Mateo 8
8
Neulian ni Hisus ke Senge Etew ne Kevuwaen ne muna pà te It-it
(Marcos 1:40-45; Lucas 5:12-16)
1Guna su midtupang si Hisus ketà te buvungan ne mibpenuruan din te menge etew, ne medmerakel se miduma kandin. 2Ne ruen etew ne egkevuwaen ne muna pà te it-it ne mid-uvey ki Hisus. Ne midlumpeng en sikandin diyà te sineruwan ni Hisus se ebpemuyù te, “Mama, embiya perem egkiyug ke rà ne egkeulian nu ini se meredsik ne sakit ku.”
3Ne midampen ni Hisus sikandin se egkahi te, “Uya, egkiyug a,” ke sikandin. “Meulii ka!” Arà dà ne neawà en ke sakit dut te meama su neulian en. 4Ne migkahi si Hisus kandin te, “Kenà nu ve imbe kegkehiya ini te misan endei en, ugaid ne riyà ka tilandeng te terebpelengesa ne ibpekita nu kandin te neulian ke en. Ne ivehey nu te Eleteala ke ibpelengesa ne insuhù dengan ni Moises su apey metueni te langun te neulian ka.”
Neulian ni Hisus ke Edsugsuhuen dut te Senge Etew ne Kepitan
(Lucas 7:1-10)
5Guna su nekeuma si Hisus diyà te inged ne Kapirnawum, ne ruen kepitan ne kenà Hudiyanen ne egkamal te menge sundaru ne mid-uvey kandin se ebpemuyù te tavang din. 6“Mama,” ke sikandin, “duen edsugsuhuen ku ne ederaru riyà te valey ku su minatey ke divaluy ne lawa rin ne merasey nevenar se egeramen din.”
7Ne migkahi si Hisus te, “Ebpendiyan a su apey ku meulii sikandin.”
8“Mama,” ke se kepitan, “misan kenà ke en edlaus diyà te valey ku, su kenà a dait ne ebpemeneyikan nu. Su dekelà se gehem nu ne misan igkahi nu te, ‘Meulii sikandin,’ ne egkeulian ini se edsugsuhuen ku. 9Nesebutan ku ini su siaken ne ruen mepurù ku ne meperumaruma a kandin. Ne ruen menge sundaru ne egkemalan ku ne meperumaruma ran kediey. Su egkahi e rà te, ‘Diyà kew,’ ne iring dan te ebelesiken. Ne engketà ded ke egkahi a te, ‘Kayi kew,’ ne seperek mata ne kayi ran en. Ne embiya edsuhuen ku ini se edsugsuhuen ku te, ‘Ul-ulaa nu ini,’ ne arà en iya rema se ed-ul-ulaan din. Iring de be kayi,” ke se kepitan, “misan edlelehan nu rà ne egkeulian ini se edsugsuhuen ku.”
10Nerineg ni Hisus ini ne neinuinu nevenar sikandin ne migkehiyan din ke menge etew ne miduma kandin te, “Sevenarbenar ne igkahi ku keniyu te warà e pà mekeuma te etew ne iring kayi kerekelà se sarig din kediey misan kayi te langun ne kevuwaran ni Israyil. 11Ini ve se idtarem ku keniyu ne merakel se menge etew ne egenat te edsilaan taman te edsenlepan ne ebpekeuma su ebpekepinuu te egkaan duma en ni Abraham wey ke anak din ne si Isaac wey ke apù din ne si Jacob diyà te menge etew ne Edetuan te Eleteala. 12Ugaid ne merakel ne menge kevuwaran ni Israyil ne mibpenehenaan perem te Eleteala dut te Edetuan din ne ibpependiyà te merusirem, ne ketà ne ebpekependerawit wey ebpekengingitel.”
13Ne migkahi si Hisus dut te kepitan te, “Ulì ke en. Su ke sarig nu kedì ne netuman en.” Ne ketà dà dema ne ke edsugsuhuen din diyà te valey ne neulian en.
Neulian ni Hisus ke Mibpenderaru ne Etew
(Marcos 1:29-34; Lucas 4:38-41)
14Ne mibpendiyà si Hisus te baley ni Pedro ne ketà ne nekita rin ke enuhang ni Pedro ne meritan ne ed-id-irehà su edetengen. 15Ne midampen ni Hisus ke velad din ne neawà en ke rateng din, ne mid-enew sikandin ne mid-ilutù en te ibpekaan kandan.
