YOANES 3
3
Yesus min Nikoremus min-nen kwariga wene
3:1-21
1Yawuri nap ennggendumu Parisi nap kek tak misik unu-ge Nikoremus irit woragaij-o. 2Misik tarem kubu nggwe-ge at na-ge Yesus eram mberarik, at yak tosolar-e: ”Mul Ondoso Nap wa-e. Kar-e Mbal Pem Nagawan-nen kibil lobok yidnak-nen yusu-o luk nir-e nenaru-o. Mbal Pem Nagawan nde inmin woragit lak-nen-e kat-nen kwiye worak mende kwarusu yu nggal-e ap misiger-o luk tet-nen kwarurag-e meya-o” luk yij-o.
3Yosoloma-ge, Yesus-nen at yak tosolar-e: ”An-e ndemeret yak kurusu-o. Mberen pem ndet ibigit lak nab-e Mbal Pem Nagawan-nen tenagaidnak wi-ge erengen kujwa bug-o” luk yij-o. 4Yosoloma-ge, Nikoremus-nen at kin wok obosolar-e: ”Ab-e nggok yidnak nggwe-ge nggesa-nen mberen pem ndet unpurag-o? Tuguruk iniya arem ngguruk mberen pem ndet unpurak nde yigen-a?” luk yij-o.
5Yosoloma-ge, Yesus-nen at yak tosolar-e: ”An-e ndemeret yak kurusu-o. Yi min Konak Indi min-nen ndet inpigit lak nab-e, Mbal Pem Nagawan-nen tenagaidnak wi ngguwa bug-o. 6Ki nap-nen ndet onpogolar-e, ki nab-et ndet unpugwi-o. Nde, Konak Indi-nen ndet onposolar-e, inndi-t ndet onposo-o. 7An-nen-e: ’Kit pidsa-ge mberen pem-et ndet kunpuwag-o’ luk yak korosola, kar-e kindi bok yurak pug-o. 8Obube puk kil lobok yosolar-e, at indi-n pidnag-et mborosola, kir-e ene pu nak kulili-o. Ene pu nak kologolar-e: ’Ngge nggwe-nen lobok yusu? Ngge nggwe-nen mburusu?’ luk kabag-et worali-o. Nde, ap Konak Indi-nen ndet onposo-ge iri nggal-net yusu-o” luk yij-o.
9Yosoloma-ge, Nikoremus-nen yosolar-e: ”Kat yigen wene iri-ge nggesa-nen kwat ma-o?” luk yij-o.
10Yosoloma-ge, Yesus-nen at yak tosolar-e: ”Kar-e Isarael nap mul ondoso nab-et nde, kar-e wene yu-ge kabak yusu-a? 11An-e ndemeret yak kurusu-o. Nit-nen-e nit nenaru iri na-t yak kondogolat, nenlengen-nen kaidnak iri na-t mirik konpogolat yili-t nde, nit-nen yidnak wene-ge kit-nen wanurak kinsili yili-o. 12An-nen-e nggweyak ma-nen kwarugwi bem yak kondosola-t nde, te rak pili me, aid arem-nen kwarugwi bem yak kondosola-ge, nggesa-nen ndemerer-o luk peragub-o? 13Nde, ap misiger-o luk tet aid arem lagwi bug-et nde, at aid arem-nen mbuwagaidnak nap Ap Ambara an narig-et nag-o” luk yij-o.
14”Nde, Musa-nen posid waro e bem perena karu me mendak pid iri na nggal-et Ap Ambara an-e mendak nubuwa iri-ge 15ap pidsa an nebem inndi angin tubu yogola-ge, unlug-et woralik nalik momtak elem wanuwakluk mendak nubuwa-o. 16Mbal Pem Nagawan-nen ki nap pidsa nenabuwa nggulok karuk, at Ambara misiget nderak wok nendamu-o. Ta-nen nde at ebem inndi angin tubu yuwa nab-e lak yigit lag-et, are, pem-et unlug-et woralik nalik momtak elem irit wanuwa-o. 17Nde, Mbal Pem Nagawan-nen-e at Ambara an nggweyak ma nibil mbuwagaij-e ki nap pidsa lak tak unpurak pem enpem wene mbaruwakluk nibil mbuwagit lag-o. Are, ki nap pidsa inmiri yaga wok unduwakluk nibil mbuwagaij-o.
