Dzɔ̌n 11
11
Yɛso zòm nùghù kɔʼ Lazalùs alo evʉ̄
1 #
Lûk 10:38, 39 Ghùw ù lì fə̀ lo tsəgha am Bɛtanì ghe fə̀ tɔŋlo enyəa à lò Lazalùs, ù m bùghò bvʉ̀ tsùghù edzâŋ; Bɛtanì zən fə̀ lo naʼ zəla Mèle ghèe wàazə̀ ùzən tɔɔŋ Matà fə̀ mughu a te. 2#Dzn 12:3 Mèle wən fə̀ naam lo ko wìzən ù mɔ̀ʼɔ wəla ù fə̀ tsoʼsō fwee e Yɛso zò am vʉ n lə̌əm mò, se kɔʼ an nyùŋ tə kətuw tə wə̄n, Lazalùs fə̀ lo wàazə̀ ù ghee ù nu. 3Waazə̂ a zən ghə n tùm ndùw tum a vʉ̀a Yɛso enyəa, “Mughùbè ghùw ù fə̀n wʉ̂a dzàŋà nù.” 4Ghəa Yɛso zuw tsughu ghəa zən zo, ù n kuuwn nughu dzɛ̀ tsughu â ghì ghə̀là ghèe ghee mò lo a dzə̀m enyəa, “Dzaŋ e Lazalùs zən yo dzə̂ zəla ù lò alekpūw a te. À lò aledèe tsughu daʼa kə Kə̀zə̀ àsùghò aleghəŋlo enyəa Wɛ ù Kə̀zə̀ kele ŋkɔʼso a te.”
5Yɛso fə̀ ŋgee ləghaa Matà ghèe wàazə̀ ù zən àsùghò Lazalùs. 6Aŋghəa ù zuw tsughu enyəa Lazalùs dzàŋà nù, ù ŋ kuuwn kòom dòʼò kpeʼe tsughu ntsuʼu m bə̀ghà an lùʼu chìa ù fə̀ lo a te. 7A m bùghò tsuʼu n tsəghà tsughu m bə̀ghà, ù n daŋso dzɛ̀ â tsə̀təndə̄ghā tə wə̄n to enyəa, “Bùghò nlò sɛ̀ ndûw ebàm an Dzùdîa alendùw kôʼ Lazalùs.” 8Tsə̀təndə̄ghā tə wə̄n tə m bvʉ â wə̄n enyəa, “Wadè, gha kə kaām sə aŋghə̂a Dzuū tə mô so təəm ghù alo atīa, ghù vʉa ghù naām moʼn ko alendùw ebàm à?” 9Yɛso m bɛ̀lɛ̀ tsughu ghee enyəa, “Tàm tə ezuw tə yo eghə̄m à ghè tò tə bə̀ghà â tsə̀ tò a? Abugho ghùw bwìi kaāŋ dzə â tsə̄ tò, ù yò aletàaŋ bvʉ̂ bòʼ enyəa ù kòʼò tsə̀ è mbī zən. 10A mò è bùghò ghùw wəla ù bwìi kaŋlo alo kələ̄m mbaa tàaŋ bvʉ̀a nù bòʼ tsə̀ sò yo aledè wə̄n â dzì.” 11A m bùghò Yɛso kə̀a tsughu ghəa ghən gho, ù n dzɛ̀ kpèʼe ndùw â ghee enyəa, “Fən ù sɛ̀, tɔɔŋ Lazalùs bwǐi nù. Ǹ ndûuw zòo nùghùun kɔ̀ʼɔ nǔ wə̄n.” 12Tsə̀təndə̄ghā tə wə̄n tə m bɛ̀lɛ̀ tsùghù enyəa, “Mughùbè, abugho ù lǒ mò ù bwǐi nù, ù lo dzàŋà tùghu nù.” 13À n lo êzə̀ mo Yɛso fi dzâa enyəa Lazalùs maā kpuw, tsə̀təndə̄ghā tə wə̄n tə ŋ kuuwn nì ndùw enyəa Lazalùs fə̀ŋò tə̀mgbii. 14Yɛso n daŋso dzɛ̀ sə ndùw â ghee an ndɛ enyəa, “Lazalùs maā kpuw. 15Bòʼ ghɛ̀, Ǹ duʼn nù enyəa mùghò fə̀ yo fughu, tò ghɛ̀ lo boo fughu â mughò. Ndzə̀a nlò, a ndûw kôʼ wə̄n.” 16Tɔ̀mâs, tɔɔŋ Didimùs#11:16 Tɔ̀mâs, tɔɔŋ Didimùs: Fɛ moʼnlò enyəa ghê ŋgɔ̀ɔŋmbɛ ŋkāa wɛ ghə nndzə̀. n dzɛ̀ â tsə̀təndə̄ghā tə̀ li to enyəa, “Ndzə̀a nlò tò sɛ̀ dzeŋe ndûw sɛ̀ à ghê Wàdè, mò à lò ko evʉ, sɛ̀ à ghee n dzeŋe m kpuw dzə̀m.”
