ሉቃ̈ሳ 21

ኣስኒ ዓይቂ̇ኖ ፔቲ̇ ኣሲን ኢሚ̇ኖ ማባ

ማ̈ርቆ̈ሳ 12፡41-44

1ዬሱ̈ሲ ሾክ ጋ̈ሪ ቤቃ̇ዚምባራ ዱራን ጾ̈ሳ̇̇ ኬ̈ ጋርታ̇ ማባ ሚ̈ሺ̇ ሺ̈ሻ̇ዝ ሳ̈ጺኒን ጋርታ̇ ፌ ማባ ሚሻምባር ቤቂ̇ዴ። 2ማ ኣስኒ ዓይቂ̇ኖ ፔቲ̇ ዎርባዪንዳ̇ ናምኢ ባካ̇ና ሳ̈ጺኒን ጋርታ̇ ሚሻምባ̇ር ቤቂ̇ዴ። 3ኢያር ኢንታ̇ኮ “ቴ ዪንታ̇ክ ኪን ጋ̈ሬ፥ ዓና̇ ኣስኒ ኣይቂ̇ኖ ዎርባዪንዳ ዎይ̈ፖ̇ ሺሻር ኢሚ̇ኔ። 4ዓን ኣሳን ፌ̈ብ ዎ ሚ̈ሻ̇ ጋልዳፖ̇ ኢንታ̇ብ ጊዲ ሺኖን ኢሚ̇ንዶ̈ን ኢዛ ዎርባያዶ̈ራ ፌ̈ብ ዎ ባዚን ኣባካር ኣሻ̇ካይዶራ ዎይ ኢሚ̇ኔ” ጌይዴ።

ዉርሲ ላይን ዬሊ̇ኖን ኤርሲዝ ማላ̇

ማ̈ቶ̈ሳ 24፤ ማ̈ርቆ̈ሳ 13

5ዬሱ̈ሳ ታማ̈ራን ጋርታ̇ፖ̇ ፔታ̇ን ፔታ̇ና ጾ̈ሳ̇̇ ኬ̈ ቆይሲዝ ሹችባርኬ ኣሳን ጾ̈ሳ̇̇ ኬ̈ብ ኤሄ̈ር ኢሚ̇ኖ ሚ̈ሻ̇ባራ ኬ̈ጺንታ̇ር ቆይሲኖን ሶ̈ላዚምባራ ዬሱ̈ሲ ኢንታ̇ኮ፥ 6“ዓ ዪንቲ̇ ቤቂ̇ዛ ዎይ ሹቺ̇ ሹች ጋልዳ ኬ̈ሊንቲ̇ኖፌ̈ን ኣቲ̇ባ̈ሴ ላ̈ሊ̇ንቲ̇ዝ ኬሊ̇ ዬይሬ” ጌይዴ።

7ኢንታ̇ሬ “ኣስታማ̈ራ̈ዶ! ዪዝኮ ዪ ዎይ ማ̈ቂ̇ዝ ኬላ̇ ኣ̈ንቲ̇ያ? ማ ዪኒ̇ ማ̈ቃ̇ዚምቦ̇ ኢዝ ማሊ̇ን ኣብዛ?” ጋ̈ር ኦይጪ̇ዴ።

8ኢያር ኢንታ̇ኮ “ኦ̈ናካር ዪንታ̇ ባሊካ̇ይፌ̈ኒ ዪንታ̇ ናጊብቴ̇። ኣባ ጌይን ዎይሊንን ‘ታ̈ኒ ክርስቶ̈ሳ’ ማ ‘ኬሊ̇ን ዬሊ̇ኔ’ ጌዪ ሙታ̇ ቴ ሱምባር ዬይሬ። ዪዚ ዪንቲ̇ ኢንታኮን ሲስካ̇ፒ̇ቴ። 9ኦልኬ ዋችኬ ዎርዣ ጊዳ̇ ዎ ጌይዝ ባዝ ሲስካ̇ሪ ባቂታፒ̇ቴ። ባዝ ዪን ዉርሲ ላይን ዬላ̇ናፖ̇ ቲ̈ን ኣባካር ጌይን ማ̈ቃካ̇ይ ኣቲ̇ባ̈ሶ ባዜ። ዎቲናካሬ ዉርሲንዳ ኤሊ̇ ባዬ” ጌይዴ።

