Mateo 4

Is Kebpenulaya ki Jesus

(Mateo 4:1-11; Marcos 1:12,13; Lucas 4:1-13)

1Ne zutun mid-ag̵ak si Jesus te Wag̵as he Mulin-ulin pehendiyà te tanà he wazà duen ed-ubpà he etew wey sikandin meg̵ezami ni Setanas. 2Ne hein kepatan en he andew ne wazà si Jesus mekekaan ne utew sikandin nevitil. 3Ne zutun mid-uvayan ni Setanas si Jesus ne mibpenuley zin he egkag̵i te, “Emun tutuu iyan he Anak ka te Megbevayà pengelinteuwi nu he mevaluy he egkeenen heini is menge vatu.” 4Ne midtavak si Jesus te, “Duen insurat he Lalag te Megbevayà he edhenduen te, ‘Kenà iyan dà igkeuyag te menusiyà is egkeenen, kekenà, elin daan egkinehenglanen din is minsan hengkey he lalag he egkeg̵iyen te Megbevayà.’ ”

5Ne zutun mid-uwit si Jesus ni Setanas diyà te inged he Hiruselim ne miduma zin diyà te utew metikang he limbuvungan te simbahan he egngezanan te Valey te Megbevayà. 6Ne migkeg̵iyan din te, “Emun tutuu iyan he Anak ka te Megbevayà, umpak ka su zuen insurat he Lalag te Megbevayà he edhenduen te,

‘Ebpetevangan ka te Megbevayà te menge velinsug̵uen din

ne edtemukan ke zan su wey kenà egkerudruzan is minsan paa nu te vatu.’ ”

7Ne midtavak si Jesus te, “Duen daan insurat he Lalag te Megbevayà he edhenduen te, ‘Kenè kew mebaal te paag̵i he igezam niw te g̵ehem te Nengazen he iyan Megbevayè niw.’ ”

8Ne zutun mid-uwit en maan si Jesus ni Setanas diyà te metmetikang he vuntud ne impeehè din ki Jesus is langun he menge g̵inhedian dini te kelibutan wey ke sengemenu is kezekelà wey ketig̵eyunan te kada sevaha zutun. 9Ne migkeg̵iyan ni Setanas te, “Is langun he egkeehè nu, kenikew en, su ibeg̵ey ku kenikew emun edluhuzan a wey ed-ezapen a kenikew.” 10Ne mibensag̵an ni Jesus te, “Setanas, ewai a kenikew! Duen insurat he Lalag te Megbevayà he edhenduen te, ‘Iyan niw zà ezapa is Nengazen he Megbevayè niw. Ne is duma pa he ngazan he megbevayà, kenè niw tumana is sug̵ù din.’ ”

11Ne zutun mid-awà si Setanas ne nekeuma is menge velinsug̵uen te Megbevayà ne imbeg̵ey zan ki Jesus is egkinehenglanen din.

Is Kebpuunà ni Jesus te Kebpenurù

(Mateo 4:12-17; Marcos 1:14,15; Lucas 4:14,15)

12Ne hein netuenan ni Jesus he nepirisu si Juan Megbebewtismu, mid-ulì diyà te prubinsya he Geliliya. 13Nekeuma sikandin diyà te Neserit ne zutun diyà med-ulì te inged he Kepirnaum he ziyà te veyvey te ranew he Geliliya, he sakup te tanà he Sebulun wey Neptali. 14Neulaula zin heini su egketuman kes netagnà dengan ni Esaias he ke sikandin te,

15“Is TigSebulun wey is tigNeptali he kenà menge Hudiyu

he ziyà mekeubpà te uvey te ranew

ziyà te zapit te edsenlepan te Wahig he Hurdan,

sakup te tanà he Geliliya he ed-ubpaan te kenà menge Hudiyu.

16Is langun kayi he menge etew,

henduen be te ziyà mekeubpà te merusirem

wey henduen be te ziyè dan en te Iveyaan

su g̵eine te nekesuwey zan te Megbevayà.

Iyan, diyà te huziyan he timpu

egketeyawan en sikandan

su ebpekeuma ziyà te kandan

is ebpeketayew te isip dan.”

17Ne puun dutun midweliyan ni Jesus is menge etew. Ke sikandin te, “Iniyug̵i niw is memezaat he ulaula niw, su meg̵aan en edhadì keniyu is Megbevayà he ziyà te langit.”

Is Kedtewag̵a Zuen te Heepat he Menlelaya

(Mateo 4:18-22; Marcos 1:16-20; Lucas 5:1-11)

18Sevaha he andew te edhipanew si Jesus diyà te veyvey te ranew he Geliliya, neehè din is dezuwa he maama, si Simon (kes mid-umanan din ngezani ki Pedro) wey is hazi ni Simon he si Andres. Ebpenlaya sikandan diyà te ranew su menlelaya sikandan. 19Ne migkeg̵iyan sikandan ni Jesus te, “Menunug̵es kew ves te pait? Duma kew kedì ne etew mulà is egkekuwa niw wey zan mekesundan kedì.” 20Ne zutundutun mid-engked dan is ebpenlaya ne miduma zan kandin.

21Ne midlaus dan dutun ne neuma ni Jesus is selakew pa he zezuwa he telehazi zaan, si Santiago wey si Juan, he menge anak ni Sibidiyu. Diyà sikandan te avang duma te amey zan su ebpurungan dan is menge laya zan. Mid-umew sikandan ni Jesus ne 22zutundutun mid-ewaan dan is amey zan dutun te avang ne miduma zan ki Jesus.

Is Kebewii Zuen te Mahabet he Egkengezeruwan

(Mateo 4:23-25; Lucas 6:17-19)

23Ne neeneb ni Jesus is tivuuk he prubinsya he Geliliya te ebpenurù te menge etew ziyà te menge simbahan dan. Impesavut din te menge etew is Meupiya he Tudtulanen te keag̵i te kedhadì te Megbevayà ne nengeulian din is egkengesekitan te migkelingulingu he varang te zaru. 24Ne nevantug si Jesus diyà te tivuuk he nasyun he Sirya. Ne tenged kayi mibpen-uwit dan diyà te kandin is langun he egkengezeruwan wey is egkengesekitan te ebarangbarang en he egezamen, iring te menge edlelungen te mezaat he mulin-ulin, menge ebevuyen, wey menge etew he minatey is divaluy he lawa, ne nengeulian ni Jesus heini is langun. 25Ne tenged dutun mezakel utew he menge etew is ebpemenduma kandin. Duen dutun menge tigGeliliya, duen menge etew he ebpuun te prubinsya he Dikepulis, duen tigHiruselim, tigHudiya, wey menge etew he ziyà ebpemuun te tanà he ziyà te zapit te edsilaan te wahig he Hurdan.

اکنون انتخاب شده:

Mateo 4: mbbNT

های‌لایت

به اشتراک گذاشتن

کپی