Dzɔ̌n 9
9
Yɛso bǎaŋ ghùw ghe fə̀ dzə mò ù m fò
1Ghəa Yɛso bwìi daŋso nduw, ù ŋ koʼ tsùghu ghùw mo ghe fə̌ wə̄n dzə wo mò ù m fò. 2Tsə̀təndə̄ghā tə wə̄n tə m bvʉ â wə̄n enyəa, “Mughùbè, à fə̀ bo e ghəəŋ ghùw wən ŋkāa à fə̀ lo tselè ghèe zə̀ à, e màʼâ fə̀ lô enyəa ghe fə̌ wə̄n dzə mò ù m fò a?” 3Yɛso m bɛ̀lɛ̀ tsùghu ghee enyəa, “À yo dzə̂ enyəa ghùw wə̄n fə̀ ghəəŋ bo è loʼ zo ŋkāa à fə̀ lo tsele ghèe zə̀, ghe fə̂ wə̄n enyə dzə wo aledèe tsughu daʼa kə Kə̀zə̀ a zəŋò wə̄n. 4Êzə̄ŋ wəla à naām lô â tsə̀ tò, sɛ̀ ki alembaā fwaʼà tsughu fwàʼ kə ghùw wəla ù tum wô mugho, nu tsuʼ u dzəa wò nù mò ghùw kòom bùʼ yò aleghə̂əŋ ghəa è li zo. 5#Mat 5:14; Dzn 8:12 Tò aŋghəa Ǹ naām lô fɛ am mbī, Ǹ lo tsə â mbī.” 6A m bùghò ù dzɛ̀ tsughu êzə̀, ù n tsə tsughu ntəghà a ghueetsə̄, nɔm kɔʼ kətsaʼ an təghà n te mò, zɔʼ ndùw an sə a ghûw vʉ̀. 7Aŋghəa Yɛso zɔʼ nduw tə̀ghà mò an sə a ghûw vʉ̀, ù n dzɛ̀ â ghùw vʉ enyəa, “Nduw tsughu sǔuw kɔʼ sʉ wʉ̀a wò an tsəm kə Silwàm.” (Silwàm mòʼnlò enyəa, Ghùw ù tum). Ghùw ù vʉ n ndùw tsùghù sùw kɔ̀ʼ wò è sugho, nùghù wò èbàm mò ù kòʼò tə̀luʼū. 8Ghî a kɔn a wə̄n ghèe ghê ghì ghəla ghe mò bûʼ kwo tsəgha ghùw wən enyəa à lò nɔ̀ɔ kə̀ nɔ̄e m bvʉ aŋ ghùe e ghee enyəa, “Wən mgbàŋ yǒ ghùw wəla ù dòʼ tsəghà a fiā, nɔɔ kə̀nɔe a?” 9Ghî à li ghə n dzɛ̀ enyəa, “À lo wə̄n.” À li ghə ŋ kuuwn dzɛ̀ enyəa, “Hǎe dzə̂, à kǔuwn lǒ fwèen kə wə̄n.” Ghuūghùe ù ghûw ù te wə n dzɛ̀ enyəa, “À lò mugho ghùw ù te.” 10Ghe m bvʉ â wə̄n enyəa, “Ghù kàʼ tsughu ênzə̂n alekoʼo luʼū to a?” 11Ù m bɛ̀lɛ̀ ndùw ghee enyəa, “Ghùw wəla ghe tɔŋlo enyəa à lò Yɛso mò nam kɔʼ kətsaʼ, nɔ̀m wò an sə ghaŋā, vʉ̀a ù dzɛ̌ â mùghò enyəa, ‘Tsughu ndùw an tsəm kə Silwàm, ghù suw kɔʼ sʉ wʉ̀a wò.’ Yìa Ǹ n ndûw sûw sə kɔʼ sugho, daŋso kaʼ ndùw alekòʼ tə̀luʼū.” 12Ghî a te ghə m bvʉ â wə̄n enyəa, “Ghùw ù te wɛ̂ɛ?” Ù dzɛ̀ â ghee enyəa, “Ŋ̀ kwo yo.”
