ዋ̈ኒ̇ሳ 7

ዬሱ̈ሲ ዳ̈ሳ ባ̈ል ቦንቻ̇ንዳብ ዬሩሳ̈ላም ሉኪ̇ዴ

1ዪኒ̇ፖ ዓኒ ዬሱ̈ሲ ኢና ዎ ኣይሁድ ኣሳን ኢያ ዎንዳ̇ብ ኮዪዛኮታ̇ቦ ዪሁዳ ጋርታ̇ ዬ̇ ቢሪንታ̇ዚን ኣሻ̇ሪ ጋሊላ ጋዲን ጋርታ̇ ዬ ቢሪንቲ ኤ̈ዴ። 2ዪና̇ ኢዝባራ ኣይሁዳን ቦንቺ̇ዛ ዳ̈ሳ ባ̈ሊ#7፡2 ዳ̈ስ ባ̈ል- ጌይዛዲ ኣይሁዳን ሚን ኢንታ ባ̈ቢንታ̇ን ጊብጻፖ ኬስካ̇ሪ ካና̈ና ሉኪ̇̈ርዶር ባራሃ ጋርሳባር ዳሳ ኮቻ̇ር ዶኢኖን ኤልቅ ዎታንዳቦ ቦንቺዝ ባ̈ላ ኡኪ̇ንዶ̈ን፥ 3ዬሱ̈ሳ ኢና̇ኣን ኢ̈ኮ “ኔ ታማ̈ራን ኔ ኦ̈ዝ ታ̈ሚ̇ራ̈ቲን ቤቃ̇ምፔ̈ኒ ዓይዲፖ̇ ዲንዳራ ዪሁዳ ጋዳ̇ ሉካ̇ቤ፥ 4ፌ̈ና ኤሪሳንዳ̇ብ ኮዪ ሙታ̇ ጌ̈ማ ቤስ̇ ኦ̈ዝ ኣሲ ኦ̈ናካር ባዬ̇፥ ዪዚ ኔ̈ናሬ ዓን ባዛን ኦ̈ርኮ ኔ ኦ̈ሲን ኣላሚን ዓኒ̇ ጋልዳ ዎ ኣሳ ኤርሳቤ” ጌይዴ። 5ኢንቲ̇ ዪና̇ ጌይኖንዳ̇ ሜላ ኣቲ̇ን ኢንቲ̇ ፌ ቆሚ̇ን ኢያ ኣማ̇ናካ̇ዮኮታ̇ቦ።

6ዬሱ̈ሳር ኢንታ̇ኮ “ታ̈ኮ ኬላ̇ ቢርት ዬላ̇ካ̇ዬ፥ ዪንቲ̇ ኮዪኖ ሳኣ̈ት ጋልዳ̇ ሉካ̇ንዳብ ዳንዳኢ̈ሬ። 7ኣላሚን ዓኒ̇ ጋልዶ ኣሳን ዪንታ̇ ኢጻ̇ንዳብ ዳንዳኢባ̈ሴ፥ ታ̈ኒ ኢንታ ኦ̈ሲን ኢ̈ታ ማ̈ቂ̇ኖን ማርኪ̇ታዚንኮታ̇ቦ ታ̈ና ኢጺ̇̈ሬ። 8ዪንቲ̇ ባ̈ሊን ቦንቻ̇ንዳብ ሉኪ̇ብቴ፥ ታ̈ኒ ቴ ኬሊ̇ን ዬላ̇ካ̇ዮኮታ̇ቦ ባ̈ሊን ቦንቻ̇ንዳብ ሉካ̇ብዳ” ጌይዴ። 9ኢ ዪኖ̇ ኢንታ̇ብ ሶ̈ላሪ ኢና ጋሊላ ኣቲ̇ዴ።

