創世記 7
7
發大水
1上主對挪亞講：「你㧯全家愛入大船去，因為𠊎發現在這世代中，只有你在𠊎面前係正直个人。 2宗教禮儀定做淨浰个各種動物，你愛帶七公七乸；各種無淨浰个動物，愛帶一公一乸。 3飛鳥也愛帶七公七乸，俾它兜保命留種在全地； 4因為再過七日，𠊎愛落大水四十日夜，將𠊎所創造个一切生物攏總對地上除滅。」 5挪亞就照上主所吩咐个去做。
6 挪亞六百歲个時，大水氾濫在地上。 7挪亞就㧯厥𡜵娘、孻仔、心舅進入大船閃大水。 8淨浰㧯無淨浰个動物、飛鳥、㧯地上一切个爬蟲， 9攏總一對一對，有公有乸，跈挪亞入大船，係照上帝吩咐挪亞个。 10七日後，大水氾濫在地上。
11 挪亞六百歲該年，二月十七該日，深淵所有个大水源裂開來，天頂个水門也打開來， 12大雨落在地上四十日夜。 13就在該日，挪亞㧯厥𡜵娘、厥孻仔閃、含、雅弗，並三個心舅攏總進入大船。 14佢等㧯各種各類个野獸、頭牲、地上个爬蟲、並飛鳥全部進入大船。 15一切有生命、有血氣个生物，攏總一對一對跈挪亞進入大船。 16該兜入去个動物，全部有公有乸，係照上帝吩咐挪亞个。然後上主代挪亞關門。
17地上做大水四十日。水漲起來，大船在水面上浮起來。 18水在地上越漲越高，大船在水面上漂來漂去。 19地上个水越來越大，將天下一切个高山沒在水底。 20大水超過山頂七公尺，所有高山沒在水底。 21地上所有个動物，就係飛鳥、頭牲、野獸、爬蟲，並所有个人攏總死淨淨。 22所有在地上鼻孔有氣个生物攏總死掉。 23地上所有个生物，對人到頭牲、爬蟲、㧯飛鳥，攏總對地上除滅；只有留下挪亞並該兜㧯佢共下在大船肚个。 24大水沒掉大地一百五十日。
انتخاب شده:
創世記 7: THV12Hdb
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012