13Ghe n nì ndùw ghùw vʉ̀a ù mo bûʼ fô doʼō avʉ̀a ghì a Falàsîi ghò. 14À n lo êzə̀ mo tsuʼ fə̀la Yɛso fə nî kɔʼ tsaʼ ko nɔ̀m ndùw an səa a ghuw vʉ̀, ghùw ù te kàʼ ndùw luʼu tə̀ koʼo to fə̀ lo Tsūʼntsə̄ u Tə̀dzûu. 15Ghî a Falàsîi ghə̀ m bvʉ kpeʼe ndùw sùghò â wə̄n enyəa ù mò kaʼ ênzə̂n alekoʼō luʼū to. Ù n dzɛ̀ â ghee enyəa, “Ù mò nɔ̀m wò kətsaʼ an sə ghaŋā, yia Ŋ̀ n sûw maʼà tsughu ghue wo, yìa Ǹ daŋso kàʼ nduw alekòʼ tə̀luʼū.” 16Ghî a Falàsîi à li ghə n dzɛ̀ aŋ ghùe e ghee enyəa, “Ghùw wən kâ nùghùu wò dzə̀ a vʉ̀a Zə̀ kò, bòʼ ù nǎaŋ yo lâŋ kə Tsuʼntsə̄ ko.” À li ghə ŋ kuuwn dzɛ̀ enyəa, “Ghùw ù bǐigh lo ênzə̂n aledeē ŋgò è tsə̌a tən to a?” 17Ghe ŋ kòom bvʉ kpeʼe ndùw â ghùw ù fǒo vʉ enyəa, “Yia a bughò ghû, ghù dzɛ̀ êndūghō kùu ndùw wə̄n a, aŋghəa à lǒ wə̄n ù mo tsʉ sə ghəa ghò a?” Tuwbʉ̀ghà vʉ n dzɛ̀ â ghee enyəa, “Ù lǒ ghùwshʉ̀ghà ù Kə̀zə̀.”
18Ghî à ne a Tə̀dzûu a ka fə kaam boo dzə̀ enyəa ghe fə̀ ghùw wə̄n dzə mò ù fù dòʼò nù, vʉ̀a ù kòom kaʼ alekòʼ èzə̄ŋ, sěe ghe sô telè tɔɔ̄ŋ tsughuu tsele ghèe zə̀, 19bvʉ â ghee enyəa, “Wən lô wɛ wɛʼɛ wəla ghɛ so enyəa ghɛ̌ fə̀ dzə mò ù fò dòʼò nù a, e sò lǒ ênzə̂n enyəa ù kòʼò tə̀luʼū a?” 20Ghê tsele m bɛ̀lɛ̀ tsughù enyəa, “Ghàʼ kwo nû enyəa wə̄n lo wɛ waʼā, a fə wə̄n dzə wo mò ù fò dòʼò nù. 21Yia abugho dzì zəla ù kaʼ a te alekòʼ, ghà sô kǔuwn kwo yo, ŋkāa ghùw wəla ù tsʉ sə a wə̄n gho, ghàʼ kwo sugho yo. Bvʉ ndùw nlò â wə̄n, ghuūghùe u wə̄n u dzâa wo, nu ù mô êzə̄ŋ noo kpē sùghò aŋ ghûw.” 22Ghê tsele fə̀ ghəa ghən enyə kəaa ghe sô tsəŋō ghî à ne a Tə̀dzûu ghò, nu ghî ne a Tə̀dzûu a te a mafə̄ ki ge naŋā enyəa abugho ghùw kè tɔ̂ʼ dzɛ̂ sə wo enyəa Yɛso lǒ Kə̀lestò, ghe n dzùm sə ghùw ù è vʉ̀ an Ndùghène è Tə̀dzûu. 23Zən lò e ghee ghê tsele fə̀ dzɛ̂ enyəa, “Ù n noo kpē aŋ ghûw, tɔ̀ʼɔ bvʉ tsughu ko nlǒ â wə̄n.”
