Susumo 18
18
1Tuhak, Abraham á sè e sangal bagat na cɔ́gɔt ouk yê Mamrɛ, á sè sangal e rwi buk. Jeng o yá sè tê-gwi, ko Dagwi Darwey a dura to mɛ na yɛ.
2Abraham a ye ganga, ko a di bemat betat e tumal. Sede a di ɛn, a yi na tele, a wɔ̀ sey ɛn. A gaba e cât bol mɛn, 3a ye, “À dagwɔ, ra a me pyɛ de ya jam, hwo kwon kwey nà ye rɛng e lɔ hom wɛt. Ma sé mwo! 4Tik na be nɔt in nshi, na yin kus mɛ̀ bol min, ko yin ka pɔnglɔ e necam tîn cɔgɔt hemo. 5Me kwong mê kyè wɔ̀ vey na kepyɛ re, na yin ye mɛ̀ shɛ̀k. Sede remo de yin a pe ye rɛng na mwat min, ko yin de re nuyel na kwɛngɛl min.”
Ko yɛn a ye, “Ey yàa, ra tyɛng na pyɛ de hwà ha.”
6Abraham a kyè dey-dey vɔk e buk na Sara, a yang ɛ, “Jut gwopey nemuk ne myeenen ziri, bɔrɔk nɛ, na hwo yongta mɛ̀ bworô kpam-tuk rwat o!” 7E bama mo, a tele vɔk e kwara mɛ, a vo bwot mus rwat o, a tɛ̀ mwât fwom mɛ, a yong a yɛ wɛ e ji jeng. 8E yɛnɛ mo, a jut nevasal, na nevasâl gàt de na sé pɔgɔdɔk, tanga namâ mus o, a wɔ̀ nɔng ɛn e hwomo e necam cɔgɔt o. Yɛn ba re, Abraham a sè gyeng e hwomo na yɛn, yɛn a sè re pyɛ́ mo.
9Yɛn a yâng Abraham, “Hwā mō Sara a sé e gwa arɛt?”
A ye, “A sé e ji buk.”
10Kwɛnɛt o hwak a ye, “Mê to me vey tyɛng jeng yemo nak, ko hwā mō Sara e kana vɔk hwey.”
Sara a sé e rwi buk e bama mɛ, e weres betong. 11E jeng o Abraham na Sara ba ga kwopos, ba ga kana pɔl ba, Sara a to bɛɛ berang wɛt. 12Ko Sara a shɛgɛsh e ji yey mɛ, a bare, “Kée-oo! E bama de jeng tɔ ya ga kwéy a me, ko dalɔ hom a ga kwop, mê to wok netâ ra pyɛ mo arɛt?”
13Dagwi Darwey a yâng Abraham, “Yaga sɛ́ de Sara a shɛgɛsh ɛ? Ko a ye, ko sɛ̌ e tɔ̀ hwey e bama de a ga kana kwop a? 14Pyɛ cak ya sé de ya dal gâp Dagwi Darwey arɛt? Di a remo, ma rɔda to me ba toyo tyɛng jeng yemo nak, ko Sara e kana vɔk hwey.” 15Ko Sara a tono, a ye, “Ma shɛgɛsh wɛt.” A ha ano, yaga a wok bengyip.
Ko mwat o a ye, “Ey, hwà shɛgɛsh.”
Abraham a ra won yaga Sɔdɔm
16Ko Abraham a wɔ̀ tɛ̀ ɛn e gwong, yɛn a kyè wɔ̀ wul kwɔn de bê tɔk di repomô Sɔdɔm. 17Ko Dagwi Darwey a bare, “Ma rɔda lɛrɛ a Abraham na pyɛ de me kyè wɔ̀ ra arɛt? 18Yerê Abraham yê tɛ́ ɛ yerê bemât jey ryey o. Yê vɔk reto, ko mwa yére bemasi e jey yê ra won, na me tɛ̀ nerat e ra yɛ̄, sede remo de ma tɛ̀ nerat e ra yɛ̀. 19Ma ga kasa hɛ, na a bin basa a nèy mɛ tanga yere mɛ, bè gyeng begwong hom, na be ra pyɛ́ de ya jam, ko ya to sé cik. Ka sede yɛn a ra ano, mê tɔk sila a Abraham ha de ma kana ha a yɛ.”
