LUKAS 8
8
Yesus imin waring kaidnak kwami unnu
8:1-3
1Marig-et nak woraruk, Yesus-e o siri nggok min marik min pidsa aid wene ya yak indilik, Mbal Pem Nagawan-nen tenagaidnak wi wene konak wene na ya yak indilik nosola-ge, at owosirak ap duabelas na at imin-et niga-o. 2Nde, kugi enarem ngggwidnak min kugi enpem mbidnak min ki rak inpidnak kwami-nen na imin-et waring kaiga-o. It unnu-ge: Kugi tuju at arem-nen wirik pidnak kwe Maria Magaralena-o yugwi na min: 3kwe misig-e Yoana, Erores urugom nap Kusa na ogwe na min; kwe misig-e Susana na min; kwami erep kwarat-nen-e it enarengge bem-nen Yesus owosirak inmin yongga ondogolat woraiga-o.
Uwi pil kaso nap ebem nden karuk yidnak wene
8:4-8
(Mt 13:1-9; Mk 4:1-9)
4O siri nin me nin me-nen Yesus eram lobok yugwi komo woragolar-e, ap kwarat ndok worogola-ge, Yesus-nen nden karuk wene yu yak ondosolat-nen yosolar-e: 5”Ap misik-nen-e uwi pil kil mbirij-o. Uwi na pil kasola-ge, ereb-e tulabiyem mbamu, ap unuwok-nen yumndogolat, towe-nen nasolat lak tak pij-o. 6Nde, uwi ereb-e kerep mborok ma mbamu, tup yij-et nde, amburu lak me, terabet yij-o. 7Nde, uwi ereb-e linggat ndumu mbamu, linggat imin lambuksa mborosolar-e, linggat-nen perena keya buruk, uwi na meya rak pij-o. 8Nde, uwi ereb-e nggweyak konak pem mbamu, mborosolar-e, engen-e seratus nggal irit pij-o” luk yij-o.
Yurug-e, Yesus-nen yosolar-e: ”Ta-nen nde eyanggo worak ala-ge, wene yu kuluwag-o!” luk yij-o.
”Nden karuk wene-ge iri bem-nen yusu-o” luk yak indidnak wene
8:9-10
(Mt 13:10-17; Mk 4:10-12)
9Yosoloma-ge, at owosirak-nen Yesus kin wok obogolar-e: ”Nden karuk wene iri-ge ngge yosolat-nen yigen-o?” luk yiga-o. 10Yogolikma-ge, at-nen it yak ondosolar-e: ”Mbal Pem Nagawan-nen tenagaidnak wi kura wene-ge kit kenaru yuwakluk we wok ondoso mende-ge wok kindidnak worasu-o. Alat nde, ap ereb-e it enlengen-nen kagolar-et nde, kagit lak yogolat, kologolar-et nde, yebet kagit lak yogolat makluk, nden karuk wene bem mul undusu-o” luk yak indij-o.
Uwi pil kaso nap ebem nden karuk wene na para yak indid wene
8:11-15
(Mt 13:18-23; Mk 4:13-20)
11Yuruk, Yesus-nen yosolar-e: ”Nden karuk wene na ebe-ge yu-o: Uwi iri-ge Mbal Pem Nagawan-nen yidnak wene-net yusu-o. 12Nde, uwi tulabi-yem mbid iri na-ge aid wene na kulidnag-et nde, it inndi angin tubu yogola, inmiri yuwa naru, Sere-nen enarem-nen mengga wanusu iri nggal-nen yusu-o. 13Nde, kerep mborok ma mbid uwi iri na nggal-e aid wene kulurug-e, enalen min-et wanurug-et nde, wene-ge it enarem kwara uwi yak yigit lak me, marig-et nggal inndi angin tubu yidnak me, abok nggwe it inndi ngaroso mende enpem mbosola-ge, keya bili nap iri nggal-nen yusu-o. 14Nde, uwi linggat ndumu mbid iri na nggal-e aid wene kulidnag-et nde, woragolar-e, it-nen wolmomtak pem unmud kagolat, it-nen enarengge kwarat windi woragolat, enalen pem wolmomtak peragolar-e, iri-nen ndowaga aid wene na perena keya bosoma-ge, engen pidnak na-ge ebe kwat yoso buk iri nggal-nen yusu-o. 15Nde, uwi nggweyak konak pem mbid iri na nggal-e, ap-nen aid wene na kulurug-e, inndi konak mot mot iri na bem-et puksa enarem tak puruk, inndi mamak puruk woragolat-nen ebe rak pili iri nggal-nen yusu-o” luk yij-o.