24Ghe n tɔŋɔ kpeʼe tsughu ghùw vʉ̀a ù mò fô doʼo alendùw sə alo tənəgha tə bəgha dzɛ̄ â wə̄n enyəa, “Dzǎa wò səŋò zò alefughu ŋkɔʼso â Zə̀ kò, nû ghàʼ kwo nû enyəa ghùw wə̄n lo ghùw ù bǐigh.” 25Tûw vʉ m bɛ̀lɛ̀ ndùw ghee enyəa, “Ŋ̀kāa ù lǒ ghùw u bǐigh, ŋkāa ù yǒ, Ǹ yo tò mùghò è kele. Ghəa e lo ko e mɔ̀ʼ Ŋ̀ kwo, enyəa mùghò fə̀ fo doʼo nû, êzə̄ŋ yia Ŋ̀ koʼo.” 26Ghe m bvʉ â wə̄n enyəa, “Ù mò ghəŋlo êndūghō â ghù a? Ù mò sə ghə̀a à tsʉ ênzə̂n?” 27Tùw vʉ m bɛ̀lɛ̀ ndùw ghee enyəa, “Mùghò m mgbàŋ dzɛ̀ â ghɛ̀, ghɛ̀ yia ləghaa yo alebōo, à sò lò kə kwò ghɛ̀ kôom ləghaa alezuūw kpeʼè à? Ghɛ̀ ləghaa sùghò aledòʼò tsə̀təndə̄ghā tə wə̄n a?” 28Ghî a Falàsə̂ ghə̀ n shə̄n wə̄n enyəa, “À lò ghû tsə̀ndə̄ghā è wə̄n, ghàʼ kuuwn lǒ tsə̀təndə̄ghā tə Musî. 29Ghàʼ kwo nû enyəa Zə̀ kə mafə̄ ghəa gho â Musî kə̀a. Yia kuūwn bugho â ghùw wə̄n, ghàʼ bûʼ kwò yo luʼū kəla ù sə a te.” 30Ghuw ù te m bɛ̀lɛ̀ tsùghù enyəa, “Ghəa è səŋò zə̀a. Ghɛ kwo yo luʼū kəla ù nùghù wo a te, vʉ̄a ù tsʉ sə ghaŋa gho. 31A kwo nû enyəa Zə̀ kə̀ zuuw yò shwaʼ u ghì à biigh gho. Zə e kuūwn lô enyəa, abugho ghùw kɔʼso Zə̀ kò, ghə̂əŋ ghəa ghə̀là Zə̀ kə̀ ləghaa, Zə̀ kə n zə̂ən shwaʼ u ghûw ū te. 32Tò aŋghəa mbī fə̀ kàʼ, a kāam zuw kòʼ enyəa ghe fə̀ dzə wo ghùw mò ù fò dòʼò nù, ghùw ù lì m bughò tsʉ̀ kɔ sə a wə̄n. 33Abugho Zə̀ kə̀ mô doʼŋ̀kè tum ghùw wə̄n, to ù mò yo aleghə̂əŋ ghəa è li zo.” 34Ghe n dzɛ̀ â wə̄n enyəa, “Ghî fə̀ biigh fən, mo ghe fə̀ fə̀fùghù dzə alo ebō, fə̀fùghù fə̀ n noo sùghò alo ebōʼ, ghù so e bughò zoʼn ghàʼ à?” Ghe n dzùm nùghù sə ghùw ù fǒo vʉ̀ an Ndùghène è Tə̀dzûu.
35Yɛso n zuw tsughu enyəa ghe n dzûm nùghù sə ghuw ù te an Ndùghène è Tə̀dzûu. A m bùghò Yɛso ndùw kôʼ tsughu ghùw vʉ̀, Yɛso m bvʉ â wə̄n enyəa, “Ghù m boo fughu â Wɛ ù Ghùw?” 36Ù n dzɛ̀ â Yɛso enyəa, “Dzǎa wò mugho â ghùw wəla Wɛ ù Ghùw lô ghè wò a Mughùbè, tò M̀ boō fughu ndûw â wə̄n.” 37Yɛso n dzɛ̀ â wə̄n enyəa, “Ghù ŋ wə̄n kôʼ, à fɛ lo wə̄n ù kə̀aa wô ghəa gho êzə̄ŋ â ghù.”
38Ghùw ù te n dzɛ̀ enyəa, “Mughu ù te, mùghò m boo fughu.” Ù m fughu Yɛso â kɔʼso mò.
39Yɛso n dzɛ̀ enyəa, “M̀ fɛ bùghò alebùghò saʼ ghî a mbī; enyəa ghî ghəla ghe fô doʼo e lo alekoʼo luʼū to, asùghò enyəa ghəla ghe moʼò enyəa ghe koʼò nù luʼū to, e lo alefòo doʼò.” 40A m bugho ghî a Falàsî ghəla ghe mò kuʼù ti am bùghò e Yɛso zuw tsughu ghəa ghən gho, ghe n dzɛ̀ â Yɛso enyəa, “Tò à fɛ lo enyəa ghàʼ fô dòʼò sùghò nù a?” 41Yɛso m bɛ̀lɛ̀ nduw ghee enyəa, “Abugho ghɛ̀ mô boōm tsughuu enyəa ghɛ̀ fôo dòʼò nù, to ghɛ̀ mô ki yò bo e li zo. Êzə̄ŋ wəla ghɛ̀ dzɛ̂ enyəa, ‘Ghàʼ koʼò nù luʼū to.’ Bôo tɛʼɛ tə naam lò ko nû.”
انتخاب شده:
Dzɔ̌n 9: agq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
