Lûk 16
16
Kwə̀ən kə ushwaʼ aŋ ghùw ù kə̀fwàʼ ù tɔ̌ɔ
1Yɛso n daŋso dzɛ̀ â tsə̀təndə̄ghā tə wə̄n to enyəa, “Ghùw ù kǔu ù lì fə̀ ki ghùw ù kə̀fwàʼ ù wə̄n, ghe m mgbɛɛ bughò dzàa fùghuu tsə̀ghà ko enyəa ghùw ù kə̀fwàʼ ù wə̄n bəla nyàa fʉgha u wə̄n tò fʉgha u dzʉghadzʉgha. 2Ghùw ù kǔu vʉ fi bughò tɔ̀ŋɔ naŋa tsughu nû ghùw ù kə̀fwàʼ ù wə̄n vʉ̀, bvʉ â wə̄n enyəa, ‘Ŋ̀ kən zuuw kâaŋ kə̀ kwò enyəa an zən zəghā a? Ghəŋlô ghù fughu nyə wo tàŋ è kə̀fwàʼ zə̀ghà, mbuu ghù lo kòom fwaʼà yo fɛ.’ 3Ghùw ù kə̀fwàʼ vʉ m bvʉ enyəa, ‘Mùghò è dzə̂ èndūghō êzə̄ŋ à, mùghùbè waŋā sô so e buū tsɔ̄ʼ mugho alo kəfwàʼ a? M̀ fɛ lǒ, Ŋ̀ ki yo nûŋ wò alebwiī tsəmā kaaŋ luʼū to, yìa Ǹ də̂nsò sughò tuw ko alenɔɔ nɔ̄e ko. 4Mùghò ŋ kele ghəa zəla Ǹ lo tò mùghò è ghəŋlo, to abugho M̀ bûʼ guŋù ko fwàʼ kò fɛ, to ghî ghə̀ è ke e naam koʼō kɛ̄lɛ̄ mugho an lùʼù tə ghee.’ 5Ù fi kaʼ nû, tɔ̄ɔŋ tsughuu ko kə̀chìa aŋ ghì ghə̀là ghe fə̀ ki mughùbè ù wən â ndàŋ kò. Ù m bvʉ â ù sûesʉ vʉ̀ enyəa, ‘Ghù mughùbè waŋā ki â ndàŋ kò aŋ kwò?’ 6Ù te n dzɛ̀ enyəa, ‘Kɔ̀n tə mvʉ̄ ŋghəm èfāa.’ #16:6 Mvʉ: Mvʉ n tə̀ Olèf. Ù n daŋso dzɛ̀ â ghùw vʉ enyəa, ‘Nǐ mwàʼsò kə kəndàŋ kò, mba dòʼo tsughùu, ghù tɔm tsughu ko kɔ̀n tò ŋghəm n chìakò.’ 7Ù m bvʉ â ù lì wən enyəa, ‘Ghù kǔuwn ki kwò?’ Ù te n dzɛ̀ enyəa, ‘Mbə̀ghà tə asāŋ ŋghəm èfāa.’ Ù n dzɛ̀ â wə̄n enyəa, ‘Nǐ mwàʼsò kə kəndàŋ kò, tɔm tsughu enyəa ghù kì ko ŋghəm tǔu.’ Ù m bɔɔm ghəəŋ kô ghəa yì èzə̀ â ghì ghəlà à dzə̀m ghe fə̀ ki mughùbè ù wə̄n â ndàŋ kò. 8Mughùbè vʉ m fùghù ndùw kɛɛ u mbaaŋ kə ghûw ù kə̀fwàʼ vʉ̀ an tsə̀ n utɔ ŋ wə̄n mì; nu wɛ a nɛ ghən ŋgee mbāaŋ ghəəŋ nù aŋ ghùe e ghee tsə̀ghàtàʼà ghəa wɛ a Kəzə̀ à ghəŋlo aŋ ghùe e ghèe. 9Ǹ so Ǹ dzâa wô â ghɛ̀ enyəa, nǐi kɔʼ nlò fʉgha u mbī wo, ghɛ̀ kwu nduw fwən wo a te ghɛ̀ à ghê ghì ghò, mo u kê bùghò mìa tsùghù nû, ghe lo kpeē nî ghɛ̀ alo Kəwālā.