Tal pago lumurak purak puk wene
8:16-18
(Mk 4:21-25)
16Yuruk, Yesus-nen yosolar-e: ”Ap-nen-e tal paguruk urumu mon kagolat, nene yugwi indipma pil nggogolat yugwi bug-o. Are, o ma ngguwa nap-nen eyaya kujwaklug-e, tal na ondolma nam ma-t pugwi-o. 17Kura woraidnak mende pidsa kura wolma bug-o. Kura wene na kura wolma bug-o. Pidsa nam nak ma-o.
18Iri bem-e, kit-nen kulidnak wene-ge kwara-t yebet kudtag-o. Enarengge worak nab-e terak mena kwarat wok unduwa-o. Alat nde, enarengge marig-et worak nab-e it endam woraso marig-et ereya na wanuwa-o” luk yij-o.
Yesus ija min owosirak min lobok yiga wene
8:19-21
(Mt 12:46-50; Mk 3:31-35)
19Yesus ija min owosirak min-e at eram lobok yiga-t nde, ap kwarat-nen at panggon ibidnak pem-e at eram wok yurag-e meya agaij-o. 20Alama-ge, ap mbi-nen Yesus yak tosolar-e: ”Kat kiya min kowosirak min-e kat kiyujwokluk lobok yiga-t nde, mbepme nde mendak worali-o” luk yak tij-o.
21Yak tosoloma-ge, Yesus-nen it pidsa yak ondosolar-e: ”Mbal Pem Nagawan-nen yidnak wene kuluruk, kulidnak iri ndak ndak kwatli nab-e an niya min nowosirak min-nen yili-o” luk yij-o.
Obube kwarat ala, Yesus-nen kondok tak pidnak wene
8:22-25
(Mt 8:23-27; Mk 4:35-41)
22Misik tarem-e Yesus na owosirak inmin-e e koma arem ngguruk-nen at-nen it yak ondosolar-e: ”Yi koma eyak ele bem ndil lujwog-o” yak ondosolug-e, mbiriga-o. 23Mburukmu-ge, Yesus na nene yij-o. Nene yosola-ge, obube nggulok mbi puk kil lobok yosolar-e, yi na sabera e koma na arem-e yi yebet yosolar-e, it pidsa na yubuk yurak nggal yiga-o. 24Alama-ge, at owosirak na Yesus eram mbirigarik, sil kagolat-nen yak togolar-e: ”Mul Nondoso Nap wa-e. Mul Nondoso Nap wa-e. Yi-n nok nunpuwa-o!” luk yogoloma-ge,
Yesus na menluk, obube min yi nggweyerep nggwayerep yidnak min na met posoloma, obube na min yi nggweyerep nggwayerep iri na min lak yosolat, yi koma na ndong yij-o. 25Iri lug-e, at-nen owosirak na yak ondosolar-e: ”Kir-e noluk-nen kinndi an nebem angin tubu yigit lak yili-o?” luk yak ondosoloma-ge,
it na wi luk, kwiye-nen pabok puruk-nen yak kerak mbogolar-e: ”Obube min yi min-et nde, at ene kuluruk, at-nen yidnak yidnak nak kwarusu yu-ge ta nde kali-o?” luk yiga-o.