20Ko Dagwi Darwey a ye, “Sekun e ra Sɔdɔm tanga Gɔmɔra sa kat, banɛn mɛn kwong ba sé baves ding-ding! 21Mê gyirik vɔk e hwomo, na me di a bayis hom, kɛ yɛn a ra ano mo, tyɛng sede kun de ha vey tá na me, kɛ wey arɛt?”
22E bama mo, bemat beba e ji mo ba vo gwông Sɔdɔm, ko Dagwi Darwey a rɔ̀ngɔl na Abraham. 23Ko Abraham a gwɛ̌ wɔ bagat, a ye, “Ko sɛ̌ hwô wey na mwat de a sé cik tanga mwat vwes arɛt? 24Ka sede e bemat kuru batungun e ji repomo mo de ba sé cik, hwô wey na mwa repomo mo a? Hwô tik repomo mo yaga vane kuru batungun de ba sé cik wɛt a? 25Hwô tɔk ra pyɛ sede yane ko tyɔng wɛt, hwo kwon wuna mwat de a sé cik na womo de a sé cik wɛt! Kée wey, pyɛ yemo yê yi na hwo wɛt! Hwo de hwà sé wo ra a mwa jey shɔt, hwô ra pyɛ de ya sé cik wɛt a?”
26Ko Dagwi Darwey a toyo a yɛ, “Ka ma sɛ̀ bemat kuru batungun de ba sé cik e Sɔdɔm, ko mê hàla a bemât repomo mo mwa yaga kuru batungun vane mo.”
27Abraham a to ye, “Di, ma ga hwɔtɔ a to hom ha na hwo, à Darwey, me de ma vey pyɛ cak wɛt: 28Ka gyeng betungun ba sé vit e ji kuru batungun de ba sé cik o, hwô wey na mwa pomo mo, yaga betungun de ba sé vit o arɛt?”
Ko Dagwi a ye, “Ma rɔda wey na pomo mo wɛt, ka sede ma sɛ̀ bemat kuru banaas na vɛ betungun e hwomo.”
29Abraham a to ye, “Ka gyeng ba sɛ̀ kuru banaas e kwɔn o ɛ?” Dagwi a toyo a yɛ, a ye, “Yaga kuru banaas o ma rɔda ra wɛt.”
30Abraham a ye, “À Darwey, hwo tɛ̀ shom wɛt, mê to hanat, ka gyeng ba sɛ̀ kuru batat e hwomo ɛ?”
Dagwi a ye, “Ma rɔda ra wɛt, sede ba sɛ̀ bemat kuru batat e hwomo.”
31Ko Abraham a ye, “Di, ma ga hwɔtɔ a to hom ha na hwo, à Darwey: ka gyeng ba sɛ̀ kuru baba e hwomo ɛ?”
Dagwi a hanat, a ye, “Yaga vane kuru baba ma rɔda wey na pomo mo wɛt”.
32Ko Abraham a ye, “À Darwey, hwo tɛ̀ shom wɛt, mê to hanat zang hining hemo zɔng. Ka gyeng ba sɛ̀ bemat kuru zɔng e hwomo ɛ?”
Dagwi a ye, “Yaga kuru vane ma rɔda wey na pomo mo wɛt.” 33E bama de a ga yɛnɛ ha na Abraham, Dagwi Darwey a kyè. Abraham arɔng a toyo vɔk e lɔ.
اکنون انتخاب شده:
Susumo 18: bomBI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust