Lûk 23
23
Ghe nî wò Yɛso a vʉ̀a Paelɛ̀t
(Mat 27:1-2, 11-14; Mâk 15:15; Dzn 18:28-38)
1Ghe a dzə̀m n daŋso nùghù è kɔʼ, nì ndùw Yɛso a vʉ̀a Paelɛ̀t; 2ghe fi kaʼ nù alekwu Yɛso, dzàa tsùghuu enyəa, “A kəŋ kwu sə kɔʼ enyəa tûwbʉ̀ghà wən tsʉ̂a bǒon ghì ghə enaʼ a sɛ̀, ù dzɛ̀ enyəa ghî à ka mwàʼsò kə̀ e chuuw â Kaesà, dzàa kaaŋ sùghò enyəa e lo Bəghambī, də̀ŋ kə̀ tsuʼu ko.” 3Paelɛ̀t fi bvʉ nù â Yɛso enyəa, “À lò ghû də̀ŋ kə Tə̀dzûu kò à?”
Yɛso m bɛ̀lɛ̀ ndùw wə̄n enyəa, “À dzɛ̀ ghù.” 4Paelɛ̀t n daŋso dzɛ̀ â tuw u tə fɔ̀e wò, àsùghò nɔ̀e kə aghì chi ko enyəa, “Ŋ̀ kâ ghəa è biigh è li e kôʼ ghùw wə̄n ghəŋlo.” 5Ghe m mgbɛɛ ko enyəa, “Ù tiso naŋa kɔʼ naʼ e Dzùdîa e dzə̀m alo efwē an tsʉ̀ e wə̄n. Ù fə̀ ziī tsughu aŋ Galèlîi, vʉ̀ ù bùghò tɛ̂ wô fɛ.”
Ghe nî ndùw Yɛso a vʉ̀a Hɛlɔ̀d
6Paelɛ̀t n zuw tsughu ghəa yì, bvʉ enyəa tûw wən lo ghùw ù Galèlîi à? 7Ghəa ù kəŋ kele kɔʼ enyəa Yɛso sə̀ aŋ kwù è Hɛlɔ̀d, ù n nì tùm ndùw wə̄n a vʉ̀a Hɛlɔ̀d. Hɛlɔ̀d fə̀ lo sugho an Yɛ̀lusalɛ̀m an tì kə te ko. 8Hɛlɔ̀d ŋ kòʼ tsùghù Yɛso, duʼn sə̄so tsughu enyə, ù màʼa fə̀ kiī zuūw tsəghà zɔ̂ŋ u Yɛso wò, ù m mbùuŋ kèe tsə̀ghà alekòʼ wə̄n. Ù fə̀ diī kêe enyəa to e mô koʼò tsughuu kô ghəa Yɛso dèe fənlo è li zo a te. 9Ù m bvʉʉ̄n ndə̀mà tə aghəa â Yɛso, Yɛso ŋ kè kuūwn bɛlɛ̀ èghəa. 10Tuw u təfɔ̀e wə̀ tee sə̀ è wo ghèe ghê dèekə̀làŋ, tɔ̀ʼɔ̀ tùghùsò sɔ̀ʼɔ̀ ndùw ko kə̀ghu a zəŋò Yɛso. 11Ghê Hɛlɔ̀d ŋ kuuwn tə̀ma ko wə̄n â nduw ghèe ghê sùghugòʼ tə wə̄n to, ghəəŋ wə̄n â nyùɛʼɛ̀ tə aghəa to, nì wò dàla è sə̀ŋò, la kɔʼ wə̄n a te, daŋso nì tùm ndùw wən ebàm a vʉ̀a Paelɛ̀t. 12Tsūʼ fə̀ è fì, Hɛlɔ̀d ŋ kwū ten afən ghèe Paelɛ̀t, mo sûesʉ, ghe fə̀ buʼū koʼō tsəgha yo kàʼmèsʉ mò.