O Nggerasa nap kugi arem nggwidnak ki rak pidnak wene
8:26-39
(Mt 8:28-34; Mk 5:1-20)
26Iri lug-e, Yesus owosirak inmin-e yi koma Nggalilea eyak ele bem nggwe o Nggerasa wok yiga-o. 27Wok luk, Yesus na kenangga wesi bem mbosola-ge, ap o siri iri me woraso nap kugi arem nggwidnak nap mbi imin lambuk yij-o. Ap iri na-ge obi-net sum keya buruk, we koro nderak woraso-o. Nde, ar-e oma nene yoso buk, ap yapma inpidnak sa nak nene yil noso-o. 28Ap iri-nen Yesus kasoluk, ene ngguloksa yuruk, Yesus eralu tud yosolat-nen yosolar-e: ”Kek tak Woraso Mbal Pem Nagawan Ambara Yesus wa-e. An-e ngge rak nubugun-o Nap wa-o. An andi bandi rak nuburak pug-o!” luk yij-o. 29Nde, iri yid iri-ge Yesus-nen-e: ”Kugi yu-ge ap yu arem-nen mbiri-o” yak tidnak pem-nen yij-o. Pempa kugi iri-nen ap yu na lombok tosola-ge, ap-nen posid kere-nen at inggi ijok kamasa keya bidnag-et nde, posid kere iri-ge mbarep parep tak puruk, kugi na-nen-e ap yu na karu me waruk mboroso-o.
30Iri ala, Yesus-nen at kin wok obosolar-e: ”Kat kunu-ge ta-o?” luk yosoloma-ge, kugi kwarat at arem nggwidnak me, ”An nunu-ge Kwarar-o” luk yij-o. 31Yurug-e, kugi na-nen Yesus emengen mbarosolar-e: ”Nab-o. Mbunmu mberak nunpurak pug-o” luk emengen mbarij-o.
32Nde, wam kwarat o iri me ndobo amun pem mungga nasolat worasola-ge, kugi na-nen-e wam ereba na arem inpil ngguwakluk Yesus emengen kiri keresa mbariga-o. Yogolikma, Yesus-nen-e: ”Ob-er-o” luk yak indij-o. 33Yosoloma-ge, kugi na-ge ap iri na arem-nen mborogolar-e, wam ereba na arem nggwiga-o. Nggogolar-e, wam ereba na pidsa yul kul mborosolar-e, mberabak nggwe na nggilara yi koma arem nggosolar-e, pip yonggok ndonggok wat yij-o.
34Iri kwarosoloma karuk, wam yik karok woragwi nap na iri kwaridnak na karug-e, ndag-et nak mborogolar-e, o siri iri na min o inggi inggi woragwi ereba min wene na wigariga-o. 35Nde, wene na kuluruk, ap ereba-nen-e iri kwarid iri na kujwokluk mbiriga-o. Mbirigarik, Yesus eram wok yiganggal-e, kugi arem-nen wirik pidnak nap na-ge usum yutluk, indi min-et Yesus eralu koreyak worala, yik kaiga-o. Kagolug-e, it pidsa kwiye kaiga-o. 36Nde, ap iri na ki rak posola kaiga nap-nen-e iri wene kerengga yak indiga-o. 37Iri lug-e o Nggerasa woragwi nap pidsa kwiye-nen pabok purug-e. Yesus yak togolar-e: ”Nit nenma yu me wolmomtak pug-o. Mbiri-o” luk yak togoloma, Yesus na e koma arem ngguruk, mbirij-o. 38Mborosola-ge, arem-nen kugi wirik pidnak nap na-nen Yesus emengen mbarosolar-e: ”Nab-o. Totno mburuwog-o” luk yij-et nde.
Yesus-nen at wirik obosolat-nen yak tosolar-e: 39”Kat kama mburugundig-e, Mbal Pem Nagawan-nen kwat kibidnak wene-ge ap yak indil mbiri-o” luk yak tij-o.
Yak tosoloma-ge, ap iri na mborosolar-e, Yesus-nen kwat ibidnak wene na-ge o siri iri me nap pidsa yak indil nij-o.
Yairus ara wene min kwe-nen Yesus usum tenagaid wene min
8:40-56
(Mt 9:18-26; Mk 5:21-43)
40Yesus na tuguruk yi koma eyak ele bem-nen ndil wasola-ge, ap kwarat-nen at yik karok woraidnak me, enalen min-et wok ibiga-o. 41Nde, iri kwarukmu-ge, Yawuri nap tepan yugwi ma winde unu-ge Yairus na wok yij-o. Wok lug-e, Yesus na at Yairus ama mburuwakluk, Yesus ijok eralu tud luk, emengen kiri keresa mbarij-o. 42Emengen mbarid iri-ge, at ara misik mesag-et nderak na wat yekluk ala-nen kwarij-o. At ara iri na-ge olengen-e duabelas nggal woraidnag-o.