10ማ̈ቂ̇ናካሬ ኢ ኢና̇ኣን ባ̈ሊን ጋርታ̇ ሉኪ̇ኖፖ̇ ዓኒ ኢያር ኦባርካር ቤንታካ̇ይዶ̈ር ባያር ባ̈ሊን ቦንቻ̇ዝ ቤሲ̇ን ሉኪ̇ዴ። 11ባ̈ሊን ቤሲ̇ን ጋርታ̇ ኣይሁዳን “ዪ ና̈ሳ ኢ ዎይዲ ዎ?” ጋ̈ሪ ኢያ ኮዪ ኤ̈̇ዴ። 12ዎርዣ̈ዲ ኢ ባዝ ሳ̈ሲጚ ሙታ̇ ዎልዎልኣ ሶ̈ሊንቲ̇ዴ። ኢንታ̇ ጋርታ̇ፖ̇ ፔታ̇ን ፔታ̇ናን “ኢ ኮሽ ኣሲሽዋ” ጌይን ማ ዶካ̇ን “ዋኣኬ፥ ኢ ዎርዣ ባሊሬ” ጌይዴ። 13ማ̈ቂ̇ናካሬ ኢንቲ̇ ኣይሁድ ኣላቃንቦ ኢ̈ጫ̇ሪ ኦ̈ናካር ኢ ባዝ ፋላ̇ ጋልዳ ኬሳ̇ር ሶ̈ላካ̇ዬ።

14ባ̈ሊን ቦንቺ̇ ጊዳ ዬላ̇ዚምባ̇ራ ዬሱ̈ሲ ጾ̈ሳ̇̇ ኬ̈ ጋርታ̇ ሉካ̇ሪ ታማርሲ ኤ̈̇ዴ። 15ኣይሁድ ኣላቃንሬ ጋራ̇ሚንታ̇ሪ “ዓ ና̈ሳ ታ̈ማ̈ራካ̇ይዶ̈ር ጌ̈ሻ̇ ማጻ̈ፋ ዎዛ̈ርታ̇ር ዓ̈ፌ̈ን ኤራንዳ̇ብ ዳንዳ̇ኤ” ጌይዴ።

16ዬሱ̈ሳር ኢንታ̇ኮ “ቴ ዪንታ̇ ታማ̈ርሳዝ ቲሚርቲ̇ንዳ̇ ቴ ጋልዳፖ̇ ጊዳካ̇ይዶ̈ን ታ̈ና ኪ̈ቲ̇ ሚሺኖ ቴ ባ̈ባ̈ ጋልዳፖ̇ ዬይኖ ቲሚርታ̇። 17ኦ̈ናካር ማ̈ቂ̇ን ጾ̈ሲ̇ ጌይኖ ባዚን ኦ̈ንዳብ ኮዪዝ ኣሲ ዎኮ ዓና̇ ቲሚርቲ̇ንዳ ጾ̈ሳ̇̇ ጋልዳፖ̇ ዬይኖን ዎይ ቴ ጋልዳፖ̇ ማ̈ቂ̇ኖን ኤሪስታ̇። 18ፌ̈ ጋልዳፖ ሶ̈ሊዝ ኣሲ ፌ̈ብ ቦንች ኮዪ̈ሬ፥ ፌ̈ና ኪ̈ቲ̇ ሚሺኖ ቦንቺ̇ሳንዳ̇ብ ኮዪዛ̈ዲ ኢ ኪን ኣሴ፥ ማቆ ኢ ጋርታ̇ ባዬ̇። 19ሙ̈ሶ ዪንታ̇ብ ሂጋ̇ ኢሚ̇ኔ ባያ? ዎቲናካሬ ዪንታ̇ ጋርታ̇ ሂጊ̇ን ና̈ጊ ፎቲኖ ኣሲ ኦ̈ናካር ባዬ̇። ዪንቲ̇ ኣባብ ታ̈ና ዎንዳ̇ብ ኮዪ̈ራ?” ጌይዴ።

