ yao ciˍ saˍ jiˍ. 25Nawng ngaˍ, Hpaˍcaoˍ beu pa rawˉ hpaet uiˉ beu keungˍ hingˍ caˍ hu mangˉ ang luˍ ang han hpeuˍ yao, nawng beu ang hpiˍ ang puˉ htiˍ baˍ uiˍ na Hpaˍcaoˍ piˍ saˍ jiˍ kang tiˍ saˉ caˉ na chaˍ lang naeˉ ang luˍ ang han uiˉ muiˉ hpeuˍ naeˍ yaˇ. Ka tiˍ saˉ caˉ hingˉ ngaˍ Hpaˍcaoˍ Aˍbraˍhamˍ na ha biˍ jiˍ yang, Nawng beu ang ceuˉ ang cat uiˉ pa nae nuingˉ chaˍ htaˍ nawˆ changˉ ceuˉ hkaˉ hko laˉ hko ang buinˉ ya naeˉ yaˇ nae Hpaˍcaoˍ ciˍ saˍ jiˍ. 26Nawng hkaˉ hko laˉ hko naˍ hokˍ na paek taw yao Hpaˍcaoˍ nawng na ang buinˉ piˍ laˍ seuˍ, Hpaˍcaoˍ maˇ yang beu yaˍ cenˍ na cheˉ yuˉ yao, nawng kawngˉ kaˉ huˍ veu saˍ luiˍ laˍ jiˍ nae Peˍtruˆ yawng na ha biˍ jiˍ.
اکنون انتخاب شده:
Naiˍ htangˍ 3: pyy
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2022, Wycliffe Bible Translators, Inc. All rights reserved.
