Matiyu 11

Isa-a Nawi Yahaya Kasalama-a

(Luk 7.18-35)

1Isa fuwurawanju mewun yindinno wada ce kerǝnniya, nadǝa kolje bǝla bǝlaro leje jamaa alamje tayiro kawuɍi kǝji wulduwu badiyeno. 2Nawi Yahaya kosolan awo Almasiwu cǝdidǝa fangenniya, fuwurawanju laa nanjuro cunode 3tiro: «Nima wa fuwun isimadǝ wo#11.3 nima wa fuwun isimadǝ wo - Almasiwu Alaye. ra gade gureniye?» cane tia keworo. 4Isaye tayiro: «Waldǝnowo, awo fanuwwa-a ruwwa-aa Yahayaro wulgǝnowo: 5Kambuwa sim cawandi, ngurdiyiya ye sinjan lejai, am barasua ngajane tayirro waljai, muwaso ye fanjai, am sanuna roaro waljai, koro talaawa ye kawuɍi kǝjidǝa fanjai. 6Barganju kam wu nangaro taljiwawodǝ!» yeno.

7Fuwurawa Yahayayedǝ sapkadaranniya, Isa kǝla Yahayayen jamadǝro mana njǝddo badiyeno. Tiye: «Awi curo karaayen kuroro leyew? Ngǝlai laa kanji kanjiro karuwaye cakke moji cǝdi wa? 8A’a. Awi gǝle kuroro leyew? Kam kajǝmu shawa cakkǝnaa wa? A’a, am kajǝmu shawa casakkǝnadǝ mairilan kasarga. 9To, awi gǝle kuroro leyew? Nawia wa? Aaa, nayiro wulnjagakki, nawimaa kojǝna. 10Tima kam duwon kǝlanjun kitawulan adǝ ruwuwadadǝ: “Nin fuwunno kǝngayammi nodǝkke niro jawalnǝm cassai.”#Mal 3.1 11Jiremaro nayiro wulnjagakki, curo kam kamulan tambǝna sammayen wunduma Yahaya Kasalamaa kojǝna bawo. Amma curo nodo bargaa Mai Samemayen tǝngǝɍidǝ tia kojǝna. 12Jaman Yahaya Kasalamayen tamiya har kuro kudero nodo bargaa Mai Samemaye kiaddin fuwu juwui, am tiro fuwu bo dapcaanadǝ kǝnduwodǝa dunodunon mowo majai. 13Dalilnjudǝ kitawuwa nawiyaye-a Attaura Nawi Musaye-a nawinawi cadǝna ngai duwon, har Yahaya kadio. 14Manadǝa ngodu kasadduwwaa, tima Nawi Iliya fuwun isimadǝ wo. 15Kam sǝmonjuamadǝ fanjo!

16«Wundusoro am jaman adǝyedǝa rattalgǝkki? Tayi alama yalla ci kasuwuyen napkada kowo sapcane amanjaro: 17“Algaita nayiro funjagaiyena duwon, bikke randuwwi. Koro so lagaranne diyena duwon, yiruwwi,” cani gai. 18To, Yahaya ise juwunni ye, canni ye, “Ti karuwama!” yera. 19Koro Tada Kambedǝ ise juwui, cai, “Akko kǝmboma, kǝnjama, sawa akki mowomaso-a biwumaso-aye!” yera. Amma nanrashidudǝ kǝndonjulan asudi.»

Isaye am ansiya Alayea wusadu

(Luk 10.13-16)

20Daji Isa am bǝrniya curonjan awo ajabba ajabba ngǝwuso cǝdǝnadǝyea kǝla tǝmjanniyen wusadu badiyeno. Tiye: 21«Kuttundo am bǝrni Korajinne! Kuttundo am bǝrni Baitsaidaye! Ca awo ajabba ajabba nandon tǝdǝnasodǝ bǝrni Tirre-a Sidonne-alan#11.21 bǝrni Tirre-a Sidonne-a - Bǝrniya kǝrdiyaye. tǝdǝnaa, tǝn kuren amnja ajaja-a buwu-alan#11.21 ajaja-a buwu-a - Noduwuram lagaranne. napcane tuwa cadǝna. 22Amma nayiro wulnjagakki, kiyama wakkajiya, wowomndo am bǝrni Tirre-a Sidonne-ayedǝa#11.22 bǝrni Tirre-a Sidonne-a - Bǝrniya duwon amnja jauro diwi nangaro Ala tayia siyeyeno. nanjaunin koji. 23Nayi ye am bǝrni Kafarnaambe, samero wa samnjai tǝmayew? A’a, kannuro kolnjagai. Ca awo ajabba ajabba nandon tadǝnadǝ bǝrni Sodomben tadǝnaa, kua gairo dǝgai. 24Amma nayiro wulnjagakki, kiyama wakkajiya, wowomndo bǝrni Sodombedǝa#11.24 bǝrni Sodombe - Bǝrni duwon amnju jauro diwi nangaro Ala samelan tayiro kannu fijiye siyeyeno. nanjaunin koji,» yeno.

Na Isayen tustu fando

25Sa adǝn Isaye: «Bawani Kǝma same-a dunia-aye, nia njungorǝkki, dalilnjudǝ awo ania ilmuwu so, rashiduwa soro gǝraame yallaro isanogǝmma nangaro. 26Aaa, Bawa, adǝma awo jauro raammadǝ wo.

27«Bawani awo sammaa mukkoniro cakkǝna. Ti gǝnia, wunduma Tadadǝa nojǝnni. Koro wunduma Bawadǝa nojǝnni, sai Tadadǝ-a am tayiro Tadadǝ isanojiyiya cǝraana-a.

28«Arowo naniro, nayi kare kurwowu ngowada yimbaruwwa samma, tustu njadǝkki. 29Wudǝ rokuraa gǝni, karwu ngǝlaa nangaro, duini#11.29 duini - Alamdu Isaye. daundoro ngogǝnowo, kolsǝnowo alamnjakko, karwundon tustu fanduwi. 30Awoa duini ye kǝske, kareni ye kamboi,» yeno.

اکنون انتخاب شده:

Matiyu 11: kby

های‌لایت

به اشتراک گذاشتن

کپی