20ዎርዣ̈ዳር ኢ̈ኮ “ኔ ጋል ኢ̈ታ ኣያ̇ና ዎ፥ ኦ̈ኖ ኔ̈ና ዎንዳ̇ብ ኮያ̈ዲ?” ጌይዴ።

21ዬሱ̈ሳር ኢንታ̇ኮ “ታ̈ኒ ፔቲ̇ ታ̈ሚ̇ራ̈ታ ኦ̈ን ዪንቲ̇ ዎይ ኢዝባር ጋራ̇ሚንቲ̇ዴ። 22ሙ̈ሶ ዪንቲ̇ ጋራ̇ዚንታምፔ̈ኒ ዎጋ ዪንታ̇ብ ኢሚ̇ኖኮታ̇ቦ ዪንቲ̇ ሳምባታ ጋላስ ኣስ ጋራ̇ዚ̈ር ባያ። (ዎቲናካር ኣስ ጋራ̇ዚዛ̈ዲ ሙ̈ሳፖ ቲ̈ን ዎ ዪንታ̇ ባ̈ቢንታ̇ንፖ̇ ዬይኖ ባዝዶኬ ሙ̈ሳ ጋልዳፖ̇ ኢሚ̇ንቲ̇ኖ ባዝ ጊዳካ̇ዬ።) 23ዪዚ ሙ̈ሶ ዪንታ̇ብ ኢሚ̇ኖ ሂጊ̇ን ኣታ̇ካ̇ይፌ̈ኒ ሳምባታ ጋላስ ዪንቲ̇ ኣስ ጋራ̇ዚ̈ርኮ፥ ታ̈ኒ ሳምባታ ጋላስ ፔቲ̇ ማኖ ኣሳብ ኢ ኣሲቲን ዎይ ፋን ዪንቲ̇ ታ ጋልዳ ኣባብ ዛልቂ̈ራ? 24ዪንቲ̇ ኪን ፊርዲብትዶኬ ኣስ ኣ̈ፋብ ዬ̈ልቃ̇ር ፊርዳፒ̇ቴ” ጌይዴ።

ኣሳን ክርስቶ̈ሳ ጎይ ዎልዎልኣ ፋላሚዴ

25ዬሩሳ̈ላማፖ̇ ፔቲ̇ ፔቲ̇ ኣሳን ዎልዎልኣ “ኣሳን ኢያ ዎንዳብ ኮዪዝ ና̈ሳ ዓ̈ ኢያ ባያ? 26ዓ̈ዲሼ ኢ ፋላ̇ ጋልዳ ሶ̈ሊ̈ሬ፤ ኢንታ̇ር ኢያ ኣባካር ጋ̈ካ̇ዬ። ና̈ሳ ዪ̈ዲ ክርስቶ̈ሳ ማ̈ቂ̇ኖን ኣላቃን ኪን ኤሪዶ̇ኔ? 27ክርስቶ̈ሲ ዬ̈ምባራ ኢ ዎይዲፖ̇ ዬይርኮ ኦ̈ናካር ኤሪዝ ኣሲ ባዬ፥ ዎቲናካር ና̈ሳ ዓ̈ ዎይዲፖ̇ ዬይኖኮ ኑ ኤሪ̈ሬ።

28ዬሱ̈ሲ ጾ̈ሳ̇̇ ኬ̈ ጋርታ̇ ታማ̈ርሲ̈ርዶሪ ፌ ቆ̈ ሾክ ዎታሪ ኢንታ̇ኮ “ዪንቲ̇ ታ̈ና ኤሪ̈ሬ፥ ማ ቴ ዎንዳፖ̇ ዬይናካሬ ዪንቲ̇ ኤሪ̈ሬ፤ ዎቲናካሬ ቴ ቴ ሲልጣ̈ናባር ዬ̈ካ̇ዬ፥ ታ̈ና ኪ̈ታ̇ር ሚሺኖ̈ዲ ኢ ኪን ማ̈ቂ̇ኖ̈ዳ፤ ዎቲናካሬ ዪንቲ̇ ኢያ ኤሪባ̈ሴ። 29ታ̈ኒ ኢ ላፋፖ̇ ዬይኖኮታ̇ብኬ ማ ኢ ታ̈ና ኪ̈ቲ̇ ሚሺኖኮታ̇ቦ ቴ ኢያ ኤራ̈ሬ” ጌይዴ።

30ዪዚ ዪኒ̇ባራ ኢያ ኤ̈̇ንዳብ ኮዪንዶ̈ን ኢ ኬሊ̇ን ዬላ̇ካ̇ዮኮታ̇ቦ ኦ̈ናካር ኢያ ኤ̈ካ̇ይ ኣቲ̇ዴ። 31ማ̈ቂ̇ናካሬ ዎርዣ ጋርታ̇ፖ̇ ዎይሊንን ኢያ ኣማ̇ኒዴ። ማ ኢንቲ̇ “ክርስቶ̈ሲ ዬ̈ርዶሪ ዓ̈ ና̈ሳ ኦ̈ኖ ታ̈ሚ̇ራ̈ታንፖ̇ ሺ ኦ̈ንዳዶ̈ኔ?” ጌይዴ።

