Éxodo 5
5
Moisés jare Aarón uyemɨngeta mburuwicha wasu ndiwe
1Joko wi Moisés jare Aarón yuraa reta mburuwicha wasu Egipto pewa jowai jare jei reta chupe: “Ore Israel iñemoñaa reta nduiko wae, oreTumpa ikoño mái wae jei ndewe kuärái: ‘Emaeño che aiparawo wae reta re oë yuraa reta waerä ɨwɨtini wasu kotɨ, joko pe uyapo reta waerä yemɨmandúa tembiu pewa cheree umbutuicha reta waerä.’ Jukuärái jei ndewe oreTumpa,” jei reta mburuwicha wasu pe.
2Erëi mburuwicha wasu jei chupe reta: “¿Kía pa ko jokua peTumpa ayapɨsaka waerä jese jare amaeño waerä oë yuraa Israel iñemoñaa reta? Aikuaa’ä jokua peTumpa, jare ndarau amaeño Israel iñemoñaa reta re oë yuraa reta waerä,” jei chupe reta.
3Jayawe Moisés jare Aarón jei ye chupe: “Ore hebreo reta nduiko wae, oreTumpa uyekuaa orewe,” jei reta chupe. “Emaeño mii oreré noë nduwata waerä kua wi mbapɨ ara rupi ɨwɨtini wasu kotɨ nduyuka numee mbaemɨmba reta oreTumpa pewarä. Echa’ä ore ndoo’ä nduyapo yawe jokua, oreTumpa uiporarakata ko orewe mbaerasɨ pe ani ñeräro pe,” jei reta mburuwicha wasu pe.
4Erëi mburuwicha wasu jei chupe reta: “¡Joko peño ma!” jei chupe reta. “Moisés jare Aarón, ¿marái ramo pembɨyemboɨ peï chepione reta iparawɨkɨ wi? ¡Opaete wae tuñatima ye iparawɨkɨ pe!” jei chupe reta. 5“Mase, Israel iñemoñaa reta uyembɨjetaete ye ma kua ɨwɨ Egipto pe, jare añawe pembɨyemboɨ peï reta iparawɨkɨ wi,” jei mburuwicha wasu Moisés jare Aarón pe.
Mburuwicha wasu umɨïruka chupe reta iparawɨkɨ
6Jayawe jokua ara etei mburuwicha wasu umbatɨka opaete upurumɨmbarawɨkɨ wae reta, jare umbatɨka wi Israel iñemoñaa iparawɨkɨ itenondewa reta. Jare oyokui reta kuärái: 7“Añawe wiwe awɨye ma pemee chepione reta pe kapii uyapo reta waerä adobe. Jae reta etei too tueru iyupe reta kapii,” jei. 8“Erëitu jekuaeño tuyapo reta adobe jeta tenonde uyapo reta rami. Pëti awe adobe awɨye tuata,” jei. “Uata oï chupe reta mbae uyapo reta waerä. Jáeramo umaeño’ä reta cheré. Jekuaeño jei ñonoï chewe, ‘Emaeño oreré nduraa mbaemɨmba reta nduyuka numee waerä oreTumpa pe,’ jei reta. 9Jáeramo pemee chupe reta jetaete iparawɨkɨrä tenonde wae wi. Jare jokua mbarawɨkɨ uyapo reta waerä, awɨye time chupe reta ara uyapɨsaka reta waerä apu reta re.” Jukuärái jei mburuwicha wasu chupe reta.
10Jayawe upurumɨmbarawɨkɨ wae reta jare Israel iñemoñaa iparawɨkɨ itenondewa reta yuraa umɨmbeu pione reta pe, jare jei chupe reta: “Mburuwicha wasu jei añawe wiwe uñemeeta’ä ma pewe kapii,” jei chupe reta. 11“Pe reta etei ma pekua peru peyupe kapii kiape pewäe chupe wae rupi. Erëi jekuaeño piyapota adobe jeta tenonde piyapo rami,” jei chupe reta.
12Jayawe pione Israel iñemoñaa reta yuraa opaete ɨwɨ Egipto rupi ueka reta waerä kapii. Erëi uepitɨ'ä chupe reta kapii. Jáeramo umbatɨ reta wi kapii itɨmakakue.
13Jare upurumɨmbarawɨkɨ wae reta jekuaeño oyokui pione reta uyapo waerä jeta adobe pëti ara pe tenonde kapii umeese chupe reta yawe rami. 14Jare uinupa reta Israel iñemoñaa iparawɨkɨ itenondewa reta, jare umbɨjeko reta jei rewe: “¡Káarumo jare kua ara wi piyapo’ä peï jeta adobe tenonde piyapose rami!” jei chupe reta.
15Jayawe Israel iñemoñaa iparawɨkɨ itenondewa reta yuraa iyengeta reta waerä mburuwicha wasu pe, jare jei reta chupe: “¿Maera pa ndiyapoka ikawi mbae wae orekotɨ?” jei reta chupe. 16“Yepe tëi umee’ä ma reta orewe kapii, erëi oreokui reta nduyapo waerä jeta adobe pëti ara pe tenonde wae rami. Jare orepuere’ä yawe, orenupa reta. Erëi ndeɨwɨ pewa reta ko onoi teko,” jei reta mburuwicha wasu pe.
17Jayawe mburuwicha wasu pochɨ rewe jei chupe reta: “Pe reta pakɨete ramo, pipota’ä peparawɨkɨ. Jokua jeko pewa ko pere peï, ‘Ya yaraa mbaemɨmba reta yayuka ñamee waerä Tumpa pe,’ pere peï. 18¡Pekua peparawɨkɨ ye! ¡Uñemeeta’ä pewe kapii, erëitu jekuaeño piyapota adobe jeta tenonde piyapo wae rami!” jei chupe reta.
19Jayawe jokua tenondewa reta uyandu yawe imeta ko jekuaeño uyapo jeta adobe pëti ara pe tenonde wae rami, ipɨatɨtɨ reta tuicha rupi.
20Jokua rambuewe, Moisés jare Aarón uäro yureko oka pe. Jayawe Israel iñemoñaa iparawɨkɨ itenondewa reta oë yuraa yawe mburuwicha wasu jëta wi, owäiti reta Moisés jare Aarón oka pe. 21Jare jae reta jei Moisés jare Aarón pe: “Tumpa tumae peré iarasɨ rewe. Echa’ä pereko pewa mburuwicha wasu jare uyeyokui chupe itenondewa reta umae ñonoï oreré pochɨ rewe. Pe reta oremɨjëwa ma chupe reta oreyuka reta waerä,” jei reta.
Moisés uyerure Tumpa pe wae
22Jayawe Moisés usɨrɨ chuwi reta jare oo uyemɨngeta waerä Tumpa ndiwe. Jare jei chupe: “CheTumpa, ¿maera pa ndiyapo ikawi mbae wae ndiparawo wae reta kotɨ? Jare ¿maera pa chembou kua pe? 23Che a amɨmbeu chupe niñee wiwe, mburuwicha wasu jeiete ma urukuasɨete reta. Jare nde ndepɨ'ä etei neï reta,” jei Moisés Tumpa pe.
انتخاب شده:
Éxodo 5: gnwPB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2017, Ethnos360 (New Tribes Mission). All rights reserved.