Éxodo 11
11
Mbaesusere taɨkuewaete rewa
1Tenonde ma jei Tumpa Moisés pe kuärái: “Pëti mbaesusere ye ambouta aï ɨwɨ Egipto pe jare mburuwicha wasu pe. Jayawe ramo mburuwicha wasu umaeñota peré peë peo waerä ɨwɨ Egipto wi. Añetete mburuwicha wasu etei pemoëta pemondo, jare upɨtata’ä pëti awe pepɨte wi joko pe,” jei. 2“Ere kuimbae jare kuña Israel iñemoñaa reta pe ueka waerä jëta iyɨpɨ rupiwa Egipto pewa reta pe mbaembae jepɨete wae oro pewa jare mbaembae korepoti tïi wae pewa.” Jukuärái ma jei Tumpa Moisés pe.
3Jare Tumpa uyapo ma ɨwɨ Egipto pewa reta uipɨu waerä Israel iñemoñaa reta wi. Jáeramo mburuwicha wasu imborɨa umbɨarakuaa wae reta jare opaete ɨwɨ Egipto pewa reta uipɨu rewe umae Moisés re.
4Jayawe, ndei Moisés oë oo mbowe mburuwicha wasu jowai wi, jae jei mburuwicha wasu pe: “OreTumpa jei oï ndewe kuärái: ‘Kua pɨare mbɨte rupi asata a aï opaete ɨwɨ Egipto rupi. 5Jare ayukata aï opaete ɨwɨ Egipto pewa reta taɨrɨpɨ. Mburuwicha wasu imbaepuere wae taɨrɨpɨ wiwe jare kuña ikuasɨete opaete wi wae imembɨrɨpɨ kuimbae retawe umanota. Opaete mbaemɨmba reta imembɨrɨpɨ kuimbae umanota wi. 6Jáeramo imeta yao mbɨatɨtɨ wasu pewa opaete ɨwɨ Egipto rupi. Jokua nunga mbɨatɨtɨ uasa mbaei ɨwɨ Egipto pe wae, jare añawe wiwe ndarau ye ma uasa. 7Erëi Israel iñemoñaa reta kotɨ mbaetɨta kiawe uyapo mbae ikawi mbae wae. Pëti yɨmbawe uñarota’ä jese reta. Jayawe ramo pikuaa kawita Tumpa oyowake’ä umae ndeɨwɨ Egipto pewa reta re kërái Israel iñemoñaa reta re umae wae rami.’ Jukuärái jei ndewe oreTumpa,” jei Moisés mburuwicha wasu pe.
8Jare Moisés jei wi chupe: “Opaete nemborɨa nembɨarakuaa wae reta yuweruta uñeñono reta ɨwɨ re uipɨu rewe cherowai. Jare chemɨñerata reta anoe araa waerä cherëtáɨwa reta kua wi. Jayawe ramo noëta ndoo,” jei Moisés mburuwicha wasu pe. Jare opa Moisés uyemɨngeta yawe, pochɨ rewe oë oo mburuwicha wasu jowai wi.
9Tenonde yawe Tumpa jei ma Moisés pe: “Mburuwicha wasu uyapɨsakata’ä oï peré. Jayawe ayapota mbaembae kɨyete pewa ɨwɨ Egipto pe,” jei chupe. 10Jayawe yepe tëi Moisés jare Aarón uyapo Tumpa imbaepuere rupi jokua mbaembae mburuwicha wasu jowai, jesewe Tumpa jekuaeño umɨtäta mburuwicha wasu ipɨa chuwi. Jáeramo umaeño’ä Israel iñemoñaa reta re oë yuraa reta waerä ɨwɨ Egipto wi.
اکنون انتخاب شده:
Éxodo 11: gnwPB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2017, Ethnos360 (New Tribes Mission). All rights reserved.