uMataayi 28

Kuzyuha ukwa Yeesu

(uMaaliko 16:1-10; uLuuka 24:1-12; uYoohani 20:1-10)

1Lwe isiku ilya Sabaato lyatuuha, inzanshi lwe kukuvhambunkana Pamulungu, uMaliiya uwa ku Magidaala nu Maliiya uwamwavho, vhahasogola kwenya imbiipa yiila. 2Yeenya, ishisumbi ishipiti shihafumila, mwe pe uhavhizya uwa MWENE uMulungu áyiisile kufuma ku mwanya, ahapalamila pa mbiipa, ahaligalagaasizya ivhwe liila ku luvhazu nu kulitendamila. 3Uhavhizya uyo ahalamaga ngati lumesyo ulwa mvula na menda gaakwe gáali mazelu inza inganda. 4Lwe avhasikaali vhaala vhamulola, vhahoogopa nkaani, vhahatetema nu kuvha ngati vhantu vhe vhafuuye. 5Ileelo uhavhizya uyo ahavhavhuuzya avhantanda ivho ahati, “Mutogopaje! Imanyile kuuti mwinzile kumulondola uYeesu we aahomeliilwe. 6Ataliipo ipa! UMulungu amuzyusiizye, inza vwe ávhavhuziizye! Yeenyi pe vhaamukasiizye. 7Ishi musogole naluvhiilo, muvhavhuuzye avhasundikwa vhaakwe muti, ‘Azyusile, avhalongoleeye kusogola ku shigavho isha nsi isha Galilaaya. Ukwo kwe kwe mumulole.’ Yeenya, izi zye ninzile kuvhavhuuzya.”

8Pe avhantanda vhaala vhaheepa naluvhiilo pa mbiipa kwi lyoga nu luseshelo ulupiti. Vhahashimbila kusogola kuvhavhuuzya avhasundikwa avha Yeesu inza vwe uhavhizya uyo ávhavhuziizye. 9Lwe vhakusogola, naluvhiilo uYeesu ahahomaana na vhantanda ivho, ahavhalamuha ahati, “Mwakaata!” Pe vhahapalamila vhahamulema ivinama nu kumusugamilila. 10Pe ahati, “Mutogopaje, musogole muvhavhuuzye avhamwitu kuuti vhasogole ku Galilaaya, ukwo kwe kuuti vhanaaje.”

Avhasikaali vhakuluma ilenga

11Lwe avhantanda vhaala vhali mwi idala vhakusogola, vhamo mu vhasikaali vhe vhahaguulaga imbiipa iya Yeesu, vhaheepa nu kusogola mu nkaaya iya Yelusaleemu. Vhahavhapanjila avhapiti avha vhapuuti zyonti zye zyávhombesile.

12Pe avhapiti avha vhapuuti na vhasongo avha Vhayuuda vhahavhungaana, vhahapanzanya kuvhahonga avhasikaali ivho impiiya inyinji. 13Vhahavhavhuuzya vhahati, “Inga umuntu wonti avhavhuziilizya zye zifumiiye, mutinji, ‘Avhasundikwa vhaakwe vhinzile uvhusiku nu kumwivha lwe tukaasite utulo.’ 14Inga uPilaato ayiivwa izi, kwe tuyanje nawo, inga mutahinjile mu mayimba.” 15Pe avhasikaali vhahaposheela impiiya izyo nu kuyanga ku vhantu inza vwe avhalongozi ivho avha Vhayuuda vhávhavhuziizye. Inongwa izyo zihakumuha nkaani ku Vhayuuda kufishila ileelo.

UYeesu akuvhatumiilizya avhasundikwa vhaakwe

(uMaaliko 16:14-18; uLuuka 24:36-49; uYoohani 20:19-23; iMbombo izya Vhatumwa 1:6-9)

16Avhasundikwa avha Yeesu 11 vhahasogola ku Galilaaya, kwi igamba kwe uYeesu ávhalajiziizye. 17Lwe vhamulola, vhahamusugamilila, ileelo vhamo vhahavha na maganigani kuuti pamo te wuuyo. 18Pe uYeesu ahapalamila ku kwavho, ahavhavhuuzya ahati, “UMulungu ampiiye amaha gonti ku mwanya na pa nsi. 19Ishi musogole ku vhantu avha mu nsi zyonti nu kuvhapela kuvha vhasundikwa vhaane. Muvhombaje isho, kwi idala ilya kuvhoozya kwi izina ilya Taata ni lya Mwana ni lya Mupepo uMufinjile, 20nu kuvhasambiilizya kulandata zyonti zye mbalajiziizye imwe. Niine kwe mbe pooka niimwe amanda gonti, kufishila ku vhusililishilo uvhwa nsi.”

انتخاب شده:

uMataayi 28: nih

های‌لایت

به اشتراک گذاشتن

کپی