10ኢናፖ̇ ኢንታ̇ኮ “ዎርዦ ዎርዣ ጋልዳ̇፥ ካ̈ቲ ካ̈ታ ጋልዳ̇ ኦል ዲንዲ̇̈ሬ።

11ሳ̈ዚ ጴች ኤንኢ̈ሬ፤ ዎይሊን ቤሲ̇ ጋፍኬ ዓርጋ ጌሊ̈ሬ። ኣስ ኢ̈ቺ̇ዝ ባዝኬ ጴች ማላ̇ ኣፋፖ̇ ቤንቲ̇̈ሬ።

12ዪ ዎይ ማ̈ቃ̇ናፖ ቲ̈ን ኣሳን ዪንታ̇ ኤ̈̇̈ሬ፤ ዳኪ̇ ኣይሁድ ዎ̈ሳ ኬ̈ ጋርታ̇ኬ ቃሺ ኣ̈ል ዪንታ̇ ጌልሲ̇̈ሬ። ዪንቲ̇ ታ̈ና ኣማ̇ናዚንኮታ̇ቦ ካ̈ቲንታ̇ን ቲ̈ንኬ ጋድ ኣቂሲዛን ቲ̈ን ዪንታ̇ ሺ̈ሺ̇̈ሬ። 13ዪኒ̇ባር ቴ ኦ̈ኖ ባዚን ሶ̈ላንዳ̇ቦ ኮሽ̇ ቃም ዪንታ̇ብ ማ̈ቃ̈̇ሬ። 14ዪዚ ኑ̈ኒ ኣ ሶ̈ሊ ማሃኔ ጋ̈ር ቲ̈ኒታር ቲ̈ሪሲ ዪንታ̇ ኤ̈ፖ̇ ጋ̈ቤ። 15ዪንታ̇ ጻላ̈ታን ጋርታ̇ፖ̇ ኦ̈ናካር ሞ̈ታባር ዪንታ̇ ጋማንፔ̈ንባዮ̇ ቃ̈ላኬ ኤራኬ ቴ ዪንታ̇ብ ኢማ̇ንዳ̇። 16ዪንታ̇ ዬሊኖ ባ̈ቢንታ̇ንኬ ኢንዲንታ̇ን፣ ኢሺንታ̇ን፣ ዪንታ̇ ዳባ̇ንኬ ዪንታ̇ ላጋን ዎይ ኣታካ̇ይዶ̈ሪ ዪንታ̇ ኣ̈ ኢሚ̇̈ሬ፤ ፔታ̇ን ፔታ̇ናንር ዪንታ̇ ጋርታ̇ፖ̇ ዎ̈ሬ። 17ዪንቲ̇ ታ̈ና ኣማ̇ኒዛኮታ̇ቦ ዎይ ኣሳ ቲ̈ን ኢጺንቲ̇ኖ ማ̈ቂ̇̈ሬ። 18ዎቲናካሬ ዪንታ̇ ቆሚ̇ን ኢሲንን ጋርታ̇ፖ̇ ፔታ̇ኒን ያባሴ። 19ዪንቲ̇ ሚ̈ጚ ኤቄ̇ጌይን ዪንታ̇ ሼምፒ̇ን ቡ̈ታ̇̈ሬ።

20ዬሩሳ̈ላም ቡጊድባር ዎታዳራን ቂርጽ ጋ̈ር ቤንቴጌይን ካታሚን ኢዛ ዪዝ ኬሊ̇ ዬሊ̇ኖን ኤሪብቴ̇። 21ዪና̇ ኢዝ ኬሊ̇ ዪሁዳ ጋዳ̇ ዎ ኣሳን ፉዳ ኢንዳ ጋልዳ ዎጻ̇ ጋ̈ቤ። ዬሩሳ̈ላም ካታሚን ጋርታ̇ ዎ ኣሳንሬ ኢናፖ̇ ኬስካ̇ጋ̈ቤ። ጌዳ ጋጻራ ዎ ኣሳንሬ ካታሚን ጋርታ̇ ዬ̈ፖ̇ ጋ̈ቤ። 22ኣባ ጌይን ጾ̈ሳ̇̇ ቃ̈ላ ጋልዳ̇ ጻ̈ፊንቲ̇ኖ ዎይ ፎቲንታ̇ምፔ̈ኒ ዓና̇ ኢንታ̇ ጋልዳ̇ ጎይሊ ዬይዝ ኬሌ̇። 23ሳ̈ዝ ጋልዳ̇ ጴች ሜታ ዬይሬ፥ ዪሁዳ ዎርዣ ጋልዳሬ ጾ̈ሳ̇̇ ጎይላ ዬይዛኮታ̇ቦ ዪና̇ ኢዝ ኬሊ̇ንባራ ዎዳንብኬ ኣሚ̇ሲዝ ጋጪናን ባዚ ኣዬ̇። 24ኦልባራ ኢንታ̇ ጋርታ̇ፖ̇ ዎይሊን ኣሲ ዓይቂ̇̈ሬ፥ ዎይሊን ኣሳሬ ካ̈ቲንታ̇ሪ ሜላ ጋዳ̇ ሉኪ̇̈ሬ። ዪ ኣይሁድ ዜር ማ̈ቃካ̇ዮ ኣሳንቦ ኢሚንቲ̇ኖ ላይን ዉሪዝ ዲራ̈ስ ዬሩሳ̈ላም ካታሚንዳ̇ ኢንታ ጻና ጋርታ̇ ቢጻ ቤቃ̇ ዶኣ̈ሬ” ጌይዴ።