Yɛso dzə̀n fə̀ŋ tə waazə̂ a Lazalùs à zən gho
17A m bùghò Yɛso ndùw tɛ̂ tsughu am Bɛtanì, ù n kəŋ kele kɔʼ enyəa Lazalùs n dòʼò alo eshìaa alo ntsuʼu n chìakò. 18Alenùghù tsughu am Yɛ̀lusalɛ̀m ndùw am Bɛtānì fə̀ lo ko tǒ tə̀mâe təbə̀ghà#11:18 Tətàm fəbɔm à ghə̀m mǒ tɛ̀ndzughu à ghè tò tə bəghà mo tə kɔʼ kpee yo wɛ fə ebəgha fo.: 19À n lo mò ndə̀mà tə Tə̀dzûu tə̀ m bùghò alebùghò tsəmso Màta ghèe Mèlè an vʉ e wàazə̀ ù ghee ù nùu. 20A m bùghò Màta zuw tsughu enyəa Yɛso bùghòo nù, ù n nùghù ndùw alendùw kpeē nîi wô wə̄n, Mèle ŋ kuuwn dòʼòdòʼò tsùghù ko an ndughu. 21Ghəa Màta kpe nî wô Yɛso, u n dzɛ̀ â Yɛso enyəa, “Mughùbè, abugho ghù mò lô fɛ, to wàanùghò kà mò kpùw dzə̀. 22M̀ bùʼ kwo nû êzə̄ŋ enyəa abugho ghù bvʉ ko kwò kò â Zə̀ kò, Kə sô fùghuu nù.”
23Yɛso n dzɛ̀ â Màta enyəa, “Wàazùghù sò zòom wò nù ebàm.”
24Màta n dzɛ̀ ndùw â wə̄n enyəa, “Ŋ̀ kwo nû enyəa ù lo zòom wò nù ebàm an nə̀ghà è kɔʼɔ səa zo alo evʉ̄ an tsuʼ fəla fə guŋsò tsughu.”
25Yɛso n dzɛ̀ â wə̄n enyəa, “À zòo nùghùun wò mùghò ghî ghò alo evʉ̄, fughuu sùghò ghee â mùghò zò. Ghùw wəla ù boō fughu â mùghò, abugho ù bùʼ kpuw ko nû, ù lo kelê mùghù è doʼn təla zo. 26Yia a bugho wəla ù boō fughu â mùghò mò ù nǎam lò â sə̀ à tughu gho, kê kpùw yo.” A m bùghò Yɛso kə̀a mɛʼɛ̀ tsughu ghəa ghən gho, ù m bvʉ̀ ndùw â Màta enyəa, “Ghù m boo ghəa ghən gho a?”
27Màta m boo ndùw â Yɛso enyəa, “Òo a Mughu ù te, mùghò m boo fughu enyəa ghù lǒ Kə̀lestò, Wɛ̀ ù Kə̀zə̀ wəla ù mò ki alenyəa wô fɛ am mbī zən.”
