uMataayi 18
18
Umupiti mu vhumwene uvhwa Mulungu
(uMaaliko 9:33-37; uLuuka 9:46-48)
1Ahavhaliilizyo hanaaho avhasundikwa vhahasogola kwa Yeesu nu kumuvhuziilizya kuuti, “Mu vhumwene uvhwa Mulungu wu naanu we mupiti kuluusya vhonti?” 2UYeesu ahamwita umwana umunsi, ahamuvhiiha pahati yaavho. 3Ahayanga ahati, “Nalyoli nkuvhavhuuzya kuuti, inga mutakwanduha nu kuvha inza avhaana avhansi, te muhinjile naalumo mu vhumwene uvhwa Mulungu. 4Pe ishi, wonti we akuyiisya inza umwana umunsi uno, we mupiti mu vhumwene uvhwa Mulungu. 5Havhili, umuntu wonti we akumuposheela umwana umunsi inza uno kwi izina lyane, akumposheela neene.”
Insoshi kuzya ndingo
(uMaaliko 9:42-48; uLuuka 17:1-2)
6“Ileelo inga umuntu wonti akumupelela kuvhomba uvhutalamalandu wumo mu vhansi ivha vhe vhakuniitiha ine, yaamile kwashi ku kwakwe kupinyiilwa ulwala ulupiti mu nsingo nu kusumbilwa pe pivhiiye nkaani mwa sumbi, kuluusya amayimba ge galimwaga.
7“Mwasheela mwe vhantu mwe vha mu nsi umu, ku ndingo zye zikupelela avhantu kuvhomba uvhutalamalandu! Indingo izyo zikwanzilwa kwinza, ileelo asheela umuntu we akuzileeta indingo izyo! 8Inga inyoovhe yaaho, poosye ishinama shaaho shikukupelela kuuti uvhombe uvhutalamalandu, ushidumule nu kushisumba ukutali! Yeenya, kwashi kwinjila mu vhulanzi uvhwa shiima ni shinkuntu poosye she we kwesu, kuluusya kusumbilwa mwi ipalaazya ilya mwoto uwa shiima ni nyoovhe zyonti zivhili poosye ni vinama vwonti vivhili. 9Havhili, inga ilyinso lyaho likukupelela kuuti uvhombe uvhutalamalandu, ulifwonkole nu kulisumba ukutali! Yeenya, kwashi kwinjila mu vhulanzi uvhwa shiima ni lyinso lyoka, kuluusya kusumbilwa mwi ipalaazya ilya mwoto uwa shiima na minso gonti gavhili.”
Ishiholanyo isha ngʼonzi ye yiteezile
(uLuuka 15:3-7)
10“Muvhanje minso, mutamusufwaje wumo mu vhansi ivha! Nkuvhavhuuzya kuuti, avhahavhizya vhaavho ku mwanya, ahavhaliilizyo honti vhali pilongolela ilya Taata waane uwa ku mwanya. 11Yeenya, ne Mwana wa Aadamu ninzile mu nsi kuvhapoha vhe vhateezile.#18:11 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 11. Zyope iBiibiliya zimo izya manda iga zikuhaleha ahansi iha ishisita kusimba. 12Ishi mukulola vhuli? Muli imwe, inga umuntu ali ni ngʼonzi 100, ileelo yooka yateega, angahonzya vhuli? Atangazileha ziila 99 mu magamba nu kusogola kuyilondola ye yiteezile? 13Inga ayaaga, nalyoli nkuvhavhuuzya kuuti, akuseshela nkaani ingʼonzi iyo yooka, kuluusya ingʼonzi ziila 99 zye zitateezile. 14Vhwevhulo, woope uTaata wiitu uwa ku mwanya atakwanza kuuti wumo mu vhansi ivha ateeje.”
Uluvhaatiho ulwa kumusoha we ateezile
15“Inga uwamwinyu akuvhombela uvhutalamalandu, usogole umusoshe lwe muli mweka vhavhili. Inga akutejeelezya, pe ukuvha wamwaga havhili uwamwinyu. 16Ileelo inga atakutejeelezya, usogole umunyatule umuntu uwamwavho wooka poosye vhavhili, inga muvhulandate uVhusimbe uVhufinjile vhwe vhukuti, ‘Uvhunanzi vhwonti vhulongwaje lwe vhaafumwa uvhwahoome avhantu vhavhili, poosye vhatatu.’#18:16 iNkumbushizyo izya Ndajizyo 19:15 17Inga atavhatejeelezya vhoope ivho, usogole ushivhuuzye ishivhanza. Inga atashitejeelezya ni shivhanza, pe shimuvhiishe inza we atamwitisile uMulungu, poosye inza umusonchezya musonko.”
