حوارئلر 4
4
پطروس و یوحنّانین توتولماسی
1پطروس و یوحنّا خالقا دانیشان واخت، کاهئنلر، معبدئن موحافئظلرئنئن ریئسی و صادوقئلر اونلارین اوستونه گلدئلر. 2اونلار چوخ ائنجئمئشدئلر، چونکی پطروس و یوحنّا خالقا تعلئم ورئب، عئسانین واسئطه‌سی‌ائله اؤلولرئن دئرئله‌جه‌یئنی اعلان ادئردئلر. 3اونلاری یاخالادیلار و صاباحی گونه قدر زئندانا سالدیلار؛ چونکی آرتیق آخشام اولموشدو. 4آمّا کلامی اِشئدنلرئن بئر چوخو ائمان گتئردئلر؛ و ائمان گتئرن کئشئلرئن ساییسی تقرئبن بش مئنه چاتدی.
5او گونون صاباحی، خالقین ریئسلری، آغساقّاللاری و دئن عالئملری اورشلئمده بئر یره ییغیلدیلار؛ 6باش کاهئن حنّا، قیافا، یحیا، ائسکندر و باش کاهئنلئک نسلئندن اولانلارین هامیسی اورادا ائدئلر. 7و اونلاری اورتادا دوردوروب تفتئش ادئردئلر کی، «سئز هانسی قووّت و یا هانسی آدلا بونو ادئبسئنئز؟»
8او زامان پطروس موقدّس روحلا دولوب اونلارا ددی: «ای خالقین ریئسلری و آغساقّاللاری! 9اگر بئز بو گون ناخوش آداما ادئلن یاخشیلیق و نجه شفا تاپدیغی باره‌ده ائستئنطاق اولونوروق، 10قوی سئزئن هامینیزا و بوتون ائسرایئل خالقینا معلوم اولسون کی، ناصئره‌لی عئسا مسئحئن آدی ائله بو آدام صاغ-سالامات قاباغینیزدا دوروب. او کی، سئز اونو چارمیخا چکدئنئز، آمّا تاری اونو اؤلولردن دئرئلتدی. 11عئسا او داشدیر کی، سئز بنّالار اونو ردّ اتدئنئز، لاکئن او، اِله کونجون باش داشی اولدو.#4:11 مزمور ۱۱۸:۲۲ 12و اؤزگه هچ کئمده نئجات یوخدور؛ چونکی گؤیون آلتیندا ائنسانلارا ورئلمئش آیری بئر آد یوخدور کی، اونونلا نئجات تاپا بئلک.»
13اونلار پطروس و یوحنّانین جسارتئنی گؤردولر و اونلارین بِساواد و عاوام آداملار اولدوقلارینی بئلئب، تعجّوب اتدئلر و تانیدیلار کی، اونلار دا عئسا ائله ائدئلر. 14و شفا تاپمیش آدامین اونلارلا دوردوغونو گؤرنده جاواب ورمه‌یه هچ بئر سؤزلری قالمادی. 15اونلارا امر اتدئلر کی، مئلّت شوراسیندان اشئیه چیخسینلار و اؤز آرالاریندا مصلحتله‌شئب، 16ددئلر: «بو آداملارلا نه اِدَک؟ چونکی اونلارین آچیق-آشکار بئر علامت گؤرستدئکلری بوتون اورشلئمده یاشایانلارا بلّی‌دئر و بونو ائنکار اده بئلمه‌رئک. 17لاکئن بو خبرئن خالق آراسیندا داها چوخ یاییلماماسینا گؤره، گلئن اونلارا ائخطار ورک کی، بو آدلا آرتیق هچ کسه بئر سؤز دانیشماسینلار.»
18و اونلاری چاغیریب امر اتدئلر کی، عئسانین آدیندا اصلا نه دانیشسینلار، نه ده تعلئم ورسئنلر.
19آمّا پطروس و یوحنّا جاواب ورئب اونلارا ددئلر: «سئز اؤزونوز قضاوت ادئن؛ آیا تارینین حوضوروندا، بو، صحئحدئر کی، بئز سئزدن تاریدان داها چوخ ائطاعت ادک؟ 20چونکی بئز اِده بئلمه‌رئک کی، اشئتدئکلرئمئز و گؤردوکلرئمئز شیلرئن حاقّیندا دانیشمایاق.»