28A m bùghò Màta kə̂a mɛʼɛ̀ tsughu ghəa ghən gho, ù n ndùw tsɔŋ tɔŋɔ tsughu wàazə̀ ù zən tɔɔŋ Mèle, dzɛ̀ â wə̄n enyəa, “Wàdè lò fɛ, vʉ̀a ù ləghaa sugho alekòʼ ghù.” 29A m bùghò Mèlè zuw tsughu êzə̀, ù n daŋso ghàʼ nùghù è kɔʼ, nùghùu ndùw alendùw kôʼ Yɛso. 30An nə̀gha zə̀ èzə̀, Yɛso n lo mò ù kaam nyə wò enaʼ, ù n naam lò ko an lùʼu kəla Màta mô ndùw kpeēn ghèe wə̄n a te. 31A m bùghò Dzûu təla tə fə̀ tsəmso Mèle an ndughu kôʼ ghəa Mèle ghàʼ nughù kɔʼ a te, bùghò shùaa sə̀ u ghue a beē, ghe n nùghù tə̀ŋò ndùw a bàâ wə̄n, ghe sô moʼò enyəa ù so e ndûw dî an tuw kə eshìaa. 32A m bùghò Mèle bughò tɛ̂ wo an lūʼu kəla Yɛso lò a te, ù tə̀m ndùw tuw wə anyʉ̄ a tsəlā Yɛso, dzàa ndùw â Yɛso enyəa, “Mughùbè, abugho ghù mò lô fɛ, to wàanùghò ka mo kpùw dzə̀.” 33A m bùghò Yɛso kòʼ aŋghəa Mèle àsùghò Dzûu tia ghe fə̀ lo a dzə̀m dzeŋe dîi, ghəa a te ghə ŋge fəmso wə̄n am fə̂ŋ, muūwn kə ŋ kɔʼ wə̄n. 34Ù m bvʉ â ghee enyəa, “Ghɛ̀ mo wə̄n tsəla ghɛ?”
Ghe n dzɛ̀ â wə̄n enyəa, “Mughu ù te, bùgho kòʼô.”
35Yɛso tsànlò è di. 36Dzûu tə̀ n dzɛ̀ enyəa, “Ù mò bəla ləghaa nû Lazalùs lo!”
37Dzûu tə̀ li tə ŋ kuuwn bvʉ enyəa, “Wən yǒ ghùw wəla ù mò tsʉā sə a aghì à foō gho a? Ù mò yo alebɔŋɔ̄ ghəəŋ tsughu sughò enyəa ghùw wə̄n ka kpuw a?” 38A m bùghò muūwn kə naām ŋgeē kɔʼɔ̄ ko Yɛso, ù n ndùw a fughu alo eshìaa. À fə̀ lo kəbûʼ ghe gūw nyə nduw alo kəgwōo mo ghe n dzʉ̀a nàŋa alo etīa. 39Ù n dzɛ̀ â ghee enyəa, “Bəŋso nùghu tsughu nlò tia zə zo.”
Màta, wàazə̀ ghùw ù kpǔuw ù zən vʉ n dzɛ̀ â Yɛso enyəa, “Gwə̄n e wə̄n zə êzəŋ e səa zuʼ kə̀ biigh ko, à ezəŋ e lo ntsuʼu n chìakò aŋghəa ù mò kpuw.”
40Yɛso n dzɛ̀ enyəa, “Ŋ̀ ka mò dzɛ̀ â ghɛ̀ enyəa abugho ghɛ̀ boō tsughu dzə a, ghɛ so koʼ daʼa kə Kəzə̀ kò à?” 41Ghe n daŋso bəŋso nùghù tsughu tia e te zo. Yɛso n nyaaŋ kɔʼ kɔʼ edzūŋ, dzɛ̀ tsùghù enyəa, “Tsele waŋā, M̀ fughû zɔ̀ɔŋ kə̀a enyəa ghù m mùghò zuw. 42Ŋ̀ kwo ziī nû enyəa ghù zǔuw tsə̀ghà nù mugho. Ŋ̀ ghəa ghən êzə̄ŋ kuuwn kə̀aa bòʼ ghì ghəla ghe ti fɛ enyəa to ghe mò boo enyəa à nùghù ghù, ghù vʉ̀a ghù tum wô mugho.” 43A m bùghò ù kə̀a mɛʼɛ̀ tsughu ghəa ghən gho, ù n dzɛ̀ sə kɔʼ an dzə̂ è tughu enyəa, “Lazalùs, nùghu sə wò!” 44Ghùw ù kpǔuw ù te n nùghù sə̀ è wo, mo ghe ŋ kwe e wə̄n àsùghò fwee zo nyeme naŋā am gbà u kəmbəghalaŋ, àsùghò kə li ko mo ghe n nyeme naŋa an sʉ u wə̄n.
Yɛso n dzɛ̀ â ghee enyəa, “Zěe nùghù tsughu nlò gbâ u kəmbəghalaŋ vʉ a zəŋò wə̄n, ghɛ̀ zəgha tsughu wə̄n ù nùghù.”
