Luka 5
5
Yesu ha ɗa kutə wuran zuŋŋuna
(Matta 4:18-22; Markus 1:16-20)
1Bigeɗe ga, Yesu tavaka ande a me heye Genesaret, ɗaha hay ɗa like aba apə səlay tan‑a apə zhek ene ka a tsukw me s'Askwaf. 2Wuran ane tsək palambak s'ahwam hay caw ande a me heye sahan, ɗa tsəm kuciɗek ɗa fafatayede, niya ɗa bune kədan hay tan. 3Dzənide a palambak s'ahwam ɓile ene de gə i Simuŋ saŋa, mbutsəkənamiya gəni á kəzəlpəna palambak sahan kutew a medeɓeca ka. Mezlene wuran ane zakakade ede, takənmandar‑a a tsugəɗilhətan away a abaga ɗaha hay sahan.
4A aŋəde sləkŋa a dzaɗay ga, dzana a Simuŋ, wa: «Kəzəlde palambak s'ahwam ala a ma gə de ahwam ene tsəgwan saŋa, hahajɨnlide kədan hay kwan, cimɨn kuciɗek kwan.» 5Simuŋ zləmkənhənaŋa, wa: «Malum, ma hənak ba pəŋŋa a sa zlaɗa ene, ba s'ama kini ma nzəka bə dəgiya. Amá ike tsaw kə dzaka ga, ba əŋ hadzəlde kədan hay sahan adəɓa.»
6Ɗa hətskəlde kədan hay ala a ahwam nde ane ga, ɗa tsəmide kuciɗek hay zləkte ene niba, ha sləŋa kədan hay tan ɗa takənmandar‑a a ndandəɗay. 7Wutan ane kaya a kebec ɗagaditan gə wutə a palambak s'ahwam s'iŋgeɗe de saŋa a nəɗay a humaɗitənande. Ɗa sahan kini ɗa naya, ɗa rəruhkede palambak s'ahwam hay cawuna i kuciɗek, ha sləŋa palambak s'ahwam hay tan ɗa ɗuke ala a ahwam nde.
8Simuŋ Piyer ba tsaka ahan ga, hadzika galəmnzay a səlay de a Yesu, dzakəna, wa: «Ɗuduwuna hwa, kəspuwa ba kwalala, aɗaba ənne ənne ɗu hipe.»
9Wutə Simuŋ atə ɗa gə tə caca a palambak s'ahwam de saŋa, ɗa ge ba s'ajipu kuciɗek hay gə ɗa tsəmika lakede a aray‑a saŋa. 10Wutə Zhak atə Zhaŋ wayə Zhebede gə ɗa ge sləra atə Simuŋ sahan kini, ɗa gəka ajipu ene ba kugunhan. Amá Yesu dzakəna a Simuŋ, wa: «Zləŋwaɗ á viɗken ba, tamandar‑a ba bəkwa saŋa ga, si kə guɓa ba ɗaha hay mezlene.» 11Wutan ane ɗa ləkəla palambak s'ahwam hay tan ala ande a medeɓeca, ɗa hərkənde a ihay tan ba cecena, ɗa kutika wuran.
Yesu mbər ɗu dərve
(Matta 8:1-4; Markus 1:40-45)
12A aŋəde Yesu a hu s'iŋgeɗe de ga, ɗu gə zhek ene ba cecena ba dərve saŋa, naya a nzəɗiya. Tsək Yesu ga, hadzika galəmnzay agide miveŋ ene ba təppa apə higay‑a, gəkən kəmkam, wa: «Ɗuduwuna hwa, ike abə kə zləha ga, kə jukka mbərɗinuwa ba laŋŋa.» 13Yesu ane pərkede alay ene ɗəfəkpan, ghaya dzana, wa: «Əŋ zləha, mbəra ba laŋŋa.» Ciɗa dərve ane hadzəkpəna. 14Yesu ɗəfkənka me, wa: «Dzana bə gha a wiya kini, amá gə le mbazləlhan ŋa aka a ɗu slumə ɗaha hay atə Askwaf, ɗɨfka atə sadake apə aŋa ka me gurɗay Musa dzaka saŋa, a gə siyade ene a ma ɗaha hay de gəni kə mbəraka ba laŋŋa#Lewi 14:1-32.» 15Aba al ahan kini labara Yesu ɗəfkənaŋade adəɓa a slaɗide a mene de. Fuɗəɗay ɗaha zləkte ene niba ɗa nay ala a ma ene de a tsukw me ene atə a mburaɗaya ada a kuza hay tan‑a. 16Amá Yesu hahərtənde ala a akiɓde, lilike a gə maduwa.
Yesu mbər ɗu gə ghuɓiya hay ɗa mutsəkpəna
(Matta 9:1-8; Markus 2:1-12)
17Bigeɗe Yesu niya cugɨlhətan away a ɗaha hay ga, Farisa hay atə malum hay me gurɗay kini ɗa niya i zazəɗay akənahan. Ɗa nay ada hu hay higay Galile ka atə ada hu hay higay Zhude ka ba cecena, ŋa ada Zheruzalem‑a. Nzəɗa Ɗuduwuna zak atə Yesu a mburɗil ɗa kuza. 18Mezlene ɗa s'iŋgeɗe ɗa mika ɗu gə ghuɓiya hay ɗa mutsəkpəna, ɗa paya apə palambak‑a. Ɗa gwasək ləɗilde adide a ɗəfɗika apə miya a Yesu‑a. 19Amá ɗa səna ba a ma gə ɗa lɨlde ala ede, a ma ndikɗay ɗaha hay de. Mezlene ɗa dzənkəla ala apə ŋa s'adaw‑a, ɗa zlərəkpan mika, ɗa tərkəlde apə palambak ene ka, ɗa ɗəfika apə miya a Yesu‑a a dagava ɗaha hay de. 20Yesu ba tsək ɗəfɗipənŋa ɗa sahan ga, dzakəna a ɗu kuza ane, wa: «Yaga hwa, hipe hay aka ɓusaka.»
