Matiye 8
8
NEMISIJE DANG-DANG
Jeju aji njebənji
Mrk 1.40-45
1Logə Jeju ḭ dɔ ər gə, aw ɗisi gə nangə ɗaa bula bo dəwje ꞌndole go-e. 2Ɗaa njebənji kara ce ɔsə ta kəj-e nangə no Jeju gə ngaɓa pa na: Mbayɓe, to gə ɓo mə-i njigi nama ar rɔ-m arə ngadə. 3Be ɓa Jeju ula ji-a ɔr ne rɔ-ɛ ngaɓa pa na: M-njigi ja, may kar rɔ-i arə ngadə. Logə Jeju pa be ɗaa, gə lo-e gə əng ja bənji ɔr rɔ-ɛ gə ar rɔ-ɛ arə ngadə. 4Cibi ɓa Jeju təl pa ar-ɛ na: ꞌNgom ta-i, ɓo ꞌpa ar dəw ang, ɗaa ɔdə aw ar njekapolo o-i, ngaɓa aw un nepolo to gə Moyiji pa tar-ɛ mə mbede gə le, mba kar to tar naji ar-je ꞌgərə to gə rɔ-i arə ngadə.
Jeju aji Ngon njekula lə mbay lə njeɗɔje
Lug 7.1-10
5Jeju andə gə mə ɓe gə Kapɛrənom. Logə n-aw n-andə ɗaa, njekun dɔ njeɗɔje gə tɔl ɗe inga-a ɗ-ɛ kɔgərɔ na: 6Mbayɓe, ngon njekula lə-m to nangə kəy ar rɔ-ɛ uy wɔ-wɔ, ngaɓa o mɛr ya̰. 7Jeju ila kəne na: ꞌMa, m-a kaw kaj-ɛ. 8Njekun dɔ njeɗɔje gə tɔl le təl ila kəne na: Mbayɓe, ꞌMa m-asə kar-i andə mə kəy gə lə-m ang, ar lo gə nee gə ja ꞌpa tar ta-i kara baa ja ɗaa ngon njekula lə-m le a kaji. 9Mba, ꞌma kara njeko̰ dɔ-mje ga̰ ja, ngaɓa ꞌma kara, m-o̰ dɔ njeɗɔje tɔ. To gə m-pa na: ꞋI gə nee aw be, nama n-aw, ngaɓa m-pa na: ꞋI gə nee ꞌɗe ne, nama n-ɗe ja tɔ, ngaɓa ɓo m-ula ngon njekula nəm pa na: ꞌƊa ne gə be nama ɗa ja tɔ. 10Logə Jeju o tar gə njekun dɔ njeɗɔje gə tɔl le pa to gə be, ɗaa lo tar ig-e sɛl gə rɔləl, cibi ɓa təl pa ar dəwje gə ꞌndole go-a na: Tar gə tɔgərɔ ja m-pa m-ar-si to gə horo dəw mə ɓeje gə Ijirayɛl nee tɔ̰y ja kara m-o takagə gə bo to gə be ang. 11M-pa m-ar-si to gə, dəwje bula d-a kḭ lo ce gə lə kar gə lo kuru nangə lə kar, mba kisi ta ka nekusa gə gə Abəraham, gə Ijagə, gə Jakobo mə ɓeko̰ gə dara. 12Ngaa nganje gə ɓeko̰ gə nee le, d-a kum-je mə cil ciməri gə gə ɗaga, lo-e gə nee le d-a no gə d-a kusa ngangəje kəne pəgərə-pəgərə. 13Cibi ngaɓa Jeju təl pa ar mbay lə njeɗɔje le na: Aw, may kar Luba ɗa sə-i gə go takagə lə-i. Be ɓa go tar gə Jeju pa to gə be ja ɗaa ngon njekula le aji kəbərə dɔ kar-ɛ əng ja.
Jeju aji dəwje dang-dang
Mrk 1.29-34
14Go-e gə ɗaa Jeju ɔdə aw kəy lə Piyɛr ɗaa, o mum Piyɛr-je gə jene to nangə ngaɓa rɔ-ɛ ta pər lam-lam. 15Logə Jeju uwa ji-a baa ja ɗaa, rɔ-ɛ gə ta pər lam-lam le təl kul mbɔ̰y ar-ɛ n-uba nangə n-ḭ taar, n-ar-je nekusa.
16Kar kumatagə ɗaa, ꞌɗe gə dəwje bula gə njilje gə kṵra̰y ɗa ɓe mə-je gə. Logə Jeju pa tar ja ɗaa njilje le ce, ar nj-ɛje d-inga kaji. 17#8.17 Eja 53.4 Be ɓa tar lə pajambərə Ejay gə pa le oso kəne paragə na:
N-ta məndəje dɔ si gə
Ngaɓa rɔko̰je gə d-aw d-ula kəm-si ndoo kara n-ta dɔ si gə nəm.