Ghe ge naŋā alewī Yɛso
45Ndə̀mà tə Tə̀dzûu təla tə fə̀ bugho alebùghò kôʼ Mèle ŋ kòʼ ghəa ghəla Yɛso ghəŋlo, ghe m boo fùghù ndùw â wə̄n. 46À li ghə ŋ kuuwn nùghù ndùw a vʉ̀a ghì a Falasîi ghò, teso dzɛ̀ ndùw fəgha kəla Yɛso fwaʼ ghè kò. 47Tuw u təfɔ̀e ghèe ghê ghì a Falasîi ghə n daŋso tɔŋɔ zùuŋ tsùghù aghî aŋ kansì, bvʉ â ghee enyəa, “À lo to a e ghəŋlo ênzə̂n? Nuū ghùw wə̄n bəla dèe ndə̀mà tə nsə̀ghàa. 48Abugho a bən zəghà tsughu ko wə̄n enyəa ù è ndûuŋ nduw ko nû, aghî a dzə̀m lo bɔɔ̄m boō fughuu ndûw ko â wə̄n. To a fi lo enyəa Gɔ̂mnɛ̀ è Lumà lo bùghò saʼà maʼà tsughu naʼ e sɛ̀ àsùghò Ndughu è Kə̀zə̀ è ne è sɛ̀.” 49Ghùw ù ghee u mɔ̀ʼ tɔɔŋ Kaefàs, wəla u fə̀ lo tuw kə fɔ̀e an nùm kə te ko ŋ kuuwn dzɛ̀ â ghee enyəa “Ghɛ̀ laʼsò nù, 50ghɛ̀ kwo yo enyəa e dzɔ̂ɔ yò â ndə̀m è aghî aleleŋe alo enə̀gha e mɔ̀ʼ à, enyəa à lǎam dzɔ̀ɔ ghùw u mɔ̀ʼ alekpūw aŋ tuūw ndə̀m è àghì.” 51Ù ka fə ghəa ghən kə̂a sə̀ wò dzə̀ aŋ ŋgəŋ è wə̄n, ù fə̀ enyə kəa sə wo tò Fɔ̀e è ne an dzə̂ e Kə̀zə̀ enyəa Yɛso ki alekpūw an tuw u aghì a dzə̀m alo enaʼ. 52Ù kǎa kpuuw ko yo an tuw u tə̀ Dzuū; vʉ e wə̄n e ki sugho alenìi zûuŋ wô wɛ a Kəzə̀ ghəla ghe sɔʼn doʼò kaŋlo aŋ kàlà tə mbī e dzə̀m alo kəbəla kə mɔ̀ʼs. 53Alekaʼa nughù tsughu an tsuʼ fə te fo, tuw u təfɔ̀e ghèe ghê ghì a Falasîi ghə̀ ŋge naŋa tsughu an ghue e ghee enyəa ghe ki alewī Yɛso.
54Bòʼ ghəa ghən, Yɛso ŋ kôom bwìin kaaŋ yo an ndɛ, ù ŋ kuuwn nùghù ndùw an bâ kə enaʼ kə lì ko ghe fə̀ tɔŋlo enyəa à lò Ɛfə̀lɛ̀m; aŋ ŋgwən, ndùw mùghù dòʼò ndùw a fughu ghèe ghê tsə̀təndə̄ghā tə wə̄n to.
55À n lo mo zə kə̀ Zəŋso naaŋ kə Tə̀dzûu kə̀ suu wò nù, ndə̀mà tə aghì tə̀ zəghàan wò kɔlɔ tə tənàʼà tə ghee bùghòo an Yɛ̀lusalɛ̀m alebùghò fəghaan naŋâ ghue e ghee aŋghəa bughōo kə enaʼ kə deē. 56Ghe ŋ kəŋo kèe kǎaŋ Yɛso fùghù êzə̀, a m bùghò ghe sô ti kaŋlo an Ndùghù è Kə̀zə̀ è nē an Yɛ̀lusalɛ̀m, chìa m bvʉ â wàazə̂ enyəa, “Ghù mòʼnlò èndughu, à lò enyəa ghùw wən lo bùghò zəa ko nù zə ko a?” 57À n lo êzə̂ mo tuw u təfɔ̀e ghèe ghê ghì a Falasî ghə̀ n tsə̀ghàsò lâŋ kò enyəa mò ghùw kòʼ ko ghɛ Yɛso, ù m bùghò dzɛ̀ fùghù è wo, ghe n ndùw è kwu.
انتخاب شده:
Dzɔ̌n 11: agq
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