16Guna su midsanlep en ke andew ne ruen merakel ne menge etew ne midsuukan te vusew ne mibpeneheewit dan kayi te ki Hisus. Ne mibpenegseg ni Hisus ke menge vusew te impepevayà dà te lalag din, ne nengeulian din langun ne ebpenderaru. 17Mid-ulaula rin ini su apey metuman ke impesurat ki Isayas ne ebpelambas te Lalag te Eleteala rengan se egkahi te,
“Sikandin en iya ke nekeulì te daru tew,
ne nekeawà te menge sakit tew.”
Ke Menge Etew ne Egkiyug Perem ne Eduma ki Hisus
(Lucas 9:57-62)
18Guna su nekita ni Hisus ke medmerakel ne menge etew ne edlingut kandin ne migkehiyan din ke edumdumaan din te, “Kuwa kiyu en su ed-apet kiyu riyà te ripag te ranew.” 19Ketà ne ruen senge etew ne mibpenurù te penduan ni Moises ne mid-uvey kandin ne migkahi te, “Meyterù, eduma a kenikew misan ebpependei ka.”
20Ne migkahi si Hisus kandin te, “Ke menge laku ne ruen takub ne ed-ul-ulian dan, ke menge pepenuk ne ruen kandan ne salag, ugaid ne ke Impeanak te Menusiyà ne misan endei en memekeirehà su warà ubpaan din.”
21Ne ruen dema senge etew ne edumdumaan ni Hisus ne migkahi te, “Mama, ed-ulì e pà ne embiya egkepupusan en te ebpeneytayen ke amey ku ne arà pà ne eduma a kenikew, su siaken ded se edleveng kandin.”
22“Kenà,” ke si Hisus, “su duma ka kedì. Ne iyan nu pelevenga rut te minatey ke menge ruma nu ne kenà ebperetiyaya kediey.”
Impeengked ni Hisus ke Keramag Diyà te Ranew
(Marcos 4:35-41; Lucas 8:22-25)
23Ketà maa ne mid-untud si Hisus te avang ne miduma ke menge edumdumaan din. 24Ne midtekewtekew se mevaher ne keramag ne nekesuhat ketà te ranew ne nelikuvungan en te baleg ini se avang dan. Ugaid ne nekelipereng si Hisus. 25Ne mid-uvey ran si Hisus ne mibpukew ran en se egkahi te, “Tevangi key, Kerenan, su egkekahem ini se avang ne egkeherà ki en!”
26Ne migkahi si Hisus te, “Meambe ke nengeandek-andek kew? Kurang kew te sarig kedi!” Ne mid-enew en ne pineengked din en ke keramag wey menge baleg, ne midlengen en ke ranew.
27Ne neinuinu ke menge edumdumaan din se egkahi te, “Engkey ini ne etew? Su misan ke keramag wey menge baleg ne ebperumaruma rut te lalag din!”
Neulian ni Hisus ke Deruwa ne Etew ne Midsuukan te Menge Vusew
(Marcos 5:1-20; Lucas 8:26-39)
28Nekerunggù en ensi Hisus diyà te ripag te ranew riyà te sakup te inged te Gadara, ne ketà ne ruen midsinuhung kandin ne deruwa ne etew ne riyà ebpuun te menge surung ne penlelevengan. Midsuukan te vusew ini se deruwa ne etew ne laus ne ebpekekaid ne igkeandek en sikandan te menge etew ne warà en edtikà ne ebpevayà ketà te ralan. 29Ne migkuleyì dan te, “Sikuna ke Anak te Eleteala, ne engkey ma se kememeniyà nu kediey? Maa mibpengkayi ka su ebpemekeiran key nu misan kenà pà ini ke timpu?”
30Ruen ketà te uvey ran medmerakel ne bavuy ne ebpememenumal. 31Ne mibpemuyù ke menge vusew ki Hisus te, “Embiya edsegsehen key nikuna ne ketà key nu ipeawuk te menge bavuy.”
32Migkahi si Hisus kandan te, “Kuwa kew en!” Ketà dà ne mid-ewaan dan en ke meama ne mibpengasuk dan en dut te menge bavuy, ne mibpemelelahuy en ke menge bavuy se ed-umpak diyà te dempilas ne nengelened dan en diyà te ranew. 33Nekita ini rut te menge etew ne edtuganur ketà te menge bavuy ne mibpemelelahuy ran en diyà te inged su impemenudtul dan ini wey ke ned-ulaula rut te menge etew ne midsuukan te vusew. 34Guna su netuenan dut te menge etew ketà te inged ne midsamasama ran mibayà ki Hisus. Guna su nekeuma ran ne mibpemuyù dan kandin te menu ke med-awà sikandin ketà te inged dan.
اکنون انتخاب شده:
Mateo 8: mbi
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1989, Wycliffe Bible Translators, Inc. All rights reserved.