Ghe tsəghàsò kə̀làŋ enyəa ghe wi Yɛso
(Mat 27:15-26; Mâk 15:6-15; Dzn 18:39—19:16)
13Ghəa ghe kôom nî wô Yɛso a vʉ̀a Paelɛ̀t, Paelɛ̀t n tɔŋɔ tsughu kəbe, tuw u tə fɔ̀e wə̀ n lo a te, àsùghò dwə̀ŋ wò. 14Ù n dzɛ̀ â ghee enyəa, “Ghɛ̀ mǒ ghùw wə̄n ni wo a vʉ̀a mùghò enyəa ù tsʉ̀a bonlo àghì enyəa ghe e tiso naaŋ kɔʼɔ naʼ zo alo efwē, Mùghò ŋ wə̄n â ghəa a tɔ̂ʼ bvʉʉn fɛ an sə kɛʼɛ̄, yìa Ŋ̀ kəŋ kele kɔʼ sughò enyəa ghu kə wə̄n kə yo aŋ ghəa yìa ghɛ̀ kwuu wə̄n a te. 15Ghuūghùe ù Hɛlɔ̀d vʉa u kôʼ enyəa ù kà ghəa e bonlo, zə̀ lò e ghee ù kòom lɛnlō, nì tùm wò wə̄n fɛ èbàm a vʉ̀a sɛ̀. Alekùum nîi tsughu, ghùw wən kâ ghəa è li e bonlo tò ù è kpuw a te, 16Ǹ nwəən buu tsughuu ko nǔ wə̄n, Ǹ zəghà wə̄n ù nùghù.” 17[Zə n lo am bùghòo kə enaʼ kə ghee enyəa, abugho ghuw a zə kə Ezəŋsō naŋa a tsəghà kpe wo, Paelɛ̀t ŋ ki aletsʉā zəghàa tsughu ghùw ù ndùghùtsāʼ u mɔ̀ʼ â ghì ghə enaʼ a te gho.] 18Ghəa ghe tso zuw ndùw ghəa a Paelɛ̀t dzɛ̀ tsughu êzə̀, ghe m bvʉ̀ tsughu an tuw kə wə̄n enyəa, “Wi nyòoŋgwən vʉ̀, ghù biso tsʉ zəghāa wo ghāʼ â Bàlabâ.” 19(Bàlabâs fə̀ ndùghùtsāʼ kɔʼ kùu ndùw ndə̀m kə̀ li ko kə fə̀ sə enaʼ ù ŋ wī ghùw a te.) 20A m bùghò Paelɛ̀t sò kuūwn ləghaa alezə̀ghàa Yɛso, ù n zʉ̀sò kə̀a kpèʼe ndùw àghəa â nɔe kə aghì chì ko. 21Ghe ŋ kəmà ndùw ko wə̄n enyəa, “Tə̀ghaa wə̄n! Tə̀ghaa wə̄n!” 22Paelɛ̀t n dzɛ̀ â ghee, kɔʼɔ səa ndùw tə̀nəghā tə təgha enyəa, “Mò à, ù bòʼò ghə̌əŋ ghəa è biigh è ghɛ zo a? Ŋ̀ kâ dɔ̀m kòʼ ghəa zəla ù bonlō tò ù è kpuw a te. Ŋ̀ kuuwn kamso tsughu ko nǔ sàʼsàʼà fò an sə e wə̄n Ǹ zəghà ndûw wə̄n.” 23Ghe m mgbɛɛ buʼn səa kɔʼɔ ko m̀bɔ̀ŋ enyəa ghe wi Yɛso. Paelɛ̀t n zùw ndùw â ghee. 24Paelɛ̀t n daŋso tsə̀ghàsò tsùghù kəlâŋ enyəa ghe ndûw wi Yɛso aŋ ghəa nɔ̂e kə aghì chi mô ləghaa. 25Ù n tsʉ̀ zə̀ghàa sə̀ wò Bàlabâs wəla naʼ e bvʉā, tɔɔŋ tûw wəla ù fə kɔʼ ndùghùtsāʼ kùu ndùw ndə̀m kəla kə fə sə enaʼ ghùw m kpuw a te, kuuwn nì fùghù sə̀ ndùw Yɛso â ghee aŋ ghəa ghe ləghaa.
