Югьан 2
2
Кана шагьриъ сумчир
1Кьюд йигълан Галилей уьлкейин Кана шагьриъ сумчир шулу. Душваъ Исайин дадара айи. 2Сумчриз Исайиз ва Дугъан ученикаризра теклиф вуйи.
3Хялари вари чяхир гъубхъиган, Исайин дадайи Дугъаз кӀуру:
– Мурарин чяхир имдар.
4– Уву гьаз кӀурава Узуз дици? – жаваб тувру дугъаз Исайи. – Йиз вахт мегьел улубкьнадар.
5– Дугъу фици гъапиш, гьаци апӀинай, – гъапи Исайин дадайи кюмекчйириз.
6Гьадушвахь жугьдари чпин диндихъди жикӀувалариз ишлетмиш апӀури шлу йирхьуб гъвандин латар хьайи, дурарикан гьарубдиъ кьюб-шубуб гаргун шид гъябгъюйи.
7– Латар штухьди ацӀай, – кӀуру Исайи кюмекчйириз. Дурарира латар даргариккнакьан штухьди ацӀру.
8– Гьамус сацӀиб шид удубзну, мярака кӀули гъабхрурихьна гъайибхай, – гъапи Исайи.
9Мярака кӀули гъабхрури чяхриз илтӀибкӀнайи штук ниъ капӀру. Дугъаз чяхир гьапӀруб-вуш аьгъдайи, хъа кюмекчйириз аьгъяйи. 10Мярака гъабхрури, жамраз дих дапӀну, кӀуру:
– Адмийири хялариз сифте ужуб чяхир гьивру, хъасин вари пиян гъашиган, чӀуруб хуру. Хъа уву ужубсиб чяхир гьамусдиз гьаз гъибтнава?
11Му Исайи Галилей уьлкейиъ айи Канайиъ улупу аьламатарикан сабпи аьламат вуйи. Гьамдиинди Дугъу Чан зурбавал улупнийи ва Дугъан ученикар Дугъахъ хъугънийи.
12Гьамдихъан Иса Кафернагьум шагьриз гъягъюру. Дугъахъди Чан дада, чвйир ва ученикарра хъайи. Дурарин душваъ сякьюдар йигъар шулу.
13Жугьдарин Пасхайин машквар багахь шулайиган, Иса Ерусалим шагьриз гъягъюру. 14Душваъ Аллагьдин хулан гьяятдиъ учӀвиган, Дугъаз малар, марччар ва луфар масу туврайидар ва пулар гьюдюхрударра рякъюру.
15Исайи, тӀурнарикан гъирмаж дапӀну, дурар вари гьадушвʼан чпин малар-марччарра хьади утӀурккуру, пул гьюдюхрударин пулар даргъуру ва устлар ккитӀикӀуру. 16Дугъу луфар масу туврайидариз гъапи:
– Мурар милин дургин апӀинай! Йиз Адашдин хал базариз миилтӀибкӀанай!
17Гьаму вари гъабхьиган, Исайин ученикарин Гирами китабарик дидикӀнайи гьамцдар гафар кӀваина гъюру: «Яв Хулахьна вуйи ккунивали Узу цӀаси ургиди».
18Мушвʼин жугьдарин гьюкумдрар гъедергуру.
– Увуз гьамцдар апӀуз ихтияр айивал фициб аьламатниинди улупидива? – гьерхру дурари.
19– Му Аллагьдиз ккарагру хал учву дабгъай, хъа Узу думу шубуд йигъан айитӀ дивурза, – дурариз жаваб вуди гъапи Исайи.
20– Му Аллагьдин хал диври инсанар ягъчӀвурна йирхьуд йисан гъилихну, хъа Уву шубуд йигъан дивдина?! – гъапи жугьдари.
21Исайи Аллагьдин хулкан улхурайиб Чан бедендикан кӀурайивал вуйи. 22Иса, дукӀну, шубудпи йигъан чӀиви гъашиган, Дугъу гьамдикан дупнайи гафар Дугъан ученикарин кӀваина гъафнийи, ва дурар Гирами китабарихъ ва Исайихъ хъугънийи.
23Иса Ерусалимдиъ Пасхайин машквраъ айи вахтна, Дугъу улупу аьламатар дяркъну, гизафдар Дугъахъ хъугънийи. 24Хъа Учв, Иса, саринна ихтибарнаъ учӀвдайи, гьаз гъапиш Дугъаз инсанар ужуди аьгъяйи.
25Исайиз адмийирин хасиятарикан шли-вуш ктитувал лазим дайи, фицики Дугъаз гьарсар касдин кӀваъ айиб аьгъяйи.
اکنون انتخاب شده:
Югьан 2: ТабГК
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2010, 2013, 2016, 2018, 2023