32ፋራሳ̈ዋን ዎርዣ̈ዲ ዬሱ̈ሳ ባዝ ሳ̈ሲንባራ ሶ̈ሊኖን ሲስኪዴ። ቄ̈ሳ ኣላቃንኬ ፋራሳ̈ዋን ኢያ ኤ̈̇ምፔ̈ን ጾ̈ሳ̇̇ ኬ̈ ና̈ጊዝ ዎታ̈ዳራን ኢ̈ክ ሚሺዴ። 33ዬሱ̈ሳር ኢንታ̇ኮ “ቴ ዪንታ̇ባር ዶኣዚንዳ̇ ጊሊ̇ ቃማ̇ብ ሙታ̇፥ ዪኒ̇ፖ ጌዳ ታ̈ኒ ታ̈ና ኪ̈ቲ̇ ሚሺኖ̈ኮ ሉካ̇̈ሬ። 34ዪንቲ ታ̈ና ኮዪ̈ርዶ̈ን ታ̈ና ዲጚባ̈ሴ፤ ቴ ዎ ቤሲ̇ንዳሬ ዪንቲ̇ ዬ̈ንዳ̇ብ ዳንዳኢባ̈ሴ” ጌይዴ።

35ኣይሁዳንሬ ዎልዎልኣ “ና̈ሳ ዓ̈ዲ ኑ ኢያ ዲጚባ̈ሶ ቤሲ̇ ኢ ዎንዳ ሉካ̇ንዳብ ቆፒ̇ንዶኔ? ኣይሁዳን ላ̈ሊንታ̇ር ዎ ግሪ̈ክ ኣሳን ጋርታ̇ ሉካ̇ሪ ግሪ̈ካን ታማ̈ርሳንዳ̇ብ ኮዪንዶኔ? 36‘ዪንቲ̇ ታ̈ና ኮዪ̈ርዶ̈ን ታ̈ና ዲጚባ̈ሴ፤ ቴ ዎ ቤሲ̇ንዳሬ ዪንቲ̇ ዬ̈ንዳ̇ብ ዳንዳኢባ̈ሴ’ ጋ̈ዚንዳ ኢዛ ኣብዝ ጋ̈ንዳብ ኮዪንዶኔ?” ጌይዴ።

ሼምፓ ኢሚ̇ዝ ዋ̈

37ባ̈ሊምቦ ዋ̈ና ማ̈ቂ̇ኖ ዉርሲ ቃሚ̇ን ጋላስ ዬሱ̈ሲ ዲንዲ ኤቃ̇ር ፌ ቆ̈ ሾክ̇ ዎታሪ ኢንታ̇ኮ “ኦ̈ናካር ባ̈ርሲንቲ̇ኖ ኣስ ዎኮ ታ̈ክ ዬ̈ሪ ኡሽካ ጋ̈ቤ። 38ታ̈ና ኣማ̇ኒዝ ኣሲ ጌ̈ሻ̇ ማጻ̈ፋ ሶ̈ሊዛ̈ዲፌ̈ኒ፥ ሼምፓ ኢሚ̇ዝ ዋ̈ ኢ ጋርታ̇ፖ̇ ኬስኪ ጎጊ̇̈ሬ” ጌይዴ። 39ኢ ዪኖ̇ ጌይኖንዳ̇ ኢያ ኣማ̇ኒዛንቦ ዎሃ ኢሚ̇ንቲ̇ዝ ጌ̈ሻ̇ ኣያ̇ና ጎይ ሶ̈ሊኔ። ዬሱ̈ሲ ቢርት ቦንቺ̇ንታ̇ካ̇ዮኮታ̇ቦ።#7፡39 ቦንቺ̇ንታ̇ካ̇ዮኮታ̇ቦ- ዬሱ̈ሲ ቢርት ማስቃላ ጋልዳ ዓይቂ̇ ዓይቃ ጋርታ̇ፖ̇ ዴንዲ̇ ፌ ባ̈ባክ ሉካ̇ካ̇ዮኮታ̇ቦ ቦንቺ̇ንታ̇ካ̇ዬ ጌይንቲ̇ኔ ጌ̈ሻ̇ ኣያ̇ና ኢንታ̇ብ ኢሚ̇ንታ̇ካ̇ዬ።