Ghe təghà Yɛso
(Mat 27:32-44; Mâk 15:21-32; Dzn 19:17-27)
26Ghəa ghe nîi nughùun nduw â Yɛso alendùw təghàa, ghe n sə kpeen ndùw ghèe ghê Sǎemòn, ghùw ù Sèlên ù lì mò ù nùghù wò enaʼ. Ghe ŋ kwu tə̀msò tsughu wə̄n alo kədàŋlo enyəa ù bòʼò a bàâ Yɛso. 27Yîzən à li ghə n lo am bvʉa e nɔ̀e kə aghì kəla kə fə̀ səŋō nduw a bàâ Yɛso, mbùuŋ dìi ndùw, sàʼsò ndùw èghue, ghe kwuso se zo a zə̄ŋò Yɛso. 28Yɛso m fwə̀n tsùghù ughue, dzɛ̀ â ghee enyəa, “Yizen a Yɛ̀lusalɛ̀m ghò, kà nlò mugho dì, laam dǐi tsughu nlò ghue zɛʼɛ zo àsùghò wɛ ghɛʼɛ gho. 29Tî kə̀ li kə kê bùghòo nù, ghî ghə̀ e kê dzaā enyəa, ‘Dzɔ̀ lò wìzən wəla ghe lù kɛ̀ kò, àsùghò ghəla ghe lo mo ghe kaam n dzə kòʼ àsùghò wəla ù lǒ mò ù kaam nyɔŋso kòʼ wɛ gho.’ 30#Hos 10:8; Edê 6:16Ghe lo daŋso kaʼā tsughu ghe e diī kɔʼɔ nduw â kàʼà tò enyəa, ‘Gbɛ̀lɛ bvʉ̌a wò nlò a zəŋo ghàʼ, tsən nǎn nlò ghaʼ.’ 31Nu abugho ghe lo aleghəəŋ ghəa ghən a zəŋò kàʼ fə̀ zʉ̂ fò, ghe lo aletsoō boʼò ghəŋlo ênzə̂n abugho fə zum tsughu a?”
32À n lo êzə̀ mò ghî à li a lo sugho a te a bə̀ghà ghe fə̀ zaʼ lâŋ kə enaʼ ko, sùghugòʼ tə̀ nî dâŋ tsə̀ghà sùghò ghee alendùw wi. 33Ghəa ghe bughò tɛ̂ tsughu an lùʼù kəla ghe tɔŋlo enyəa, à lò Kaŋ kə kətūw, ghe n tə̀ghàa kɔ̀ʼ Yɛso a fughu ghèe ghê ghì yìa à bə̀ghà ghe fə̀ zaʼ lâŋ kò. U mɔ̀ʼ aŋ kwe u Yɛso ù təma wo, u mɔ̀ʼ aŋ kwe u Wə̄n ù kwû wò. 34#Sms 22:18 Yɛso n nùghù dzɛ̀ tsughu enyəa, “Tsele waŋā, wuwmàʼà bo e ghee zo, nu ghe kwo dzə yo fəgha kəla ghe ghəŋlo ghè kò.”
Ghe n nì dzùghù tsùghu ndzʉ̀ è wən aŋ ghùe e ghee mo ghe təm tsughu bòʼ. 35#Sms 22:7 Ghî ghə̀ n ti, lɛ̂ɛn ghəa yì; ghî à ne ghə ŋ kuuwn təma ndùw wə̄n â nduw, dzàa ndùw enyəa, “Ù maā ghî à li a bəghasə, ù bəghāa səā tsughu ghue wə̄n êzəŋ, bugho ù lǒ Kə̀lestò, wɛ ù Kə̀zə̀ ù tsùʼu.” 36#Sms 69:21 Sùghugòʼ tə̀ n təma sùghò wə̄n â nduw, ndùw fùghu wə̄n â faa kə nlʉ̀ kò, 37dzàa ndùw enyəa, “Abugho ghù kùm lo də̀ŋ kə Tə̀dzûu kò, bəghasə tsughu ghue wʉ̀a wò.” 38À n lo mo ghe ŋ ghəa à tɔɔ a fəghà an baaŋ kə tsə̌a, bɛ naŋa kɔʼ edzūŋ an tuw kə wə̄n, ghe n tɔm naŋa kɔʼ am baaŋ kə te ko enyəa, “KƏN LǑ DƏ̀Ŋ KƏ TƏ̀ DZÛU KƏ TĒ KŌ.”
39Zàʼà kə̀làŋ u mɔ̀ʼ aŋ ghì yì a bə̀ghà ghe fə̀ bɛ naŋa sugho m nùghù tsɔ̀ kə̀a ndùw â Yɛso enyəa, “To ghù mgbàŋ lò Bəghambī lo a, so bəghasə tsughu ghue wʉ̀a wò a, ghù bəghasə daŋ tsəgha sugho ghaʼ à.” 40Zàʼà kə̀làŋ ù lǐ vʉ̄ ŋ kuūwn geen ndùw wə̄n enyəa, “Ghù Zə̀ kə̀ tsəŋo yo a? Ghe ŋ ghù təghàa sùghò tǒ wə̄n. 41Sɛ̀ fɛ lǒ, sɛ̀ kûu fǎan kpēe to nù, bòʼ ghəa a sɛ̀ à ghəəŋ gho; tûw wən kâ ghəa e kuuwn bonlo.” 42Ù n dzɛ̀ â Yɛso enyəa, “Yɛso ghù ke moʼn mugho abugho ghù kè lô am Fɔ̀e wʉ̀a.” 43Yɛso n dzɛ̀ ndùw â wə̄n enyəa, “M̀ fɛ kùum dzàa wò nù â ghù, nɛ, ghàʼ à ghù sò lò a dzə̀m alo Kəwālā.”
