San Mateo 4
4
On diablo* okitlatlatak Jesús para ma tlajtlako
(Mr. 1.12-13; Lc. 4.1-13)
1Kemaj on Espíritu Santo okuikak Jesús kampa xalpatlajkan, para ompa on diablo* ma kitlatlata Jesús. 2Yejua xotlakuaj cuarenta tonajli niman cuarenta yeuajli, niman kemaj yejua sanoyej* oapismik. 3Kemaj on diablo* okinisiuij Jesús, niman okijlij:
—Tla melauak tejua tiiKoneu Dios, xkinnauati in temej ma nochiuakan tlaxkaltin.
4Pero Jesús okinankilij:
—On Yektlajkuilojli kijtoua: “Xsan ikan tlaxkajli uelis nemis sen tlakatl, yej no ikan nochi tlajtojli yejuan Dios kijtoua.”
5Kemaj on diablo* okuikak ipan on yejyektikaj ueyikalpan Jerusalén, niman okitlejkoltij ne kampa más tlakpak ipan on ueyitiopan, 6niman okijlij:
—Tla melauak tejua tiiKoneu Dios, xonmotlajkali ne tlatsintlan, pampa ipan on Yektlajkuilojli kijtoua:
Dios kinnauatis iángeles ma mitspaleuikan,
niman mitsketsteuaskej ika inmauan para maka timokxikokos ikan tetl.
7Jesús okinankilij:
—No kijtoua on Yektlajkuilojli: “Maka xtlatlata moTEKO Dios.”
8Kemaj on diablo* okuikak ikuapan sen tepetl yejuan sanoyej ueyi. Ompa okititij nochi on países yejuan onkaj ipan in tlaltikpaktli niman on miyek ueyilistli yejuan kipiyaj. 9Kemaj on diablo* okijlij:
—Nochi in nimitsmakas tla tejua timotlakuantelketsas niman tinechmauistilis.
10Kemaj Jesús okijlij:
—Xuiya Satanás, pampa ipan on Yektlajkuilojli kijtoua: “Xmauistili moTEKO Dios, niman san yejua xtekipano.”
11Kemaj on diablo* okitlalkauij Jesús. Niman on ángeles oualajkej itech Jesús niman okipaleuijkej.
Jesús opeu tenojnotsa ika on kuajli tlajtojli
(Mr. 1.14-15; Lc. 4.14-15)
12Ijkuak Jesús okak ika Juan tsakutikaj, oyaj para Galilea. 13Pero yejua xonokau ne Nazaret, yej ochantito ne Capernaúm. Capernaúm katka sen kalpan yejuan onkatka itenko on mar itoka Galilea niman ipan inueyitlalpan Zabulón niman Neftalí. 14Yejua in onochiu para onocumpliroj on tlen on tiotlajtojketl Isaías okijkuiloj. 15-16Yejua ijkin okijkuiloj:
On chanejkej ipan on tlajli de Zabulón, de Neftalí,
niman nisiu de on ojtli itech on mar de Galilea,
niman ne kampaka ikisayan tonaltsintli de on río Jordán,
niman on parte de Galilea kampa chantij on yejuan xhebreos*,
nemiyaj ipan tlayouajlotl.
Pero aman yejuamej kitaskej sen ueyi tlauijli.
Kampa yejuamej nemiyaj ipan tlayouajlotl, mikiskia inalma,
pero on tlauijli okinmakak tlastajlotl.
17Desde ijkuak onokuep para Galilea, Jesús opeu tenojnotsa, niman kiteijliaya:
—Xkajkauakan ika nenkichiuaj on tlen xkuajli, pampa ye uajlau on tonaltin ijkuak Dios tlamandaros nikan ken tlamandaroua iluikak.
Jesús okinnots nauimej michajsikej
(Mr. 1.16-20; Lc. 5.1-11)
18Se tonajli ijkuak Jesús nejnentiaya itenko on mar de Galilea, okintak omemej iknijtin. Se itoka katka Simón, yejuan no itoka Pedro, niman on okse Andrés. Yejuamej konchapaniayaj iminmatlau ne ipan on atl pampa michajsikej katkaj. 19Niman Jesús okinmijlij:
—Nemejuamej nenkintejtemouaj michimej. Pero aman xuajuiyan nouan niman nenkintejtemoskej tlakamej para nenkinuikaskej itech Dios.
20Yejuamej nimantsin okajkej iminmatlau niman iuan oyajkej.
21Achi más tlayakapan Jesús okintak okse omemej iknijtin intoka katka Santiago niman Juan. Yejuamej ikoneuan katkaj Zebedeo. Yejuamej kitlamanilijtikatkaj iminmatlau ipan se barco iuan intataj. Jesús okinnots, 22niman yejuamej nimantsin okajkej on iminbarco niman intataj, niman iuan oyajkej Jesús.
Jesús otemachtij niman otepajtij nochiuiyan ne Galilea
(Lc. 6.17-19)
23Jesús nochiuiyan panotiaya on región de Galilea, niman temachtijtiaya ipan on sinagogas*. Yejua kiteijlijtiaya on kuajli tlajtojli ika Dios saniman peuas tlamandaros. Yejua no kipajtijtiaya nochi tlajtlamach* kualolistli niman kokolistli* yejuan on tlakamej kipiyayaj. 24Omachiyato on tlinon kichiuaya Jesús imanian on región de Siria. Yejua ika okinuajuikilijkej nochimej on yejuan kijyouiyayaj nochi sesentlamantik kualolistin niman kokolistin, niman on yejuan kipiyayaj on xkuajkualtin espíritus, niman on yejuan sotlauiyaj niman on yejuan sepouiyaj. Niman Jesús okimpajtij. 25Niman kemaj oyaj iuan miyek tlakatl yejuan ualeuaya ipan on regiones de Galilea, niman Decápolis. Niman no oyaj iuan miyek tlakatl yejuan ualeuaya ipan on ueyikalpan Jerusalén niman on yejuan ueleuaya iregión Judea niman on yejuan chantiyaj kampaka ikisayan tonaltsintli de on río Jordán.
اکنون انتخاب شده:
San Mateo 4: nguNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1987, 2012 Wycliffe Bible Translators, Inc. All rights reserved.