18Ambara an nebem inndi angin tubu yuwa nap na enpem-e lak tak unpurak wene mbaruwa bug-o. Nde, inndi angin tubu yigit lak nab-e Mbal Pem Nagawan Ambara misiget nderak an nebem inndi angin tubu yigit lak me, it enpem-e lak tak unpurak wene-ge mondok mbarak puruk worasu-o. 19It lak tak unpurak wene enpem mbarid iri-ge elem yu bem-nen-o: Yaya na-ge nggweyak ma yu me lobok yij-et nde, ir-e meya nak kwarugwi me, yaya na insili rak puruk, ’Ndamuk irit ninndingen-o’ luk yugwi iri bem-nen enpem wene mbarid irir-o. 20Nde, meya nak kwarugwi nap-nen-e yaya iri insili rak puruk, it meya yugwi nam tak puwa naru, yaya na eram lobok yili bug-o. 21Alat nde, Mbal Pem Nagawan indi-n pidnak nak kwarugwi nap-nen-e it-nen kwarugwi na-ge Mbal Pem Nagawan indi-n pidnak nak kwarugwi-o luk nam maklug-e, yaya na eram lobok yugwi-o” luk yij-o.
Yesus min Yoanes ap yi maroso nap min-nen kwaridnak wene
3:22-30
22Iri rak purug-e, Yesus min at owosirak min-e Yurea wi mberarig-e, o iri me-t inmin woralar-e, ap yi ma onposolat woragaij-o. 23-24Nde, iri tarem-e Yoanes na-ge o kubu me awo ibil nggwigit lak worala me, Yoanes-nen na irit, o Salim koroga o Ainon iri me yi kwarat alama karuk, ap yi marosolat woragaij-o. Nde, ab-e at eram lobok yogola, yi ma onposolat woragaij-o.
25Worala-ge, Yoanes owosirak erep-nen-e yi ma unpugwi iri na wene lit lit Yawuri nap misik imin ngguno nggwiga-o. 26Alama-ge, ir-e Yoanes eram mbirigarik, at yak togolar-e: ”Mul Ondoso Nap wa-e. Yi Yorodan eyak ele bem kimin woragaid nap, kat-nen mirik ninpigen nap iri na kar-e yeberak worasu, lak? Nde, ap iri na-ge yawo ap yi ma onposola, ap pidsa-nen at eram mbitli-o” luk yiga-o.
27Yogolikma-ge, Yoanes-nen yosolar-e: ”Mbal Pem Nagawan-nen ap mbi kwat ibigit lak-nen at ondomok amawi bem-nen nak kwarurag-e meya-o. 28’An-e Kerisut-e lag-o. Are, at abuwok wirik nibil lobok yidnak-nen yusu-o’ luk yosola, kuligep nar-o. 29Kwe ap wanurak kwe iri-ge at wok uburak nap iri na ogwer-o. Nde, kwe iri wok uburak nap anggam mbi-ge an ene kolosolat at eram mendak worasolar-e, kwe wanurak nap iri na ene-ge alen min-et koloso-o. Nde, iri nggal-et an yawo na nalen kwarat kasu-o. 30Ar-e mondok kek yil lasola, an-e tebe yil mbosolar-e ob-o” luk yij-o.
At iri-ge aid arem-nen mbuwaidnak nab-o
3:31-36
31Teram-nen mbuwagaid nab-e kek tak terak minig-er-o. Nde, nggweyak ma-nen lobok yidnak nab-e nggweyak ma nap me, nggweyak ma wene nak yoso-o. Nde, teram-nen mbuwagaid nab-e kek tak terak minig-er-o. 32At iri-nen-e at erengen-nen kaidnak nde at eyanggo-nen kulidnak nde iri na-t yak undusu-t nde, ap misiger-o luk tet at ene wanili bug-o. 33Nde, at-nen yidnak wene ndemerer-o luk perali nap-nen-e: ”Mbal Pem Nagawan iri-ge lud tak nak kwaroso-nen yusu-o” luk yili-o. 34Nde, Konak Indi ebis-et wok tidnak me, Mbal Pem Nagawan-nen wirik ibil lobok yidnak nap-nen-e Mbal Pem Nagawan-nen yidnak wene nak yak ondoso-o. 35Eid nen-e at Ambara abuwa karug-e, yi kwarurak ndi kwarurak pidsa Ambara inggem nak pamu-o. 36Ambara ebem indi angin tubu yusu nab-e urug-et pem-et woralik nalik wolmomtak elem wanusu-o. Nde, Ambara-nen yidnak wene kuruk tusu nab-e urug-et wolma bug-o. Are, Mbal Pem Nagawan isilepma-ge at ebem mondok puruk wolma-o.
انتخاب شده:
YOANES 3: inondx
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@LAI 1992, 1994