Vʉ e Yɛso
(Mat 27:45-56; Mâk 15:33-41; Dzn 19:28-30)
44 #
Ksm 26:31-33
À fə̀ lo an zuuw è kɔʼɔ teme zo, ləm kə m bvʉ̀ tsughu luʼū tən tə̀ dzə̀m ndùw tɛ̀ ndùw an tàm tə ezuw tə təgha an zuw è bəŋo zo. 45Aŋghəa lə̄m kən bvʉ̂ doʼō, Vʉa e zəa an Ndughu è Kə̀zə̀ è ne m gbə̀n bàa sə̀ tsùghù wò alo ugbà u bʉ̀ghà. 46#Sms 31:5 Yɛso n daŋso dì sə̀ wò an dzə̂ è tughu enyəa, “Tsele waŋā, ghue waŋa vʉ̀a M̀ fughu wô â ghù.” Ghəa ù daŋso dî tsughu êzə̀, ù m mìa kɔ̀ʼ è wo. 47A m bùghò êzəŋo komndzūghū vʉ kôʼ tsughu ghəa yia a sə kɔʼ, ù m fùghù ndùw ŋkɔʼso â Zə̀ kò, dzɛ̀ tsùghù enyəa, “Ghùw wən mò kuūm lo ghùw ù tsəghatsəgha.” 48A m bùghò nɔ̂e kə aghì chia kə mò zûuŋ doʼō alelɛ̂ɛn ghəa yì, kôʼ tsughu ghəa yia a nî bəla ko, ghe ŋ kwəla nyəa ndùw èbàm mo ghe m fə̀ŋ tə̀ kwu kele. 49#Lûk 8:2, 3 À n lo mo ghî ghəla ghe fə̀ kwo wə̄n fughu a dzə̀m nyàa tì ko alo kədɛ̀, lɛ̂ɛn ghəa yì ghèe ghê yìzən ghəla ghe mò nughù sə wo ghèe ghee aŋ Galèlîi.
Ghe tsəla Yɛso
(Mat 27:57-61; Mâk 15:42-47; Dzn 19:38-42)
50Ghùw kaŋsì ù lì n lo sugho fughu ghe fə̀ tɔŋlo enyəa à lǒ Dzùghùsî, mò ù sə̀ wò an Àlìmatìa an naʼ e Tə̀dzûu. À fə̀ lo ghûw ù dzùŋ, lò sugho tsəghatsəgha. 51Bəghà wən ka fə̄ boo tsə̀m u ghee u te wo, kè boō sughò fəgha kəla ghe fə̀ fwaʼ ghè kò. Ù mò ləəm tsəgha Fɔ̂e u Kəzə̀. 52Bəghà wən n ndùw bùʼ ndùw kə̀ghu â Paelɛ̀t enyəa ù zə̀ghà wô gwən e Yɛso to e ndûw tsəla. 53Ù fi bughò nì sə̀ tsùghù wò nù gwən e te zo, nyəme bɔ̀m kɔ̀ʼ am gbà u kəmbəghalaŋ, ndùw nyə̀ŋsò nàŋa nyə̀ ndùw alo kəbùʼ ghe guw nyə̄ nduw alo kənɛ̄; mo ghe kaām ghǔw fughu n nyə tsəla kòʼ. 54À fə̀ lo tsuʼ fəla ghe biaān naŋā zeē fʉgha wo alenùghù zəā zeē wô Tsuʼntsə̄ u ghee lo a te, ghe ŋ ki alekùʼù kaʼ alezə Tsuʼntsə̄ u Tə̀dzûu 55Yîzən ghəla ghe mò nughù sə wo ghèe ghee aŋ Galèlîi n nùghù dàŋso ndùw sùghò a bàâ gwən e wə̄n zo, ndùw kòʼ tsùghù sùghò ghəa ghe tsəla naŋā gwən e wə̄n zo a te. 56#Ksm 20:10; Lwa 5:14Ghe n daŋso kwə̀n nyə̀ ndùw èbàm, kwən biaan naŋa tsughu fə̀ghà n lə̌əm mò, àsùghò vʉ n lə̌əm mò. Ghe n nùghù zʉ̀ʉn zěe wò èghue Tsuʼntsə̄ u Tə̀dzûu, aŋghəa lâŋ kə̀ deē.
انتخاب شده:
Lûk 23: agq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