10Ghùw wəla ù lǒ alenyɔ̀ʼɔ̀ kwuū kēlê nyàaŋ fə fəfə̀ghà, ù lò nû alenyɔ̀ʼɔ̀ kwuū kele sughò ndə̀m. Ghùw wəla ù yò aledòʼò tsəghatsəgha an nyàaŋ fə fəfə̀ghà, ù yò sughò aledòʼò tsəghatsəgha an ndə̀m. 11Ghəa ghɛ̀ yô alenyɔ̀ʼɔ̀ kwuū kēlê kum è səŋò zò, à kǔuwn lò ndughoo alefughūu wô ghɛ̀ â fʉgha ù səŋò wò enyəa ghɛ̀ kwu kelê à? 12Abugho ghɛ̀ yô alenyɔ̀ʼɔ̀ kwūu kēlê fʉgha u ghûw nùghù, à kǔuwn lò ndughoo alefughūu wô ghɛ̀ â ù wɛʼɛ wo ufʉgha à? 13#Mat 6:24 Kɔ̂ɔ fə̀ li fə yo dzə̂, fə lo alefwaʼā aŋ ghùu ghê mughùbè a bə̀ghà alo enə̀gha e mɔ̀ʼ; tɔŋlo enyəa to ù sə̀ lə̀ghaa u mɔ̀ʼ, bàa ù lì wən, ŋkāa ù è tumso u mɔ̀ʼ, kòʼò kèe ù lì wən. Ghù yò alekɔʼso Zə̀ kò, kɔʼso sùghò fʉgha u mbī wo.”
14Falàsîi tə̀ n tsōʼ wə̄n aŋghəa ghe zuw tsughu shwaʼ wə̄n, ghe maʼâ ŋgee ləghaa kua wo. 15Yɛso n dzɛ̀ â ghee enyəa, “Ghɛ̀ lo ghî à dzûŋ ghò an sə kə aghì, Zə̀ kə̀ kuuwn kwō fə̂ŋ tɛʼɛ; nu fʉgha wəla ghî à kuūwn kɔʼsō, à lò udzʉ an sə kə Kəzə̀.
16 #
Mat 11:12, 13 Ghɛ̌ fə̀ bwiī ko an làŋ kə Musî, zuuw sùghò tsʉ̀ e ghîishʉ̀gha bùghò kùm wò an tì kə Dzɔ̌n Fùghùu mùghù ŋ Kə̀zə̀; alenìi nughù wô an tì kə te ko, ghî à fɛ tsòo mgbɛ̌ɛ kə̀aa tsə̀ghà kô ghəa e Fɔ̀e u Kəzə̀, ndə̀m è àghì yia a dəmà aleŋgaām nyə aŋ ghəa e te zo. 17#Mat 5:18 À lò nɛ̀ɛn kə eghəa â mbī aletsə̀ghà mîa à Wala ko, zə e kuuwn ŋgee tughuu â nyàaŋ fə eghəa fo alesəā nughù kɔʼ alo kəlàŋ.
18 #
Mat 5:32; 1Kò 7:10, 11 Ghùw wəla ù dzùm sə kɔʼ wī, kòom nì tsùghu ù nùghù, ù n sə̀ nùŋlò; ghùw wəla ù nì tsughu wìzən wəla ù lǒ mò ù maā num sə, ù fi naam sə̀ nùuŋ sùghò nù.”
