uMaaliko 5

UYeesu akumuponia we ali ni mpepo inkandamanu inyinji

(uMataayi 8:28-34; uLuuka 8:26-39)

1Pe uYeesu na vhasundikwa vhahalamba usumbi uwa Galilaaya, vhahafiha mu nsi iya Vhagelaasi.#5:1 AVhagelaasi vháali vhantu vhe vhahatendamaga mu shigavho isha nsi isha Dekapooli. 2UYeesu lwe ayiiha mwi ivhooti, ahahomaana nu muntu wumo uwa mpepo inkandamanu we áfumile ku mbiipa. 3Umuntu uyo, uvhulanzi vhwakwe vhwáli ku mbiipa. Yáhaninkiine kumupinya, poosye na manyoloolo, 4mwe pe avhantu vhámupinyile ulwinji ni mpingu na manyoloolo, ileelo ahagadumulanyaaga. Atáliipo uwa maha aga kumupoota nu kumudindila. 5Insiku zyonti, uvhusiku nu musanya, ahazyunguulaga ku mbiipa na mu magamba, ahahoolaga inkoolo iya halanga, havhili ahayivholanyaaga na mavhwe.

6Lwe amulola uYeesu ukutali, ahamushimbiilila, nu kumusugamilila, 7ahahoola kwi izwi ipiti ahati, “Shooni she ukuninjiilila iwe Yeesu, we Mwana wa Mulungu uMupiti uwa ku Mwanya? Nalamba nkaani kwi izina ilya Mulungu utahanjimvwe!” 8Áyanzile vhwevhulo, mwe pe uYeesu ápezile ayipiliiye impepo inkandamanu kuuti yifume mwa muntu uyo. 9UYeesu ahamuvhuziilizya ahati, “Izina lyaho we naanu?” Ahamwamula ahati, “Izina lyane ne Mpuga,#5:9 IMpuga: IShiyunaani shikuti Legiyooni, yáamile mpuga iya vhasikaali avha Shiluumi. Impuga iyo yihavhanga na vhasikaali kwandila 3,000 kufishila 6,000 ishi. mwe pe swe vhinji.” 10Pe impepo izyo zihamulambiilizya nkaani uYeesu kuuti, atahazishimbizizye ukutali ni nsi yiila.

11Pe vháamile páali igamba, pi igamba ilyo páamile impuga impiti iya nguluvhe, zye vhahazidiimaga. 12Impepo zihamulambiilizya uYeesu, zihati, “Twitishile twinjile mu nguluvhe.” 13Pe ahazyitishila. Zihafuma mwa muntu ula, zihinjila mu nguluvhe. Impuga yonti iya nguluvhe 2,000 zihiiha mwi igamba nu kushimbiilila mwa sumbi, zihadwivha mu minzi nu kufwa.

14Avhadiimi avha nguluvhe vhahashimbila uluvhilo kusogola mu nkaaya na mu ntala, vhahayanga zyonti zye vhazilola. Avhantu vhahasogola kwenya zye zivhombesile. 15Vhahamwaga uYeesu nu kumulola ula we ali ni mpepo inkandamanu, atendiime azwaye amenda, havhili áali ni njeele zyonti. Vhoope vhahoogopa nkaani. 16Avhantu vhe vhávhwenyi zye zyávhombesile, vhahavhavhuuzya avhanji zyonti zye zyámwazile uwa mpepo uyo, na zye zyázyazile inguluvhe. 17Pe vhahamulambiilizya uYeesu, kuuti ayeepe mu nsi yaavho.

18Lwe uYeesu akwinjila mwi ivhooti, umuntu ula we áamile ni mpepo inkandamanu ahamulambiilizya kuuti asogole nawo. 19Ileelo uYeesu ahamugalusya ahati, “Sogoola uvhapanjile avhantu avha ku mwinyu, imbombo zyonti zye uMWENE uMulungu akuvhombela na vwe akufwila uvhwila na vwe akwavwa.” 20Aheepa, ahataliha kukumusya mu ntala izya Dekapooli#5:20 IDekapooli: Mu Shiyunaani kwe kuuti iNkaaya 10. Avhantu avhinji vhe vhahatendamaga mu nsi iyo vhatáamile Vhayuuda. imbombo impiti zye uYeesu ámuvhombeeye. Avhantu vhonti vhahasukumila nkaani.

