MATIUS 17
17
Yesus abinal worak yidnak wene
17:1-13
(Mk 9:2-13; Lk 9:28-36)
1Nde, enam nene lug-e, Yesus na mborosolar-e, Peterus nde Yakobus nde owot Yoanes nde inmin mberarig-e, it enarik wolmokluk ndobo mot misik iri bem inpil lagaij-o. 2Nde, it iri na enlengen ma-ge at na abage nin agaij-o. Iri yosolar-e, at erare-ge mo abinal nggal yaya worak yosolat, at usum-e loro lombok abina-nen igip kip worak agaij-o. 3Iri luk, it-nen yik kagolar-e, Musa nde Elia nde Yesus na imin wene ndorogola, eneyaiga-o. 4Iri alama-ge, Peterus na-nen Yesus yak tosolar-e: ”Nagawan Indo wa-e. Nir-e yu me worali yu-ge konak lombog-o. Kat kindingen nde ala-ge, o lije kenan yu me wereyeg-o. Misig-e kat kamanggim, nde misig-e Musa amanggim, nde misig-e Elia amanggim-et wirimin-o” luk yij-o. 5Nde, Peterus-nen wene iri yosoma ereya na-net yaya worak nggan nggan iri arem-nen ene mbi-nen yosolar-e: ”At yu-ge an Nambara abuwa worak-nen yusu-o. At ebem-e an nalen kasu-o. At ene nak koler-o!” luk yij-o. 6Iri yosoloma kuluruk yigarig-e, at owosirak ereya na-ge kwiye kwarat luk nggweyak pem entare nggwe yud tud mbiga-o. 7Alama-ge, Yesus na it endam lobok yosolat, tena onposolat-nen yak ondosolar-e: ”Men mer-o. Kwiye kali-ge meyog-o” luk yak indij-o. 8Yak ondosoloma-ge, it iri na undugun pugaksa yik kaiganggal-e, ap mbi eneyagir-e lak, Yesus arig-et nak kaiga-o.
9Iri luk, ndobo bem-nen mbogolar-e, Yesus-nen ene amawi min-et it yak ondosolar-e: ”Kit-nen yanem kaigep iri-ge Ap Ambara an-e wat yidnak ennggendumu-nen nuruk tak pigit lak ma-ge ap misiger-o luk tet yak undurak pug-o” luk yak indij-o. 10Yak ondosoloma-ge, at owosirak-nen Yesus na kin wok pogolar-e: ”Nde, it imiri mbarak pidnak wene enaru nap-nen yogolar-e: ’Elia na-ge nandug-et lobok yuwa-o’ luk yili iri-ge noluk-nen iri yili-o?” luk yiga-o. 11Yogolikma-ge, Yesus-nen wene erepnggarosolar-e: ”Ndemerer-o. Elia na-ge nanduk lobok yuwarig-e, yi mende ndi mende oboksa tuguruk op tak puwa-o. 12Alat nde, an-nen yak kendeyeg-o: Elia na-ge lobok yij-et nde, it ereba na-nen at yenggerak ibigit lak luk, it inndi-n pidnak nak at kwat ibiga-o. Nde, iri nggal-et Ap Ambara na irit it-nen andi bandi rak ubuwa-o” luk yij-o. 13Yosoloma-ge, at owosirak na-nen yenggerak pogolar-e, ap yi maroso nap Yoanes na imin yidnak irit yenggerak piga-o.