40ዎርዣ ጋርታ̇ፖ̇ ፔታ̇ን ፔታ̇ናን ኢ ሶ̈ሊኖ ቃ̈ሊን ሲስካ̇ሪ “ዓ̈ ና̈ሳ ኪን ናቢ ዶኢ ኣታካ̇ዬ” ጌይዴ። 41ሜላንሬ “ኢ ክርስቶ̈ስሽዋ” ጌይን፥ ማ ዶካ̇ን “ጋሊላ ጋዳ̇ፖ̇ ክርስቶ̈ሲ ዎዛ̈ርታ̇ር ኬስካ̇ንዳብ ዳንዳኢ̈ራ? 42ክርስቶ̈ሲ ዳ̈ዊቲ ዜር ጋርታ̇ፖ̇ ዬሊንታ̇ዚንዲኬ ዳዊታ ካታሚን ቤቴሌ̈ማ ጋርታ̇ፖ̇ ኬስ̇ካዚን ጌ̈ሻ̇ ማጻ̈ፋ ጋልዳ ጻ̈ፊንቲ̇ናባያ?” ጌይዴ 43ዪ̈ኮታ̇ቦ ኢ ጊሻ̇ቦ ዎርዣ ጊዳ̇ ፋጊቲ ኬስኪ̇ዴ። 44ፔታ̇ን ፔታ̇ናን ኢያ ኤ̈̇ንዳብ ኮዪንዶ̈ን ኦ̈ናካር ኢያ ኤ̈ካ̇ይ ኣቲ̇ዴ።

ኣይሁድ ኣላቃን ዬሱ̈ሳ ኣማ̇ናካ̇ይ ኣቲ̇ዴ

45ዪኒ̇ፖ ዓኒ ጾ̈ሳ̇̇ ኬ̈ ና̈ጊዝ ዎታ̇ዳራን ቄ̈ስ ኣላቃንኬኬ ፋራሳ̈ዋንኮ ሉኪ̇ዴ። ኢንታ̇ር ዎታ̇ዳራንኮ “ዪንቲ̇ ኢያ ኣባቦ ኤሄ̈ካ̇ይ ኣቲ̇ቴ?” ጋ̈ር ኦይጪ̇ዴ።

46ዎታ̇̈ዳራንር ኢንታ̇ኮ “ዓ̈ ና̈ሳ ሶ̈ላዚንዲፌ̈ን ኦ̈ናካር ሶ̈ሊ ኤሪባ̈ሴ” ጋ̈ር ማሂዴ።

47ፋራሳ̈ዋን ኢንታ̇ኮ “ማ ኢ ዪንታ̇ር ባሊ? 48ዪንቲ̇ ቤቃ̇ምባ̇ራ ኣይሁድ ኣላቃንፕኬ ፋራሳ̈ዋን ጋርታ̇ፖ̇ ኢያ ኣማ̇ኒኖ ኣሲ ዎ? 49ዪ ሙ̈ሳ ሂጋ̇ ኤሪባ̈ሶ ዎርዣ ዎይ ጾ̈ሲ̇ ኪን ባ̈ዲኖ ዎርዣ” ጌይዴ

50ዓኒ̇ፖ̇ ቲ̈ን ዬሱ̈ሳክ ሉኪ̇ኖ፥ ፋራሳ̈ዋን ጋርታ̇ፖ̇ ፔታ̇ና ኒቆ̈ዲሞ̈ሲ ኢንታ̇ኮ፥ 51“ኑ ሂጊ̇ንዲፌ̈ንኮ̇ ፔቲ̇ ኣሲ ፌ ሞ̈ቲምቦ ቲ̈ን ማልሳ ኢማ̇ካይዶ̈ርኬ ኢ ኣብዝ ኦ̈ኖኮ ኤሪንታ̇ካ̇ይዶ̈ር ኢ ጋልዳ ፊርዲባ̈ሴ” ጌይዴ።

52ኢንታ̇ር ኢ̈ኮ “ኣን ኔ̈ናር ጋሊላ ኣሳ? ናቢ ጋሊላፖ̇ ኬስኪ̇ባ̈ሶንዶ ጌ̈ሻ̇ ማጻ̈ፋ ኮሺንቻ̇ ናባ̇ባር ቤቃ̇ቤ” ጌይዴ። 53ኢናፖ̇ ዎይ ፌ ኣ̈ል ሉኪ̇ዴ።

انتخاب شده:

ዋ̈ኒ̇ሳ 7: ኦጫ̈ቃማ

های‌لایت

به اشتراک گذاشتن

کپی