21اونلار خالق اوزوندن پطروس و یوحنّانی داها چوخ تهدئد ادندن سونرا بوراخدیلار، (اونلاری جزالاندیرماق اوچون بئر بهانه تاپا بئلمه‌دئلر) چونکی بوتون خالق باش ورمئش ائشه گؤره تارییا حمد ادئردی. 22اونا گؤره کی، شفا تاپمیش آدامین یاشی قیرخی کچمئشدی.
23اونلار آزاد اولاندان سونرا، اؤز یولداشلارینین یانینا گتدئلر و باش کاهئنلر و آغساقّاللارین بوتون ددئکلرئنی اونلارا خبر وردئلر. 24بونو اشئدن زامان، اونلار بئرلئکده سسلرئنی تارییا طرف قالدیریب ددئلر: «هر شیه قادئر رب! گؤیو، یری، دهنزی، و بوتون اونلاردا اولانلاری یارادان سنسن کی، 25موقدّس روحون واسئطه‌سی‌ائله اؤز قولون آتامیز داوودون آغزی ائله ددئن:
”نه اوچون مئلّتلر قایناشیرلار
و خالقلار باطئل فئکئرله‌شئرلر؟
26دونیانین پادشاهلاری قالخیرلار،
امئرلر بئربئری ائله ربّئن ضئدّئنه،
و اونون مسح اتدئیئنئن ضئدّئنه مصلحتله‌شئرلر؟“#4:26 مزمور ۲:۱ و ۲
27دوغرودان دا سنئن موقدّس قولون عئسا مسئحئن ضئدّئنه کی، سن اونو مسح ادئبسن، هم هئرود، هم ده پونطئیوس پئلاط، قیری‌یهودئلر و ائسرایئل خالقی ائله بو شهرده بئر یره ییغیلدیلار کی، 28سنئن اَلئنئن، و هدفئنئن اوّلدن موقدّر اتدئیئنئن هامیسینی یرئنه یتئرسئنلر. 29و ائندی، یارب، اونلارین تهدئدلرئنه باخ و اؤز قوللارینا باغیشلا کی، سنئن سؤزونو کامئل جسارتله دانیشسینلار. 30و الئنی اوزات کی، سنئن موقدّس قولون عئسانین آدینین واسئطه‌سی‌ائله شفا، علامتلر و عجایئبلر باش ورسئن.»
31اونلارین دوعاسیندان سونرا، اولدوقلاری یر لرزه‌یه گلدی و اونلارین هامیسی موقدّس روحلا دولوب، تارینین سؤزونو جسارتله دانیشماغا باشلادیلار.
ائمانلی‌لار هر شیلرئنی پایلاشیرلار
32و ائمان گتئرنلرئن جمئنئن بئر اورَک و بئر جانی وار ائدی؛ هچ بئری اؤزونون اولان هچ بئر شیی اؤزونونکو بئلمئردی. چونکی هر شی اونلار اوچون هامییا عایید ائدی. 33و حوارئلر بؤیوک بئر قووّتله رب عئسانین دئرئلمه‌سئنه شهادت ورئردئلر و اونلارین هامیسینین اوستونده بؤیوک بئر فیض وار ائدی. 34اونلارین آرالاریندا مؤحتاج بئر آدام یوخ ائدی، اونا گؤره کی، مولکلر و اِولر صاحئبی اولانلار، اونلاری ساتیردیلار و ساتیلمیش شیلرئن پولونو گتئرئب 35حوارئلرئن آیاقلارینا قویوردولار؛ و هر کسه اؤز احتئیاجینا گؤره پایلانیردی. 36قئبرئسده آنادان اولموش لاوئلی یوسئف ده کی، حوارئلر اونو بارنابا چاغیریردیلار (معناسی؛ تشوئق اوغلو) 37مالئک اولدوغو یری ساتدی و پولونو گتئرئب حوارئلرئن آیاقلارینا قویدو.
انتخاب شده:
حوارئلر 4: موقدس کتاب
های‌لایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Elam Ministries 2013. All rights reserved.