21Malum hay me gurɗay atə Farisa hay ɗa takənmandar‑a a dzəmɗiya a ŋa tan de, wa: «Dagwa saŋa mà, wiya ta wuran ni, nenɨla avaŋe ala apə Askwaf‑a saŋa? Wiya ta ɗu gə jukka ɓusɗinka hipe a ɗaha ka abə Askwaf bə ɓile?» 22Mbatse Yesu səna tsaw a dzəmŋa tan sahan, dzəktəna, wa: «Amnaya kwa dzama ajiba s'aŋa a ŋa kwan de? 23I gəna tsaftsafa ayitənde a dzaɗiya: “Hipe hay aka ɓusaka təku,” təku “Slabakude, le i səlay aka he”? 24Amá əŋ gus kwa sənede gəni Kine ɗu səlammərzheŋ niya i hakuma a ɓusɗinka hipe a ɗaha ka a duniya de.» Mezlene dzakəna a ɗu gə ghuɓiya hay ɗa mutsəkpəna ane, wa: «Na əŋ dzaaka, slabakude, təvakude palambak aka hú ala adaw.» 25Ciɗa dagwa ane rəkwat slabakakude a dagava ɗaha hay de sahan, təfkakude palambak gə zak i hənɗay apəna ane, ba huɗay ene ala adaw, ghaya zəmbəla Askwaf ande a ciba. 26Ɗaha hay ba cecena ɗa ge ba s'ajipu ene. Ɗa takənmandar‑a a zəmbəl s'Askwaf, ghaya wutə i zləŋwaɗ ene a bembec hay tan de. Ɗa dzawa, wa: «Bəkwa ga, ma tsatsika ihay gə ma zak ba a tsaɗiya aride!»
Yesu ha Lewi
(Matta 9:9-13; Markus 2:13-17)
27Adede a ahan, Yesu nayede a ma sahan‑a, tsək ɗu maməsl hadama s'iŋgeɗe sləmay ene Lewi, i zaɗay a adaw maməsl hadama de ga, dzakəna, wa: «Kutinaw.» 28Wuran ane slabakakude, hərkənde a kazlaŋa ene ba cecena, kutika. 29Mezlene Lewi ane dakənka ipəɗay hay gərgərgəra ba duna adiyana. Ɗa maməsl hadama atə ɗa s'iŋgeɗe ba duna niya ɗa piya away amazhekde atə ayitəna. 30Ahan sahan ŋgəməktan ba a Farisa hay atə malum hay me gurɗay gə wutə a ma tan de saŋa, ɗa takənmandar‑a a dəduŋɗipətan a ɗa kutə wuran, wa: «Amnaya kwa piya away, kwa sawa away amazhekde atə ɗa maməsl hadama, ŋa ɗa hipe saŋa?» 31Yesu zləmkənhətənaŋa, wa: «Ɗa gə tə lapiya hay ga, ɗa gwasa bə duktar, si ba ɗa gə wutə al aray ba. 32Ənne əŋ nay ba a ha ɗa jire, amá əŋ naya a ha ɗa hipe gəni ɗá mbəɗakude zaɗay tan.»
Mbutsəɗay ala apə bər meshahwam‑a
(Matta 9:14-17; Markus 2:18-22)
33Farisa hay ɗa dzakəna a Yesu, wa: «Ɗa kutə Zhaŋ atə ɗa kutə Farisa hay ga, gəkəlhətəna bər meshahwam ɗa giya atə maduwa, amá ɗa kutɨɗiken ike ɗa piya away, ɗa sawa away.» 34Yesu zləmkənhətənaŋa, wa: «Kwa gurəkəl ɗa jukka slaɗitənaŋade bər meshahwam a ɗa gə wutə a wumbri dəna ɗuway de, a aŋəde humas hərmana niya a ma tan de he? 35Amá sərte s'iŋgeɗe niya nike, à ɗá bərede humas hərmana a duvak tan‑a ga, a hənɗay hay sahan de, wutan à ɗá bər meshahwam.»
36Yesu ɗəfkənhətənaŋade zlama adəɓa araja saŋa, wa: «Niba ɗu gə ndeka kacakaca ɗuway ni, gəɗəlde mide s'ifətɗay al ayina saŋa. Abə gəka kugunhan ga, ɗuhan ba mbəzika kacakaca ene gə ɗuway saŋa. Kacakaca ɗuway sahan kini ɗa mislke ba atə mide ene. 37Niba ɗu gə mbuɗɨde meɗula məhay a mide kenakena hay de. Aɗaba abə təkmandar‑a a ŋgusɗay ga, nduzhɨnariya a kenakena hay‑a, mezlene məhay hehickede, kenakena hay kini mbuzaka. 38Aɗaba sahan, meɗula ga, si ɗa mbuɗɨde aba kenakena hay ɗuway de. 39Ɗu gə abə sika məhay gə i ŋgusɗay ga, ŋa ene niba cine apə meɗula ka. Aɗaba ɗa dzawa, wa: Məhay məɗinna ba s'aŋa i ŋgusɗay.»
اکنون انتخاب شده:
Luka 5: mlr
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active), Wycliffe Bible Translators, Inc. All rights reserved.