Yesus na mborosola-ge, ap kwarat-nen at panggona keya biga-o. 43Mburukmu-ge, kwe misig-e eyabi mborosolat nak olengen duabelas woraidnak kwe iri mbi woragaij-o. Ndoktet kwarat-nen yongga wuruwakluk, kwe na-nen-e arengge pidsa ondoro rak pij-et nde, ar-e ki yoso bug-o. 44Kwe na Yesus amberam nggwe panggosa mborosolar-e, at usum erep nak tena bidnggal-e, ereya na-net at eyabi na pok yij-o. 45Tena bosoloma-ge, Yesus-nen yosolar-e: ”Ta-nen an tena nibij-o?” luk yosoloma-ge,
it pidsa-nen-e: ”An-e lag-o” luk yil mborogola-ge, Peterus-nen yosolar-e: ”Mul Nondoso Nap wa-e. Ap kwarat-nen lop lop kiriga yu-nen panggon keyali-o” luk yij-o.
46Alat nde, Yesus-nen yosolar-e: ”An namawi-ge an nebem-nen nggigisa mborosola kagirik me, an naru-o. Ap-net tena nibiga-o” luk yij-o. 47Yosoloma-ge, kurasa kwarij-et nde, nam tak posola karuk, kwe na-ge owak lele min-et lobok luk, Yesus ijok eralu mbud lug-e, ap pidsa inmbiri bem-et wene na parosolar-e: ”An-e iri bem-nen tena kibigirikmu, tena kobosoma ereya na-net ki yigi-o” luk mbenasa yij-o. 48Yosoloma-ge, Yesus-nen kwe na yak tosolar-e: ”Nara wa-e. Kindi an nebem angin tubu yigen iri-nen ki rak kibij-o. Kalen min-et mbiri-o” luk yak tij-o.
49Nde, Yesus na wene yosolat worasoma-ge, Yairus ama-nen lobok yidnak nap mbi-nen Yairus na yak tosolar-e: ”Nab-o. Kat kara na-ge wat yamu me, Mul Nondoso Nap yu wewesa anggun panggun tak purak pug-o” luk yak tij-o.
50Yak tosoloma, Yesus na wene iri kuluruk, Yairus na yak tosolar-e: ”Kwiye kasu meyog-o. Kat kindi an nebem angin tubu yugun pem-e kara na ki yuwa-o” luk yak tij-o.
51Iri lug-e, Yesus na Yairus omborom wok luk, ma nggweyekluk-nen yosolar-e: ”Ap mbi nggumomtak pug-o” luk, Peterus min Yoanes min Yakobus min la kwe na eid ija min inmin nak ma nggwij-o. 52Nde, la iri na ubud-nen ap pidsa-ge yip togolat, yip lilan wanogolat woragola-ge, Yesus-nen yosolar-e: ”Yip tili-ge meyog-o. La kwe iri-ge wat yij-e lag-o. We nene yusu-o” luk yij-o.
53Yosoloma-ge, la kwe iri na abu wat yidnak enaru me, it pidsa-nen-e Yesus nda wiriga-o. 54Alat nde, Yesus-nen la kwe na inggi tena buruk-nen yosolar-e: ”La kwe yu-ge wa-e. Men min-o!” luk, ene ngguloksa yij-o. 55Yosoloma-ge, la na tuguruk indi wok yosolar-e, ereya na-net men yij-o. Nde, Yesus-nen it yak ondosolar-e: ”Nunggwi mende mak ter-o” luk yak indij-o. 56Iri yosola-ge, la kwe na eid ija na wi langgu kwarat mbariga-o. Nde, Yesus-nen it yak ondosolar-e: ”Yu kwarigi yu-ge ap misiger-o luk tet yak undurak pug-o” luk yij-o.
انتخاب شده:
LUKAS 8: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
