Luka 17
17
Yoothega ni oleveleliwa
1Yesu ahawiirelaga anamasuuza aaye: <<Kadhinaandeya wi dhooholosa dhihidhe, mbwenye oddilu wa muthu oyene onadhana. 2Yaali yoofwaneelela amageleliwe mukohi nibwe nuulubale na nsilo, avokedhiwe munyaza, ohiya omuthegiha mmohi mwa ahima ala.
3<<Pole-pole. Akala ddibilo ohuthega, omusumulule, atthwaruwe omulevelele. 4Oothegela dila tanu nabiili vanlaboni, dila tanu nabiili adha wa we, eeraga: <Gihitthwaruwa>, omulevelele>>.
5Vano arumiwi yahimwiirelaga Nabwiya: <<Muneenjedhedhe nroromelo neehu!>>
6Nabwiya ahawaakulaga, wiira: <<Mwakalana nroromelo wona bewu ya mukwani muneerege wiirela muthanko wa amora ola: <Wiiddule weedhale munyaza>, vano oneerege wuwiiwelelani.
7<<Baani wa nyoovo onakanna mwiimeleli aaye alabaga omudda, naari aang'anelaga mabila, vooweruwa omudda amwiirela: <Odhe mowaaguva okaraati, oje?> 8Kuneere nda, onomwaaddela wi: <Osasanyedhe yooja, oware guwo dhimohi, ogiimelele va. Miyo gamala oja ni ong'wa, we fineeriiwe oje, ong'we>. 9Munoobuwelela wi oneere omutamaalela mwiimeleli ola mwaha wowiirana dharumiwiiye? 10Ndala teto nyo mweerana dhaaddeliwiinyu, mwiire: <Nili amwiimeleli eebeweene mwaha wi nihiirana dhafwaneeliihu wiira> >>.
Oyilihiwa wa aliba maredda kumi
11Yesu adhowaga oZheruzalemi ahivira mmigaanoni mwa Samariya ni Galileya. 12Avolowagawene mmudhini athu kumi a maredda#17.12 Maredda mu ewogelo ya eGerego kinaagana mareddave mbwenye teto dhiredda dhoohiyana-hiyana dha nikupa na muthu. yahimuharelaga, wiimela wuddeeddewene. 13Egeemelile wuddeedde wewule yookuwaga, yiiraga: <<Yesu, namasuuziha, muneeddiwele thagaraga!>>
14Yesu agawoonile, ahiiraga: <<Mudhowe mweyoonihe wa anamakutha>>. Dhahipadduwa edhowaga mundila yahiyilihiwaga.
15Mmohi wa ale kumi agoonile wi gihiyilihiwa, ahiwelelaga mundduli amutamaalaga Mulugu ni ndhu nootaama. 16Agafiyile vaaligi Yesu, ahikokoraga oworomihedha kove vati va manyalo a Yesu, atamaalelaga. Ola aali muSamariya.
17Vano Yesu ahimukohaga, wiira: <<Kamwaali kumi mweelihiwe? Ki atanu ni annayi eli waani? 18Kalivo mmohi owelile wi amuthithimihe Mulugu, ahili mwanaweendda ola?>> 19Omwiirela: <<Kawege nroromelo naawo nuhuuyiliha>>.#17.19 Nuhuuyiliha Naari wi: nuhuuvulumusa.
Odha wa Omwene wa Mulugu
20Dhahipadduwa ayi, aFarizi yahimukohaga Yesu wi Omwene wa Mulugu onadha alini? Yesu ahawaakulaga, wiira: <<Omwene wa Mulugu kunadha ni mukalelo wowooneya ni meento, 21athu kidha ewogaga, yiira: <Oli veva>, naari <Ole oli vale>, vowi Omwene wa Mulugu oli muwari mwa nyo>>.
22Yesu ahawaaddelaga anamasuuza aaye, wiira: <<Onofiya mudhidhi onafunigiinyu woona nlabo nimohi na Mwaana a Muthu mwa malabo alene, kamudha moona. 23Athu enodha yuwaaddelegeni wi: <Oli va!> naari <Oli wule!> Kamuyewo, naari kamwaahare. 24Vowi nlabo nnadha Mwaana a Muthu kanidha naanganyedheya onaakale wona ozherima, onadheela odhulu omoneyelaga dhipaddi dhaatedhene. 25Mbwenye enofuneya wi vowambeela oliye arabulihiwe mwa dhego dhijinji, akooddiwe ni mulogo ola.
26<<Dhapadduwile malabo a Nowe teto sinaapadduwe malabo a Mwaana a Muthu. 27Athu yooja, yoong'wa, yootela ni oteliwa, ofiyedha nlabo navolowile Nowe mmwanddeyani, odha mutokora waatolosa aatene.
28<<Dhimohive dhedhi dhahipadduwa malabo a Lothi. Yooja, yoong'wa yoogula, yooguliha, yoodhala, yoomaga nyuba dhijinji. 29Mbwenye Lothi nlabo navenyigiiye oSoddoma, odhulu wahirubwaga munddo ni mabwe oohidda, waatolosa aatene.
30<<Dhinadha dhiireye ndala nlabo noodha wiyooneyiha Mwaana a Muthu. 31Nlabo nddo onaakale vadhulu va nyuba onadhe akite wi akumihemo dhookalana dhaaye dhili mba. Emodha-modhave onaakale omudda ahiwelele mundduli wi athukule dhego. 32Muubuwelele dha mwadha Lothi! 33Ole onafuna wiing'anela egumi yaaye onoyelela, vano ole onayelele onovulumusa. 34Ginowuwaaddelani wi: Mahiyu ayene abiili enodha ekale vakamani; onodha athukuliwevo mmohi, ahiyiwevo mmohiwa. 35Ahiyana abiili enoodha esilege vamohi, athukuliwevo mmohi, ahiyiwevo mmohiwa>>.#17.35 Enofwanyeya verisikulu 36 eneera: <<Athu abiili enodha ekale omudda; athukuliwevo mmohi, vano mmohiwa ahiyiwe>> elebiwe mu dhoolebiwa ni madada dhing'onog'ono baahi. Mwa ela anamasuuza ajinji enoobuwela wi madhu ala kiyalebiwe ni Luka. Moone Matewuzhi 24.40.
37Vano anamasuuza aaye yahimukohaga, wiira: <<Dhineereye waani dhedhi, Nabwiyani?>>
Yesu ahaakulaga, wiira: <<Vevo vinaakale muruthu, fivevo teto vinatugumane mibidha>>.#17.37 Madhu ala enatapulela wi odha wa Mwaana a Muthu kudha orabuleleya. Athu aatene enoodha enone, a vakuukuvi ni awoolapela enoodha etugumanege odha ogumana ni oliye. Moone Matewuzhi 24.28; Ovuhulela 19.17, 21.
انتخاب شده:
Luka 17: tke
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2015, Wycliffe Bible Translators, Inc. All rights reserved.