Yesus-nen kugi arem nggwidnak la ki rak pid wene
17:14-21
(Mk 9:14-29; Lk 9:37-43a)
14Nde, it iri na-ge ap kwarat endam wok yogola-ge, ap misik na Yesus eram lobok yarik, at eralu endaru yunggusa kore luk-nen 15at yak tosolar-e: ”Nagawan Indo wa-e. An nambara abuwa ki-o. At iri-ge wat wat yoso kugi ebem mbidnak me, wat nak yoso-o. Wat yosolar-e, kan ma mbud yosolat, yi ma mbud yosolat kwat tenak woraso-o. 16Kat kowosirak na endam ibil lobok yigi-t nde, it-nen-e ki rak uburag-e meya-o” luk yij-o. 17Yosoloma-ge, Yesus-nen wene erep nggarosolar-e: ”Kit kinndi angin tubu yugwi buk, kinndi nari wari rak nap wa-e! An-e nunggwirik tarem kit kinmin woramin-o? An-e nunggwirik tarem kit kinmin-e momak puruk woramin-o? La iri-ge an neram pil lobok yi-o” luk yij-o. 18Iri luk, Yesus-nen ene amawi min-et kugi na yak tosolar-e: ”Mbiri-o” luk yak tosoloma, kugi na mborosola ereya na-net la iri na ki yij-o.
19Iri ala-ge, at owosirak iri na-ge Yesus eram lobok luk, enarikmu-nen kin wok obogolar-e: ”Nit-nen kugi iri wirik purag-e noluk-nen meya yij-o?” luk kin wok ibiga-o. 20Yogolikma-ge, Yesus-nen wene erep nggarosolar-e: ”Kit kinndi kwara angin tubu yigit lak ala-nen meya yij-o. An-nen yak kendeyeg-o: Kit kinndi angin tubu yidnak iri-ge we sawi uwi marik iri nggal ndak ndak worala-ge, kit-nen ndobo yu yak togolar-e: ’Yu me-nen iri me mbiri-o’ luk yak togola-ge, mburuwar-o. Kit-nen kwarurak mende angin worak misik mbi worasu-ge lag-o. [21Alat nde, kugi yu mende yu-ge mburu keya buruk, tepan yogolat woraidnak pem-net wirik pugwi-o]” luk yij-o.
Mberen pem tak posolar-e, Yesus-nen ”Wat yimin-o” yid wene
17:22-23
(Mk 9:30-32; Lk 9:43b-45)
22Nde, at owosirak na-ge o Nggalilea iri me lambuksa woragola-ge, Yesus-nen it yak ondosolar-e: ”Ap Ambara na-ge wesera ap ininggem puwama, 23it iri-nen at wuruwama, mberen naruk, kenan tak purak pem-e ar-e uruk tak puwa-o” luk yak ondosoloma-ge, it iri na inndi puru kwarat yiga-o.
Yesus-nen tepan yugwi o na bem pemerinta enmanggim tol pidnak wene
17:24-27
24Yesus min at owosirak na min-e o Kaperenaum wok yogola-ge, it tepan yugwi o na bem pemerinta enmanggim tol ndok wurugwi nap-nen Peterus eram lobok luk, at kin wok pogolar-e: ”Kat mul koroso napna-nen-e tepan yugwi o amanggim tol-e poso, lak, lag-a?” luk yiga-o. 25Yogolikma-ge, Peterus-nen wene erep nggarosolar-e: ”Eyo posor-o” yij-o. Yak ondosoluk, o ma nggosoma-ge. Yesus nanduk-nen at yak tosolar-e: ”Simon wa-e. Kat kindi-nen ngge perasu-o? Nggweyak ma nap nagawan nagawan-nen tarak enpem-nen tol mengga wanogolat, enanggul wonaridnak tol mengga wanogolat yili-a? It inlirak enpem, lak? Are, ap sal enpem, lak?” luk yak tij-o. 26Yak tosoloma-ge, Peterus-nen wene erep nggarosolar-e: ”Lag-o. Ap sal enpem-nen mengga wanugwi-o” luk yosoloma karuk, Yesus-nen yosolar-e: ”Iri ala-ge, inlirak iri-nen tol purag-e lag-o. 27Alat nde, it iri na mbud tak unpurak kerep nggal kwarul naru, kat yi ma mburugundik, keyane wanugwi sugulud mberak pi-o. Nde, nanduk-net ulok ma keyane na wanugundig-e, emende penggera pak kasoma-ge, kerep tol misik kagun-o. Tol iri na wanosoluk, nit nenmberek nenmanggim it na wok indil mbiri-o” luk yak tij-o.
انتخاب شده:
MATIUS 17: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