UYeesu akumuponia umwantanda nu kumuzyusya umulindu

(uMataayi 9:18-26; uLuuka 8:40-56)

21Havhili uYeesu na vhasundikwa vhaakwe vhahalamba usumbi kugaluha kwi isyila, ivhungaana ipiti lihamuvhungatila pepaala pa luvhazu pa sumbi. 22Umuntu wumo umupiti uwa isinagoogi we izina lyakwe áali wu Yaayili, ahinza kwa Yeesu, ahamusugamilila. 23Ahamulambiilizya nkaani ahati, “Umwana waane umulindu akwanza kufwa, nkukulaavha uyinze, umuvhiishile inyoovhe yaaho apone, atahaafwe.” 24UYeesu ahasogola pooka nawo, ivhungaana ipiti ilya vhantu lihamulandata nu kumuviganya nkaani.

25Páamile umwantanda wumo pi ivhungaana liila, we áamile nu vhuvhinu uvhwa shamwiho ku havhaliilizyo aha maaha 12. 26Umwantanda uyo áamile na mayimba, ahajendaga ku vhaganga avhinji nu kufumwa ivwuma vwonti. Ileelo kutamwavwizye naashimo, ájendeleeye kuvhina nkaani. 27Ázyivuuye imbombo izya Yeesu, ahakwenkwenya pi ivhungaana ilya vhantu, ahasogola kwisinda kwa Yeesu, ahapalamansya umwenda waakwe. 28Ávhomvile vhwevhulo, mwe pe ásivhiliiye mu mwoyo waakwe kuuti, “Inga napalamansya umwenda waakwe vhweleele, kwe mpone.” Lwe apalamansya, 29pepaala amavhanda gaakwe ge gahafumaga gahuuma, ahayimanya kuuti uvhuvhinu vhwakwe vhwepa.

30UYeesu ahamanya pepaala kuuti amaha gaakwe gamo aga kuponia gamwepa. Ahagalunkana aheenya imbazu zyonti, ahati, “Wu naanu we apalamansya amenda gaane?” 31Avhasundikwa vhaakwe vhahati, “Ukulola ivhungaana vwe lituvigiinye. Tutangaamanya wu naanu we akupalamansya.” 32Ileelo uweene ahatalanganya kwonti, inga amulole we ámupalamansiizye. 33Umwantanda ula ilyoga lihamulema, ahanda kutetema,#5:33 Kutetema: Umuntu we áamile nu vhuvhinu uvhwa shamwiho áamile muhandamanu, atahanzilwaga kupalamansya poosye kusangaana na vhanji. Vhaazya aVhalaawi 15:25-33. mwe pe ámanyile kuuti kwe amanyishe. Ahinza, ahamusugamilila uYeesu nu kumupanjila uvhwanalyoli ku zyonti zye zihamuyimvwaga na vwe aapona. 34UYeesu ahamuvhuuzya ahati, “We mwana waane, waapona, mwe pe waniitiha, sogolaaga, uMulungu akuteteesye, utahaavhine havhili.”

35Lwe akuyanga izyo, vhahinza avhantu vhamo kufuma kuhaaya kwa Yaayili, vhahati, “Yaayili, leha kumutamwa uMusambiilizi, umwana waaho afuuye.” 36Pe uYeesu lwe ayiivwa vwe vhakuyanga, ahamuvhuuzya uYaayili ahati, “Utogopaje, suvhilaaga vhweleele.” 37UYeesu ahavhahaana avhantu avhanji kumulandata, nkandi we Peeteli nu Yaakobu nu Yoohani umunine uwa Yaakobu.

38Lwe vhaafiha mu nyumba iya Yaayili, vhahaaga avhantu vhakuloosya, nu kukuuta shaaha. 39UYeesu ahati, “Shooni she mukuzuma ahalanga nu kuloosya? Umulindu atafuuye, akaasite tulo!” 40Avheene vhahanda kumuseha, ileelo uweene ahavhafumwa panzi vhonti. Ahamunyatula uyise uwa mulindu nu nyina, na vhaala avhasundikwa vhatatu, ahinjila navho kwi iziiho kwe umulindu áamile. 41Ahamulema inyoovhe umulindu, ahati, “Taalita kuumi,”#5:41 Taalita kuumi: Ino njango ya Shiyalaamu, yáamile njango iya Vhayuuda ahavhaliilizyo iho. Ye yáamile njango yimo ya Yeesu. kwe kuuti, “Mulindu, nkukuvhuuzya, damuula.” 42Pepaala, woope ahavhuuha, ahataliha kujenda. Umulindu ula áamile na maaha 12. Avhapaafi vhahasukumila nkaani. 43Ileelo uYeesu ahavhalajizya nkaani kuuti vhatahamuvhuuzye naawumo ge gavhombesile paala. Ahavhavhuuzya kuuti, vhaamupe ishaakulya umulindu ula.

انتخاب شده:

uMaaliko 5: nih

های‌لایت

به اشتراک گذاشتن

کپی