25ኢናፖ̇ ዎሃ ዬሱ̈ሲ ኢንታ̇ኮ “ኣዋ̈ፍ ጋልዳ̇፣ ኣጋን ጋልዳኬ ቤ̈ርስ ጋልዳ ኦራ ማላ̇ ቤንቲ̇̈ሬ። ባሃ̈ራ̈ዲኬ ኢ ጋልዶ̇ ዉርጊ ጊርሳ ሲስካ̇ሪ ሳ̈ዝ ጋልዶ̇ ዎርዣ ኢ̈ጫ̇ር ሼንእ ሼንእ ጌይሬ። 26ኣፎ ዎልቃ ዎይ ኤንኢዛኮታ̇ቦ ኣሳን ‘ሳ̈ዝ ጋልዳ̇ ኣብዚ ዬ̈ንዳ ዶ̈ኔ?’ ጋ̈ሪ ና̈ጋባር ዳ̈ቡሪ̈ሬ። 27ዪና̇ ኢዝ ኬሊ̇ንባራ ታ̈ኒ ኣሳ ናኣ̈ዲ ዎልቃባርኬ ጴች ቦንችባራ ሻ̈ራባራ ዬ̈ዚን ኢንቲ̇ ቤቂ̇̈ሬ። 28ዪንታ̇ሬ ባዛን ዪን ፎቲንቲ̇ ኤ̈̇ዚምባራ ዪንቲ̇ ጾ̈ሲ̇ ዪንታ̇ ፋዝ ቃሚ̇ን ኡኪ̇ኖኮታ̇ቦ ፉዳ ሾክ ጋ̈ሪ ቤቂ̇ብቴ” ጌይዴ።

29ኢናፖ̇ ዎሃ ዬሱ̈ሲ ኢንታክ ሚሳ̇̈ሊባር “ዪንቲ̇ ባላስ ሚንዲኬ ሜላ ሚ ዎይን ቤቂ̇ብቴ̇። 30ኢንታ̇ ዋይን ፉርቲ ኤ̈̇ምባራ ዪኒ̇ባር ሴ̈ታ ዬሊ̇ኖን ዪንቲ̇ ኤሪ̈ሬ። 31ዪና̇ ኢዝፌ̈ን ማ ባዛን ዪን ፎቲንታ̇ዚን ቤቃ̇ዚምባራ ጾ̈ሳ̇̇ ካ̈ቲቲን ኡኪ̇ኖን ዪንቲ̇ ኤሪብቴ̇።

32“ቴ ዪንታ̇ክ ኪን ጋ̈ሬ፥ ዪ ዎይ ፎቲንቲ̇ዝ ዲራ̈ስ ዓ̈ ዬሊቲ ዓይቂ̇ባ̈ሴ። 33ኣፋ ጪሊንዲ̇ኬ ሳ̈ዶ̇ ሳ̈ዚንዳ̇ ያ̈ሬ፤ ታ ቃ̈ሊንዳ̇ ያባሴ።

34“ዪዚ ዪንቲ̇ ሙንትኬ ኡሽኬ ዎይሊሳር ማባር ሳ̈ዝ ጋልዶ̇ ቲ̈ሪስባር ዪንቲ̇ ዳ̈ቡሪ ዎን ጋርታ̇ ዪና̇ ቃሚ̇ን ጺሂፌ̈ን ኤሪንታ̇ካይዶ̈ር ዪንታ̇ ዬላ̇ካይፌ̈ኒ ና̈ጊንቲ̇ብቴ̇። 35ኣባ ጌይን ዪና̇ ሳ̈ዝ ጋልዳ ዶኢዝ ኣስ ዎይ ጋልዳ ዬላ̇̈ሬ። 36ዪዚ ኢ̈ታ ባዝ ዎይ̈ፖ̇ ቡ̈ታ̇ንዳብኬ ታ ኣሳ ናኣ ቲ̈ን ኤቃ̇ንዳቦ ዳንዳኣምፔ̇̈ኒ ዎይ ጋላስ ሚ̈ጛር ዎ̈ሲ̇ብቴ̇” ጌይዴ።

37ዬሱ̈ሲ ጋላስ ጋላስ ጾ̈ሳ̇̇ ኬ̈ ጋርታ̇ ታማ̈ርሲ ሙታ̇ ቃም ቃም ዳብራዛይታ ኢንዲን ጋልዳ ኬስኪ ኣቂ̇̈ርዶን፥ 38ዎርዣ ዎይ ኢ ታማ̈ርሳዚን ሲስካ̇ንዳ̇ቦ ጌሽ ቃም ዲንዳር ጾ̈ሳ̇̇ ኬ̈ ጋርታ̇ ኢ̈ክ ዬይሬ።

انتخاب شده:

ሉቃ̈ሳ 21: ኦጫ̈ቃማ

های‌لایت

به اشتراک گذاشتن

کپی