Ghùw ù kǔu ghèe Lazālùs
19Ghùw ù kǔu ù lì fə̀ lo nû mò ù ghue u laa tsə̀ghà ko an dàla tə̀ səŋò tò, à fə̀ghà mə̀ ŋ̀ghùe n nyə̀ghaan mò tò kədə̀ŋ; ù n zəa zēe tsə̀ghà wə̄n â fə̀ghà n dzûŋ mò nəgha tən tə dzə̀m. 20Ghùw ù lǎa ù lì m bughò dòʼn zěe tsə̀ghà a fǔumbɛ̀ u ghûw ù kǔu vʉ̀, mo ba zə ŋ wə̄n kwu pfʉ̄. Ghe fə̀ tɔɔŋ wə̄n enyəa à lò Lazālùs. 21Ù m mbûuŋ kèe tsə̀ghà alebuʼū nə̄əŋ kūum zəa ko sugho təla tə tsɔʼn tsughuu būghō ghùw ù kǔu vʉ zəā; bvʉ tə n yian bùghò kàʼ wò sùghò alenəghā sə̀ghà ŋ wə̄n mī a zəŋo ughùe. 22Zə m bùghò sə kɔʼ enyəa ghùw ù lǎa wən bùghò kpuw tsughu nû, tsə̀təndə̄ghā tə Kəzə̀ tə n nì ndùw wə̄n a vʉ̀a Abə̀làhâm. Ghùw ù kǔu wən m bùghò kpùw tsùghù è sugho, ghe n tsəla tsughu wə̄n. 23Ù n nyə̀ kàʼ ndùw a lùʼù faan wo an nāʼ zə evʉ̄. Ghəa ù sə̀ faān fughu êzə̀, ù mo e baŋà lɛ̌ɛn kɔʼɔ nù, lɔʼso kòʼ kɔ̀ʼ ndùw Abə̀làhâm, à Lazālùs a vʉ̀a wə̄n. 24Ù n dì sə̀ wò enyəa, “Tsele waŋā Abə̀làhâm, kwuso se zo a zəŋò mùghò ghù tum tsughu Lazālùs, tò ù tsùu kɔʼ wàakə̀ghu ù wə̄n alo mmùghu, ù bùghò bvʉ̂ʉn wô tɔŋ waŋa a te; nu ŋ ŋgee zuuw èfɔnlo fɛ aŋ wə̀n wən.” 25Abə̀làhâm ŋ kuūwn dzɛ̀ ndùw â wə̄n enyəa, “Ŋ wɛ, kele tsughu enyəa, ghəa ghù mò mughù am mbī, ghù mò ki fʉgha ù dzûŋ wò, Lazālùs ŋ kuuwn mùghù an tsù; êzə̄ŋ, ù kǔuwn mùghù alo nsəghanyəgha fɛ̄, ghù vʉ̀a ghù kuūwn lo an tsù. 26Səm vʉa u fəghaan lô sugho ghe sùghù naŋā an tsə̀tèʼè fə sɛ̀ enyəa mò ghùw nùghù tsùghù fɛ enyəa e daŋà wò fì, ù ŋ ghà è ke, ghùw è yo sughò alenùghù tsughu fì, ù bùghò fɛ.” 27Ù fi daŋso dzɛ̀ nù â Abə̀làhâm, â wən enyəa, “Ǹ so Ŋ̀ kuūwn buʼū wô kə̀ghu â ghù a tsēlē waŋā enyəa, ghù kuuwn tum tsughu ko wə̄n enyəa ù ndùw am be kə bəghà, 28ù ndùw kwɛ̂ɛn tsughu waazə̂ ghaŋa yì fughu a te, e kwo ko ghe ke bughòo sughò fɛ an lùʼù kə ŋgōʼ kən.” 29Abə̀làhâm ŋ kuuwn dzɛ̀ enyəa, “Ghe ki nû lâŋ kə Musî kò àsùghò tsʉ̀ e ghîishʉ̀gha zò, ghe e bwiī nduw a te.” 30Tûw vʉ mo enyəa, “Ɛ̂ŋgaŋ a tsēlē, abugho ghùw laam ndûw a vʉ̀a ghee, mò ù nùghù tsùghù fɛ an naʼ zə evʉ̄, to ghe zuw, ghe kuwnlo.” 31Abə̀làhâm n dzɛ̀ â wə̄n enyəa, “Abugho ghe yô alebwìi an làŋ kə Musî, àsùghò tsʉ̀ e ghîishʉ̀gha zò, to ghe kâ ŋgə̌əŋ zùw sùghò bugho ghùw bùʼ sə ko an nāʼ zə evʉ̄.”
انتخاب شده:
Lûk 16: agq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