Amaha aga vhasundikwa aga kugalila nu kwigula
18“Nalyoli nkuvhavhuuzya kuuti, zyonti zye mwazigalila kwi izina lyane mu nsi umu, woope uMulungu akuzigalila ku mwanya. Havhili, zyonti zye mwazyigula kwi izina lyane mu nsi umu, woope uMulungu akuzyigula ku mwanya. 19Havhili nalyoli nkwonjezya kuvhavhuuzya kuuti, inga vhavhili muli imwe mu nsi umu vhitinkana kulaavha zimo, uTaata waane uwa ku mwanya alivhavhombela zyenezyo. 20Yeenya, inga vhaliipo avhantu vhavhili, poosye vhatatu vhe vhavhungiine kwi izina lyane, niine nkuvha pooka navho.”
Ishiholanyo isha muntu we atakuswila avhanji
21Pe uPeeteli ahasogola kwa Yeesu, ahamuvhuziilizya ahati, “We Mwene, inga uwamwitu ambombela uvhutalamalandu, nkwanzilwa imuswilaje lulinga? Vhuli, poosye mala 7?” 22UYeesu ahamwamula ahati, “Ntakukuvhuuzya kuuti, mala 7 vhweleele, nkandi umuswilaje uwamwinyu ahavhaliilizyo honti ishisita kuvhaazya.#18:22 Ahavhaliilizyo honti ishisita kuvhaazya: IShiyunaani shikuti 7 mala 70.
23“Kuli izyo, uvhumwene uvhwa Mulungu vhuholiine ni shiholanyo isha mwene we ahanzaga kuhoma imbaazyo izya mpiiya zye ahavhadaayaga avhavhomvi vhaakwe. 24Lwe umwene akwanda kuvhaazya, vhahamuleeta umuntu wumo ku kwakwe we ahadayilwaga italanta 10,000.#18:24 Italanta 10,000: Italanta yooka yihakwilanaga kumulipa umuvhomvi amaaha 15 nu kushila. 25Umuvhomvi uyo ahapootwa kulipa impiiya zye ahadayilwaga. Pe umwene waakwe ahalajizya ahati, vhamukazye uweene pooka nu mushi na vhaana vhaakwe ni vintu vwonti vwe áamile navwo inga amulipe.
26“Pe umuvhomvi uyo ahamusugamilila, ahamulaavha ahati, ‘Nkulaavha unguliilile hansi, kwe nkulipe ivintu vwaho vwonti.’ 27Umwene uyo ahamufwila uvhwila umuvhomvi waakwe, ahamuswila kuuti atahaalipe, ahamwitishila kuuti asogolaje.
28“Ileelo lwe umuvhomvi uyo akufuma panzi, ahahomaana nu muvhomvi uwamwavho we ámupavhiiye idinaali 100.#18:28 Idinaali 100: Idinaali yooka gáamile malipilo aga isiku lyoka kwa muvhomvi. Kuli izyo, idinaali 100 zyáli zya malipilo aga nsiku 100 kwa muvhomvi. Naluvhiilo ahamulema, ahamufina ku nsingo, ahamuvhuuzya ahati, ‘Ndipa vwe naakupavhiiye.’ 29Umuvhomvi uwamwavho uyo ahamusugamilila, ahamulambiilizya ahati, ‘Unguliilile hansi, kwe nkulipe ivintu vwaho.’ 30Ileelo uweene ahahaana, ahasogola kumukunga uwamwavho mu jeela kufishila pe aliilipa ivintu ivwo.
31“Lwe avhavhomvi avhamwavho vhaalola izyo, vhahavwalala nkaani mu mooyo gaavho. Pe vhahasogola kwa mwene waavho nu kumuvhuuzya zyonti zye zyávhomviilwe. 32Pe umwene ahamwita umuvhomvi ula, ahati, ‘We muvhomvi umuvhiivhi iwe! Yeenya, lwe wandambiilizya kuuti nkuswile vwe nákupavhiiye, nkuswiliiye vwonti! 33Vhuli, utanzilwaga kumufwila uvhwila umuvhomvi uwamwinyu inza vwe niine nkufwiliiye uvhwila iwe?’
34“Pe umwene ahaviitwa nkaani, ahavhalajizya avhasikaali kuuti vhamuleme nu kumukunga mu jeela kufishila pe aliilipa ivintu vwonti.”
35Pe uYeesu ahati, “Niimwe uTaata waane uwa ku mwanya alivhavhombela vhwevhulo, inga mutakuvhaswila mu mooyo giinyu avhamwinyu amalandu gaavho.”
اکنون انتخاب شده:
uMataayi 18: nih
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2021 Wycliffe Bible Translators, Inc.