Ɗəw kun rɔ karə Jeju
Lug 9.57-62
18Ndɔ kara Jeju o bula dəwje gə gugu dɔ-ɛ. Logə n-oje ɗaa n-un ndu n-ar ngan njenendoje lə-a karəje d-aw tura man gə ər kara gə. 19Be ɓa njekɔr gəl torondu kara ɗe inga-a pa ar-ɛ na: Njenetɔji, aw gə ɗa ja kara m-a kaw sə-i. 20Jeju pa ar-ɛ na: Njaje gə ꞌto daje baa kara buja lə-je ga̰, ngaɓa əlje gə d-aw dara əng kara kinga lə-je ga̰, ngaa ꞌma gə Ngon lə dəw ja baa ɓa lo kula dɔ-m godo. 21Dəw kara horo ngan njenendoje gə pa ar Jeju na: Mbayɓe, iya̰ ɗəw ar-m m-aw ndubu bɔ-mje ɓa, m-təl m-ɗe ɓi. 22Ngaa Jeju ila-a kəne na: Iya̰ nje gə d-uy ar-je ꞌdubu yo lə-je, ꞌi ɗaa uwa go-m.
Jeju uwa ta ləl
Mrk 4.35-41; Lug 8.22-25
23Jeju al to ɗaa ngan njenendoje lə-a d-ore go-e. 24Logə d-aw dan man babo gə nam ɗaa ləl ula ar ꞌpagəm tuga ngaɓa to ləngə ya̰, ngaa Jeju to aw cibi. 25Be ɓa ɓəəl unda ngan njenendoje badə gangə-je ar ꞌɗəmje gə mbɔr Jeju gə ngaɓa ꞌndol-e ɗaa ꞌpa na: Mbayɓe, ꞌta si na ja kaw kinga tuji. 26Jeju ḭ gə je na: ꞌƁəəlje mba ɗi wa? ꞌToje dəwje gə takagə lə-si əngə. Ngaɓa Jeju ḭ ar taar, ndangə ləl je gə babo ɗaa mbi lo pa kəng. 27Al dɔ ngan njenendoje ar ꞌpa tar horo naa gə na: Dəw gə nee to na ja wa? N-pa tar n-ar ləl-je gə babo ja kara d-o tar t-ɛ gə səmə!
Jeju aji dəwje joo gə njilje gə kṵra̰y ɗusu mə-je
Mrk 5.1-20; Lug 8.26-39
28Logə Jeju ce tura ɗaga, dɔ nangə gə Gadara ɗaa, dəwje joo gə njilje gə kṵra̰y ɗa ɓe mə-je gə ꞌce horo dɔbarəje gə ꞌɗe d-inga Jeju. Njilje le ɗa-je ar d-uba singa ya̰ ɗaa dəwje ɓəəl mba nday gə ɗəw gə lo to-je gə. 29D-uru ꞌkuwi na: Ngon lə Luba, ɗi ɓa aw njigi ji-si gə wa? ꞋI ɗe mba bɛ̰ ta-si kede nam ɓa kar ndɔ gangə tar gə Luba ɔji asə wa? 30Lo gə d-ar kəne əng le, kuduɓe bərəje gə ꞌbula ya̰ d-ar əw ja d-aw d-usa ne, 31ɗaa njilje gə kṵra̰y ꞌdəji Jeju na: Ɓo ꞌi njigi tɔbə-si nama, ar-si j-andə mə bərəje gə d-ar nu kən. 32Jeju pa ar-je na: ꞌCeje aw-je, ɗaa ꞌceje mə dəwje gə joo gə le d-aw d-andəje mə bərəje, d-ar-je d-a̰y ɗisi kungu babo d-aw ɓugu mə babo gə, d-ay d-uy. 33Dəwje gə njekuul bərəje le, d-a̰y d-aw mə ɓe gə, d-aw pa tar neje gə nday nee le d-ar dəwje d-o. Tar gə ɔji dɔ dəwje gə njilje gə kṵra̰y tuji-je le. 34Be ɓa dəwje gə mə ɓeboje tɔ̰y ja ce cila kəm Jeju, lo gə d-a lo d-o-e ɗaa, ꞌɗa-ɛ kɔgərɔ mba kar-ɛ n-ɔdə dɔ nangə gə lə-je.
انتخاب شده:
Matiye 8: lap
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2020, ATALTRAB. All rights reserved
