Югьан 10
10
Габан ва дугъан марччар
1– Гьякьлу вуйи гьякь кӀуразачвуз: фуж марччаринишваъ урчӀариан дарди, фици-вуш жараси учӀвруш, думу тӀафал ва тӀарашчи ву. 2Хъа фуж урчӀарианди учӀврур, гьадму марччарин лижан габан ву. 3Гъаравли дугъаз урар арццру. Марччар дугъан дихнахъ хъпехъуру. Дугъу чан марччариз ччвурариинди кӀуру ва чӀатинди адауру. 4Дугъу чандар вари адаъган, думу дурарин улихьди гъягъюру, хъа марччар дугъан кьяляхъди гъюру, гьаз гъапиш дурариз дугъан дих аьгъя. 5Жарадарихъди дурар гъягъидар, дурар дугъхьан гьергди, гьаз гъапиш дурариз жарарин дих таниш дар.
6Исайи дурариз гьаму тахалус ктибтуру, хъа Дугъу чпиз фтикан гъапнуш, фарисйир гъавриъ ахъундайи.
7Исайи давам апӀуру:
– Гьякьлу вуйи гьякь кӀуразачвуз: марччариз урчӀар – Узу вуза.
8Вари Узу гъяйиз гъафидар тӀафлар ва тӀарашчйир вуйи. Саки марччар дурарихъ хъпехъундар. 9УрчӀар – Узу вуза. Фуж Узʼантина учӀвиш, дюрхну хьиди. Гьацир УрчӀаризди учӀвди ва дилинтина удучӀвиди, гьацириз чаз ипӀруб алишв бихъиди. 10Хъа тӀафал саб апӀуз гъюри шулу: гьитӀибкӀбан бадали, йибкӀбан ва пуч апӀбан бадали. Узу гъафунза гьацдариз уьмур хьади, варибдиъ – абцӀу уьмур. 11Узу гъяни Габан вуза. Дицир ужур габни марччар бадали чан уьмур тувру. 12Хъа гъирагъдилан дуфнайир – думу габан дар, дицириз марччар жарадар ву – жанавар лижахьна багахь шулайиб гъябкъюбси, марччара гатӀахьуру ва гьергрира ву. Жанаври дурар дисуру ва чӀяргъюру. 13Дицир габан дар, хъа гъирагъдилан, гьякъи тувну, хъитнайир ву; дицир марччарин гъайгъушнаъ шулдар. 14Узу ужур Габан вуза: Узуз Йиз марччар аьгъязуз ва Узура Йиз марччариз аьгъя. 15Адашдиз Узу фици аьгъяш, гьаци Узуз Адашра аьгъязуз. Узу Йиз уьмур марччарихъанди тувдиза. 16Узуз жара марччарра азуз, гьаму марччаринишвʼан дарудар. Узу гьадрара хъади дуфну ккунду, Йиз дихнахъ дурар хъпехъиди, гьадмуган саб лиж хьибди ва сар Габан хьиди! 17Узу Адашдиз гьаддиз ккундуки, Узу уьмур туврайиган, тазакӀултӀан думу гъадабгъуз. 18Йиз уьмур сарира дадабгъидар, Узу Йиз хушниинди думу тувраза. Думу тувуб Йиз ихтиярнаъ, думу, кьяляхъ гъадабгъубра Йиз ихтияриаъ айиз. Думу гьаци Узуз Йиз Адашди улупунзуз.
19Хъана гьаму гафари жугьдарин арайиъ гьюжатар ирчру. 20Дурарикан гизафдари кӀуйи:
– Думу амрихъан душна ва гьарзади улхура. Дугъахъ гьаз хъпехъурачва?
21– Му улхбар жинар кайириндар дар, – кӀури, къаршу удучӀвуйи тмундар. – Жинар кайирихьан кур вуйириз рябкъювал тувуз шулинхъа?
Исайиз жугьдар къаршу хьуб
22Кьюрд улубкьуру. Ерусалимдиъ Аллагьдин хал таза апӀбан машквар вуйи. 23Иса Аллагьдин хулан гьяятдиъ Сулейман пайгъамбрин айвандихъ лицурайи. 24Жугьдари, Дугълан илтӀикӀну, Дугъхьан гьерхру:
– Уву фукьан вахтназ ич сабур ахтармиш апӀури гъузуз ккава? Йип учуз дюзди, Уву Месигь вуна?
25– Узу учвуз гъапунзачвуз, хъа учву Узухъ хъугърадарчва. Узу Йиз Адашдин ччвурнахъан апӀурайи ляхнар – магьа Узкан шагьидвал апӀурайидар. 26Амма учву Узухъ хъугърадарчва, фицики учву Йиз марччарикан дарчва. 27Йиз марччариз Йиз дих ебхьуру ва Узуз дурар аьгъязуз, дурар Узухъди гъюру. 28Узу тувдиза дурариз гьаргандин уьмур, дурар аьсрариъра йихдар, дурар Узхьан сарира гьитӀикӀдар. 29Йиз Адаш варидартӀан зурба ву. Гьаддиз дурар Йиз Адашдихьан сарихьанра дадагъуз хьибдар, 30хъа Узуна Йиз Адаш сар вуча.
31Жугьдар хъана Исайиз йивуз гъванарихъан хъчӀихуру.
32– Йиз Адашдихьан Узу учвуз гизаф ужудар ляхнар улупунзачвуз, – гъапи Исайи. – Гьадрарикан фунубдин гьякьнаан Узуз йивуз ккунди ачвуз?
33– Учуз, Уву ужудар ляхнар гъапӀну кӀури, йивуз ккунди адарчуз, хъа Аллагьдикан рихшанд апӀурайиган. Уву вуйир адми, хъа Увкан Аллагь апӀурава.
34Исайи жаваб туву:
– Ичв Къанундиъ дибикӀнадаринхъа: «Узу гъапунза: учву аллагьар вучва?» кӀури. Хъа гьякь дибикӀна. 35Эгер Аллагьди Чан Гаф шлихьна гьапӀнаш, Дугъу дурариз аллгьар кӀура. 36«Узу Аллагьдин Бай вуза», гъапну кӀури, фици учвхьан Узуз пуз шулчвухьан: «уву рихшанд апӀурава», кӀури. Шлиз кӀурачва гьаци? Узуз? Адашди гирами дапӀну, гьаму дюнʼяйиз гьаънайириз?! 37Эгер Узу Йиз Адашди апӀурайи ляхнар апӀурадарш, гьадмуган Узухъ мухъугъанай! 38Хъа эгер Узу дурар апӀураш, учвхьан Узухъ хътругъуз шулчвухьан, саки Йиз ляхнарихъкьан хъугъай! Гьадмуган, учвуз аьгъю хьибдичвуз ва: Узуъ – Йиз Адаш, хъа Узу – Дугъаъ айибдин гъавриъ хьидичва.
39Гьадмуган дурариз Иса хъана дисуз ккун шулу, амма Думу дурарин хиларигъян гъютӀурччвуру.
40Хъасин Иса, Ярдан нирихъ Ягьʼяйи улихьди штуан апӀури гъаши йишвариз гъягъюру ва душваъ саб кьадар вахтна гъузру. 41Дугъахьна гизаф адмийир гъюйи.
«Ягьʼяйи саб аьламатра улупундайи, – кӀуйи дурари, – хъа Исайикан гъапидар вари гьякь ву». 42Ва гьадушваъ гизафдар Дугъахъ хъугънийи.
اکنون انتخاب شده:
Югьан 10: ТабГК
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2010, 2013, 2016, 2018, 2023
